ዘውዴ በካሉ
ስካዊ ክንቲው ፍኖተ ካርቲ ክንቲውሳ ፃንኩቶ ማንዲፅጝስ ትኩቶ እያማ እንፃኽስቱክ ቴግባርካዴስ እምፕል ፍታኒው ምዛኒው ቴርቲያኽ:: 12ንቲ ቤንካው አጌር አቡቑ ፍታኒ ዩኒቨርስቲዳ እይስትⶓ ጄሜሩኒዴስ አሜትካዋ ቼፍፃ:: 2016 ም.አሜትዳኪላ 12ንቲ ቤንካዉ ክንታንትካ ኦንላይንስስታ ወረኬትስ ፍታኔ ካፅጝ ማሊስቴ:: እን 12ንቲ ቤኑ አጌር አቡቑ ፍታኒ አምሊ ሹኻ ጌርክዴስ ጄሜራማ አምሊ 11 ጌርኮ ኺስታ እይስቱስ ሴኔቤታ::
አማኻሪ ክልልታኪላ አምሊ 3/2016ዴስ አምሊ 11/2012 ም.አሜቶኺስታ እይስቱስ እጂኹ 12ንቲ ቤኑ ፍታኒ ሰላምስ አሌድስትⶓ ትክትሊ ቺፅጝፂ ጛራሱ ማይሬግስ ማይቤራዊ ዜርፉ ቴቤቤርጝፃንታስታ ክልሉ ክንቲው ቢሩ አላፋ ሙሉነሽ ደሴ (ዶ/ር) ጌሌፅካ:: ሰላሞ ቼሜትጝፅጝስ እንፃኽስቱንኩ አካልካስ ምስጋኔ ዲግስካ::
አዊ ብሄረሰቡ ቺፅጝፂዳ 2016 ም.አሜቱሳ 12ንቲ ቤኑሳ አጌር አቡቑሳ ፍታኔ ላጛ ዙራስ ክንታንትካዋ ቻቤላማ እንጃቢሪ ዩኒቨርስቲ ፍታኔ ሰላምስ ፌቴንፃማ አሌድⶓ ብሄረሰቡ ቺፅጝፂው ክንቲው ሜምሪው አላፊ ደስታው አለሙ ጌሌፅካ:: 12ንቲ ቤኑ አጌር አቡቑ ፍታኒ ማይቤራዊስታ ፍትሬቱ ሳይንሱ ክንቲስ ቤንስታማ እይስቱስ እጂኹ ፍታኒው ቴርት ሰላምስ አሌድስትⶓ ጌሌፁንኩ ሜምሪው አላፊ ፍታኒ ሰላምስ አሌድስታታ ፍታኒው ማይኬልዴስ ጄሜራማ ትኩታኩ አካልካ ቤዴራ ቴርቶ ፄውⶓ ዙሜካ::
ፍታኒ ሰላምስ እይስታማ አሌድስታታ ፃምርትኹ ፄትቲው አይል፣ ምንግስቱ እንፅኺው አላፍካ፣ ፍታኔ ፌቴንፃንኩ ክንትፃንትካ፣ ዩኒቨርስቲው እምፕልታቕ ክንቲው ሜዋክር፣ አጌር ሹማጌልካስታ እሊኩ ታምብዌን አካልካ ትኩቶ እይካማ እንፃኽስትጝስ አላፍቶ ፊትⶓኪላ ክንቲው ሜምሪው አላፊ ጌሌፅካ::
እንጃቢሪ ዩኒቨርስቲው አካዳሚክ ጉዳይካው ትክትሊ ፕሬዝዳንት አእምሮ ታደሰ (/ዶ/ር) 2016 ም.አሜትዳ 12ንቲ ቤንካው አጌር አቡቑ ፍታኔ ፌቴንስታንኩ እስታማ አኬድሰትኹ 9 ሻይ 924 ክንታንትካዴስ 9 ሻይ 678 ክንታንትካ ላጛ ዙራስ ፍታኔ ፌቴንስትⶓ ጌሌፅካ:: ፍታኒስ ዩንቨርስቲሾ ይንቱንኩ ክንታንትካስ ትራንስፖርቱ አኺኒ ቴርትጝስ ክንታንትካ ሰላምስ ጝን አቕሾ ዙርⶓኪላ ዙሜካ::
