ዝቤኑ ምርት

አለሚቱ የኔት

ሊጊሲሚ አሜትስ ትክላሊ በጀትስ ሳሴር እስታቲውሳ ሀብቶ ባርኾቼዴስ ስንዳዩ አጌርሾ ሚፅፅጝስ እሽፄሽቲት ይቶፒያ ፌዩንኩ ላጛስታ ሹኻ አሜትካዴስ ናቴ ኩፅኒ እሳን ያኹኽ ስንዳዩ ምርት ልማትሾ ትያ::

ሳኑ አኹዋቲው ስንዳይ ልማቱሳ እንፅኼ ዋይሚስታ ፄውጝስ ባርኾቼዴስ ቱዋውሳ ምርቶ አጌራኻሱ ምርትስ ቲኪጝስ እንፃኽስስታማጊ ዝክኹ እሳን አሪባሪብጚስ ይስጝፃው ዋይሚ ሜዜጌብስታማጌኽ::

ፍትሬቱ እሪውሳ ወክቶስታ እንግራ ይጉዌ እርሺውሳ ቴርቶ ዝቤንካስ ምፅን ንካማ ሊሚፃንኩ አሬሳቻንትካ እን እንግራ ይጉዊ ዴስዴስ ፍሽጝስ ሳኑ ስንዳይ እስታው ልማቱ ፕሮግራምዳ ስንዳዩ አኹዋቲስ አሜሬታንታ ዴስጝፄታጊ አግስቲ:: እንጚዳኪላ ስንዳዮ ምስሊስ ዜርጝስ ይሳን እፃውሳ ምርቶ አግፅጝስ ጝንዴስ ፌይካማ እሳንስ ጌቤልስ ዲግሳኒስ ሼውስቴ::

አዮ ጉዋጉሲ ወረዳ አንቢሪ ኬቤሊው ዝኩዋንቲ አሬሳቻንቲ አታላይ አለማየሁ ስልኪስ ንባሮ ቻቤልንኹ ሳትስኪላ ፄውንኹ ዙሚትጚዴስ እርዳትስትንኹስታጊ ሳኑ ስንዳይስ ያኻው እርሺ እንፅኻሳ ካስጝፅካማጊ አኽⶓ ሼው ንጝስ ካሊና:: ላጛ አሜታዴስ ቤዴራ አጌራው አችስ ጄሜርስትኹ  አኹዋቲስ ስንዳዮ ሊሚፅጝሾ ቱጝስ ችኽስ አሜሬታኑ ሴብሉ ምርትዴስ ቤሌፃውሳ ምርቶ አግፅጝስ ቴኬምስታንትካ አኽⶓ ድኹዌካ::

አኹዋቲስ ስንዳዮ አሜሬትጝ ችኻ አሜሬታኑሳ እኻኺስ፣ ንፋስስታ ሊሊትጙንኩ ኹዋንትካስ ሊፋኑ ልክስ ምርቱሳ ኩፔ አግፃቲኑሳ ላካ ሳኑስ አኹዋቲስ አሜሬትጝስ ኩፅኒ ዴሬቱኑውሳ ላካ ምርቶ አፔሳንኩ አኽⶓ አሬሳቻንቲ አታላይ እንክርፄካ::

እምስትኹ አሜትስኪላ አኹዋቲስ ስንዳዬ አሜሬትጝስ ፋይፃውሳ ቤዴራ ቴርቶ ፄዌካማጊ አኽⶓስታ ስንዳይስ ያኻውሳ ማሴ አሬስⶓኪላ አሬሳቻንቲ አታላይ ዲብስካ:: ፋይፃውሳ ጉልሌ ዜሮስታ ማዳባሬ ኩፅኒ አግፅጝስ ሰላሙ አኺኒሊ እምትጛማ ቼጌርስትጝስ ካላንኩ አኽⶓ ቶኬምካ::

