ክልኹ ዙርሚ

ታደለ አጋጄ

እምፕልታቕ እሌት ቺፋሱሳ ልቕልቕቴ አኮሜችጝስኪ ያኻ ማይቤራዊ፣ ኢኮኖሚውስታ ጊፁሳ ልቕልቐቴ አሬኽፃንኩ ስርኩ ልማትካዴስ ዳድ ቢዲሪዳ ቶኬምስቴ:: ጋያኪ ዳድ ኬቴምካዳ እሳንጝጝ ኬፍቲኒ ትክም ዝኩኽ አኽጝ አቕስትኹያኽ:: እንታ እኑስ ዴሜካ ጌፄሩ ዙራሙሪስ ዳድ ፋይፃቲውያኽ ንጝስ  ጋቲዊያኽ:: ሚንችትስ መኪንካ አግስታኑ ኬቴምዳ አኽጝስ እምፕልታቑ ፋይኪላ ዴሜካው ኬቴምዳ አኽጝስያኽ::

ሚንችካ አጌርካ ዳዱ ስር ልማትስ ሊሊቴ ትኩቶ እይጝስ እንፃኽስታና:: ይቶፒያኪላ ሊሊቴ ትኩቶ እይታታ እንፃኽስቴታጊ አግስቴው ስር ልማትካ ክቻዴስ ዳድ አባላምቲዳ እንኩርስቴ:: እንስኪላ እስካውካ ፕሮጀክትካ ጌፄርዴስ ኬቴሞስታ ኬቴምዴስ ጌፄሮ ታምትጝፃንኩ ዳድካ ግቢትስትጝዳ አግስታና:: ኬቴሙ ዙራሙሪ ዝኩኽሳ ዳዱሳ ሜቴኖ ሌጌፅጝስ ኬፍቲኒ ፅሬት ፄውስታማጊያኽ::

ጌፄሩ ሊሊትጙንኩ ዙራሙርካዳ ዳዱ ስር ልማት ግቢትስታታ ካሴንኩ እምፕልታቑ ቼፍ  ኪላ ልቓ ጋቲዊያኽ:: ዞንዴስ ወረዳ፣ ወረዳዴስ ኬቤሌ፣ ኬቤሊዴስ ኬቤሌ ታምትጝፃው ዳድ ግቢትስታውላ ይጉጝስ እምፕልታቕዳ ሚንች ችግር ታምባማጊያኽ:: እምፕልታቑ ሚንች ጊዙ ካሲ እሺኹስታ ወረዳዳ አግስታንኩሳ ሚንችካ ኬቤልካዋ ታምትጝፃው ግምጃ ቤትዴስ ሚሲሌኺስታ ታምትጝፃው ዳድ ግቢትስታውላ ይጉጝስ እምፕልታቕ ሚንቺትስ ካሴ ጉሻኒስ እጂካ:: ዳዶ ግቢትጝስ ማልጛ ቺጊርፂ ያኹኽ ካንስታ ጃላ ኩክሪ ብቲው እንጅኩዊ አኽጝታጊ ካቢትጝጛማ ዳድ ግቢትስቱኒውላ አቤሌሽስትጝስ እምፕልታቕስ አግልግሎቴ እያውላስ ሚንችካ ጊዝካዋ እጄ::

እምፕልታቑ ክርፂ ቺፅጝፂው ችግር ያኻማ ሚንችካ አሜትካዋ ቼፍፅኹ ቤ ኬፍቲ-ሚሲሊ ዳድ ዲጊስ ግቢትስታማ አግልግሎቲስ ብስታ ያኻ::

አቶ ሀይሌ ማዘንጊያ ሚሲሊ ኬቤሊው ዝኩዋንትካኽ:: ስኔ ጊፅጝዳ አሴሜርጜካማ ዝኩዊኔ ጉሳና:: ያኼስጉ ቤኬፍቲዴስ “ሚሲሌ ኺስታ ዝኩኽ ዳድ ወክትስ ግቢትስታማ አግልግሎቴ እያውላ ይጉጝ ጊፁ ልቕልቐቲዳ ቻኒስቶ ታምፅኹ አኽⶓ ዙሜካ:: ሚሲሊ ኬቤሊ ማልጛ ልማትስ አቕስታው ዙራሙሪያኽ” ኑንኩ አቶ ሀይሌ ኬቤሊዳ አሜሬትስታውሳ ዋሺኔኪ ምርቶ ወክትስ ጌቤልሾ ዲግስጝስ ዳዱ ችግር ቻኒስቶ ፌቴራማ እጂⶓ እርዳትፅካ::

