ድርባው ቑንዚ

ሙሉ ስሜነህ

ድርባው ቑንዚ (ባይሪ) ነርቭ ችግራኻዳ ቱዋኒ ካቢትጚስ አካላትዳ ትራኹጝ፣ ቱንችካ ይሴካማ አፄፍስታላ ቤቴርስታላ ንⶓ ሲፍፃው ቑንዚያኽ:: ነርብ ባፃባፅስትⶓ ጄሜሩስ እንኮኽስቱ ሴልካዳ ኪሲ ኬሴትስቴ:: እን ኪላ ያኻው አንኮላኻዳ አግስታው ሴልካዉ ቤንጚ ዴዴጝ ጊዝስ ባፃባፅስታዉ  አኽጝስያኽ:: እምፕል አቒዳ ድርባው ቑንዚ ዝኮ እስታማ ወሴንስታው ነርቩ ባፃባፅስትጝ እንፁኒ ላጚኒስታ አንዴስ ጃላ ካቢትጚስ ኬሴትስታኒያኽ::

ድርባው ቑንዚ ዜሮ፣ እድሜ ጐሌላውላ ውላ አቒዳ ኬሴትስቴ:: ድርባው ቑንዚ እሳንስ ስራስሪዳ፣ ኹንዳስታ ሹማጌልካዳ ኬሴትስታው ያኹስ ዋሺኒዳኪ እድሚው ክልልዳ ኬሴትስትጝስ ካሌ:: አካላት ትራኹⶓ ጄሜሩታ አንኩሌ ዜኔግጝ፣ ቱንችካ ዴሬትጝ፣ ሴግዳ ሴግዳ ፊኹጝ፣ ቻኺ እምቢት እምቢት ናማ ታምብጝስታ ፄጌርጙንኩ ምልኻትካ ካንትስታና:: እኒ ምልኻትካ እምፕልዴስ ሹኻ ደኪካዋኺስታ እጂጝስ ካላና:: እንዴስ ሲፍፅጝስ ትራኹዋሺኹ አቒ ዝኩኹሳ ስፍሬ ማሊⶓ አቲጙ እንኮኽስት ዝኩጝስ ካሌ::

ድርባውሳ ቑንዜ ካንትኹስ አውጚው ቴርት ቤና አዊ ብሄረሰብ ቺፅጝፂዳ አገው ግምጃቤት አባላምቲ አች ሆስፒታልዳ ቲኑ ውማይቲኒሊ እጂጜ ፄውኽሳ አንቤብፅጝስ ፋኑኻ::

ቺርቤዋ፡- ስሞ አቕትጝፃን?

ዶክተር ዮናታን፡- ዶክተር ዮናታን መኮነን እስቴ:: አገው ግምጃቤት ትክላሊ አባላምቲ አች ሆስፒታልደ ትክላሊ አኪምያኽ::

ቺርቤዋ፡- ድርባው ቑንዚ ኻኺሪስ ይንታው ቑንዚያኽ እስታማ እምፕልታቑላዳ አምንስታው አኺኒ ዝኮ አንታ ድርባውሳ ቑንዜ ዋታይ ጌሌፅስቴ?

ዶ/ር ዮናታን፡- ድርባው ቑንዚ ንጝ አካላቱ ቤን ያኹኽዳ አንኮሊዳ አኹኪ ኒዉሮንካዳ እምፕል አይኔት አኹኪ ሜንች አይኔት ምልኻት እምፕላኒስ ካንትስታኒ ኤሌክትሪካል ዲስቻርጅ እስታው ዲብ ዝኮ፤ እንጚስ ዴሜካ እንፅኼንት ፌያፌይጜ:: እምፕል አይኔት አኹኪ ሚንች አይኔት ዲስቻርጅ እምፕልዳ እምፕላኒስ ሜንች እንፅኼንት ፌያፌይጛው ጊዛይ እኖጂሱ አካላት ዙርሜ እዬ:: ዙርሜ እያው ትራኹፅጝስ አኽጝስ ካሌ፤ እን እምፕላኒሱ ትራኹዊ አሱ ትራኹዋ አኹኪ ውን ትራኹዋ አኽጝስ ካሌ፣ እሊው ምክንያቲ ዝኩኽ አኽጝስ ካሌ፣ ዙራማ አንትጙ እድልኪላ ሜንች አኽጝስ ካሌ፣ እኒዴስጊ ዙራማ እሊውስ ጌርክስ ንጝኪ ሶኼትስ፣ ላጛ ሶኼትስ፣ አርፊስ ኬሴትስታው ያኹስ እንሳ አቾ ታምቡታ ድርባው ቑንዚ እስታማ እቑስቴ::

