ባላንዶሩ ዊፃንቲ

ታደለ አጋጄ

ስፔን አጌሩ ካሜንስታንቲስታ ማንቸስተር ሲቲው እንክራንቲ ሮድሪ ንጙዊኒ 2024 ባላንዶሩ ዊፃንቲ ያኻ።

ፌይኹ ልኺትጚው ዝቤንዳ እንክርካዳ እምፕል ይቢቺዳ ዊፅስትኹ ክቹ ውታኺው እንክራንቲ ስፔን 2024 አውሮፓውሳ ዋንቼ ዊፄታ ፄዋ።

ማንቸስተር ሲቲሊ ዴሜካ ፕሪሚየር ሊጉ ፣አውሮፓው ሱፐር ሊግስታ አሌሙ ክሌብካውሳ ዋንቼ ሳኪትጝፅጝስ ካላ።

አባላምቲ ባላንዶሩ ዊፃንቲ ያኹኽ ሮድሪ ሪያል ማድሪዱሳ ቪንሺየስ ጁኒየሮ ቤዴርጝስ ሽልማቴ ዊፃ።

እሊው እንግሊዝ አጌሩ ካሜንስታንቲስታ ሪያል ማድሪዱ እንክራንቲ ጁድ ቤሊንግሃም ሹኻንቴ አቾ እሚጝስ አሌዳ።

ሪያል ማድሪድ አሜቱ ዊፃንቲ ኬች እስቱስ ሴሌቴንፃንቲ ካርሎ አንቸሎቲ ዴሜካ አሜቱ ኮኬብ ሴሌቴንፃንቲ እስታማ ጎሌልስታ። ሪያል ማድሪድ ክሌብኩ ዎኬልስታንትካ ሽልማቲው ቴርትዳ ዲግካማ ሽልማቴ ቻቤላኑላስ ይጉዌካ።

ሪያል ማድሪድካ ጛጛርትጛሳ አግሌሉኒኪላ ቪንሽየስ ጁኒየር ባላንዶሮ ዊፃውላ ይጉጝ ቼሜትጙኒዴስ ፋሌንጋኽ እስታ።

“እዬስኪ፣ጝናአቕስኪ ያኻ አጌራስ ሊሊቲ ጌርኬኽ”ኑስ ሮድሪ ሽልማቴ ቻቤልኹ ጊዝዳ ዙማ።

ባላንዶር ፊፋ አጌርካው አችስ ሊኾ ኺስታ ዝኩኽ ዝርዝራኻዳ አግስታንኩ አጌርካዳ እንፃኽስታንኩ ጋዜቴንካስ እይስታው ጉላሊስ እይስታው ሽልማቲያኽ።

ሮድሪ ፌይኹ ልኺትጚው አሜትዳ አንኩዋንቴ አቾ እሜሺኾ።

ሃሪ ኬን ስታ ኪሊያን ሞገፔ ዴሜካ ኬፍቲኒ ጎሎ ቼፍፃንትካው ሽልማቲ ያኹኽሳ ገርድ ሙለር ዋንቼ ይጋርቴካ፡፡

ጎቤዝ ኮኬብ ጎሎ ማንዳንቲስ እይስታውሳ ያሺኑሳ ዋንቼ ዴሜካ አርጄቲና አጌሩስታ አስቶን ቪላ ክሌቡ ጎላ ማንዲ ኤሚሊያኖ ማርቲኔዝ ላጛንቲ ጊዝስ ዊፃ።

ንባር አግስትኹኪ ቢቢሲ አማኻርጚዴሴኽ