“ ምንግስት እዝቡሳ ክልኾ እምቢታ ቹኒታማ ታምባውላ ይጉጝስ ሚንች ጉዳት ታምባማጊኽ አካኮ አርጃ ኬቤሊው ዝኩዋንትካ

ሰለሞን ስንታየሁ

አማኻሪ ክልልዳ ኬሴትስትኹ ፄትቲው ችግር ፅካ አርፋሳ ቼፍፃ። አዊ ብሄረሰቡ ቺፅጝፂዳኪላ ሚንችካ ዙራሙርካዳ ፅንፊኒ ኬች ታምፃውሻው ፅካትስ ዙራሙሬ ባይፅካማ ችግርዳ እቱንኩ እምፕልታቑ ቼፍ ሚንቻማጊ አግስቴ::

እንዴስ ድምክና ዳማሱኪ ፖለቲካው ቴሳትፉ እላቲንኩ ሰላማውካ እምፕልታቑ ቤንካዋ ኩጝ፣አብቶስታ ንብሬቶ ዜሬፍጝ እሳንስ እን ድፂውስታ ሰላሙ ፄር ያኹኽ ፅንፊኒ ኬች ፌፄማውሻኩ ቴግባርካኽ::

ስንብቶ አዊ ብሄረሰቡ ቺፅጝፂዳ አግስታንኩ ወረድካ ክቻዴስ ዚጋሚ ወረዳዳ አካኮ አርጃ ኬቤሊዳ ፅንፊኒ ኬች ታምፅኹ ቤዴል ታሪክስ ይጉዌን እስታቲዌኽ::

ቤዴራ አኺቲ (ጎኻ) ኬቴማዋ ዋኽስ ዋኾ ድንጙፅጝዴስ ፌይኹስ አብት ንብሬቶ ዜሬፍጝ ዜኔግስታቲውሳ ፅካቶ ታምፃ:: ታምብኹሳ ችግሮ ስታ ፌፄምስትኹሳ ችካኖ ቴግባሮ ካንትኹስ አውጚው ቴርት ቤና ኬቤሊኩ ዝኩዋንትካሊስታ ጉዳይ ካንታኩ አካልካሊ ስልኪስ እጂጜ ፄውና:: አቶ ገረመ ዘለከ ስታ አቶ ዳኛው መላኩ እስታና አካኮ አርጃ ኬቤሊው ዝኩዋንትካኽ::ኬቤሊዳ እዝቡ ባላንጋሪ ያኹኽ ፅንፊኒ ኬች ፌፄምኹሳ ግፎ ካንትኹስ ሲንቲ ላሌቕኹ እንኮኽስትስ ጊሌፁኑውስታጊ ዙራሙሬ ኬቤቤጝስ ይዝኩዌ ሜሳሬ ቴኬምስትጝስ ጉዴቶ ታምፃ ንካ። ጋያኪ ዲሽካዋ፣ ብሬኖ፣ ስናይፐሮስታ እሊኩሳጊ ቴኬምስትጝስ እዝብ ታክሳውላስ ዙራሙሪዳ ፅካቶ ታምፃኽ ኑኑ::

ፅንፊኒ ኬች ታክሳያሱ እዝብዳ ይዝኩዌ ሜሳሬ ቶኬሳኒ ዙራሙሪው እዝብ ልኩ ፍሻዋ ካዌናኻስታ ፅንፌንካ ቤፍቱኑ ብቲሾ ካስጝስ ታስስትጝስታ ጉዲስትጝስ ካሌካኽ ኑኑ:: ፅንፊኒ ኬች ፌፄምኹ ፅካትስ ጛኾሳ ዴሜካማ 380ዴስ 400 ሊኻ ያኻው ጝን ዝኩኹ ንብሬትሊ ዋኽስ ዋኾ ሌግስ ድንጙስትኹ አኽⶓ ዙሙንኩ አካኮ አርጃው ኬቤሊው ዝኩዋንትካ ጝናኻዴስ ፊጝስ ካላቲንኩ አክማ ጋንኩ ሹማጌል፣ ካሜንካ ቹትካስታ ስራስሪ ጝናኻዳ ድጙስታንታ ፄዉስታ ንካ::

ሚንችካ እምፕልታቑ ይዎት ድስጞ ዙሜካ::እንዴስ ድምክና ካዌንዴስ አግፁንኩሳ እንሴስካዋጊ እሽታኻሳማ (ዜሬፋኻሳማ) ካፅⶓ አቶ ገረመስታ ዳኛው ዙሜካ። አሬሳቻንትካ አሜሬቱኑሳ ምርቶ ሰላሙ ችግርስ ጌቤላ ፍሽካማ ዋይካያስኩ አኽጞ ዙሙንኩ ዝኩዋንትካ ቤርቤሮ ዴሜካማ እሊኩሳ ምርትካዋ ጝን ቺፋ 100ዴስ 300 ኩንታሎኺስታ ሌግስ ድንጙስትⶓ ድኹዌካ።

