83ንቲ አሜቱ ይቶፕያው አርቤንው ጌርክ ኬቤርስትኾ

ሰለሞን ስንታየሁ

ይቶፕያው እዝቡ ጄግንት ታሪክስ አቕስትኹ፤ አጌራ ሚንች ሻይ አሜታዴስ ጃላ ኔፃኔቶ ማንዲፄታ እጂቲት ጅፊፄስታ ኪቢርስቴታ ሴጝቱት አጌራኽ። ካቢትጚስ ፄውስትኹሳ ባላንጋርቱሳ ባርኾቼው ዌሬራንቲ አይሉሳ ፅካቶ ክብርካ ጚሪ ኬዩኑ ውላቱዊ ሜስዋቲስ ካላካልጝታታ ኔፃኔቶስታ ድንቤሩሳ እምፕልቶ ፂኒስታታ ሲፍፅጝስ ካሊት አጌራኽ።

ያኽስጉ አድዋው ድል 40 አሜታዴስ ፋሌንጋ ፋሺስትታሊያኑ ምንግስት እሳኖ ዎሬሙሳ ቴርትጜ ፄውጝስ ታሊያን አድዋው ዎሬምዳ ታምብኹሳ ዊፅስትጙሳ ቑሎ ፊትጝጝስታ ይቶፕያዋ አይልስ ዌሬራማ እሚጝስ ጛው ክሙ አካል ፄውጝስ ካብስ 1928 ም.አሜትስ ይቶፕያዳ አይሉሳ ውራሬ ፄውⶓ ታርኩ ፁፍካ ካንትፃና።

አንኮ አሜታሱ ፋሺስት ታሊያኑ ውራሪው ዝቤንዳ ካይ ክማዋ ምኽ ምኽ ንካማ ፍችቱንኩ አጌራው እንካንስ ናኒስ ዋሺኒኪ ሜስዋቴ ኬይጝስ ቴርቱንኩ ይቶፕያንካ ቹ ታብል አርቤንካ ሴዛጊ ዳብዚስ እቑትጛካማ ኩፔካማስታ ሜሮ ቱዌካማ ካዌኖ ጝን ፄዌካማ ካዌንስታ ጋኺስ፣ ካንስስታ ካርጛኻስ ዙራዙርካማ ዋሺኒኪ ሜኬሪስታ ችግርስ እንግርግራ ናኑላስ ባላንጋሬ ፍሽፄስታ ሚፅፄ አቲካ:: ፅላቶ ቼኔክፅጝስ ቡንካዋ ወክቱ ንጉስለ ዲፕሎማሲው ቡንካሊ ፃምርስካማ ሜዜጌብፁኑ ዋይሚስ ዌሬራንቲ ባላንጋሪ ድላ ያኽጝስስታ ዊፅስታንታ ያኻማ ሴሜራማ አጌርዴስ ፍንጂስትጝስ ካላ።

እኑ ቹዋ ታብል አርቤንካ ኬዩኑ ሜስዋቲ ዴሜካ አሜት ቺፋ አርቤንካው ጌርክ እስታማጊ ኬቤርስትⶓ ጄሜሩኒዴስ 83 አሜታሳ ቼፍፃ።

ይቶፒያዳ አርቤንት ጄሜርስትኹ ኽታዊኒ ጊዝዴስ ጄሜራማ ቹዋ ታብል እን አጌራዋ ባላንጋሪስ ዌሬሬፅናላ ናኒስ ሚንቾ ጊዞ ሴብትጛኒስ እሺካ ኑንኩ እንጃቢሪ ዩኒቨርስቲው ታሪኩ ክንቲ ቤኑ አላፊስታ ታሪኩ ክንትፃንቲ እርዳታንቲ ፕሮፌሰር አበበ ፈንታሁን ቹዋስ አርቤንት ይቶፒያው ታሪክዳ አቕስታው ኩፂ ይቶፒያው እዝብ ታሊያንሊ ፄውኑ ዎሬምኽ ንካ:: እንጚ ጉዝማ ውላጊ ታሊያኑሳ ባላንጋሬ አጌራዴስ ፍሽፅጝስስታ እዝብኪላ በላንጋሪስ ክምስታቲንታ ፄዋሺኑ ቡንካኽ አርቤንት እስታማ እቑስታው ንካ::

