ፌቴርስትኹ ጋቻ ኩስጝጚስስታ ዳራዳርጚስ ኽይስታታ ውላጊ አሬባሬብጜ ፄውጝ ቱስቴ እስትኾ

ታደለ አጋጄ

አማኻሪ ክልሉ ኩስጚ ጝና 6ንቲ ዙሪ 3ንቲ አሜቱ እንፅኺው ዝቤኑ ሚዲቢኔ ጉባየ ስንብቶ ካስጝፃ::

ጉባይዳኪላ ክልሉ ቺፅጝፂ ጛራ አረጋ ከበደ አሜትስ አኮሜችስቱንኩ ቴግባርካውሳ ሪፖርቶ ኩስጚ ጝናስኩ አባልካስ ዲግስካ::

ፌይኹ አሜቱ አምሊ አርፊዴስ ጉሽፃማ ክልል ሰላሙስታ ፄትቲው ችግር ጌቴማማ እጂⶓ ጌሌፁንኩ ቺፅጝፂ ጛራ ሰላሙ ችግር አቕቱሳ፣ ንብሬቱሳ፣ ሼው ፅንታውሳስታ ማይቤራዊውሳ ጉዳቶ ሲፍፃ ንካ::

ሰላሙስታ ፄትቲውሳ ችግሮ ኽይጝስ ካሊፃው ካቢትጝጚስ እዝቡ ኩስጝጚ ካስጛ ኑንኩ ቺፅጝፂ ጛሪ ካስጝጙኽ ኩስጝጚዳ እዝብ ችግሩሳ ሜቴኖ እርዳትስታታ ፄዋ ንካ::

ናካዳ ክልሉ እዝብ ሰላሙ ጜዋና አኽጝሰ እሺኹ ችግርዴስ ፋታ ፅሬቶ ፄዋታ ንካ::

እጎ ኬቤርፅጙ እንፅኺዴስ ኬምፕስ ኬምፖ ፄትቲውሳ ሜዋክሮ እንግራ አችትጝፅጝስ ኬሽኹ ዋይሚ ካንትስታ ኑንኩ ቺፅጝፂ ጛራ አረጋ ከበደ እዝብ ሰላሙ ጜዋና አኽጝስ እርዳትⶓ ጄሜርጝ ጉድ ሰላሙ አኺኒ ሴፌናታ ፄዋ ንካ::

ክልሉ ምንግስት ክልላኻዳ ኬሴትስትኹ ጋቻዋ ሰላማዊ ያኹኽ ዳድስ ኽይጝስ ሰላሙ ካውንስል ዲግስኹሳ ካሴ ቻቤልጝስ ቴግባርዳ እሼታ ኩርፂኒ አኽⶓ ጉሽካ::

ይዎቱሳ ሜስዋቴ ኬይጝስ ክልልዳ ሰላም ይንታታ ፄውንኩ ፄትቲኩ አይልካስ፣ አጌሩ ካላካልጚው ስራዊቲስ፣ አይማኖትኩ ታብልካስ፣ አጌር ሹማጌልካስ እንቲታኪ ክልሉ እዝብስ ምስጋኔ ዲግስካ::

ቺፅጝፂ ጛራ ፊፂምጚዉሳ ሪፖርቶ ዲግሱኒዴስ ፋሌንጋ ኩስጚ ጝናስኩ አባልካ ስላሙስታ ፄትቲው ዙሪዳ ካስካዋስታ ካንቴ እይካ::

ኩስጚ ጝናስኩ አባልካ ክልል ጋቻዳ ያኻማ አኮሜቹክ ቴግባርካ ቴስፌ እያንኩዊያኽ ንካ:: ክልሉ ስላም ማንዲስታማ ዋኽ አክምስ ልማትሾ ቱዋስኩኒ እንዴስ ጃላ ኬሽኹ ፊፂምጚ ካንትስታው እሺኹ አኽⶓ ቶኬምካ::

ኩስጚ ጝናሰኩ አባልካ ትኩቶ እይካማ ጉሹኑ ክልሉ ሰላሙ ዙሪዳ ያኹስ ክልሉ ምንግስት ሰላሙ ኩስጝጚስስታ ዳራዳርጚስ ካንትፅኹ ጁትጚ ጋሺስታዊያኽ ንካ::

እን ቴግባርዳ እሼታኪላ ኪንዴ ዳዶኺስታ እንዜጝጝስ እንፃኽስትⶓ ፋያው አኽⶓ ጉሽካ::

ጝሺ አግስትኹሳ ጉድ ሰላሙሳ አኺኔ ሲፍፅጝስ እንቲታኪ ዊዳፌ ሰላሞ ቼሜትጝፅጝስ ካሊፃንኩ ጉላልካዋ ካንትጝ ቱስቴ ኑንኩ ኩስጚ ጝናሰኩ አባልካ ዶንጌቱንኩ አይልካ ክልሉ እዝብ ማይቤራዌ ፉሬ አግፃታ ሰላሙሳ ጉላሌ ቴኬምስትጝ ቱስቴ ንካ::

ክልል ዝኩኽ ወክታዊ አኺኒ እርዳትስትጝስታ ክልሉ እዝቡሳ እምፕልቶ ሺሽራንኩ ችግርካ ቲሬንታ ኩሰጚ ጝናስኩ አባልካ ካሴ ጉሽካ::

ዋግኽምራ ብሄረሰቡ ቺፅጝፂዳ ካንትስታው ኢኮኖሚውስታ ልማቱ ካሲ ክልሉ ምንግስት ካላው አክምስጊ እምፕልታቑሳ ካሴ ኽይጝ ቱስቴ ኑንኩ ኩስጚ ጝናኩ አባልካ እዝቦስታ እዝቦ አግሌልጝፃንኩ አይልካዳ ክልሉ ምንግስት ትኩቶ እያማ እንፃኽስትጝ ፋይፄ ንካ::

ክልልዳ እምፕሎ አሜቶ ቼፍፅኹ ጋቻ ክልሉሳ አብቶ፣ ፖላቲካውሳስታ ማይቤራዊውሳ ልቕልቕቴ ቤዴልⶓ ዙሙንኩ ዴሜካ ኩስጚ ጝናሱ ጉባይ ኽምባ ፋንቱ ተስፋዬኽ::

ጉባይ ኽምባ ጋቻ ፌቴርስቱኒዴስ ናቴ አቒ ክርጝዴስስታ ንብሬት ድስጝዴስ ድምክና እምፕልታቑ እጂኹስታ ኬቤርስቱንኩ እሴትካዳ ታምፅኹ ጉዳት ኬፍ ንኹዌ ንካ::

ዲጊሲ ሰላምስ እንፃኽስታንኩ አይማኖትኩ ታብልካዳስታ አጌር ሹማጌልካዳ ፌፄምስትኹ ፅካት እምፕል ካንትፂያኽኪላ ንካ::

ዎሬሙስታ ጋቻው አሊዲ ሰላሙ ኩስጚ ያኽ ኑንኩ ጉባይ ኽምባ ክልልዳ ፌቴርስትኹ ሰላሞ አቲጙሳ ችግሮ ዊዳፊስ ኽይጝስ ኩስጝጚስታ ዳራዳርጚ ጎሌልስታንቲያኽ ንካ::

ጉባይ ኽምባ ዝኩዊኒውሳ ክብርናቴ ኔኬትጝስ፣ ሙስኔስታ ዳዴኾ ቡንክትጝጝስ እንቲታኪ እዝቡሳ ክሬቴስታ አግልግሎቴ እይጙ ችግርካዋ ሺሻማ ክችስጝኪላ ቱስቴ ንካ::