ዳሌስናንታ ጋው

ምንግስት ይፋ ፄውኽ ማክሮ ኢኮኖሚው ኬሽጝፂ ፕሮግራም ባርኾቼውሳ ምንዛሪውሳ ዛቢትጜ ክችስጝስ ሊጊሲሚ ጊዙ ባርኾቼው ኬይጚው ሚንዛኑሳ ዳንጊዊኔ ኽይጝስ፣ ጌንዜቡ ፖሊሲውሳ ማይኬፎ ዝቤናዋ ፄውጝስ ጌቤሉሳ ክብርናቴ ኔኬትጝስ፣ እድቴና አኽⶓ ኔኬትጝስ አጌራኻሱሳ ጌቤ ሌጌፅጝስ፣ አጌራዌ ልማቱሳ ፋዩ አጌራኻሱ አክምስ ሳኪትጝፅጝስ፣ ፋይናንሱሳ ዜርፎ ቲን ዌና ያኻታ ይስጝፅጝስስታ ምንግስቱሳ አግልግሎቴ እይጜ ኬሽጝፅጝ ኩልፍ አላሚስታ ግብ አኽጝ ቶኬምስታ::

እስጜ ማክሮ ኢኮኖሚውሳ ኬሽጝጜ ሲፋማ ዶላሩ ምንዛሪኪላ ዴሜካ:: ሴላም አቲጛስ እሌትዴስ እሌቶ ዴሜኩስ እጂኹ ጌቤሉ ክብርናቲ ባስ ባሳሳ አቒያ ፃራ ጋራማ አግፃውስ ጌንዜብስ ዝኩዊኔ ጉሳቲታ ፋብሪኪውኪ ያኻ ግብርኒው ምርትዳ ድምክኒ ኬሴትስታ::

ጊፂኒ ዴሜካውዴስ ፌይኹስ እኑስ እኖ ታክስጚ ድሳማ ጌንዜብ ዝኩክ ጛርት አቕ ቤዴርካማ ምርቶ ኩችፅጝስ ጌቤል ባግ ባግ ናታ ፄውጝስ ጌቤሉ ክብርናቲስ ፍሼ ፄውጝኪላ ካንትስታ::

ብቲ ቹኽቺፋ ዴሜካው ጌቤሉ ክብርናቲስ ዜሬቕቲኔ ዝኩዊኔ ጉ ጉሳንኩስታ ጌርክ እንፅኻስ ቺትጛንኩ እምፕልታቕዳ ጋያኪ ጄርኬ ሌጌፃንኩዳ ቺጊርፂ ጊዝ ያኻ::

ማክሮ ኢኮኖሚውሳ ኬሽጝⶓ ካንትኹስኪላ ኢኮኖሚው ውማይቴንካ ፖሊሲ ቴግባራዋ ያኻማ አሬጌግጝምባኺስታ ዝኩዊኒው ክብርናቲ ኬሴትስትጝስ ካላው አኽⶓ ስጋትታ እንኩርካ:: ናካዳ ካንትስታው ቴግባርኪላ እንጜኽ:: እስጜ ድኬ ጊዞ ፌይጝስ ካሊስታው ኩፅኒ ታክስጚስስታ እርዳትጚሴኽ::

ዝክኹ እላቲውስ ቤንጝፅጝ አጌራው ባይል አኽጝስኪላ እርዳትጚ ፋይፃንቴኽ:: ጌፄንካኪላ ያኹኒ ቱስታጋውሳ አድርትⶓ ፋይጝስ ሜቴንዴስ ጃላ ምርትካዳ ፄዋኑሳ ድምክኔ ሼው ንካማ ካንትጝስ ባይጝ ፋይፃንቴኽ::