ቑሎ ፊትጜ ባንስ

ሰላም ንጝ ጋቻስታ ወሬም እላ አኽጝ፣ አቕ ክቻዳ ዲግጝጚ፣ ቱትጚስታ ጋቻዋ ዙሚትጚስ ኽይጙስታ ጉስጙሳ አኺኔ ካንታዌኽ::

ሰላም ፖለቲካዊ፣ ይኮኖሚያዊስታ ማይቤራዊ ዝኩዊኒዴስ ፌይኹስ አቕ አቕዴስ፣ ፍትሬትስታ ዙራሙሪሊ ዝኩኽሳ ታምትጜ ካንታዌኽ::

ሰላም ንጝ ጋቻ እላ አኽጝ ይኹቺ ጋቲዌኽ ናንኩ ሰላሙስታ ዴክቱ ውማይቴንካ ይቶፒያዳ ወሬም እሺያሱ ዝቤንዳጊ ጋቻስ ታምፃንኩ ክሬትካ እንግራ ጁጝ ይጉዋላኬኽ:: ክሬቴ ዙሚትጚስስታ ኩስጝጚስ ኽይጝዴስ ይጐ አይልስ ኽዮ ፋይጝ ዴስስትኹ ያኻማጊ ይንታ::

ክልልዳ ኬሴትስታሺኹ ሰሜኑ ወሬምዴስ ጄሜራማ ጋቻ እሊውሳ ጋቻዋ ካሜናማጊ ሰላሞ አቲጙ አኺኒስ ዳሴቕስትናና አሜትካዋ ቼፍፅና::

ሰላም አቲጛስ ክልልታ ሚንችካ ክሳርካዋ ሌንጌድፅና:: ቲኪስታቲው አቒው ይወት ፌያማ ሚንችካው ጝን ልምታ፣ ስራስሪ ሌጌፃንታ ጋቲታ ይጉዌካ:: ሰላም ይንታው ታምብኹሳ ዙርፅጝስ ፄውስታው ልኻው  ወሬምስ ያኻውላ ካሊትጚስስታ ኩስጝጚሴኽ::

ዲጊስ ምንግስት ዙራሙሪ ቺፋ ሹማጌሎ፣ አይማኖትኩ ታብሎስታ ወታትካዋ እሚጝስ “ሰላም ውላስ ውላጊ ሰላምስ” ንጝስ ካስጝፅⶓ ጄሜርኹ ኩስጚዳኪላ ውላጊ አሴቴፍጝጝስስታ ካሲ ዝኮ ንጝስ ዶንጌትካማ ወሬምሾ ቱንኩ ጄርካዋ ኩስጝፅጝስ ሰላምሾ ዙራንታ ፄውጙሳ ቴግባሮ ፌፄምጝ ፋይፄ::

ክልልታ ጌቴምኹ ሴላሙ ዳንጉዊኒስ ስፍሪዴስ ስፍሪሾ ሼውታ ልቕልቕንጝስ ካሊስታቲው አኽጝስ ክሩኽሳ እሴማ ዴውጝስውላ ካሊስታያላኪ:: ኽቴናቴ ስልኪስ ኩዋይጝ ይቪቻ ያኻ እርዳታንትካ ጋንኩ ቹዋ ታብሎ እርዳታንኩ እትጜካማ ዝኩዋንኩ ጄርካ ፋይታ ካስካማ ፋይፃውሳጊ ዋኽትጝፅጝስስታ ናፌክጙኑሳ ላካ ታምትጜካማ እንክርጚስ ካሌካያ፤ ዋዚታ ካንትስታሺኹ ሰላም ናካዳ ኽሳንቲ ብቲ ዝኩኽ አኽⶓ ውላጊ ሼው ናውላስ ይጉዋያላኬኽ::

ሰላሞ ፋያንትካ ዝኩኑሳ ላካ ዴሜካ “ጌቤል ሼቤራኒ” ናኒስታጊ ሰላሞ አቲጝዴስ አግፃኑ ትክም ይጉዋቲታ እንፃኽስታንኩስታ ጉዳጋውሳ ኩስጜ ኩስጝፃንኩኪላ እንፂዊዴስ ጛጛርትጛሳ ክብስካማ አጌራው ናማኪ ክልሎ ሰላምሾ ዙርፅጝ ቱስቴ:: ሰላም ውላ ዲቡ እዌኽ:: እንፃኽስታማ ኪስስትጝስ፣ ካሜናማ ሌጌፅጝስስታ ፋማ ቱጝስ ትክላሊስ አቒያሱ እሌት ቺፋሱ ቴግባራኻዳ ፊኹናው አይርዴስ እንፃቲው ዋይሚ ዝኩኽ አኽጝስ ሰላም ይንታታ ካሊስታው አክምስጊ ፅሬቶ ፄውጝ ቱስቴ::