ዝኩዊኒው ክብርናቲስ “ክርጝስታ ዝኩጝክቻዳኽ” ዝኩዋንትካ ጌቤል አሬኬዛታ እንፃኽስስትናናጌኽ “ጊፁስታ ጌቤል ልማት ሜምሪ”

አለሚቱ የኔት

ባሳማጊ ካስኹ ዝኩዊኒው ክብርናቲስ “ክርጝስታ ዝኩጝ ክቻዳኽ” ናኒስ እንጃቢሪ ኬቴሙ ዝኩዋንትካ ዲብሱና::

ክብርናቲ ኬሴትስቱኒኪላ ጌቤል አሬኬዛታ እንፃኽስስታማጊ አኽⶓ አዊ ብሄረሰብ ቺፅጝፂው ጊፁስታ ጌቤል ልማት ሜምሪ ጌሌፃ::

ምርቱ ዲግስጚውስታ ሾሜታንትካው ሚንችት ታምትጛውላ ይጉጝስ ዝኩዊኒውሳ ክብርናቴ ፌቴራ:: ዝኩዋኒው ክብርናቲኪላ ጝሺዳ ውላውሳ ቴኮ ኔክፃ::

አዊ ብሄረሰብ ቺፅጝፂ እንጃቢሪ ኬቴሙ ዝኩዋንትካ ዊ/ሮ ሰዋሰውወርክ ታየ እሌት ቺፋ ዴሜካው ጌቤሉ ክብርናቲስ ፃሬ ጋሬካማ አግፃንትስ ጌንዜባስ ዝኩዊኔ ጉስጝስ ካሌካያስኩ አኽⶓ “ዝኩጝስታ ክርጝ ክቻዳኽ” ናኒስ ድኹዌካ:: ሳቱስታ ጌርኩ ሊሊትስ ምርትካዳ ካንትስታው ኬፍቲኒ ዋይሚው ሊሊት እምፕልታቑ ዝኩዊኒዳ ስጋታ ያኻ::

ትኩታኩ ቤንካ ጌቤሎ አሬኬዝፅጝስ ልቕልቓኒስ ኔኬታችኹኒኪላ ምርቶ ቤፍፅጝስ ጄውጝስ ፋያኒ አግፃቲንኩ አኽⶓስታ ዙርፅካማ ዋይሜ ኬቤርፅጝስ ጌቤልስ ዲግሳንኩ አኽⶓኪላ ዊ/ሮ ሰዋሰውርክ እንክርፄካ::

እሊት ኬቴሙ ዝኩዋንታ ዊ/ሮ ማንተግቦሽ ምትኩኪላ ግርብ እንፅኻሳ አግፃኑ ጌንዜብስ እሌታ እርባቴ ዝኪዊኔ ጉሳሺንኩ ያኹስ ናካዳ ኩፅኒ እንፅኺ እላ አኽጝሊ እምትጛማ ጌቤሉ ክብርናቲ ይወቶ ፍታኒዳ ሚፅፅⶓ ድኹዌካ::

ፋብሪኪው ምርትዴስ ፌይኹስ ዙራሙሪዳ አሜሬትስታው ምርትዳኪላ ኬፍንኹ ድምክኒ ካንትስትጝስ ዜሬቕቲኒ አችዳ አግስታንኩ እምፕልታቕ ዝኩዊኔ ጉስጝስ ችግራኻዳ አኽⶓ ዝኩዋንታ ዲብስካ::

ይቶፒያው ይኮኖሚ ውማይቴንካው ማቢሪ አጌራውሳ ጌቤሉሳ ክብርናቴ ካንትኹስ ፍሽኹ ፅናት ዝኩዊኒው ክብርናቲስ ባርኾቼውሳ እርዳቴ እንፂⶓስታ አጌራኻሱ ፖለቲካው አሪጊግጜ አቲⶓ ምክንያትታ ቶኬማ::

አዊ ብሄረሰቡ ቺፅጝፂው ጊፁስታ ጌቤሉ ልማት ሜምሪው አላፊ ጌሌፁኑውስታጊ አጌራዌ ማክሮ ኢኮኖሚውሳ ኬሽጝጜ ምክንያታ ፄውጝስ ቱስታ ጋቲው ዋይሚው ድምክኒ ዝኩዋቲታ ብሄረሰቡ ቺፅጝፂ አችስ ግብረ አይል ቲሪትጛማ ሴላም ዝኩክ ኬቴምካዳ እንፅኺ ጄሜርስታ::

ጌቤሉ ምርትካዳ ምክንያታ ጋው ዋይሚው ድምክኒ ካንትስትⶓ ሼውንጝስ ቱስታ ጋው አኽⶓ እርዳትፅጝስ ክችሳንታ ፄውⶓኪላ አላፊ ጌሌፅካ::

ዋይሜ ክችሳንታ ድኹስታኒ ኩስጜ እንኮኼካያስኩ 134 ጌፄንካው አችትካ አሼግስትⶓ፣ 240 ጌፄንካስ ቲንኪክፂ እይስትⶓስታ 1ሻይ 4 ሊኻ ጌፄንካ ዴሜካ ኩስጚስ ፌይስትⶓኪላ አላፊ ዴሜክካማ እርዳትፅካ::

ክብርናቴ አሬኬዝፅጝስ እንፃኽስስታንኩ ክቻዴስ ሾሜታንትካው ማቤርካ እምፕልታቕስ ምርትካዋ ሜቴቴንጙኽ ዋይሚስ ዲግሳንታ ፄውጝስ ምንግስትዴስ 83 ሚሊዮን ብር ጉሺ እይስታታ ፌኬድስትⶓ አላፊ እርዳትፅካ::

ድምክኒስኪ አድማስ ውላቱዊ ማቢሪ ሾሜታንትካው ማቤርካስ ያኻውሳ 1ሻይ 229 ኩንታል ሽኩዋሮ ዲግሳስኩኽ አኽጝስ እምፕልታቕስ ታንባታ ፄውጙሳ እንፅኼ አኮሜቻንኩ አኽⶓ አቕፄካ::

ሾሜታንትካው ማቤርካ ዳሜካ ዙራሙሪ ቺፋ ዝኩዋንትካዋ ጐሌላኑውላስ ታምፃንኩ አኽⶓኪላ ጌሌፅካ:: ክብርናቲ አሬኬዛታ እንፃኽስታችኹኒኪላ ዋኽስዋኾ ችግሮ ጌጌውጝስ ኩፅኒ ካሊስታያሱ አኽⶓስታ ፍንሾስ ይሴኖ እንፅኼ ካሴው አኽⶓኪላ አላፊ ቶኬምካ::