ጐርጐራ

ገነት አየነ

ይቶፒያዳ ሊሊትጙንኩ ዝቤንካስ ሚንችካ ምክንያትካስ አቕስታሺንኩ ኬቴምካ ዝኩና:: ሊሊትጙኽ ጊዝስ ኔጌስንኩ ንጉስካ ኬቴምካዋ ሌጌፅጝስ  እንፃኽስታሺና:: ጛጂሱ ክሙ ዝቤንስ እሺኹሳ ስልታኔስታ ታፉሳ ታቤቦጊ ሊሊትጙኽ ዳድስ እንኩሬካማ ፌይካ:: ኬቴሙ ልግስስታ እሺኹ ትቤብጊ ሲፍጝስ ካላው አዴሮ ቻቤልኹ ክምንት ቱስቲስ ፍንሾ ሲፍፅⶓ ካላኒያኽ:: እምፕል ንጉሱ ክሙ ዝቤንስ ማልጛ አቕስቴሽቲት ኬቴሙ እሊው ንጉሱ ክምዳ እንግራ ቓቔፅጝ ይጉዋላኽ::

እምፕል ዝቤንዳ ሚንችካ ንጉስካት ኔጌስፃ እሽቲት ታሪካዋ ኬቴማ ጚው ታሪክስታ አቕስትጝ 30 አሜትዴስ ናቴ ቓቒፄትሰታ ናካ እኖጂሱ ዝቤንዳ ክምንቱ አሻሪ ፉሪፃ ታሪካዋስታ ኽታዌና ኬቴማዋ ካንትኹስ አንቤብፅጝስ ፋኑኻ::

ጐርጐራ ሜስፍንትካው ዝቤን አሌድስትጝስ ምክንያታ ያኹንኩ ኬቴምካዴስ እምፕላኽ:: ታና አይኩ ስሜኑ ዳብዚሾስ አግስቴት ጐርጐራ ታና አይክቲ ቹዋ ወዴባኪላ እሺቲኾ:: እገ ልቦኒዴስ እጋ ኦሪቶ ንጉሳዊ ክምዴስ ወታድራዌ ክሞ፣ ፋሺስትዴስ አጌሮ ጐቤናንቴ፣ ኽታዊንካዴስ ዝቤናዌ ክሞጊ ሊንጊድፂት ኬቴማኽ:: ዴርጉ ዝቤንዴስ ፋሌንጋ ጐርጐራስታ ጐርጐራው ወዴብ ዜኔግስታማጊ ካስኾ:: ቤፍትስኪ ያኻ ፋይስ ሌንጌድትስ ጐቤናንትካስታ ጉሳንትካ ጐሌላሺንቲ ጐርጐራ ታሪኮ አኽዳ  ቤፍፄታ ድምፆ ድፄታ 30 አሜትዴስ ጃላ እንጅኩዊኾ:: ቤዴራስኩ ንጉስካስ እንፃኽስስቱንኩ ማኼትካስታ ታሪካውካ ስፍርካ ዴስ ይጐ ውላዲብ ዜኔግስቲኾ::

ጐርጐራ ሊሚጝስ አሜቻው ብቲ እንጅኩዋ፣ ታና አይኩ ዳሪዳ አግስትጝስታ እሊኩጊ ምክንያትካስ ሊሚጝስ ታሚትስቲኾ:: እምፕል አጌራው ልግስስ ፋይፃንትካ ያኹንኩ ዲብካዴስ እምፕል ቱሪዝሙሳ ታምብስታንቶ እሳንጝፅጝያኽ:: ይቶፒያ እሳንስ አጌራው ልግስስ እንፃኽስቲኩ እንፅኽካዴስ እምፕል ያኹኽ ጊቢቲ አጌርስ /ገበታ ለሃገር/ እስታው ፕሮጄክትያኽ::

ትክላይ ሚንስትር ዶ/ር አብይ አህመዱ አሳቡ ጉሻንትካስታ እክድ ስሬታስ ሚንችካ ይቶፒያኩ ዙራሙርካስ ሊሚጙ አፂታምብኾ:: ቤዴርኑስ ኮይሻ ሸገር ፕሮጀክት፣ ሀላላ ኬላ፣ ወንቺ ዳንዲስታ እሊኩ አግፁኑ እድል ናካ ታሪካዋስታ ኽታዌና ንጉሳካት ዝኩፃ ታኹት ጐርጐራስ አፂ ፋማ ቤዴርንኹ ኽሳንትትሾ ዳዶ ጄሜርትኾ::

አማኻሪ ክልል ሰሜን ምራብ ቤንዳ ታናው ሰሜኑ ዳብዚሾስ አግስቴት ጐርጐራ አኹስ ኬቤብስትኹሳ ስፍሬ ማልጜ ግዴታውሳ ብቲ እንጅኩዋሳ ፃታ::

