ሰላምስ ዜባ አኽኔስ

አማኻሪ ክልልዳ አሜቶ ላካሳ እጂኹ ጋቻ ፌቴርኹ ችግር አቕቱሳ፣ ንብሬቱሳስታ ማቤራዊውሳ ክሳሬ ታምፃማ እጄ:: ክንታንትካ ክንቲው ማድዴስ እቺካማ ሳኑስትካ፣ ቑንዳስቴንካ አኬምስትካማ ኬሽጝስስታ እጆ አግፅጝስ ቺጊርፂ አኺኒ ፌቴርስታ:: ጋቻ ዋሺኒኪ ልማቱ ዜርፍዳኪላ ታምፅኹ ጉዳት ይዝኩዊያኽ:: ክልልዴስ ድስኹሳ ሴላሞ እሺኹሾ ዙርፅጝስ ይጋሪስ ቲሪጝኪላ ማልጜ ፋይፃንቲያኽ::

ሰላሞ አቲጙ ችግርኪላ እምፕል ፓርቲስ፣ እምፕል ጛርት አቕስ አኹኪ ኾትስስታ ልቓ ኬችካስ ይቪቻ ኽይስታው ጋቲዊያኽ:: ሰላሞ አቲጙ ችግር ዜርፎ ሚንች አኽጝስ ኽይጝስ አሴቴፍጛንኩ አካልካኪላ ሚንችጝ ቱስቴ::

ክልልዳ ፌቴርስትኹሳ ሰላሙሳ ችግሮ ጌጌውጝስኪላ ምንግስት ዲግጛማ ኩስጝጝስ ችግሮ ኽይጝ ፋይፃንቲ አኽⶓ አምናማ ሴኒ 17-18/2016 ም/አሜታሳኺስታ አማኻሪ ክልልዳ ዊዳፌ ሰላሞ ሴፌንፅጝስ ባርዳር ኬቴምዳ ሰላሙሳ ኮንፈረንሶ ካስጝፃ:: ሰላሙ ኮንፈረንስዳኪላ “ሰላም ውላስጊ፣ ውላጊ ሰላም” ናው ጉሳንቲ እንፅኼንትስ ሰላሙ ችግርስ ኽዮ ያጋና እስትካማጊ ጐሌልስቱንኩ እምፕልታቑ ቤንካሊ አኽጝስ ዊዳፊስ ቴኩሶ ቲሪፅጝስ ዙሚትጜስታ ዳራዳርጜ ፄዋንታ ኮንፈረንስዳ ወሴንስታማ 15 አባልካ ዝኩኑሳ ሰላሙሳ ካውንስሎ ጐሌላ:: ጐሌልስትኹ ሰላሙ ካውንስልኪላ እንፅኺሾ ቱጝስ ዶንጌቱንኩ አይልካዋ ዙሚትጝፃማ ዳራዳርጚስስታ ሰላምሾ አንትጝስ ፍካዴንካ አኽⶓ ጌሌፅⶓ አሚኮ ዜጌባ:: እስጜ ፍካዴና አኽⶓ ኩፅኒ ቴግባራዋ ፄዋማ ክልሉ እዝብ ቱኽ ሰላም አቲጙ ችግርዴስ ፋታ ፄውጝስ ውላውጊ ፋይ አኽጝ ፋይስቴ::

ስንብቶ አማኻሪ ብሄራዊ ክልል ኩስጚ ጝና 6ንቲ ዙሪ፣ 3ንቲ አሜት እንፅኺው ዝቤን፣ 8ንቲ ማዲቢኔ ጉባዬ ካስጝፁስኪላ ኩስጚ ጝናስኩ አባልካስ ክልልዳ ዳጊትኹ ሴላሞ አቲጙ ችግር እዝብዳ ጉዋል ንኹሳ ጉዳቶ ታምፃማጊ አኽጝስ ጄሜርስትኹ ዙሚትጚውስታ ዳራዳርጚው ካስጚ  ቲኪስታንታ ጋው ኽይ አኽⶓ ኪላ ጌሌፅካ::

ምንግስትኪ ያኻ ዶንጌታንትካ አይልካኪላ ሰላማዊ ዙሚትጝጚስ ችግርካዋ ኽይጝስ ኩርፄና አኽጝስ እንፃኽስትጝ ቱስቴ:: ሰላሙ ዙሚትጚሾ ፄውስታው እንዝጚኪላ ሳኪትጙኽ ያኻታ ዶንጌታንትካ አይልካ ቴኩሶ ቴሬፅጝ፣ ፍችትጚው ዙሚትጚስታ እሊኩ ሰላሞ አግጝስ ፄራ ያኻንኩ እርምጅካዴስጊኪላ ክብስስትጝ ፋይፄ::

ውኒቲኒ ኩስጝጚ፣ ዙሚትጝጚስታ ዳራዳርጚ ዝኩዋኒ ውላጊ ቹኒትስቴ፣ አስሜምጜ:: ውላጊ አካል ሰላማዊ እቑዊስ አኻስንጙሳ ዙሜ እይጝ እዝቦስታ አጌሮ ድስጝዴስ ይጉፄ::

ጋቻ አብርታ እሼማ ቹኽ ቺፋ ዲብ ይስጛማጊ ካሴ፣ ብሪ ክቢጝ ዴሜኬ፣ ሰላማውካ አቑ ይወት ቺጊርፂ ዝኩዊኒሾ ቱዌ አኽጝስኪ እዝብስስታ አጌር እስቱስ ሰላሙ እቑዊስ ዙርሜ እይጝ ፋይፄ:: ሰላም አንትጝስኪላ ውላውጊ አሪባሪብጚ ፋይፃንቴኽ::