አቫላምቲ ዙሪዳ ፌቴንሰታንኩ ማይቤራዊ ሳይንሱ ክንታንትካ 4ሻይ 358 ያኻኒስ ላጛንቲ ዙሪስ ፌቴንስታንኩ ፍትሬቱ ሳይንስኩ ክንታንትካ ዴሜካ 5ሻይ 566 ትክላሊስ 9 ሻይ 924 ክንታንትካ 2016 ም.አሜቱ አጌር አቡቑስ ፍታኔ እንጃቢሪ ዩኒቨርሰቲዳ ፌቴንስትጝኪላ ጌሌፅስታ::
2016 ም.አሜቱ 12ንቲ ቤኑ አጌር አቡቑሳ ፍታኔ ካፁንኩ ክንታንትካዴስ ክንታንቲ ዮሃንስ አናጋው እምፕሌኽ:: አገው ምድር ክንቲ ጝናሱ ክንታንቲ ያኹስ ማይቤራዊ ሳይንሱ ክንታንቲ አኽⶓ ዙማ:: ዩኒቨርስቲው እጂጚዳኪላ ያኻ ፍታኒው እይጚዳ ዳርኪ ችግር ጌቴማያሱ አኽⶓኪላ ክንታንቲ ድኹዋ:: ክንታንቲ ዮሃንስ ሳቶ ቴኬምሰትጝዳ ጚሾስኪ ዳንጉዊኒ እሺኹ አኽⶓ ዙማማ ፌቴንፃንትካ ክንትፃንትካዴስ ጄሜራማ ፄትቲኩሳ አካላካዋኺስታ ዝኩንኩ ውላጊ ሰላምስ ዜቦ ቲሪካማ ፍታኒ ሰላምስ አሌድስትⶓ ዲብሳ:: ፍታኒኪላ ዴስስትኹዴስ ሊሊታ ጋቲው አኽጝስ ክርፄ ዋይሜ ማንዳው አኽⶓ ክንታንቲ ዮሃንስ ድኹዋ::
ቻግኒ ትክላሊ ላጛንቲ አች ክንቲ ጝናስቲ ክንታንታ ቤቴልሄም አድነው 2016 ም.አሜቱ 12ንቲ ቤኑሳ ፍታኔ ሰላምስ አሌድⶓ ዙሜ:: ፍታኒ ዩንቨርሰቲዳ እይስትጝ ክርፂ ዲብ አኽⶓ ድኹቱት ክንትንታ ቤቴልሄም ዩኒቨርስቲው እጂጚዳ ምግብዴስ ጄሜራማ እክምኒውሳ አግልግሎቴኺስታ ዋኽትጙኽ አኺኒ እሺኹ አኽጝስ ዳርኪ ሴኬኬና ጋቲታ ፍታኔ ፌቴንስታንታ እርዳትⶓ ዙሜ:: ክንታንትካስታ ክንትፃንትካ ክቻዳ ዳርኪ ጋቻ ፌቴርስታውላስ ጋያኪ ፄትቲኩ አካልካውስታ ትኩታኩ አካልካው ቴቤቤርጚስ ዳርኪ ፄትቲው ችግር ጋቲታ ፍታኔ ሰላምስ አሌድⶓኪላ ክንታንታ ቤቴልሄም ዙሜ::
አጌር አቡቑ ፍታኒ ቤናኻሱዴስ ሚንቾኪላ ሊሊቲ ጋቲው አኽⶓ ዙሚት ክንታንታ ቤቴልሄም ፍታኔ ቱስቲስስታ ካሊኹ አክምስ እንፃኽስቲኹ አኽጝስ ክርፄ ዋይሜ ሜዜጌብፅጝስ ማንዴት አኽⶓኪላ ዲብስታ::
አሌም ኪሰስትኹ ክንቲስያኽ!