ኡራ ኪዳነምህረት

ዘውዴ በካሉ

ይቶፒያ ሚንችካ ቱሪስቱ ጉስፅካ ስፍርካ ዝኩንቲ አጌራኽ:: እኒ ክቻዴስ ሊሊትጙንኩ እምኔትኩ ስፍርካ ቶኬምስታንትካኽ:: አማኻሪ ክልል ዴሜካ ሚንችካ ባርኾቼኩ አጌር አቕ ይንቴካማ ጐቤናኑ ዙራሙሬኽ:: እኒ ጐቤንስታንትካ ያኹንኩ  ስፍርካ ክቻዴስ ታናው አይካኻዳ አግስታንኩ ጌዳምካ ቶኬምስታንትካኽ::

አማኻሪ ክልል ባርዳርዳ አግስታው ታናው አይክ 3 ሻይ 600 ኪሎ ሜትር ብቲውሳ እሳንቶ ሾፌኔ::

ታናው  አይካኻዳ አግስታንኩ ደሴትካዳ አግስታንኩ ጌዳምካ ክቻዴስ ኡራ ኪዳነምህረቱ ጌዳም እምፕል ያኹስ እኒ ጌዳምካሾ ካስጝስ ዴሜካ ጀልባዋ አኹኪ ሜርኬቦ ቴኬምስትጝስ እንዝጜ ፄውጝስ ካሊስቴ::ናካስ ሊሊትጙንኩ ንቫርካዴስ አግፅንኹሳ ኡራ ኪዳነምህረቱሳ ጌዳሞ ካንትኹስ ፁፎ አንቤብፅጝስ ቴርስናኽ ክርፂ ንባብ፡-

ኡራ ኪዳነምህረት ጌዳም 14ንቲ ጊዝ ዝቤን ቤናዳ አፄ አምደ ፂዮኑ ዝቤንዳ ግቢትስቲቴኽ:: ብሽታኖ ጊቢቱንኩ ታብልኪላ አባ ዮሃንስ እስታና:: አቡነ ዩሃንስ ምንግስቱሳስታ አይማኖቱሳ ክንቴ ቱስቲስ ክንቱኒዴስ ፋሌንጋ ሊሊትጙንኩ ጌዳምካሾ ካስካማ አምላኮ አጌላጌላኒስ እጂካ::

አንዴስ ፋሌንጋ ድባን ካሜንስትኹሳ፣ ፄሜቕስትኹሳስታ ሳንክስትኹሳ ስፍሬ ጐቤንጝስ እየሩሳሌምሾ እንዝጜ ፄዌካ:: ኢየሩሳሌሙ እጂጚዳኪላ ዳግማዊ እንቶንስ እስታንኩሳ ታብሎ አግፄካ:: ዳግማዊ እንቶንስኪላ አቡነ ዮሃንስስ እመቤቴ 500 አሜትዴስ ፍና ደብረ ኩስኩዋምዳ ጊሊፅስቴታ አባ ዮሃንስ እስታው ይቶፒያዊ ሙሊቒሲ ይንታኒ እይኔታ ይትኹ ሴዛ ታቡት እኒኮኽ ንካማ አባ ዮሃንስስ እዩና::

አባ ዮሃንስስ ሴዛዋጊ ታቡትካዋ ታቦተ ስላሴ፣ ታቦተ ኢየሱሶ፣ ታቡተ ደብረ ምትማክ ማርያሞስታ ታቦተ ኪዳነ ምህረቶ ኻስካማ አጌርሾ ዙርካ::አባ ዮሃንስ ይቶፒያሾ ይንቴካማ  ብሽታኖ ጊቢቴካማ እንኩርጝስ ፋያኒ ዜጌውስ ዴሴቶ አግፄካ:: እን ጊዛይ ዘጌ ናኺሲ ስፍሪ እሽኾ እስቴ:: 14ንቲ ዝቤን ቤናዳኪላ ኡራ ኪዳነ ምህረቶ ጊቢቴካ:: ኡራ እስትኹ ምክንያትኪላ አባ ዮሃንስ መላኩ ኡራኤሉ ጉሳንትስ ይንቱንኩ አኽጝስ መላኩ ስምስ ኡራ ኪዳነምህረት እስትኹ አኽጝ ዙሚስቴ::

ኡራ ኪዳነምህረት ጌዳምሾ ካስጝስ ኡራሾ ካፃውሳ ዳዶ እሚካማ 20ዴስ 30 ዴኪካዋኺስታ እንዜጙኒዴስ ፋሌንጋ ሌዋስታ ፃንጌኻ ቴኬልስቱንኩ ሉሚኒው፣ ብርቱካኑ፣ ቡኑስታ ጌሹውሳ እንቲታኪ ሊሊትጙንኩ ካናኻፅካስ ጌሬምስትካማጊ እንዜጙኒዴስ ፋሌንጋ አግፃንቲ ጌዳማኽ:: ኡራ ታና አይካኻዳ አግስታንኩ ኹን ቱጝስ ፌኬድስቱንኩ ጌዳምካ ክቻዴስ እምፕሌኽ:: ኡራ ኪዳነምህረት ጌዳም 500ዴስ ጃላ ድሚ ዝኩት ታኹስ ኽሳንትካ ኽሳንትካ ካንካዴስ ቴርስስትኹ አኹኪ አኬልስትኹ ሙሲሲኒ፣ አብጂሊ፣ መስኮት፣ ሼንቤኩስስታ ፃፍርስ ክራሪስ ጊቢትስቱንኩ ጝንካ እንቲታኪ ካኒስስታ ችቒስ ክርጝስ ግዲታማ ጊቢትስትኹ ብሽታኒያኽ:: ዘጌዳ አግስታንኩ ጌዳምካዴስ እሳንትስ አቕስታው ኡራ ኪዳነምህረቱ ጌዳምዳኪላ ሙዚየም አግስቴ::ሙዚየማኻዳኪላ 14ንቲ ዝቤን ቤናዴስ 18ንቲ ዝቤን ቤናሳ ኺስታ እሺንኩ ይቶፒያኩ ንጉስካው ታሪክ፣ ጛጂሱ ስይስታ ሊሊትጙንኩ አይቶ ጌሌፃንኩ ፁፍካ፣ ሊሊትጙንኩ ብራኒኩ ሜፃፍካ፣ ሊሊትጙንኩ ሚስኪልኩ አይኔትካ አግስታና::