ዝኩዋንትካው ካንቲታ እን ድፂው ቴግባር እዝብ ምርኪስ ድንጙስታታ ፌፄሙኑዌኽ ንካ። ፅንፊኒ ኬች እንዴስ ቤዴራ አዮ ጉዋጉሲ ወረዳዳ አምቢሊ ኬቴማዋ ስታ ዚጋሚ ወረዳዳ አኺቲ (ጎኻ) ኬቴምዋ ዋኽስ ዋኾ ሌግስ ድንጙፅጝ፣ዜሬፍጝ ስታ አቑሳ ይዎቶ ድፅⶓ ታክስካማ ዝኩዋንትካ ስንብቶ ጛው ዙራሙሪዳ ፌፄምኹ ፅካትኪላ ዙራሙሬ ዌሬርጝስ ታክስⶓ ካንትፃዌኽ ንካ:: ናኪኒ ወክትስ አካኮ አርጃ ኬቤሊዳ ፅንፊኒስታ ዜሬፋንቲ ኬች ታምፅኹ ፅካትስ እንኩዊኒ ጝንዳ እሺንኩ እምፕልታቑ ቤንካ ልኩ ፍሻዋ ፊጝስ ካዌናኻዳ አንቼንቴ አቲጝስ ማልጜ ቺጊርፂ አኺኒዳ አግስታንኩ አኽጞ ቶኬምካ። ኹዋኑሳ፣ዝቃኑሳስታ ሴያኑሳ አቲጝስ አዊስታ እኹሚስ ታስስትካማጊ ዝኩንኩ አኽⶓ ዙሙንኩ አቶ ገረመስታ ዳኛው ጉዳይ ካንታኩ አካልካ ፋይፃውሳጊ እርዳቴ ፄዋካያንታ ካሲካ:: ምንግስት እዝቡሳ ክልኾ ቹኒታማ እምቢታ ታምባውላ ይጉጝስ ሚንች ጉዳት ታምባማጊ አኽጝስ ፍንሾስኪላ ይስጙኹሳ ሲፋሲፍጜስታ እርምጄ ካፃያንታ ታክስፅካ::

ዚጋሚ ወረዳው ሰለሙስታ ዴክቱ ፅፌት ጝናሱ አላፊ አቶ ዳግማየሁ ተሻለ ጛሾስ ፅንፊኒስታ ድፂው ኬች ዜጋሚ ወረዳዳ ስንብቶ አኺቲ ኬቤሊዳ ጎኻ ኬቴምዳስታ አካኮ አርጃ ኬቤሊዳ ታምፅኹ ፅካትስታ ጉዳት ማልጜ ኬፍቲኒ አኽⶓ ጌሌፅካ:: ዚጋሚዳ ሰላም ቼሜትጛታ ፄውጝስ ቤዴራ ጄሜራማ ይስጙኹ እንፅኼ አኮሜችስታችኹኒውላ ስንብቶ ፌፄምኹ ፅካት ኩፂ እን ባላንጋሪ ኬች ቤዴራማ ሚንችካ ዙራሙርካዴስ ኩፓማ ይንትⶓ ካንትፃዊኽ ንካ::

እን ድፂው ኬች ዙራሙሪዳ ፅካቶ ፌፄምጝስ ሚንቾ ይዝኩዌ ሜሳሬኺስታ ቴኬምስትⶓ ዙሙንኩ አቶ ዳግማየሁ፤ወረዳው ፄትቲው አይልስታ እዝብ ሜስዋቴ ኬይⶓ ዙሜካ:: ባላንጋሪው ኬች ዙራሙሬ ድንጙፅጝስታ እዝቦ ፌኔኬልጝፅጝስ ብቴ ዌሬርጝስ አኬዳማ ይንቱኹ አኽጝስ ወረዳው ምንግስት ካላካልጝስ ዝኩኹሳጊ አክሞ ቴኬምስታውሻው ያኼስጉ ወረዳው ምንግስቱስታ እዝቡ አክምዴስ ጃላ አኺኒስ አጉዊኒ ምንግስት ወረዳዋ እርዳታታኪላ አቶ ዳግማየሁ ካሲካ:: ወረዳታ ፄትቲው ችግር እን ፅንፊኒ ኬችስ ባፃባፅስታቲታ ኩፂ ዙራሙሬ አቺትጛካማ ማንዳንታ ፄውስታማጊ አኽⶓ ቶኬሙንኩ ፅፌት ጝናሱ አላፊ አጉዊኒ ምንግስት ፄትቲው አይልስ ያኻውሳ ግባቶ ስታ ሬሽኖ ዲግሳያታ ቶኬምካ:: አካኮ አርጃዳ ባላንጋሪው ኬች ፌፄምኹ ፅካትስ ሚንች ጝን ሌግስ ፃያ፣አሊቢ ድጙስታ፣ እንሴስካዋጊ እሽታማ ካፅኹ አኽⶓ ዲብሱንኩ አቶ ዳግማየሁ፤እን እዝብ ናኪኒ ወክትስ ታፎ ናኺሲ አኽⶓ ዙሜካ:: ፌቴርስትኹ ኬፍቲኒ ችግሩ ምክኒያቲስ ፌኔኬልጙንኩ እምፕልታቑ ቤንካስ እሌትስ ያኻውሳ እርዳቴ ካንትኹስ ወረዳታ ዙሚትጚ ፄውስታችኹኒውላ እን አብን ቴርቴምባኺስቴ ኩፂ ዲጋይኹ እርዳቲ እላቲው አኽⶓ ቶኬምካ::

ወረዳታ ፅንፊኒ ኬች ኬቴምካዋ ድፅጝስ ታክሳማ ልቕልቕናውሻው አኽጝስ ውላጊ እዝብ ፄትቲው አካልካሊ ኬምፕዳ ያኻማ ዙራሙሬ ይስጙኹ ዳድስ ሮንዶ ማንዳንታ አቶ ዳግማየሁ ተሻለ ታክስፅካ::