“ፄትቲው ችግር ሚዲቢኔ እንፅኼ ፌፄምጝስ ፅንጋኻ ያኻማ እጄ” ሰላሙስታ ፄትቲው ቢሩ አላፊ

ታደለ አጋጄ

11 ሻይዴስ ጃላ ዶንጌቱንኩ አይልካ ሰላሙሳ እቑዌ ቻቤልጝስ እምፕልታቕሊ አሌቔትጝⶓ ሰላሙስታ ፄትቲው ቢሩ አቕፁኻ::

አማኻሪ ክልሉ ኩስጚ ጝና እጉስታ ፍቱ ቺፅጝፂው ጉዳዩ ኮሚቴ ሲፍጝጛኩ ፌፄምፃንትካ አካልካ 2016 በጄት አሜቱሳ  ፌፄምጝጜ ስንብቶ ጋማጋማ::

ትክትሊ ቺፅጝፂው ማሬግስ ቺፅጝፂው ዜርፉ ቴቤቤርጝፃንቲስታ ሰላሙስታ ፄትቲው ዜርፉ አላፊ ደሳለኝ ታሳው ቢሩ ሲፍጛኩ ኾትካው እንፅኺው ፊፂምጜ ቲሬንቲ ኮሚቴስ ዲግስካ::

ሪፖርትዳኪላ አሜትስ አኬድስትኹሳ እክዶ ፌፄምጝዴስ ድምክና ክልልዳ ፌቴርስትኹ ፄትቲውሳ ችግሮ ኽይጝስ እንፃኽስታኒስ እጂⶓ ዲብስካ:: ፄትቲው ችግር ሚዲቢኔ እክዶ ፌፄምጝስ ፅንጋኻ  አኽⶓ ዙሜካ::

ክልልዳ ፌቴርስትኹ ፄትቲው ችግር ክልሎ ዜረፋ ማንቼ ዋይሜ ኬይፅⶓ ዙሜካ:: ክልልዳ አኽቲኒስታ ሲግቲኒ ፍታኒ ጌቴምⶓ ጌሌፅካ:: ኬሴትስትኹ ፄትቲው ችግር እምፕላኒስ ጁኹ ያኻውላስ  አኽቲኒስታ ሴግቲኒ ቻኒስትስ ጁኹ ችግር አኽⶓ ዙሜካ::

ክልል እጂኹ ማይቤራዊ፣ ፖላቲካውስታ ኢኮኖሚው ችግርዴስ ፌያማ ፌቴርስትኹ ዎሬምስ ሚንችካ ስዴቴንካ ክልልሾ ቱዋንታ ፄውስትⶓስታ ቻኒስቶ ታምፅጝስ ምክኒያታ አኽⶓ ዙሜካ::

ዎሌን ክልልካ እምፕልትስስታ ላጛሴንትስ አክም ሌጌሳታ እክዶ እሚጝስ እንፅኺሾ ቱⶓ ታክስፅካ:: ሱዳንስታ ዎሌን ክልልካ ፌቴራኒ ቻኒስትስ ክልልዳ ፌቴርስትኹ ፄትቲው ችግር ድምክኒ ችግር አኽⶓ ጉሽካ::

አማኻሪ ክልል አምሊ 2015 ም.አሜትዴስ ጄሜራማ ፄትቲው ችግራኻዳ እሺⶓ ታክስፁንኩ አላፊ አኽቴንካስታ ሴግቴንካ አይልካው ቻኒስት እዝብስ ጐሌልስትኹሳ ምንግስቶ ፌሬስፅጝስ ፅካቶ ታምፅⶓ ዲብስካ::

ክልሉሳ ፄትቲውሳ ችግሮ ኽይጝስ   ፄትቲውሳ አይሎ ሴሌቴንፅጝስ አቺትጛታ ፄውስትⶓ ጌሌፅካ:: ፄትቲው ሜዋክር ክርፂ ቺፅጝፂው ችግር ኽይስታታ እንፃኽስትⶓኪላ ዙሜካ::

