“ክብሱኑሳ ጌንዜቦ ዳዴኽጝታኽ”

ታደለ አጋጄ

አብቱስታ ንብሬቱሳ እጎ ካንትኹስ ኢፌዲሪ ፍቱ ሚኒስቴር 2007 ም.አሜታዳ ቴርሳማ ፍሽኹ ሴኔድዳ ጌሌፅስትኹስታ አቕ ዝኩዊኔ ጉስጝስስታ ኔፃኔትስ ዝኩጝስ ካሊፃንኩ አኼንካዴስ ቹዋ ጛርትስ ያኻ እምፕልትስ አፌራኑ አብትስታ ንብሬቲያኽ::

አብትስታ ንብሬት አቑ እልውኒሊ ማልጛ ታምትጚ ዝኩኽ አኽⶓ ሴኔድዳ ቶኬምስታ::

ኢፌዲሪው እገ ምንግስት ቱንዚ 40ዳ ዴንጌግስታማ እንኩርስትኹ አብቱሳስታ ንብሬቱሳ ሜብቶ ካንታዊያኽ:: አይኪ አቒ እምፕልታቑሳ ትክሞ ማንዲፅጝስ እግስ ካላካልስትኹዴስ ይጎ ጛርቱ አብቱ ጜዋና አኽጝ ኬቤርስታያውስታ ማንዲስታያው አኽⶓ እገ ምንግስትዳ ዴንጌግስታ:: ያኼስጉ እምፕልታቕ ጛርቱሳ ያኻ ምንግስቱሳ አብቶስታ ንብሬቶ ቱስታው ዳድስ እሚጝዳስታ ቴኬምስትጝዳ ዳንጉንካ ካንትስታና::

አዊ ብሄረሰቡ ቺፅጝፂዳ ምንግስቱሳ አብቶስታ ንብሬቶ እሚጝዳስታ ቴኬምስትጝዳ ካንትስታንኩሳ ዳንጉንካዋ አቶ ስሜነህ አላምረው እንጃቢሪ ኬቴሙ ዝኩዋንትካ አውጚው ሬዲዮንሊ እጂጜ ፄዌካ:: ምንግስቱ እንፅኺው አላፍትዳ ሚንችካ አሜትካስ እንፃኽስቴካ:: “ምንግስቱ አብት ንጝ እዝቡ አብት ንጝያኽ” ኑንኩ አቶ ስሜነህ ምንግስቱሳ አብቶስታ ንብሬቶ ቱስታው ዳድስ እምስታታስታ ቴኬምስታንታ አላፍቶ ካፅጝ ፋይፃው አኽⶓ ዙሜካ:: ምንግስቱሳኪ ያኻ ጛርቱሳ አብቶ እሚጝዳስታ ቴኬምስትጝዳ ውላጊ እምፕልታቕ አላፍቶ ፊትጝጝ ፋይፃው አኽⶓ ዲብስካ::

እምፕልታቕ ምንግስቱሳ አብቶስታ ንብሬቶ እሚጝዳስታ ቴኬምስትጝዳ ዳንጉኒ ዝኩⶓ ቶኬሙንኩ አቶ ስሜነህ እምፕልታቕ ጛርቱሳ ትክሞ ቤዴርፅጝስ ምንግስቱ አብት ቱስታ ጋቲው ዳድስ አቤሌሽስታቲታ ሼውቴ ፌቴርጝ ማንዲስታው አኽⶓ ጉሽካ::

ምንግስቱሳ አብቶስታ ንብሬቶ ቱስታው ዳድስስታ ክችክቺስ ቴኬምስትናውላስጊ አጌራዳ ሚንቾ ቻኒስቶ ሲፍፃው አኽⶓ ድኹንኩ አቶ ስሜነህ ምንግስቱ እንፅኺዳ እሼው አብትስታ ንብሬት ቱስታ ጋቲው ዳድስ ድስጝ አጌራዳ ኬፍቲኔ ኢኮኖሚውሳ ክሳሬ ሲፍፃው አኽⶓ ዙሜካ::