ቺርቤዋ፡-  ድርባው ቑንዚ ኬሴትስትጝስ ካላው እንዳራ ጉሽፃ ፄውጝሲ?

ዶ/ር ዮናታን፡- ሜንች አይኔትካ ጉሽፅካ ዝኩና:: ምሳሊስ አንኩሊው ፍትሬትዴስ ጄሜራማ ዳንጉዊትጚ ዝኩኒጊ እንጚ እምፕል አይኔት ጉሽፂያኽ:: ላጛንቲ ዴሜካ አንኮሊዳ ብሪው እንፂጝ አኹኪ ብሪው ክቢጝ ቹዋ ጉሽፅካኽ ፣ ሳቔናዋ አቲጝስታ ፄጌርጙንኩ ዲብካጊ እን ቑንዚስ ጉሽፅካ አኽጝስ ካላና:: ዲብኩፂ እኒ ጉሽፅካ እክምኔ አግፁኒጊ ኬሽጝስ ካላና:: ሶኼትቺፋ ካቢትጛማጊ ይንታው ያኹኒጊ አይሊኒ ድርባው ቑንዚ አኽጝስ እኒ ጉሽፃ ፄውጝስ ካላንኩ ዲብካዴስ ቴንኬክስትጝ ፋይፄ::

ቺርቤዋ፡- ቑንዚ ኬሴትስትጝዴስ ፍና ቑንዚስ እምስትናኻ አኽⶓ ማሊጝስ ካሊናው ዳድ ዝኮማ?

ዶ/ር ዮናታን፡- ቑንዚ ኬሴትስትጝዴስ ፍና ደኪካዋኪ ያኻ ሰኮንዶ ቤዴራማ ኬሴትስትጝስ ካላንኩ ዲብካ አውራ (ቹዋ) እስታንኩ ዝኩና:: አውራ እስታንኩ ዲብካ ትራኹፅጝ ኬሴትስትጝዴስ ፍና ቑንዳስታንቲስ ካንትስታንኩ ምልኻትካ፥ እልዳ ድሚ ዙርጝ፣ ሜብራቶ ፄጌራው ዲብ ካንትስትጝ አኽጝስ ካሌ፣ ሊሊትንኹ ኽሪኪላ ኻሪጝስ ካሌ እኒ ዲብካ ቑንዳስታንቲስ ካንትስትጝስ ካላና:: ያኼስጉ እሊው አብራ  ዝኩኽ አቒስ ካንትስትጝስ ካላላ:: ቑንዚ ኬሴትስትጝዴስ ቤዴራማ ኬሴትስትጝስ ካላንኩሳ ዲብካዋ ማሊጝስታ ትንካኬ ፄውጝ ፋይፄ::

ቺርቤዋ፡- እን ቑንዚስ ቹዋ ቹዋ ምልኻትካስ እንዳርካ እንዳርካይ?

ዶ/ር ዮናታን፡- ቑንዚ ኬሴትስቱክ አቕዳ ካንትስታንኩ ቹዋ ቹዋ ምልኻትካ፦ ታፎ ልኮ ይስፃማ ቤቴርጝስታ አፄፍጝ፣ እሎ ጃላ ጌሌቤትጝ፣ ፃⶓ ፍሽጝስታ ብስቔ ዴፌክጝኪላ ዝኩጝስ ካሌ::

ቺርቤዋ፡- እን ቑንዚ ኹንዳ እሳንስ ኬሴትስትጝስ ካሌ ናው ንባር ዝኮ:: አንታ ኹንዳ እሳንስ ኬሴትስትጝስ ካላው ምክንያቲ እንዳርማይ?