ጐርጐራዋ ሊሚፅⶓ እንፅኺ ጄሜርስቱስ ጐርጐራዳ አግስታው ካኒ ኪውስታማ እታውላስ ብቲ ናዲስታማ ማሊፊ ኪስስታውላስ ጃላዴስ ኩክሪስቴ ግሽስታማ፣ ካኒ አምፓዳ ናቒካማ ዝኩዋንኩ ቻኽካስታ ጐኽካ ሴዴድስትካማ ካስኑላስ ትንካኪስ ግቢትስትኹ ፕሮጀክትያኽ::

ታና አይክ ጚውዳ ዙሪዳ ዝኩንኩ፣ ካንካሊ፣ ካናኻፅካሊ፣ እንሴስካሊስታ እሊኩሊጊ አምኽጛማ ዝኩⶓ ፋይኹሳ ፄጌሬ:: እንዳ ስፍሪዳ  ታሪካዋ ደብረሲና ማርያም እስቴት ጌዳማኪላ ዝኬ:: ጐርጐራ ኢኮ ሪዞርት ግቢትስቱስ  ባይሎስታ ታሪኮ ማንዱኽ ዳድስ አኽጝኪላ እን ፕሮጀክቱሳ ትቤቦ ሊሊታ ፄዌ:: ጐንዴርኩ ንጉስካዋ ታክስፅጝስ ጐንዴር ፋሲል ግንቡሳ ግብሬ ፄጌራው እንፂው ትቤብ ኪላ እሳንስ ካንትስታ::

እን እሳን ፕሮጀክትዳ አቓ ግብርካስታ ፍትሬትኩ ፍትኽፅካ ዲብካ አግስታና:: 15ዴስ ጃላ አሲኩ አይኔትካ ታናው አይካዳ አግስታኑ እሳንሳ ጐርጐራው ዙሪዳኽ:: ላጛ ፕሬዝዳንሻልኩ ግንብካኪላ እን ሪዞርትኩ ሊሊትካ ግድካኽ:: ትክትክ ንኹ ዴን እን ዙራሙሪስ ሊሊቴ ግዶ እያ:: ግዲው እንፂው ትቤብኪላ አቒያሱሳ ታፍ ትቤቡሳ አቾ ካንትፃ አኽጝዴስ ድምክና ባይላዌ ዳዶ ባይፃውላስ ዝቤናዌ ቴክኖሎጂ ቴኬምስታማ ግቢትስትጝ -ሊሊቲ ካሊቕቱ ካንትፃ ያኻ::

ጐርጐራ ኢኮ ሪዞርትዳ አግስታው አቓ ግብሪ ባንቢፄ ጊንዲኪላ አቕስ ታና አይክዳ ባንቢⶓ ላኬውሳ እንኩዋኽስቶ ፌቴራዊያኽ::

አቓ ግብራ ባሩዳሪ አሻዊስ (ኽብቻቺስ)ፄፄርስ ግዲጝዴስ ድምክና ውላ ድሚው አችዳ አግስታንኩ አቕስኪላ አሜቻው ያኻ::

ጐርጐራ ኢኮ ሪዞርትሾ  ካስጝስ ሹኻ እንዜጝትጝፂኩ ጉላልካ ኪላ ዝኩና::  እምፕላንቲ ባርዳሩ ግድ ያኹኽ ታናዳ ሜርኬብስ፣ ጀልባስ ስታ ታንኩዋስ ካስጝ ያኹስ ላጛንቲ ጐንዴር (አዘዞዴስ) ጐርጐራዋ  መኪናስ ያኹስ እሊው ዴሜካ ሄሊኮፍተርስ (ሩምብላስ) ያኽ::

ማልጛ ግዴው ጐርጐራ ኢኮ ሪዞርትዳ ውታኺዳ ትያትሩ ካንትፂ፣ ስራስሪው እንክርፂ፣ 500 ዴስ ጃላ አቖ አሜው ኩፕቲው አደራሺ ትክልቲው ብቲጊ አግሰቴ:: ባይላዌ አኺኔ ባይፃውላስ ዝቤናዌ ቴክኖሎጄ ቴኬምስታማ ግቢትስትኹ ጐርጐራ ኢኮ ሪዞርት ቱሪስትካስ ታምብስታንታ አኽጝስ ካሌ::

30 አሜትዴስ ጃላ ቓቒፂት ጐርጐራ ናካ ካንትስቴኒ ሊሊቴ ግዶ እምቴ:: ጐርጐራ ኢኮ ሪዞርት ይቶፕያውሳ አይጚኔ ታሪኮ፣ ናኪኔ ድሎስታ ቻሱሳ ቲኹዋ /ፋዬ/ እሚኹ ልግዲ ፕሮጀክትያኽ:: ኽታዌኔኪ ናኪኔኪ አሻሬ ፃምርፄታ እምቲት ብራንቴታጊ-ካንትስቴት ጐቤናንትካው ፍትኽፄት ስፍራኽ ጐርጐራ::