ስርልማትኩ እንፅኽካ እንፃኽስስትካማጊ ጋዌኽ እስትኾ

ታደለ አጋጄ

አገው ግምጃ ቤት ኬቴሙ ቺፅጝፂዳ ስር ልማትኩ እንፅኽካ እንፃኽስስትካማጊ ጋቲዊያኽ ናኒስ ኬቴምኩ ዝኩዋንትካ ዙሙና::

አገው ግምጃ ቤት ኬቴም ዲጊ ጊዝስ ኬቴሙ ቺፅጝፂ አኽጝስ ቲሪትጝጝ አቕስቴ:: ያኼስጉ ኬቴምዳ እምፕልታቕ ፋያኑሳ ላካ ስርኩ ልማትካ እንፃኽስስትካያስኩ አኽⶓ ካቢትጝፄካማ ጉሻና::

አገው ግምጃ ቤት ኬቴሙ ዝኩዋንታ ዊዛሩ አልጋነሽ አሰፋው ዙሙኑውስታጊ ኬቴሙ ቺፅጝፂዳ ሰላሙስታ ፄትቲው ችግር ምክንያታስ ሚንችካ ልማትኩ እንፅኽካ እንፃኽስታኑላስ ይጉⶓ ድኹዌካ:: ናካዳ ምንግስትኩ አግልግሎቴ እያንኩ ኾትካ ጉዳዮ ፌፄምጝዴስ ይጎ ልማቱ እንፅኺ እንፃኽስስታማጊ ጋቲው አኽⶓ ዲብስካ::

ኬቴምዳ ኩራ ክብፂ ቦይ ግቢትስታውላ ይጉጝስ ወክቶ ማንዳያሱ እሪ እሉዋማ ኬቴምዳ ኩሪ ኬሴትስትⶓኪላ ዙሜካ::

አገው ግምጃ ቤት ኬቴማ ቲሪትጝትኹ ጊዝ ሊጊሲሚ ያኹኒውላ ልማቱ እንፅኺስ ኩፂ ኩክሪስቴ እንዜጝታታጊ አኽⶓኪላ ዊ/ሮ አልጋነሽ ድኹዌካ::

“ልማት ዝኩዋኒ ሚንችካ ጉዳይካስ ኪሴ ካንትፄት እሺቲት ኬቴማኽ” ኑንኩ ዊዛሩ አልጋነሽ ኬቴማዉ ልግስስ ምንግስትኪ ያኻ እምፕልታቕ እርዳትስትካያሱ ዲብ ዝኩⶓ ቶኬምካ:: አኽጝስኪላ ልማቱ እንፅኺስ ኩክሪሾ እንዜጝታታጊ ዝኪት ኬቴማ አኽⶓ ዙሜካ::

ሚንችካ አብትዌንካ ኬቴማዋ ባይፅጝስ እሊው ኬቴምሾ ካስጝስ ሊሚፅካማጊ አኽⶓ ቶኬሙንኩ ዊዛሩ አልጋነሽ አብትዌንካ ኬቴማዋ ሊሚፃቲንታ ፄዋው ምንግስቱ አግልግሎቴ እይጙ ችግር ዝኩኽ አኽⶓ ድኹዌካ::

ኬቴሙ ቺፅጝፂዳ አግስታው ድኻድኹ ጝን ማልጛ ፌሬሳ:: ሚንችካ እምፕልታቕ ዴሜካ ጝን ዝኮስኩስ ኬቤሊ ጝናሳ ቴኬምስታንኩ አኽⶓ ቶኬሙንኩ ዊዛሩ አልጋነሽ ፌሬሱንኩ ኬቤሊኩ ጝንካ ሊዝስ ዋይስታማ ኬቴም ሊሚጝ ቱስታው አኽⶓ ዙሜካ::

ኬቴሙ ቺፅጝፂዳ ዝኩንኩ ምንግስትኩ አግልግሎቲ እያንኩ ኾትካ እምፕልታቕስ አግልግሎቴ እይካማጊ ያኹኒውላ ፌፄምጚዳ ኩፂ ችግር ዝኩⶓ ዙሜካ::

