ዘውዴ በካሉ
አማኻሪ ክልሉ ግብርኒው ቢሩ ግብርኒኩ ግብአትካዋስታ ጌፄሩ ፋይናንሱ ዲግስጝጚው ዳይርክቶሬት ሙሽራ ሲሳይ 2016/17 ምርቱ ዝቤንዳ አሬሳቻንትካስ ግብአቶ ዲግስጝስ እንፃኽስቴካማጊ አኽⶓ ዙሜካ::
ምንግስት ፌይኹ አሜትዳ ፌትርስትኹ ችግር ካቢስታቲታ ትኩቶ እይካማ እንፃኽስትⶓ ጉሽካ:: ግብርኒው ቢሩ ኽብፂው ማዳባሪዴስ ድምክና እሊኩሳ ግብአትካዋኪላ አሬሳቻንትካስ ዲግሳው አኽⶓኽ ዙሜካ::
2016/17 ምርቱ ዝቤንዳ 8 ሚሊዮን 57 ሻይ 900 ኩንታል ማዳባሬ አማኻሪ ክልልስ ፌኬድⶓ ጌሌፅካ:: ንⶓ እሊኩ አሜትካዴስ ሊሊትንኹ ዳድስ እምቢት ናማ ግብአቶ ዲግስⶓስታ ሚንቺትስኪላ ኬሽኹ አኽⶓኽ ዙሙኑ:: 2016/17 ምርቱ ዝቤን ፌይንኩ አሜትካሊ ካንትስታኒ ላጛ ትኩሚ ላጜታ ሚሊዮን ኩንታል ግብአት ድምክኒ ዝኩⶓ አቕፄካ:: ፌይንኩ አሜትካዳ ቴሳስ አሊዲዳ ጄሜራማ ግብአቶ ዲግⶓ አቕፁንኩ ዳይሬክተር ንጙዊኒ አሜትስ ትክምቲ 2016 ም.አሜት ኪንዲዳ ጄሜራማ ዲግⶓኽ ዙሙኑ::
ክልልስ ፌኬድስትኹ ማዳባሪዴስ 4 ትኩሚ 1 ሚሊዮን ኩንታል ያኻው ጂቡቲ ወደቦ ታምብⶓኪላ አቕፄካ:: ጂቡቲ ወደቦ ታምብኹ ማዳባሪ እክድዴስ ሊኽዴስ 51 ታፋ አኽⶓ ዳይሬክተራ ጌሌፅካ:: ሹኻ ትኩሚ ሴዛ ሚሊዮን አኹኪ እክድዴስ ሊኽዴስ 43 ታፋ ያኻው ዴሜካ ክልልሾ ቱዋኽ::
ግብአት ጄሜርስትኹ ልክስ እንፅኺ አኮሜችስቱኒጊ እንዴስ ጃላ ሳኪትጛው እሺኹ አኽⶓ ጉሹንኩ ዳይሬክተራ ክልልዳ ዝኩኹ ፄትቲው ችግር ግብአቱሳ ዲግስጝጜ እንግራ ይጉፅⶓ ጌሌፅካ:: ማዳባሬ ቻኔካማ ይንታንኩ እንዝርናንትካ ብቲ ብታዳ ቲሪⶓኪላ ጌሌፅካ:: ፄትቲው ችግር እምቢት ናማ ግብአቶ ዲግስጝስ ፅንጋኻ አኽⶓኪላ ዳይሬክተር ሙሸራ ሲሳይ ዙሜካ::
እምፕል ትኩሚ ሹኻ ሚሊዮን ኩንታል አሬሳቻንትካስ ቤንስትⶓ ዳይሬክተራ ዙሜካ:: ወክትዳ ግብአቶ አሬሳቻንትካስ ቤንጝፃንታ ቢሩ እሳንስ እንፅኼ እንፃኽስታማጊ አኽⶓኪላ ዙሜካ:: ሹኻ ዞንካስ ግብአቱ ታምብስታንት ዜርቕቲኒ አኽⶓ ዙሙንኩ ዳይሬክተር ሹኻ ዞንካዳ ግብአቱሳ ዲግስጝጜ ታምብፅጝስ ትኩትስ እንፃኽስታማጊ አኽⶓ እርዳትፅካ:: ጌርክስ 223ዋኺስታ እንዝርናንትካ ጅቡቲው ወዴብዳ ቻኔካማ አማኻሪ ክልልሾ ቱዌካማጊ አኽⶓኽ ጌሌፁኑ::
ዜሬቕቲኒ ቻኒስትኾ እስታው 58 እንዝርናንቲ አኽጝኪላ ጌሌፅታ:: ወክትስ እንፅኼ አሌድጝስ ጌርክስ 121 መኪናዋ ቻኒፅጝስ ክልልሾ ሚፅጝ ቱስቴኽ እስትኹ:: ሚንች ችግር ፌትርስታውላስ ማዳባሪው ዲግስጝጜ ክልልሾ ወክትስ ሚፅጝስ እንፃኽስትካማጊ አኽⶓኪላ ዳሬክተራ ጌሌፅካ::
