22 ሚሊዩን ብርዴስጃላ ፍሺስ ግቢትስትኹ ክንቲ ጝና ዳቔርስታማ እንፅኼ ጄሜርኾ

አለሚቱ የኔት

አዊ ብሄረሰቡ ቺፅጝፂ አዩ ጉዋጉሲ ወረዳ ዊንዲጊ ኬቤሊዳ እርዳታንትካ አችትካስስታ ፕሮፌሰር ጌትነት ታደለው ቴቤቤርጝፃንትስ 22 ሚሊዮን ብርዴስጃላ ፍሺስ ግቢትስትኹ ዊንዲጊ እምፕላንቲስታ ክቻክቺ አች ክንቲ ጝና ዳቔርስታማ አግልግሎቲስ ቢኪጝ ስራስሪ ክንቴ ዲጊዳ አግፃንታ ፍሼ ፄዋው አኽⶓ ዝኩዋንትካ ዙሙና::

ውንቢሪ ውንዲጊ ኬቤሊዳ አግስታው 1ንቲ አች ክንቲ ጝና አግስታው ዙራሙሪ እቺ  አኽጝስ ድሚስ ፅልካስታ አክም እላቲኩ ስራስሪ ክንቲ ጝና ካስጝስ ቼጌርስታንኩስታ ክንቲው ማድዳ አግስታቲንኩ እሺⶓ እንክርፁንኩ ኬቤሊው ዝኩዋንቲ ጓዴ ሙሉ ፕሮፌሰር ጌትነት እንሳ ክንቲ ጝናሳ ዲጊዳ ግቢትጝ ክንቴ ኬውጝፃኒስ እሺንኩስስታ ድሎ አግፃቲንኩስጊ ኽሳንቴ ፍሼ እሜማ አንትጝስ ቹዋታብል ዴስቴንካ አኽⶓ ዲብስካ::

ግቢትስትኹ ክንቲ ጝና አቾ ማንዱኽስታ ካንትጝስኪላ ዴስፃው አኽጝስ ጝናኻዳ እሼንኩ ዋሺኒኪ ድሚው አችዳ አግስታንኩ ስራስሪጊ ክንቲ ጝናሾ ካስጝስ ፋዮ ካንፅፅⶓኪላ አቶ ጓዴ ዙሜካ::

እሊው ኬቤሊው ዝኩዋንቲ መጋቢ ስርአት ደሳለው ከፋለ ኑኑውስታጊ ቤዴራ እቺት ንኹ ክንቲ ጝናስ ስራስሬ እንፃኻማ ክንትፅጝስ ቺጊርፂ ብቲ ፉንታ እሺኹስታ ካይካማ ካሳኑ ብን ክችዳ ዝክኹ አኽጝስ ቹዋ ታብል ሼዎ ዋኽካማ ስራስሬ እንፃኽጝስ ፍካዴንካ እሺካያኪ:: እን ክንቲ ጝና ሙሪዳ ግቢትስትጝ ዴሜካ ውላጊ ስራስሪ ክንቴ ክንታንታ ፄዋውሳ ድሎ እሜማ ይንቱኽ አኽⶓ ዲብስካ::

ግቢትስታማ ክንትጝ ክንትፅጝስ ቴርትኹ ክንቲ ጝናስ ኬቤሊው ዝኩዋንትካኪላ ጛጂዴስ ማንዲስታውሳጊ እርዳቴ ፄዋኒስ እሺⶓ መጋቢ ስርአት ደሳለው እንክርፄካ:: ፍንሾስኪላ ኩችናያሱ ጌንዜብ ዝኩጝስ ኩችፅካማስታ ፋይፃውሳጊ ዴሜክካማ ዳንጉዋውሳጊ ዋኽትጝፅጝስ ፍካዴንካ አኽⶓኪላ ድኹዌካ:: ግቢትስታማ ዲግኹ ክንቲጝናስኪላ ስራስሪዋ ቢኪፃንኩ ክንትፃንትካ ሜዴብስትካማ ክንትፅካያንታ ፋይⶓ ዲብስካ::