ዶ/ር ዮናታን፡- ኹንዳስታ ስራስሪዳ እሳንስ ኬሴትስትጙ እድል ኬፍቲኒያኽ፡ ስፒድሞሎጂስ (ፅናትስ) ፂኒስስታማ አግስትኹ ዲብ እላቲዉያኹ ኹና አኽጝስ አኹኪ ስራስሪ አኽጝስ ሊሊት ንኹ ዳድስ እምስታና ናው ፅናት ላንቡሳኺስታ እላኪ:: ፅናትስ ፂኒስስታማ እድሚው ክልል፣ ፆቲ፣ ዙራሙሪው አኹኒ ፂኒስስታማኽ እሳንስ ፂኪጝስ ካሌ ካላላ እስትጝስ ካላዉ::

ቺርቤዋ፡- ሜንችካ ንባርካ ድርባውሳ ቑንዜ ነርቩ ቑንዚሊ ፄጌርጝፃና እንታ እኒ ላጛ ቑንዝካዋ ዋታይ ካንቴን?

ዶ/ር ዮናታን፡- ድርባው ቑንዚ ያኻችኼስጉ ቹዋ ዲብ ነርብያኽ:: ነርቭዳ ሜቴንዴስ ጃላ እንፅኼንት ፌያፌይጙስ ያኽ ድርባው ቑንዚ ኬሴትስታው:: እምፕልታቕኪላ ሜንቾ ጊዞ ሜሴሴልፃና፤ ዲብ ኩፂ ነርቩ ቑንዚ ነርቭዳ ያኹስ ኬሴትስታው ድርባው ቑንዚ ዴሜካ አንኮላኻዳኽ  ኬሴትስታው:: ሌዋ  ፃንጌኻዳ አኹኪ ላንጊ አንኮሊ ቤንዳኽ ድርባው ቑንዚ ጁጝስ ካላው አቕ ዴስስ ነርቭ ናኑ አንጎልዴስ ሴጋ ያኹንኩሳ ነርቭካዋኽ:: ላንጊሱ ቑንዚስ ጉሽፂ እምፕል ያኹኒኪላ ልቓ ሊሊት ዝኩኽያኽ::

ቺርቤዋ፡- ምራማሪስታ እክምኒሳ እንዳራይ ፄጌሬ?

ዶ/ር ዮናታን፡- ምርማሪዴስ ጄሜርናኒ እን ቑንዚስ ጉሽፂ እንዳርማጚ? ናውሳ ዲቦ አባላምቲዳ ማሊጝ ቱስቴ:: ጉሽፂ ዝኩኽስ ቑንዚስ ላጛ አይኔትካ ምርማራካ ዝኩና:: እኒጛኪላ ኤሌክትሮ ኢንቴፍሎግራምስታ ሲቲስካን እስታንኩያኽ::

ሲቲስካን አንኮሊው ራጅ እስትጝስኪላ አቕስቴ:: እምፕል አቒ ትራኹፅጝ ኬሴትስያማ አኪም ጝናሾ ይንቱስ እንሳ ትራኹዌ ክችክቺ ድርባው ቑንዚማ ጋቲዊ እናና ማሊጝስ ቴኬምስትናው ምርማሪው አይኔት ኤሌክትሮ ኢንቴፍሎግራም እስቴ:: ሲቲስካን ምርማሪው አይኔት ዴሜካ አንኮሊዳ ድርባውሳ ቑንዜ ጉሽፅጝስ ካላንኩ ዝኩናማ ናውሳ ጐሌላማ ማሊፅጝስ ቴኬሜ:: ሲቲስካኑ ምርማሪ ማሊፅጝስ ካላኩ ችግርካ፦ አንኮሊውሳ ላኼንትⶓ (ኢንፌክሽን)፣ አንጎልዳ  ብሪ ክቢጝ (እንፂጝ)፣ ካንሰር፣ ፌቴርጙ ችግር /mal formation/ እኒ ችግርካዋ ማሊጝስ ቴኬሜ:: ድርባው ቑንዚስ ቹዋ እናኩ ምርማርካ ላጛ ያኹኒኪላ ትራኹፅጝ እሊው ቑንዚስኪላ ምልኻት አኽጝስ ካላው አኽጝስ እሊውሳ ትክላሌ ምርማሬ ፄውጝ ፋይፄ::