ምንግስቱሳ አብቶስታ ንብሬቶ ይው ንብሬት ጋቲዊያኽ ናማ ታክስጝ አግልግሎቲዳ እሼውሳ ላካሳ አገልግሎቴ እያውላስ ድስጝስ ካላው አኽⶓ ዲብስካ::

“ምንግስቱሳ አብቶ አላፍት ዝኩክ አቕስ ይቢችካስ ባይጝ፣ እንዳርማ ሚፄ ንጝ፣ ምንግስቱሳ አብቶ ይው አብት ጋቲዊያኽ ናማ ታክስጝ” ሚንችካ እምፕልታቕዳ ካንትስታው ችግር አኽⶓኪላ ድኹዌካ::

ክንቲጝናዳ ሚንች ባጄትስ አቴምስታማ ይንታው ክንታንትካው ሜፃፍ እሚጝዳ ኬፍቲኒ ችግር ዝኩⶓ ቶኬምካ::

እሊው ክንቲ ጝናዳ አግስታንኩ ሊሊትጙንኩ ምንግስትኩ አብትካዋ ጛርቱ ትክምስ ቴኬምስትጙ ፋይ ዝኩⶓ ድኹዌካ::

“አጌራው ኢኮኖሚ ሌጌሳቲው ዝኩኽሳ አብቶ ቱስቲስ ቴኬምስትናውላ ይጉጝሲያኽ” ኑንኩ አቶ ስሜነህ ምንግስቱ አብት እዝቡ አብት አኽጝስ ውላጊ አላፍቶ ካፅጝስ ማንዲጝ ቱስታው አኽⶓ ዲብስካ::

ምንግስቱሳ አብቶስታ ንብሬቶ ቱስታ ጋቲታ ድፅጝስታ  ባቴልፅጝ “ጚጛርትጛስ ክብሱኑሳ ጌንዜቦ ዳዴኽጝ ንጝታኽ” ኑንኩ አቶ ስሜነህ አጌራው ልግስ ይንታታ ምንግስቱ አብትዳስታ ንብሬትዳ ቼፍጝጜ ፄውጝ ፋይፃው አኽⶓ እንክርፄካ::

እሊዉ ካንቴ ታምፁንኩ ዴሜካ አቶ አባይነህ አልማው ክዳማጃ ትክላሊ እምፕላንቲ አች ክንቲ ጝናሱ አላፊያኽ:: ክንቲ ጝናዳ አግስታውሳ ንብሬቶ ውላጊ ቱስቲስ እሜንታ ፄዋንኩ አኽⶓ ጌሌፅካ::

“ምንግስቱ ንብሬት እስታኒ ሳትጊ ምንግስቱ አብቲያኽ” ኑንኩ አቶ አባይነህ ምንግስትኩ እንፃኽስታንትካ ሳቶ ቱስቲስ ቴኬምስትጝዳ ችግርካ ካንትስታንኩ አኽⶓ እርዳትፅካ::

ውላ አብትስታ ንብሬት ናኪኒ ጊዝዳ ዴሜካማጊ አኽጝስ ዝኩኽሳ ንብሬቶ ቱስቲስ ቴኬምስትጝ አብቶ ክብሳማ እሚጝ አጌራዳ ዝኩኽሳ ኢኮኖሚውሳ ቻኒስቶ ኔኬታው አኽⶓ ጌሌፅካ::

አብቶስታ ንብሬቶ ቱስታው ዳድስ ቴኬምስትናውላስ ይጉኑኒጊ ጛርቱ ኢኮኖሚዳ ችግሮ ሲፍፃው አኽⶓ ቶኬምካ:: ምንግስቱሳ ንብሬቶ ጚው ንብሬት ፄዋማ ቴኬምስትጝ ፋይፃው አኽⶓ  አቶ አባይነህ እርዳትፅካ:: ክንቲ ጝናሱሳ ንብሬቶ ቱስቲስ እሜቲንኩ እምፕልታቕዳ እርምጄ ካፃንኩ አኽⶓ ኪላ ጌሌፅካ::

