ግብሮ ኩፕፅጝስ እንፃኽስስታማጊ አኽጝ ጌሌፅስትኾ

ዘውዴ በካሉ

አዊ ብሄረሰቡ ቺፅጝፂዳ 2016 ግብሩ ዝቤንዳ ሹኻ ቢሊዮንዴስ ጃላ ግብሮ ኩፕፅጝስ እንፃኽስስታማጊ አኽጝ ጌሌፅስትኾ::

ምንግስት አጌር አቑሳ ይኮኖሚያዌ፣ ማቤራዌስታ ፖለቲካዌ ልግስኔ አሬኽፅጝስ ኬፍቲኒ አላፍት ዝኩኼኽ:: አላፍቶ ፊትጝጝስኪላ ምንግስት ጚጛርትጛሱ ጌቢ ፋይፄ:: እስጜ እንፅኼ ካስጝፅጝስ ያኻውሳ ጌቤ ኩፕፃው ጌቢው አግፅፂ ክቻዴስ ግብር እምፕልስታ ቹዋ አኽጝ አቕስቴ::

ግብሮ ወክትስስታ አምንስታንትስ ኬያንኩ አካልካ ዝኩንኩ ያኹኒኪላ ወክትስ ኬያቲንኩስታ አትሌልፃንኩ ዴሜካ ድሳላ:: ጋያኪ 40 ዴስ 60 ቢሊዮን ዶላሮ ኺስታ አቴት አኽⶓ አፍሪካው ይኮኖሚው ኮሚሽንዴስ ንባሮ አግፃ ኑሳ አሚኮ ኦንላይን አንቤብፃ::

አዊ ብሄረሰቡ ቺፅጝፂ ዚጋሚ ወረዳው ግብር ክንቲውስታ ኮምኒኬሽኑ ቴቤቤርጝፃንቲ አቶ ደመላሽ ፈካዱ  2016 ግብሩ ዝቤንዳ ግብርዴስኪ ያኻ ታክስዴስ ላጛ ሚሊዮን 242ሻይ 202 ብር ኩፕንⶓ እርዳትፅካ::

አጌራው አችስ ፌቴርስትኹ ሰላሙ ችግርስ ዚጋሚ ወረዳታጊ ሹኻ ኬቤልካዴስ ግብሮ ኩፕፅጝስ ቼጌርስትⶓ ጉሹንኩ አቶ ደመላሽ 2016 ግብሩ ዝቤንዳ ትክላሊስ ኩፕፅጝስ አኬድስትኹ ዋልታ ሚሊዮን 915 ሻይ 765 ብር ያኹስ ልቓ ሰላም ቼሜትጙኽ ዙራሙርካዴስ ዴሜካ ላጛ ሚሊዮን 242 ሻይ 202 ብሮ ኩፕፅⶓ አቶ ደመላሽ ዙሜካ::

አች “ሐ” “ለ” ስታ “ሀ” ግብሮ ኬያንትካ እይስትኹ ጊዝስ ኬያንታ ፄትቲኩ አካልካሊስታ ትኩታኩ ቤንካሊ አኽጝስ ጛውሳ ልቕልቕቴ አግፃንታስታ ግብሮ ወክትስ ኬያንታ ሼውቴ ፌቴርካማጊ አኽⶓኪላ እርዳትፅካ:: አች “ሐ” ግብሮ ኬያንትካ አምሊ 1 ጌርክዴስ 30 ጌርኮ ኺስታ፣ አች “ለ” አምሊ 1 ጌርክዴስ ኮግሚ 5 ጌርኮኺስታ እንቲታኪ አች “ሀ” ዴሜካ አምሊ 1 ጌርክዴስ ትክምቲ 30 ጌርኮኺስታ ኬያንኩ አኽⶓ ጌሌፅካማ ውላጊ አች ግብሮ ኬያንትካ ግብሮ ወክትስስታ አምንሰታንታንትስ  ክፃታ ጋቲታ ኬያንታ እንፅኼንቶ ፌያፌይጝፅካ::

ፋግቲ ለኮማ ወረዳው ቺፅጝፃንቲ አቶ ታገለ እጅጉ እምፕል ምንግስቱ ይሴንት ካንትስታው ሰላሞስታ ሚፄ ፃምርሳማ እንፃኽስታኒ አኽⶓ ጌሌፅካማ ሰላሙ ችግራኻዳ ያኼካማኪላ 180 ሚሊዮን ብሮ ግብርዴስ ኩፕፅጝስ አኬድⶓ ጌሌፅካ::