እንዴስ ጁናና ቹዋ እስታንኩ ምርማርካዋ ኺስቴ ምርማሪ ፄውስቴ:: ቑንዚ ምርማሪስ ታምብስቱኒዴስ ፋሌንጋ እክምኒ ፄውስቴ:: እክምኒ  ኪላ ስራስሪዴስ ኽሳንትካዋ ኺስቴ ጚዉሳ ካሉኽ ዝኮ:: እክምኒ ቑንዚው አይኔትታ እይስታው ያኹስ ድሜስታ ሼርቶ ካንታው ያኹስ እጆ  ቴኬምስትጝስ አኬምስታው ቑንዚያኽ::

ቺርቤዋ፡- እን ቑንዚሊ እምትጜካማ ይንታንኩ እሊኩ ቑንዝካ ዝኩናማ፣ እሊኩ ቑንዝካስ እምፅጙ እድል እንዳራይ ፄጌሬ?

ዶ/ር ዮናታን፡- ድርባውሳ ቑንዜ ጉሽፃ ፄውጝስ ቑንዳሲቲኒ ዴዴጝ ጊዙስታ ሊጊሲሚ ጊዙ ቑንዚው ችግርካስ ፂኪስትጝስ ካሌ:: ዴዴጝ ጊዙ እኑስ ምሳሊስ አቒ ትራኹስ ጚጛርትጛሳ ቤዴልጝስ ካሌ፣ እቲጝስ ካላው ድኪ ስፍሪዳ፤ ሌግዳ፣ ጋኺዳ፣ ካርጝዳ እቲጝስ ካላው አኽጝስ አንኮሌ፣ ታፎ፣ ልኮ፣ እሎ ታስስትጝስ ካሌ እን ዴዴጝ ጊዙ ችግርያኽ ትራኹፃው ዲብ ሚንቾ ጊዞ ኬሴትስታው ያኹኒጊ አንኮሌ ጉዲስትጝስ ካላና::

ሊጊሲሚ ጊዙ ችግር እኑስ ዴሜካ እጁሊ ታምትጙኽያኽ:: እሊውሳ አኽቲኔ አካሉሳ ቤኖ ቤዴልጝስ ካሌ፣ ጛሬ አግሌሌ፣ አንኮሊው ችግር ፌቴርስቴ፣ ጚጛርትጛሳ ቑንዳስቲኒታ ቼፍጝ፣ ቼኔክስትⶓ ሲፍፄ::

ቺርቤዋ፡- ቑንዚ ኬሴትስትጝዴስ ፍናስታ ኬሴትስቱኒዴስ ፋሌንጋ ዋትጜይ ካላካልጚስ ካሊናው?

ዶ/ር ዮናታን፡- ኬሴትስትጝዴስ ፍና ጉሽፅካዋ አኬምጝ፣ ጉሽፅካ አኽጝስ ካላንኩ ዲብካዴስ ቤዴራማ ቴንኬክስትጝ ምሳሊስ ስራስሪዳ ኬሴትስቱኒጊ አካላቱ እንኩዊንት ዴሜኩታ እን ዲብ ኬሴትስትጝስ ካላው አኽጝስ እንኩዊንት ዴሜካቲታ ካላካልጝጝ ፋይፄ::  ኬሴት ታምባማ አንኮሊዳ ችግር ታምባቲታ ካላካልጝጝ፣ ብሪው ሺንኪት ዴሜካቲታ ቼፍጝጝ፣ እኒ ዳድካዋ ቴኬምስትጝ ጉሽፂ ዝኩኹሳ ቑንዚ ኬሴትስትጝዴስ ቤዴራ ካላካልጚስ ካሊስቴ::