እን አርቤንቱ ጊዝ እን አጌራው ታሪካኻዳ አቕስታውኪላ አውሮፓው ዝቤን ቼፍታ 1936ዴስ 1941 ም.አሜቶኺሰታ ዝኩኽ ጊዝኻዳ ታሊያን ይቶፒያዋ ዌሬርታኒ ቹ ታብል እምፕልታ ያኼካማ ባር ኾቼውሳ ዌሬራንቴ አጌራኻዴስ ፍሽፅጝስ ቡንካ ፄዋሺኑ ጊዜኽ::  አዊ ብሄረሰቡ ቺፅጝፂዳ ኽታዌንካ አርቤንካ ያኼካማ ባላንጋሬ ቡንክትጛሺንኩ ክቻዴስ ዳንግሊው ፊታውራሪ መንገሻ ጅንበሬ እምፕሌኽ ኑንኪ ርዳታንቲ ፕሮፌሰር መንገሻ ጀንበሬ ባላንጋሪ አጌርዴስ ፍንታስታ አጌራዋ ዌሬራንቲ ፅላትስ እምፅናላ ናማ ኬፍቲኔ ክራፊትጚ ፄዋሺንኩ፣ እዝቦ ኪላ ኩፕፃማ ጉሳሺኹ ጄግኒ አርቤኒ አኽⶓ ቶኬሙንኩ ክንትፃንቲ እሊውሾስ ዴሜካ ማርኮሱ በላይ ዘለከኪላ አርቤንት ጆዋኒ ታሪክ ዜኔጋቲው ጐጃሙ አርቤንካ ክቻዴስ እምፕሌኽ ንካ::

በላይ ዘለከ አጌራው ባላንጋርካዳ ኬፍቲኔ ፅካቶ ታምፃማ ፍንጃሺካ ኩርፂኒ አቕስቱኹ አርቢኒ እሺኾ:: ያኼስጉ በላይ ዘለከ ፋሌንጋ ኩፂ እን አጌራው ጉሳንቲ ንጉስ አይለስላሲ አጌራኻሾ ዙሩኒዴስ ንጉስስ ክምስታላ ናውሳ አሳቦ ጉሻሼኾ:: አንጚ ጉዝማ መንገሻ ጀምበሬ ዋታይ ፄውኹ ምንጊ ትብ አጌራስ ጉስስትናላ እናናጉ እምፕልታ ቡንክትጝናሸንኹ ጃጊ እኑ ንጉስስ ጉስስትናላ እናና ጋቲዊኽ ቡንክትጝኑኹ ናማ እንግራ በላይ ዘለከዋ ሴብትⶓኺስታ ታምባሽኾ ኔ ታሪክ ኑንኩ ክንትፃንቲ እን ክንትፃው(መንገሻ ጀንበሬዴስ) ክንትናው ዴስ አባላምቲኪ አዊው እዝብ እግስ ጉስስታንትካ ጋያኪላ አዊው እዝብ እጐ ኬቤርፃው፣ እግስ ቺትጛው አኽⶓ፣ ንጉሱሳ ትዛዞ ፌፄምጝስ እንግርግራ ናቲው አኽⶓ ክንትፃዌኽ ንካ::

ኽታዌን ታብልዴስ ናኬንካ ጉሳንትካ ክንትጝ ዝኩኹ ዱብ ሜንቼኽ:: ጋያኪላ እዝቦ ጉሳንኩ አላፍካ ክቻዴስ እምፕል እምፕል አመራርዳ ችግር ዝኩኹ ድሳላኬኽ:: አኽጝስኪ እዝቦ ጉሳኒስ ሙሲኒዳ ቱⶓ ባይካማ፣ እዝቦስታ እዝቦ ጋቺትጝፃውሳ አሳቦ እይⶓ ባይካማ እዝብስ ቴኬማውሳ፣ እዝብ ዋታኻማይ አብርታ ዝኩጝስ ካላው፣ ዝኩኹ ድኽቱ ችግር ዋታ ያኻማይ ልማትስ ኪሲሲትጝስ ካላው ናውሳ እሚጝስ ጉስጝጉ ቱስታው እዝቦ ጛስጛዋ ጋቺትጝታ አኹኪ ጛውሳ ፋዮ ይቢቼ ዋኽትጝፅጝስ ጊጝትጚ አሳላካሳላ ታምፃቲው አኽⶓ ማሊጝ ዝኮ ንካ እርዳታንቲ ፕሮፌሰር እዩኑ ካንቲዳ::

አርቤንት ንጚ ጛስጛዋ ሴብትጚ፣ እምፕሎ ድፅማ ፊጝ ያኻውላ አጌራዋ ባላንጋሪዴስስታ ፅላትዴስ ማንዲጝ፣ እን አጌራ ሚንችካ አኻኻስኩ ስታ ባርኾቼው ባላንጋሪ ዝኩንቲ ያኽጝስ ባርኾቼውኪ ያኻ አጌራኻሱ ባላጋሪ ዌሬራቲታ ማንዲጝ፣ እምፕልታ ልማቶ አሬኽፅጝሰ ድኽትዴስ ፊጝስ እንፃኽስትጝ ዝኩኹስ እኑስ እኖ ፄውስታውሻው ሴብትጚ ክችክቺ ጋቲዌኽ:: ናኒስ ታክስፅካ ታሪኩ ክንትፃንቲ እርዳታንቲ ፕሮፊሰር አበበ ፈንታሁን::