አዊ ብሄረሰቡ ቺፅጝፂዳ ጌንዜቡ ሜምሪው አላፊ አቶ መለሰ አዳል ብሄረሰቡ ቺፅጝፂዳ 2016 ም.አሜታዳ ሜዴብስትኹሳ ምንግስቱሳ ባጄቶ ምንግስቱ አግልግሎቲዳ እሼታ ፄዋንኩ አኽⶓ ጌሌፅካ::

ምንግስት እግስስታ ሜሜሪ ስሬታስ  ሜዴባማ ባይፃው ባጄት ምንግስቱ እንፅኺዳ እሽፅጝዳ ካንትስታዉ ዳንጉዊኒዳ ኦዲተርካስ ጋማጋምስታው አኽⶓ እርዳትፅካ::

አክኽካ ጄውስታኒስ ዳንጉንካ ዝኩዋንኩ አኽⶓ ቶኬሙንኩ ጌንዜቡ ሜምሪው አላፊ አክኽካዋ ጄዋማ እምቢታማ ታምፅጝዳ  ችግርካ ዝኩⶓ ጉሽካ::

ጌንዜቡ ሜምሪ ቱስታ ጋቲታ ድስኹሳ ጌንዜቦ ኦዲታ ፄውጝስ ዙራታ ፄዋንኩ አኽⶓ ኪላ ቶኬምካ::

ክልልታ ፌቴርስትኹ ፄትቲው ችግርስ ምንግስት ኩፕፃው እሺኹ ጌንዜብ ወክትስ ኩፓውላስ ይጉⶓኪላ ቶኬምካ::

ፌይኹ አሜትዳ ሚፄ ኩፕፅጝዳ ሚንችካ ችግርካ እሺⶓ ጉሽንኩ ሜምሪው አላፊ ምንግስቱሳ ንብሬቶ ቼፍጝጚዳ ሚንችካ እንፅኽካዋ እንፃኽስትⶓ እርዳትፅካ::

ሚፄ ኩፕፃንኩ ኾትካ ችግራኻዳ ያኼካማኪላ ኾትታ ሚንችካ እንፅኽካ እንፃኽስትⶓ ጌሌፅካ::

ወረዳታ ሚንችካ ምንግስትኩ አግልግሎቴ እያቲንኩ አክኽካ ኩፔካማ  አግስታንኩ አኽⶓ ቶኬሙንኩ ሜምሪው አላፊ ትክምዳ እሼንኩ ንብሬትካ ትክሞ እያንታ ፄዋንኩ አኽⶓ ቶኬምካ::

ሜምሪታ አክኽካዋ ጄውጝዳ ዝኩንኩ ዳንጉንካ ኮሚቴዋ ቲሪትጝፅጝስ ፃንኩት እላቲኩ አክኽካ ጄውስታኒ ዙራንታ ፄውስታማጊ አኽⶓ ጌሌፅካ::

ወረዳዳ ግንባቲዳስታ እሊኩ እንፅኽካዳ ጄውስታንኩ አክኽካዳ ዝኩንኩሳ ዳንጉንካዋ ክችስጝስ እንፃኽስትካማጊ አኽⶓኪላ እርዳትፅካ::

ሜምሪታ ሜዴብስትኹ ባጄትዴስ ሊኽዴስ 97 ታፋ ትክምዳ እሼታ ፄውስትⶓ እርዳትፅካ::

ሚንችካ ወረዳካዳ ሚፄ ኩፕፅጝዳ ችግር እሺኒውላ እይስትኹሳ ባጄቶ ትክምዳ እሽፅጝዳ ጉድ እንፅኺ እንፃኽስትⶓ ጌሌፅካ::