ፄትቲው ሜዋክር እዝቡ ሰላምስ ሜሰዋይቴ ኬይⶓስታ ኬያማጊ አኽⶓ ዙሜካ:: ይዎቶ ጝን አቖስታ አብቶ እምፅጝስ ክልሉ እዝብስታ ምንግስት እይኹሳ አላፍቶ ፊትጝጝስ እታጁⶓ አቕፄካ:: ሊሊቲ እርዳቲ ፄውስታውላ አላሚስ ፂኒጝስስታ ካልዳ ቻንኩ ጄግንካ ዝኩⶓ ዙሜካ::

ክልሉ ፄትቲው ችግር ጊዝዴስ ጊዞ ኬሽጝጜ ካንትፅⶓ ዙሙንኩ አላፊ ናካኪላ ክልሉሳ ሰላሞ አዌካው ጋቻ ዝኩⶓ ጌሌፅካ:: ዳድ ልምትጝ፣ ሴላማውካ አቖ አጌትስትጝ፣ ግባቱ ዲግስጝጚ ዝኩዋቲታ ፄውስትጝ  ዲብስካ:: ፄትቲው አይል እንፃኽስትኹ ይስጙኹ እንፅኺስ ግባቱ ዲግስጝጚ አሬሳቻንትካስ ታምባታ ፄውስትⶓ ጌሌፅካ::

ክንቲጝናዳ፣ ጌቤልዳስታ ሰላማውካ ዝኩዋኑ ስፍሪዳ ቦንቦ ፌኔድፅጝስ ሼቤርፅጙ ልቕልቕቲ እሺⶓ ታክስፅካ:: አብትዌንካዳ ፌፄምስታማጊ አግስታው አጌትጝ ሚንቻማ አብትዌንካ ክልሎ ባይፅካማ ሴዴድስታንታ ፄውⶓ ጌሌፅካ::

ብሄርስስታ አይማኖትስ ጋቻ ጁዋታ እሳንስ እንፃኽስታንኩ አይልካ እሺⶓ ዙሜካ:: ክልሉ እዝብ አባላምቲዳ እሺኹሳ ሰላሞ ዙርፅጝስ ሰላምስ እንፃኽስታማጊ አኽⶓ ጌሌፅካ::

ክልልዳ አዌጅስትኹ እምቢትንኹ ጊዙ አዋጅ ምንግስቱ ቴርት ሲፍታ ፄውⶓ ዙሜካ:: ፄትቲውሳ አይሎ ዙርፃማ አቺትጝፅጝዴስ ፌይኹስ እጎ ኬቤርፅጙ እንፅኺስ 11 ሻይዴስ ጃላ ዶንጌቱንኩ አይልካ ሰላሙሳ እቑዌ ቻቤልካማ ቱⶓ ዙሜካ:: ክልልዳ ፌቴርስትኹ ፄትቲው ችግርስ ቼፍጝጚው ስርዳ እሺንኩ ዎጌንካ ተሃድሱሳ ስልታኒ እይስታማ ማቤርአቕሊ አሌቔትጝⶓ አቕፄካ::

ሰላሙ እሴቱ ግንባቲስታ እሊኩ ዎንጄልካ ካላካልጝጝስ አኬድስትኹ እክድ ክልልዳ ፌቴርስትኹ ፄትቲው ችግሩ ምክኒያቲስ ፋይስታውሳ ላካ እንፅኺ እንፃኽስታያሱ አኽⶓ ጌሌፅካ::

ፄትቲው ኾት ክልልዳ ፌቴርስትኹሳ ፄትቲውሳ ችግሮ ካላካልጝጝስ፣ ዙራሙሬ አሬኬዝፅጝስስታ ክልሎ ሚዲቢኒ ልቕልቕቲሾ ይንታታ ፄውጝስ ኽሳንቴ ፍሼ ፄውⶓ ጌሌፅካ::