ፌይኹ አሜትዳ ሰላሙ ችግር ምክንያታስ ግብር ኩፕ ናውላስ ይጉጝስ ላጛ አሜቱሳ ግብሮ አሬሳቻንትካዴስ እምፕል ትኩሚ 17 ሚሊዮን ብሮ ኩፕፅⶓ አቶ ታገለ እርዳትፅካ:: ዳድዳ ኬላዋ ብስጝስ ዴሜካ ሮያሊቲዴስ ላጛ ሚሊዮን ብሮ ኩፕፅⶓ ጌሌፅካማ ፌይኹ አሜትዳኪላ ግብር ኩፕናውላስ ይጉጝስ ክልሉ ምንግስት 54 ሚሊዮን ብሮ ጉሺስ እይⶓኪላ እርዳትፅካ::

እን አኽጝስ ጉሺዴስ ፊጝስ 2016 ግብሩ ዝቤንዳ ችግራኻዳ ያኼካማኪላ ግብሮ ኩፕፅጝስ እክድ እምስታማ አች “ሐ” ግብሮ ኬያንትካ፣ 511 አች “ለ” ላጛ አቕ እንቲታኪ “ሀ” ዴሜካ 11 ግብሮ ኬያንትካ ዝኩⶓኪላ ጌሌፅካ::

አኬድስትኹሳ እክዶ ሳኪትጝፅጝስ አመራርካሊስታ ፄትቲኩ አካልካሊ አኽጝስ ፃምርቴካማ እንፃኽስትጝስ ዳብዚ እንኩርስትⶓ አቶ ታገለ እርዳትፅካ::

አዊ ብሄረሰቡ ቺፅጝፂው ጌቢ ሜምሪው አላፊ አቶ ፈተነ ትላሁን 2016 ግብሩ ዝቤንዳ ግብርዴስኪ ያኻ ታክስዴስ ሹኻ ሚሊዮን 148 ማሊዮን 643 ሻይ 494 ብሮ ኩፕፅጝስ እክድ እምስታማ እንፃኽስስታማጊ አኽⶓ ጌሌፅካ:: አች “ሐ” ግብሮ ኩፕፅጝስ ሰላሙ ችግር ዝኩክኪ ያኻ ልቓ ሰላም ዝኩክ ዙራሙርካ ዝኩⶓ ጉሽካማ እኒጛዴስ ዙራሙርካዴስ 13 ሻይ 330 ግብሮ ኬያንትካ ዝኩⶓ ጌሌፅካ:: ሰላሙ ዙራሙሪዳ ግብሮ ኬያንኩ አቕዴስ 70 ሚሊዮን 57 ሻይ 381 ብሮ ኩፕፅጝስ ካሊⶓኪላ እርዳትፅካ::

ብሄረሰቡ ቺፅጝፂው አችስ አች “ሐ” ግብሮ ኬያንትካዴስ ዚጋሚ ወረዳስታ ጉዋንጉዊ ወረዳዳ ሰላሙ ዳንጉዊኒኪላ ያኼካማ እክዶ ሳኪትጝፅⶓ አቶ ፈተነ ጌሌፅካ::

ባንጂ ወረዳስታ ቻግኒ ኬቴሙ ቺፅጝፂ ሊኽዴስ 70 ታፋ እክዶ ሳኪትጝፅⶓ ዙሜካማ ግምጃቤት፣ አዩ ጉዋጉሲ ወረዳ፣ አንኪሺ ጉዋጉሲ ወረዳስታ እንጃቢሪ ኬቴም ዴሜካ ዜርቕቲኒ ፊፂምጚዳ አግስታንኩ አኽⶓ ጌሌፅካ::

ንጙዊኒ ግብሩ ዝቤንዳ ሰላሙ አኺኒ ቼሜትጛያስኩ ዙራሙርካ ዳንግሊ፣ ፈንድካ፣ አዲስ ክዳምሰታ እሊኩጊ ሰላም ቼሜትጛያስኩ ዙራሙርካ እምፕል ጊፂኒ ኬይጝ ቱስታውሳ ውሳኔ ወሴንካማ 2015 ግብሩ ዝቤኑሳስታ 2016 ዝቤኑሳ ግብሮ ኬይፅጝስ እንፃኽስቴካማጊ አኽⶓ እርዳትፅካ::

ንጙዊኒ ግብሩ ዝቤንዳ ትክላሊስ ኩፕፅጝስ አኬድስትኹ ሹኻ ቢሊዮን 148 ሚሊዮን 643 ሻይ 494 ብር አኽⶓ እርዳትፅካማ ግብር ዋሺኒኪ ጊዝስ ይጉዋቲው አኽጝስ እምፕልታቕ እስጜ ማሌካማ ወክትስ ኬያንታኪላ እንፅኼንቶ ፌያፌይጝፅካ::