ዴክ ሻኽሱት ኬቴማ

ታደለ አጋጄ

እምፕሎ አሜቶ ቼፍፅኹ አማኻሪ ክልልዳ ኬሴትስትኹ ጋቻ ክልሉ እዝብዳ አቕቱ፣ ሼው ፅንታው፣ ማይቤራዊስታ ኢኮኖሚውሳ ቻኒስቶ ታምፃ::እምፕል ስፍሪዴስ እሊው ስፍሪሾ ልቕልቔካማ እንፃኽስታቲንታ ዳዱ ልምትጝ ፅንጋኻ ያኻ።

ሚንችካ ዙራሙርካዳ ምንግስቱ እንፅኺ እንፃኽስስታያ::ክንታንትካ ክንቲዴስ ሴጋ ያኼካ::ቑንዳስቱንኩ እክምኒ ጝና ካስካማ አኬሜስታቲንታ፣ ካሜናንትካ አኪም ጝናዳ ካሜናቲንታ ትክላሊስ እምፕልታቖ ሚንች ጉዳትስ ታምፃ::

ኬሴትስትኹ  ፄትቲው ችግርስ አሬሳቻንትካ ሳኑዴስ ችኾ ኺስታ አሜሬትካማ ምግብስ ጛጛርትጛሳ ካላቲንታ፣ ጌፄንካ ጊፅሳቲንታ ዝኩዊኒው ክብርናቲ ኬሴትስታታ  ፄዋ::

አዊ ብሄረሰቡ ቺፅጝፂው ዳንግሊ ወረዳዳኪላ  ፄትቲው ችግርስ ማልጛ ጉዳት ታምባ::እምፕሎ አሜቶ ዋኾ ዋሺኒኪ ምንግስቱ እንፅኺ እንፃኽስስታያ::

ዲጊ ጊዝዴስ ናቴ ኩፅኒ አጌሩ ካላካልጚው ስራዊቲ ኬቴማ ጉድ ሰላሙ አኺኒሾ ትያታታ ፄዋ።

ስሞ ጌሌፅጝስ ፋያያሱ ዳንግሊ ኬቴሙ ዝኩዋንቲ እምፕሎ አሜቶ ቼፍፅኹ ሰላሙስታ ፄትቲው ችግር እምፕልታቕዳ ሼው ፅንታሱ፣ ማይቤራዊስታ ፖላቲካውሳ ቻኒስቶ ታምፅⶓ ድኹዌካ::ኬቴማው ኢኮኖሚው ልቕልቕቲ ኬፍቲኒ አችስ ጉዲስትⶓ ቶኬምካማ ናካ ኩፅኒ ኬቴማ ጉድ ሰላሙ አኺኒዳ አኽⶓ ዙሜካ::ሊሊትጙንኩ ምንግስትኩ ኾትካ እንፅኼ ጄሜርካ::ፄትቲውሳ እንፅኼ እንፃኽስታንኩ፣ ሚፄ ኩፕፃንኩ ኾትካስታ እሊኩጊ እንፅኺሾ ቱⶓ ዲብስካ::ሰላም ይንታው ኩስጝጚስስታ ዙሚትጝጝስ አኽጝስ ሜሳሬ ዶንጌትካማ ሴብትጝጛንኩ አይልካ ምንግስት ፄውኹሳ ሰላሙሳ እቑዌ ቻቤልካማ ችግሮ ኩስጝጚስ ኽይጝ ቱስቴ “ንካ::እምፕልታቕኪላ ዶንጌቱንኩ አይልካ ሰላምሾ ይንታንታ ቻኒስቶ ፄውጝ ፋይፃንቲ አኽⶓስታ ዲብስካ::

ዎሬሞ ሴቤክጝዴስ ኪቻ ሰላምስ ዜሜርጝ ቱስታው አኽⶓኪላ ዲብስካ:: ዎሬም ኢኮኖሜ ጉዴ፤ጋቻውሳ ጊዞ ሌጌፄ፤ ሰላም ኩፅኒ ውላውጊ ይጋሪ አኽጝስ ዶንጌቱንኩ አይልካ ዳራዳርጛንታ እቑዌ ፄውጝ ፋይፃንቲ አኽⶓኪላ እንክርፄካ:: ምንግስት ዳራዳርጚስ ቤቴርኹሳ ታፎ ይስጝፃማ ሲፍፅጝስ ዊዳፊ ሰላም ሴፌናታ ፄውጝ ፋይፃንቴ አኽⶓስታ አች ቺፋ ቲሪትጙኽ ሰላሙ ካውንስል ስላምስ ኽስኹስ እንፃኽስትጝ ቱስታው አኽⶓ ታክስፅካ::  ዳንግሊሊ ኬቴሙ ትክትሊ ከንቲባ አቶ ካሳሁን አስማረ ስልኪስ ፄውንኹ እጂጚዳ ጌሌፁኑውስታጊ ክልልታ ኬሴትስትኹ ፄትቲው ችግርስ ዳንግሊ ኬቴም እምፕሎ አሜቶ ዋኾ ሰላሞ አቴታ እጂቴ::