ሚሲሊ ዲከረንሰ ችግኝ ዋጋው አኽጝስ ችግኝዴስ ኬሴልፁኑሳ ክሴሎ ዋይጝስ ቼጌርስትካማ እጂካ:: ማኪና ቱዋውሳኺስታ ክሴሎ ቡዌካማ ልኩስ እንዜጝካማ ካፅጝስ ጌዴድስትካ:: እንኪላ ኢኮኖሚስ አግፃኑ እሺኑ ጌንዜብ ዳዱ ችግርስ አቲⶓ ድኹዌካ::

ሚሲሊዳ ሚንችካ ጌፄንካ ዝኩዋኑ ኬቤሊ ያኹኒውላ ጌፄንካ ዳዱ ችግርስ ኪሳሪዳ ታምብⶓ ድኹዌካ:: ናካዳ ዳድ ግቢትስታማ አግልግሎቲስ እሺጝ ዴስቴ ፌቴራይኹ ያኹኒውላ ትራንስፖርቱ አግልግሎቲስ እሼውሳ መኪናዋ ምንግስት ሜዳባማ እንፃኽስታታ ፄውጝ ቱስታው አኽⶓ ዙሜካ:: “ግቢትስትኹ ዳዳ እምፕልታቕ ቱስቲስ እሚጝዳ እንዳርማኪ ችግር እላ” ኑንኩ አቶ ሀይሌ ኬቤሊ ኬሽኹ ልግስኒው አችዳ ያኻታ አቖ ቻኒጝስኪ ያኻ ችኔትስ አጌላጌላንኩ መኪንካ ቱዌካማ እንፃኽስቱኒ እምፕልታቕ ቴኬምስታንታ ያኻንኩ አኽⶓ ዙሜካ::

እሊት ሚሲሊ ኬቤሊው ዝኩዋንታ ዊዛሩ ፀሃይነሽ መኮነን ዳዱ ችግርስ ካሜናንታ ሳትስ እክምኒ ጝና ካታታ ካሜናቲታ ዳዱ ችግርስ ጉዳት ታንቡስ ሴጝⶓ ዙሜካ:: ሼርካ ካሜናንትካስታ ቑንዳስቱንኩ አቕ ካስካማ አኬምሰትጝስ ቼጌርስታሺኑ አኽⶓ ኪላ ድኹዌካ::

ዳድ ግቢትስታማ ዳቔርስትጝ ዴስቴ ፌቴራይኹ አኽⶓ ዙሙንኩ ዴሜካ እሊው ሚስሊ ኬቤሊው ዝኩዋንትካ ኪስ አለም ወንድምያኽ::

ዳድ ግቢትስታውላ ይጉጝ ኬቤሊው ዝኩዋንትካዳ ማይቤራዊስታ ኢኮኖሚውሳ ቻኒስቶ ታምፃሺኹ አኽⶓ ዲብሱንኩ ኪስ አለም ዳድ ግቢትስትጝ እምፕልታቕስ ሚንቾ ትክሞ እያው አኽⶓ ዙሜካ:: አሬሳቻንትካ አሜሬቱኑሳ ምርቶ ወክትስ ጌቤልስ ዲግስካማ ቴኬምስታንታ ያኻና ንካ::

ግቢትስትኹ ዳድ አቤሌሽስታቲታ ቱስታው ዳድስ አንኬባንኬባንኩ አኽⶓኪላ ዙሜካ:: ኩሪ ዳዶ አቤሌሻቲታ እምፕልታቕ ጜዋንቶ ካፅጝስ ውላዴስጊ ማንዲስታው ቴግባሪያኽ ንካ:: ይንታውስኪላ ዳድ ፋይስታውሳ አግልገሎቴ እያታ ወክትስ ፅጋኒ ፄውስትጝ ቱስቴ ንካ::