2016 ም/አ ምርቱ ዝቤንዳኪላ ውማይቴን እያኑሳ ኩስጜ ቻቤልካማጊ ምንግስትስ ዲጋይኹሳስታ ጊፂንዴስ ጄውኑሳ ጉልሌ ዜሮስታ ማዳባሬ ቴኬምስትጝስ ስንዳዮ አኹዋቲስ ሊሚፅካማ ኬፍቲኔ ምርቶ አግፁንኩ አኽጝስ ንጙዋ ኪላ ኬሻንቴ ምርቶ አግፅጝስ ልቕልቕቴ ፄዌካማጊ አኽⶓ አሬሳቻንቲ አታላይ ድኹዌካ:: ጉልሊ ዜርስታ ማዳባሬ ዲጊስጚው ችግር ጌቴማቲታስታ ዜርጙ ወክት ፈያቲታ ትኩታኩ ቤንካ ቤዴርካማ ዲግስካያንታኪላ ታክስፅካ::

እሊው አንቢሪ ኬቤሊው ዝኩዋንቲ አሬሳቻንቲ ግዛቸው ወርክነህ ምንግስት ጄሜርኹ አኹዋቲስ ስንዳዬ አሜሬትጙ እንፅኺሾ ቱጝስ ችኻ አሜሬትካማ አግፃኑዴስ ኽስኹሳ ምርቶ አግፅⶓ እንክርፄካ::

ጉልሊ ዜሩ ችግር ጌቴማቲታኪላ ፋይስታውሳ ላካሳ ዜሮ ዲግስካማ መካዚንዳ አግስታው አኽⶓ ቶኬምካ:: ዳላው ግባትስታ ጉልሊ ዜር ዲግⶓ ጌሌፁንኩ አቶ አብዮት አሬሳቻንትካውላስ ኩፅኒ ዋይሚው ክብርናቲዳ ክሬቲ ዲጋማጊ አኽⶓ ቶኬምካ:: እስጜ ችግሮ ጌጌውጝስ ኩፅኒ ሊሊትጙንኩ ጉሺው ሴልካዋ ቴኬምስትጝስ አሬሳቻንትካስ ዲግስጝስ ቴርቴካማጊ አኽⶓኪላ እርዳትፅካ::

ክልልታ ጌቴሙኹ ሰላሙ ዳንጉዊኒው ችግር ምክንያታስ ስንዳዩ ምርት አሜሬትስታኩ ኬቤልካ ክቻዴስ ዋልታ ኬቤልካሾ ውማይቴንካ ቱዌካማ ዲጊዳ ያኼካማ አሬሳቻንትካዋ ኩስጚስ እርዳትጝስ ካላቲኑ አኺኒ ዝኩⶓ አቶ አብዮት ጌሌፅካ:: አሬሳቻንትካስ ክንቴስታ ሼውቴ እምፃውሳ ኩስጜ እይጝስ ካላኑኪላ ኬቤሊቺፋ አግስታንኩ ልማቱ ኬችካው ኩችፃንትካውላስስታ ወረዳሾ ይንታኒስ ኩችፅጝስ ካስጝፃኑ ዙሚትጚስ አኽⶓኪላ ቶኬምካ::

ስንዳዮ ምርትዳ ምርታምቶ ዴሜክጝዳ ይቪቻ ያኻውላ ፃንኩቶ ማንዱኽ ስንዳዩ ምርት አሜሬትስታማ ባርኾቼውሳ ምንዛሬ አጌራስ ሚፅፃታ ፄዋውሳ እንፅኼ እንፃኽስታንኩ አኽⶓኪላ አቶ አብዮት ጌሌፅካ::

ኬሻንታ ያኹኽሳ  ምርቶ አግፅጝስ አሬሳቻንትካ ውማይቴንካውሳ ኩስጜ ቻቤልካማ ቱስታውሳ አንኪባኪብጜ ፄውጝስ ሼውዴስ እንፃኽስትጝ ቱስታው አኽⶓኪላ ታክስፅካ::