ያኼስጉ ዲጊ ጊዝዴስ ናቲ ኩፂ ካላካልጚው ሰራዊቲ፣ ክልሉ አድሜ ቤቴናንቲ አይል፣ ሰላሞ ማንዳንቲ አይልስታ ኬቴሙ ሚዲቢኒ አይል እዝብሊ አብርታ ፄውስትኹ አሬባሬብጚስ ኬቴማው ሰላም ዙራማጊ አኽⶓ እርዳትፅካ::

ፌዩንኩ ሚንችካ አርፍካዋ አግልግሎቴ ቲሪፃሺንኩ ምንግስቱ ኾትካስታ ጛርቱ ኾትካ እዝብ ፋያውሳ አግልግሎቴ እይⶓ ጄሜርካኽ ኑንኩ ትክትሊ ከንቲባ፤ ኬቴሞ ጉሳንኩ ፖለቲካኩሳ አመራርካዋ እንግራ ዙርፃማ ቲሪትጝፅጙ እንፅኺ ካስጛማ አመራር ድጋፎስታ ሲፋሲፍጜ ፄዋማጊ አኽⶓኪላ ጌሌፅካ::

ኬቴሙ እዝብ ሰላሞ እንካናንቲ አኽጝታጊ ኬቴማ ምንጊሱ ሰላምሾ ዙርታታ ፃምርትጙኽ አይል ኬፍቲኔ እንፅኼ እንፃኽስትጝስ ሚፂ ኩፓታ ፄውስታማጊ አኽⶓኪላ እርዳትፅካ።

ውላ ኬቴሙ ኬቤልካዳ ሰላም ዙራማ ልማቱ እንፅኺ አኮሜችስታማጊ አግስታው አኽⶓ ዙሜካ:: አቶ ካሳሁኑ ጊሊፄታጊ፤ እን ልማት ዊዳፊስ ቼሜትጛታ ይስጙኽ ኩስጚ አች ቺፋ ዝኩኽ እምፕልታቕሊ ኩስጚ ፄውስታማጊያኽ።

ሰላሙ ችግርስ ሜኬሬ ካንቱስ ችኹኽ ኬቴሙ እዝብ ናካ ይንቱኽ ሰላምስ ዴስ ናማ ዶንጌትኹ አይል ፅንፊኒ ኬች ፌፄማው ፂዊ ቱስታ ጋው ዳድስ እዝቡሳ ሰላማዌ ዝኩዊኔ አዌካው አኽⶓ ሼውንጝስ አዌጌዝካማጊ አኽⶓኪላ ትክትሊ ከንቲባ እረዳትፅካ::

ኬቴሙ ልቕልቕቲ ዝኩዋቲታ ዳድ ልምትጝ፣ኾትካ አግልግሎቴ ቲሪፅጝ፣ አቖ ኩጝ፣ ኾትካዋ ዜሬፍጝ፣ አብቶ ንብሬቶ ኪሚጝ ኬቴሙ እዝቡሳ ሼውፅንታሳ ማልጜ ጉዱኹ ዊ አኽⶓ ጉሹንኩ ትክትሊ ከንቲባ እዝብ እን እንኮኽስትዴስ ፋማ ልማትሾ ዙራታ ኩስጚ ፄውስታማ ልቕልቕቲ ጄሜርስትⶓ ቼሜትጝፄካ::

ቲኑ ኾትካ ዳድ ልምትጝሊ እምትጙኽስ ዳላው ግባትስታ ብሪ ዲጋውላ ይጉጝስ እዝብ ቼጌርስታሺኹ ያኼስጉ ናካ ኩፂ አግልግሎቴ እይካማጊ አኽⶓ ጌሌፅካ::

ናካ ጄሜርስትኹ ሰላም ዊዳፊ ያኻታ እዝብ ፃምርትጙኽ ፄትቲ አይሉ ኬምዳ አኽጝ ቱስቴ፤ ካዌናኻ ቱንኩ አካልካ ዴሜካ ምንግስት ዲግስኹሳ እቑዌ ቻቤልካማ ችግሮ ሰላማዊ ዳድስ ዲግስጝስ ኩስጝጚሾ ይንታንታ እቑዌ ዲግስካ።