አዊ ብሄረሰቡ ቺፅጝፂው ዳዱ ሜምሪው አላፊ አቶ ትላሁን ሽቴ “እን ወክት ሰላሙ እንፅኺስ ትኩቶ እይናና እንፃኽስትናው ጊዝ ያኹኒውላ ሰላሞ ሴፌንፅጝዴስ ኬምፕስ ኬምፖ ሚንችካ ዳዱ ስር ልማትካ እንፃኽስትካ” ንካ:: እን ዳድ ግቢትሰትጝ እምፕልታቑሳ ክልኾስታ አንጌሌትስትⶓ ዙርሜ እይኹ አኽⶓ ቶኬምካ:: ሰላሞ ፋያንቲ እዝብ አኽጝታጊ ሰላምሰ እንፃኽስትጝዴስ ኬምፕስ ኬምፖ ልማቱሳ እንፅኼ አኮሜ ሜቹኑ ጊዞ አኽⶓ ዙሜካ:: ዳድ ግቢትስታማ አግልግሎቲስ ቢኪጝ እምፕልታቕ ማልጛ ዴስቴንካ አኽⶓ ዙሙንኩ አላፊ እምፕልታቑ ካሲ ዙርሜ አግፅⶓኪላ ድኹዌካ:: ማልጛ ካዌንስታ ብቲው እንጀኩዊ ቺጊርፂ ያኹኽ ዙራሙሪ አኽጝስ እምፕል እምፕል ስፍሪዳ ማልጛ ቼጌርፃው አኽⶓ ዙሜካ::

ዳዱ ልማት እንፃኽስትጝ እሊኩሳ ልማትካዋ ያጋው አኽⶓ ቶኬሙንኩ ዳዱ ሜምሪው አላፊ ዳድ ግቢትስቱኒዴሰ ፋሌንጋ መኪናዋ ሜዴብጝ ፋይፃው አኽⶓ ዙሜካ:: አኽጝስኪላ ብሄረሰቡ ቹፅጝፂው ትራንስፖርቱ ሜምሪሊ ዙሚትጝጝስ መኪና ሜዴብስታማ እምፕልታቕስ አግልግሎቴ እያታ ፄውስታው አኽⶓ ጌሌፅካ::

ዳቔርስታማ አግልግሎቲስ ብስታ ያኹኽ ቤኬፍቲዴስ ሚሲሌኺስታ ዝኩኽ ዳድ 17 ኪሎ ሜትር ያኹስ 18 ትኩሚ 2 ሚሊዮን ጌንዜብ ፍሺ ፄውስትኹ አኽⶓ ዙሜካ::

ዳዱ ግቢትስትጝ እምፕልታቕ ክቻዳ ሚንችካ አሜትካዋ ክርፂ ቺፅጝፂው ካሲ ያኻማ እጂኹስታ ጝሺ ዴሜካ እምፕልታቖ ቴኬምስታንታ ፄውⶓ ዙሙንዙ ዴሜካ አንኪሺ ጉዋጉሲ ወረዳው ቹዋ ቺፅጝፃንቲ አቶ ደሳለው አምሳሉዋኽ::

አዊ ብሄረሰቡ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው ሊጊሲሚ ጊዙ እምፕልታቑ ካሲ እሺኹ ቤኬፍቲ- ቱልቲ -ሚሲሊ ኬቤሌ አገው ግምጃ ቤት ኬቴምሊ ታምትጝፃው ዳድ ናኪኒ ጊዝዳ ዙርሜ አግፅⶓ ቶኬምካማ ዳድ እምፕል አጌርስ ኢኮኖሚውስታ ማይቤራዌ ልግስኔ ቼሜትጝፅጝስ ኬፍንኹ ትክም ዝኩኽ አኽⶓ ዙሜካ::

“ዳድ ዝኩዋኒ እዝብስታ ልማት ታምትጜ፤እምፕልትስታ አብርት ሌጌሴ፤ እምፕልታቑሳ ቲኖ ማንዲፅጝስ ካሊስቴ” ናኒስ ዳዱሳ ዜርፋ ሚንቼ አግልግሎቴ ጌሌፅካ::

“አሜሬትጝስስታ አሜሬትስትኹሳ እንዜጝትጝፅጝስ ዳድ ልግስኒው ቹዋ ኩልፍያኽ” ኑንኩ ቹዋ ቺፅጝፃንቲ ልማትስ ቴኬምስታንታ አኽⶓ ቼሜትጝፅጝስ ካሊስታው ኩፅኒ ውላጊ ሰላምስ ዜቦ ቲሪናኒያኽ ንካ:: ግቢትስትኹሳ ዳዶ እምፕልታቕ ጜዋንትስ ማንዲጝስታ አንኬባኬብጝ ፋይፃው አኽⶓኪላ ታክስፅካ::