ጉሽፂ እላቲውሳ ቑንዜ ኩፂ ኬሴትስቱኒዴሰ ፋሌንጋኽ ካላካልጚስ ካሊስታው:: እን አኽጝስ ዴዴጝ ጊዙ ችግርካዋስታ ሊጊሲሚ ጊዙ ችግርካዋ እን ቑንዚሊ እምትጜካማ ይንታንኩሳ ካላካልጚስ ካሊስቴ:: ድርባውሳ ቑንኬ ኩፂ እጁ አሌድስታውሳ ጊዞኺስታ እጆ ቴኬምስትጝስ ካላካልጚስ ካሊስቴ::

ቺርቤዋ፡- ድርባው ቑንዚ ኬሴትስትስቱታ እምፕልታቕሳ እንዳርማ ፄዉጝ ማንዲስታው አኽⶓ ፌያፌይጝፄኑ እንፅኼንት?

ዶ/ር ዮናታን፡- እኖጂሱ እምፕልታቕዳ እንታኮው ዲብ ኬሴትስታኒ ታፎ ልኮ እሚጝ፣ ጉርጉሞ እሚጝ፣ ክብሪቶ ሳንዳ ኻሪስጝ፣ እንዴስ ፌያማ ፄቤልዳስታ ባይሉ አኪምሾ ካፅጝ እሳንስ ካንትስቴ:: ሊሊትጙንኩ ስፍርካዳ ካፅካ እሺካማ ሜንቾ እድሜ ሴጝፅካማ ቑንዳስቴንዳ ሜንች ቤዴል (ጉዳት) ኬሴትስቱኒዴ ፋሌንጋ  እክምኒሾ ይንታና፣ እን ቴግባር ጉዳንቲስታ ፋይፃቲው ዴስያኽ:: እምፕል አቒዳ እን ዲብ ኬሴትስቱታ እምቢት ንካማ እክምኒሾ ካፅጝ ቱስቴ:: እን ቑንዚ እሊውስታ ቑንዚታጊ እክምኒስ ኬሻው ቑንዚያኽ::

እምፕልታቕ እክምኒሾ ካስካማ ኬሻኑ ቑንዚ አኽⶓ ሼውንጝ ፋይፄ:: ችግር ኬሴትስታኒ ታፎ ልኮ እሚጝ፣ ጉርጉሞ እሚጝ፣ ክብራቶ ኻሪስጝ ፋይፃላ:: እን አጉላጉሊ ዴስያኽ::  እቱኽ ስፍሪዳ አግስታንኩሳ ቑንዳቲዳ ጉዳቶ ታምፅጝስ ካላንኩሳ ዲብካዋ ጉሽጝ፣ ጛሪስታ አንኮሊ ታስስታቲታ ቖቔስጜ ፄውጝ ፋይፄ:: እንዴስ ፌይኹስ ዴሜካ ናካ አግስትናው ቴክኖሎጂውዳ ዝቤንዳ አኽጝስ እምፕል አቒ ትራኹዋው ወክትዳ ስልኪስ ፎቶ ጉሽጝስ ትንካክካ ማንዲስቱንታ ያኼካማ እክምኒሾ ካፃማ ካንትፅጝስ ውማይቲኒሊ ኩስጝጚስ እክምኔ አግፅጝ ፋይፄ:: ውማይቴንካ ኪላ ሜንች ድርባው ቑንዚ ዝኩኽ አኽጝስ ድርባው ቑንዚማ ጋቲዊ ናማ ክችክቺስ ሺሻማ ቱስታውሳ እክምኔ ፄውጝ ፋይፄ::