እን አጌራ አብቶ ፄታስኪስ ድኽት ሜኬሬ ካንፅፃውሻት አኽⶓ አሌምጊ ያቑኽ ዲቢያኽ:: እሳ አብቶ ቱስቲስ ቲኪምስቴታ ሌጌሳቲታስታ ድኽትዴስ ፋቲታ ዴሜካ ፅላትካ ዙሬ ኬቤብካማ ፄውታው ልቕልቕቲዳጊ አⶓ ቴኬላኒስ ሴጝካ::
እንኪላ ላምቡ ጌውስታያሱ ዲብ ያኻማኽ አግስታው:: ኽታዋዴስ ጉሽፃማ እምፕላ ሼውትናና ልግስስ እንፃኽስትናቲታ እኑስ እኖ እጝትጝፃንስስታ ዴሬትንኹሳ ፄጌርናኒ ዴሜካ ዎሬሞ አጌፍካማ ሴባኒስ ካንትስትጝ ላንቡሳ ሲፉታኽ:: ድንቤሮ ካያማ ሴብጝስ ጅፊስታኒኪ ዎሌን አጌርካዋ ጁትጝፃኒስስታ ዶንጌትፅካማ ሴብፃኒስ እጂካ:: ናካኪላ ፉሬካያ:: እንስኪላ ፅላትካ ፅኪኒ ፌሬስናታስታ ድጙትጝናታ ዴሬትካችኹኒ ላምቡ ዴፌርስታቲት አጌራዋ ሲፍፅጝስ ካሊና:: እንቹ እንታሊ አሬኬብፁኑሳ ይሴንቶ ኬፄልፅና:: ዝኩኹዴስ አብትዴስጊ እን አጌራ ይቶፒያዋ ቴኬማውላ ዝቤንዴስ ዝቤኖ ችግርዳ ድርብጝስ አባዊ ብን ኽሳንቲ አቾ እሜ:: አባዊ ኽብፄ ፄሬሬጋማ ባርኾቼ አሴብጝዴስ ኽቴ እንአጌራ ሴብስቲስ ሴጝትኹ ጚውዳ ጁኽሲያኽ:: ናካ ኩፅኒ እንታሪክ ያኻማጊያኽ:: አባዊ ታፎ እምስታኽ::
ይጋ! አባዊ ታፎ አምፓ ጉሻማ ይቶፒያንካው እምፕልትስ ቼውስታ:: ጚቹሳ አጌሌጌልጝስ ሼዎ አግፃ:: አኒኮ ሜጋቢት 24/2003 ም.አ አባዌ ዴዴካማ ኤሌክትሪክ አይላው ፍልቕፂ ያኻታ ስሩው ካርጝ እንኩርስቱኒዴስ ጉሽፃማ እኑው ግርብስስታ ጌንዜብስ ግቢስታማጊ አሊዲዳ ታምባ::
“ቑፂ እምፕልታኒ ስቬቶ ዱንፄ” ናኒስታ ድኻድኻ አኽናችኹኑኒ ታፎስታ ሼው እምፕልስናና አባዌ ቼውጝስ ቢኪና:: እንቹ እንታሊውሳ ይሴንቶኪላ ሜሴኬርፅና:: እንኪላ ግርቦ አግፅናና እሊውሳ ዴዴኮ ግቢትናታ ጁትጝፃው ያኻማ አግስቴ:: እንዴስ ፍና ግብፅስ እሽስታሺንኩ አጌርካስታ ኾትካ ልግስስ ያኻውሳ ጉሼ አግፅናቲታ ፅንጋኼ ኬኼራሺኑ ዲብጊ ናካ ኽይስታ::
እንዴስ ጌና አባዊ እሊውሳ አባዌ ዴዴክጝስ ካሊፃውሳ ግርቦ አግፅናታ ፄዋ:: እን ይቢቺ ጋቲዊያኽ:: አባዊዳ ኽሳንት አቓ ግብሪ አይክ ፌቴርስታማ 120 ኪሎግራሞ ሜዜናውሳ አሴጊ ሩብፅጝስ ካሊፃ:: “አብትዳ አብቶ ዴሜካይምኽ” ኑኑ ድቕር ቴግባርስ ካንትስታ::