አማኻሪ ክልሉ ግብርኒ ቢሩ ትክትሊ አላፊ ካልኪዳን ሸፈራው አቒው አይል ሚዲቢኒ እንፅኺዳ ትኩቶ ፄዋታስታ ግብርኒው እንፅኺ ዴጌፍስታታ እንፃኽስትⶓ ጌሌፅካ::
ፌይኹ ምርቱ ጊዝዳ ፌትርስትኹ አይሩ እግልታው ኪሲስታ ኹዋንቲ ሴብሎ ባስኹ ጉዳትዳ ታምፃቲንታ ካላካልጚስ ካሊⶓ ዙሜካ:: እንፅኺስ ፅንጋኻ ያኹንኩ ችግርካዋ ክችስጝስ ኬሽኹ ምርት አሜርትስታታ ፅሬት ፄውስትⶓ ትክትሊ አላፊ ጌሌፅካ:: ክልልዳ ፌቴርስትኹ ፄትቲው ችግርስ እንፃኽስታማ ካንትፅጙስ እንፅኽካ እንፃኽስታንኩ አብትካ ካፅስትⶓ ዙሜካ:: ግብርኒ ኬፍ ንጝስታ ዜርቕንጝ፣ ሰላምስታ ኩስጚ አሳብ ፋይፄ ኑንኩ ትክትሊ አላፊ ፄትቲው ችግር ሚዲቢኒ እንፅኺዳ ፅንጋኻ ያኻማ እጂⶓኽ ጌሌፁኑ:: ናካ ዝኩኹ ግብርኒው ግብአትስ ቴክኖሎጂ ፋይፃው አኽⶓኪላ ዙማካ::
ሰላሞ አቲⶓ ችግር እንፅኼ እንፃኽስታቲንታ ፅንጋኻ አኽⶓ ጉሽካ:: ፍትሬትስ፣ አቓ ግብሪ ችግርስ፣ ኩስጚውሳ አሳቦ ቴግባራዋ ፄዋውላ ይጉጝስስታ ግብአቱ ዲግስጝጚው ችግሮስታ ምርት እንፂⶓ ጉሽንኩ ትክትሊ አላፊ እንሳ ኬሽጝፃው ዳድስ እንፃኽስታማጊ አኽⶓ ጌሌፅካ::
ኢንዱስትርካ ፋያኑሳ ግብአቶ ዋኽትጝፅጝስ፣ ምግብስ ጛሬ ካሊጝስስታ ባርኾቼው ጌቤልስ ዲጋንኩ ምርትካዳ ትኩት እይስታማ እንፃኽስታውያኽ እስትኾ:: ክልል ኽሳንቲ አክም ዝኩኹስታ አጌርስ ኽሳንቲ ታምብ ዝኩኹ አኽⶓ ትክትሊ አላፊ ጌሌፅካ:: ችግርስታ ይሴንካ እንፅኽካዋ ጐሌላማ ምርቶስታ ምርታምቶ ሌጌፅጝስ እንፃኽስታማጊ አኽጝ ጌሌፅስታ::
ፌይኹ አሜትዴስ ኬሽኹሳ ምርቶ አግፅጝስ እንፃኽስታው አኽⶓኪላ ቶኬምካ:: ምስሊስ አሬስⶓ እሳንስ እንፃኽስትጝስ ምርትስስታ ምርታምትስ ኬፍቲኒ ታምብ ዝኩኹ አኽⶓኽ ጌሌፁኒ ትክትሊ አላፊ:: አሜትስ አሬስስታው ብቲ ሊኽዴስ 48 ያኻው ብቲ ምስሊስ አሬስስትጝስ አኬድስትⶓኪላ ጉሽካ::
ክልል 30ዴስ ጃላ ሴብሎ አሜሬትጝስ ካላው አኽⶓኪላ አቕፄካ:: ቹዋ ቹዋ ሴብልካዋ አሜሬትጝስ፣ ምስሊስ አሬስⶓ ቴግባራዋ ፄውጝስ አሬባሬብጜ ፄውስታማጊ አኽⶓ ትክትሊ አላፊ ጌሌፅካ:: አማኻሪ ክልል ፌያንኩ አሜትካዳ ሜካናይዜሽኑስታ ዜሮ ዲግስጙ ችግር እሺኹ አኽⶓ ዙሜካማ ኬሽኹሳ ኪሴ አግጝስ ሜካናይዜሽኖ ቴኬምስትጝዳ ትኩት እይስትⶓ ትክትሊ አላፊ ጌሌፅካ::
ምርቶስታ ምርታምቶ ሌጌፅጝስስታ አቒውሳ ግርቦ ባኬናቲታ ኔኬትጝስ ሜካናይዜሽንዳ ትኩት ፄውስታዌኽ እስትኹ:: ዜሮ ሚንቺስጙ እንፅኺ እንፃኽስታማጊ አኽⶓኪላ ዙሜካ:: አሬሳቻንትካ ኬሽኹሳ ምርቶ አሜሬትጝስ ይጉኹሳ ጊዞ ልማትዳ ትኩታ ፄዋንታ ትክትሊ ቢሩ አላፊ ካሲካ::