ዊንዲጊ እምፕላንቲስታ ክቻክቺ አች ክንቲጝና ጄሜርስታማ አሌድስትኹ ወክት ቺጊርፂስታ ሚንች ፅንጋኺ እሺኹ አኽⶓ ጌሌፁንኩ እርዳታንትካ አችትካዋ ቴቬቬርጝፅጝስ ክንቲጝናሳ ግቢትፁንኩ አዲስ አበባ ዩኒቨርሲቲዳ እምፕልታቕ ሳይንሱ ማራማርጛንቲ ፕሮፌሰር ጌትነት ታደላኽ::

አዮ ጉዋጉሲ ወረዳዳ ግቢትስቱንኩ እምፕልትቕ አግልግሎቲስ እሼንኩ 10 ፕሮጀክትካዋ ሊሊትጙንኩ እርዳታንትካ አችትካው እርዳቲስ ግቢትፅጝስ እምፕልታቕ ቴኬምስታንታ ያኻንታ ፄዌካማጊ አኽⶓኪላ ፕሮፌሰር ጌትነት እርዳትፅካ::

ድሚ ክንቲስ ታንቡንኩ ስራስሪ ክንቲው ድልስ ቴኬምስታንታ ያኻንታ ግቢትስትኹ ክንቲ ጝናዳ ቱስቲስ ክንትፅጝ ክንትፃንትካው አላፍት አኽጝስ አጌራዋ እንካናንትካስታ ግግርካ አጌር አቕ ፌቴርስታንታ ክንትፃንትካ ሼውዴስ ክንትፅጝ ፋይፃንቲ አኽⶓኪላ ፕሮፌሰር ጌትነት ታክስፅካ::

“ክንትፃንትካ ክንቲ ጝናሱ ማንዳንትካ፣ ክንትጝ ክንትፅጙ ቴግባርዳ ኩስጚው ማንዲስካ አኽጝስ ሼውዴስ ክንትፅጝስኪላ ስራስሪውሳ እንኩሌ አድርፄንኻ አኽጝስ ሼውዴስ ክንትፅጝስ ኬሻንትካ ቲኪስታንትካ ጄርካዋ አፌርጝስ ካሌንኻኽ” ንጝስኪላ ፕሮፌሰር ጌትነት ካንቴ እይካ::

ታንብዌንካ አካልካኪላ እምፕልታቖ ኪስጝስ ፋይስቱኒዴስ ክንቲው ዜርፍዳ ትኩትስ እንፃኽስትጝ ማንዲስታው አኽⶓ እንፅኼንቶ ፌያፌይጝፅካ:: አፌርናው አብት ድኽጝስ ካላው፤ አቕት ኩፅኒ ዘላለሙ አብት አኽⶓ እርዳትስትጝስ ክንቲስ ሊሊቲ ትኩትስ እንፃኽስትጝ ፋይፃንቲ አኽⶓኪላ ፕሮፌሰር ጌትነት ቶኬምካ::

ክንትጝ አቒ ጄራሱጊ ሜብት ያኻስኩስ ሚንችካ ክንቲጝና ሙሪዳ እላ አኽጝስ ክንቲውሳ ድሎ አግፄኑላስ ሴጙንኩስ ድሉ ቴኬምስታንታ ያኻንታ ሚንችካ ክንቲ ጝናሳ ግቢትፅⶓ፣ ክንቲስ ፋይፃንኩ ሜሳርካዋ ዋኽትጝፅⶓስታ ክንቲውሳ ፃንኩቶ ማንዲፅጝስ ክንትፃንትካስ ስልታኔ አግፃንታ ፄውጝስ እንፃኽስታኑ እንቲታኪ እሊኩ ወረዳው ልማቱ ቴግባርዳጊ ፄዋኑ ልቕልቕቲ ውንስ እዝቡሳ ኪስስትⶓ ፋይጝስ አኽⶓ ጌሌፁንኩ ዴሜካ አዩ ጉዋጉሲ ወረዳው ቹዋ ቺፅጝፃንቲ አቶ ገበየሁ በሪሁኔኽ::

ጝሺ ግቢትስታማ ዳቔርስትኹ ክንቲ ጝናኪላ አጌራው ሴላም አቲጝ ምክንያታስ ጄሜርስታማ አሌድስትኹ አኽጝስ ዴኔክፃው ቴግባር አኽⶓ አቶ ገበየሁ ቶኬምካ::