ኡራ ኪዳነምህረት ጌዳም መክደሱ ቤን ሶኼታ አብጄሊስታ ሶኼታ መስኮት፣ ክድስቱ ቤን ሹኻ አብጂሊስታ እምፕል መስኮት ዝኩኽ ያኹስ ክኔ ማህሌት ፍንፍኒዳ ካንትስታው ጅግርዳ ዴሜካ 16ንቲ ዝቤን ቤናዳ ሚፃፍ ክዱስዴስ ካፅካማ ኽታዌንካ ሳላንትካ ታሪኮ ካንትፅጝስ ኬሴሎስታ ካናኻፅካዋ አሌቔትጝፅካማ፣ ኬሌሞ ባፃባፅካማ ሳሉንኩ ስልካ አግስታና::

ጌዴማኻዳኪላ ሊሊትጙንኩ ማኼትካ ንጝኪ አፄ አድያም ሰገድስ እይስትኹ ወርኩ ካቢ፣ አፄ ዮሃንሱ ዝቤን ቤናዳ እይስትኹ ብሩ ዘውድ፣ ብሩ ሚስኪሊ፣ ወርኩ ምሱብ፣ ንጉስ ተክለሃይማኖትዴስ እይስትኹ ወርኩ ዘውድ እንቲታኪ ብራኒስ ፃፊስቱንኩ ኽሳንትካ ሜፃፍካስታ ስልካ አግስታና::

አባ ሃይማኖት አናጋው ሃመር ኖህ ኡራ ኪዳነምህረት ጌዳሙ ቺፅጝፃንቲያኽ::ኡራ ኪዳነምህረት 14ንቲ ዝቤን ቤናዳ አፄ አምደ ፅዮኑ ዝቤንዳ ቲሪትጝቱት አኽⶓ አሚኮስ ጌሌፅካ:: ኡራ ኪዳነምህረት አምሉ ቴኬልስ ሹፊንስቲት ኽታዌና ብሽታና አኽⶓኪላ አባ ሃይማኖት እንክርፄካ::አባ ሃይማኖት ዲብሱኑውስታጊ ዘጌኩ ማቤር አቕውላዳ እርሺ አሬስስታላ፣ ዝላንቲ ኮያላ፣ ካኒ ኬውስታላ፣ ክምካ እሩባላ:: ዘጌኩ ማቤር አቕ ድባኑ ካል ኪዳንስ ዝኩዋንኩ እዝብካኽ:: ዝኩዊኔ ጉስጝስ ግብርኒ አኹኪ ክምካዋ እሩብፅጝ ፋይፃው አኽጝስ ዋታ አኽናና ዘጌዳ ዝኩጝስ ካሊኔ ንካማ አባ በትረማርያም እስታንኩሳ ታብሎ ካሴኒ አባ በትረ ማርያም እሚኑሳ ዜንጐ ሹኻሾ ኬውካማ ሹኻ ብታዳ ቴኬላንታ አዜዙና:: እኒ ሹኻሾ ያኼካማ ቴኬልስቱንኩ ዜንግካ እምፕልኪ ቡን፣ እምፕልኪ ጌሹ እሊው ዴሜካ ሉሚኒ ያኻማ ዋጉኻ:: እንዴስ ፋሌንጋ አቕ ዝኩዊኔ ጉሳኑ እኒጛ ቴኬልካስስታ ኩፓኩፕካስ አኽⶓ እንክርፄካ::

ዘጌ እስትኹ ምክንያቲ ዴሜካ አቡነ በትረ ማርያም ሊሊትጙንኩ ጌዳምካዳ ፆሌቶ ፄዋኒስ፣ ቑንዳስትኹሳ ኬሽፃኒስ እጂኒዴስ ፋሌንጋ ድባን አዜዛማ ዜጌሾ ይንቴካ:: ዘጌሾ ካሳኒስ ናካስታ እንዜጝትጝፂ ጀልባ አኹኪ ሜርከብ እላቲው ጊዝዳ እሚኑሳ ዜንጐ አኹዳ ሞሬኬዝስትካማ ታናውሳ ባሮ ፌይካማ ዜጌው ደሴትሾ ታምብካ:: እን ስፍሪዳ አግስታንኩ ሞሌቔስስታ ዙራሙሪኩ ዝኩዋንትካ አባ እንዳርማሲይ ይንቱኑ ናኒ ዜንግስ ንካማ ዙርፅካ:: አቕኪላ እንሳ ታብሌ አባ ዘንጌ ንጝስ እቑዌኒስ እጂኒዴስ ፋሌንጋ እንሳ ስፍሬ ዘጌ ንካማ ሴየምⶓ ኣባ ሃይማኖት እንክርፄካ::