አቶ ይርጋለም ዳኛው ዳንግሊ ኬቴሙ ቺፅጝፂው ብልፅግኒ ፓርቲ ቻፊ ፅፌት ጝናሱ አላፊያኽ::ክልልታ ፌቴርስትኹ ፄትቲው ችግር ዳንግሌ ከቴሞ ስታ ዙሬ ኬቤሊውሳ እምፕልታቖ ጉዳትስ ታምፅⶓ ጌሌካ::

አቕቱ፣ አክኽካው፣ ማይቤራዊስታ ሼው ፅንታውሳ ጉዳቶ ታምፃማ ፌይⶓስታ ፄውስትኹ ሰላሞ ማንዲፅጙ እንፅኺስ ኬቴም ናካ ምንጊ እሽቲኹ ሰላምሾ ኪላ አቶ ይርጋ እርዳትፅካ::ኢኮኖሚው ፣ፖለቲካውስታ ማይቤራዊ ልቕልቕቲ አኮሜችስታማጊ አኽⶓኪላ ቶኬምካ።

አቶ ይርግ ኑኑውስታጊ ይስጙኹሳ ኩስጜ ኬቴሙ እዝብሊ ፣ ምንግስቱ እንፃኽስታንትካሊ፣ እንዝርፃንትካሊ ጌፄንሊስታ እሊኩሊጊ ፄውስታማ ሰላም ቼሜትጝጝስ ካላ።

ናካ እዝብ ቴኩሱሳ ድምፅ ምኽምኽ ናማ ቹኒትⶓ ፋያቲው አኽⶓ ፄውስቱንኩ ሜድሬኽካዳ እሳንስ ጉሽⶓ ዙሙንኩ አቶ ይርጋለም፣ ኬቴሙ አመራርኪላ እዝብ ካሴኩ ልማቱስታ ክርፂ ቺፅጝፂው ችግርካዋ ኽይጝስ ካላታ እስካዊስ አመራሮ ቲኪጙ እንፅኽካ አኮሜችስትካማጊ አኽⶓ ቶኬምካ::

ካሲ ዝኮ ናው ዋሺኒኪ አካል ዝኩኒጊ ኬቴሙ አመራር ቹኒትጝስ ቴርትⶓ ቶኬሙንኩ አላፊ፤ ካዌናኻ ቱንካ አካልካጊ ምንግስት እይኹስ ሰላሙ ጉላሊው ድልስ ዙርካማ ጛውሳ ካሴ ዲግስጝስታ ጛው እዝብስ ሰላምስ ቢዲሬ እይጝ ቱስቴኽ ንካ።

እዝብ ሰላሙ ችግርዳ ቱዋማ ልማቶ ቲሪፃቲታ አሬሳቻንትካስ ዳላው ማዳባሪስታ ጉልሊ ዜር ዲጋታ ፄውስታማ ልማቱ እንፅኺ ክርፂ አኺኒዳ አግስቴ ኑንኩ አቶ ይርጋለም ፍንሾስ ኬቴሙሳ ልማቶ ቼሜትጝፃንኩ እንፅኽካ ይስካማ ሲፋንኩ አኽⶓ እርዳትፅካ::

ፄትቲው ችግር ምክኒያታስ ኬቴማኻዳ አግስታንኩ ክንቲ ጝንካ ዋኽስ ዋኾ ልምትካማ ችኽⶓ ጌሌፁንኩ አላፊ 2017 ም/አሜትስ ዋኽስ ዋኾ ክንቴ ጄሜርጝስ ቤዴራ ቴርቱ እንፅኺ አኮሜችስትⶓ ዙሜካ::

ክንቲ ጝንካኩ ክንትፃንትካሊ፣ ጉሳንትካሊ፣ ኾቱ አመራርካሊስታ እዝብሊኪላ ዳንጉንኩ ዲብካ ዋኽትጛንታ ኩስጚ ፄውስትⶓኪላ ዲብስካ::ፍንሾስኪላ ክንቲው ልቕልቕቲዳ ትኩታንኩ ኩስጚው ሜድሬኽካ ቴርታንኩ አኽⶓ ጌሌፅካ::

“ኬቴምታ ችግርካዋ ኽይጝስ ካሊፃው ሰላሙ ካውንስል ቲሪትጛማ እንፅኼ ጄሜራኽ” ኑንኩ አቶ ይርጋለም፤ ዊዳፊ ሰላም ቼሜትጛታ እዝብኪ ካዌናኻ ቱኽ አይልኪ ሰላምሾ ዙርጝስ ቴቤቤርጝ ቱስታው አኽⶓ ታክስፅካ::