አገው ግምጃ ቤት ኬቴሙ ቺፅጝፂው ኬቴሙስታ ስር ልማቱ ፅፌት ጝናሱ አላፊ አቶ ጌታቸው የኔው አገው ግምጃ ቤት ኬቴማ ሊጊሲሜ ድሜ ቺፍፂት ኬቴማ ታኹኒውላ እምፕልታቕ ፋያኑሳ ላካ ስር ልማት እንፃኽስስታማጊ ጋቲው አኽⶓ እርዳትፅካ:: እንሱ ቹዋ ችግር ኬቴሙ ቺፅጝፃ ታኹኽ ዲግ ጊዝስ አኽጝስ ዳላውሳ አብቶ ኩፕፅጝስ ልማቱሳ እንፅኼ እንፃኽስትጝስ ኬቴሙ ቺፅጝፂዴስ ኩፕናው ጌንዜብ ዳላቲው አኽጝስስታ ክልልዳ ፌቴርስትኹ ፄትቲው ችግርስ ክልልዴስ ባይስታው ጌንዜብ እይስታውላስ ይጉጝ ፋይስታው ልማት እንፃኽስስታማጊ ጋቲው አኽⶓ ጌሌፅካ::

2017 ም/አታሱ ባጄትዳ እምፕልታቕዴስ ኩፕፃኑ ጌንዜብስስታ ክልልዴስ አግፁኑ ጌንዜብስ ኮብል ስቶኖ ዳድዳ ግቢትጝስ ፅሬት ፄውስታማጊ አኽⶓኪላ ቶኬምካ::

ኬቴማዳ ሊሊትጙንኩ ጊዝካስ ኬሴትስታው ኩሪ እኩት እስታው ጌፄሩ ዙራሙሪዴስ ጅዋማ ይንታው አኽⶓ ጌሌፁንኩ አቶ ጌታቸው እንሳ ክችስጝስ ዴሜካ አሬሳቻንትካዋ ኩስጝፅጝስ ብቲዉሳ ካሴ ኬይጝስ ጎርፍ ኬቴምሾ አንታቲታ ፄውጙሳ እንፅኼ እንፃኽስታንኩ አኽⶓኪላ ጌሌፅካ::

ቤዴራ ኬቤሊው ጝንዳ ሚንችካ ችግርካ እሺⶓ ቶኬሙንኩ አቶ ጌታቸው አብት ዝኩኽስ እይስትⶓ ፋያኑሳ አቖ ሚፅጝስ ፄጌርጛንኩ ችግርካ እሺⶓኪላ ጌሌፅካ:: ናካዳ ኩፂ ማኔጅመንትስ ዎሴንስታማ ድኻድኻስ ኬቤሊው ጝን እይስታው አኽⶓ ጌሌፅካ::

ፌሬሱንኩ ኬቤሊኩ ጝንካዋ ቻራቲስ ፍሽጝስ ልማት ፄውስታው አኽⶓ ዙሙንኩ አቶ ጌታቸው ሚንቾ ጊዞ እሚካማ እጂንኩ ኬቤሊኩ ጝንካዋ እግስ ባይፃንታ ፄውስታው አኽⶓኪላ እርዳትፅካ::

ቤዴራ እሺንኩ ችግርካ ናካዳ ኽይስትⶓ አቕፄካ:: ኬቴሙስታ ስር ልማት እምፕልታቕስ ፋይስታውሳ አግልግሎቴ እያማጊ አኽⶓ ጌሌፅካ::

ኬቴሙ ብቲውሳ ዳዴኾስታ ጉዳ ጋቲውሳ እንፃኽስትጝጜ ክችስጝስ ዲጂታላይዜሽንስ ንባር እምስታታ ፄውጝስ እንፃኽስትካማጊ አኽⶓኪላ አቶ ጌታቸው እርዳትፅካ::

“ሲዚ አሜታዴስ ጃላ እንኩርስትኹሳ ኮብሎ ጄሜርፅጝስ እክድ እምስታ” ኑንኩ አቶ ጌታቸው ኬቴማ ልማትሾ ትያታ ፅሬቶ ፄዋንኩ አኽⶓኪላ ቶኬምካ::