ታደለ አጋጄ
ግብርኒኩ ውማይቴንካ ዙማኑውስታጊ ፍትሬቱሳ ማዳባሬ ቴርስጝስ ቴኬምስትጝ ኽብፂውሳ አሉምቶ ዴሜካታ ፄውጝዴስ ፌይኹስ ዜርስትኹ ሴብል ምርታምት ዴሜካታ ኬፍቲኒ ትክም ዝኩኽያኽ። አሬሳቻንትካ ሊሊትጙንኩ ምክኒያትካስ አቓ ግብሪ ማዳባሪው እንፂጝ ፌቴርስታኒስታ አቓ ግብሪ ማዳባሪስ ፍሻኑሳ ጌንዜቦ ይጉፅጝስ ፍትሬቱሳ ማዳባሬ ቴርስጝሰ ቴኬምስታና።
ፍትሬቱ ማዳባሪ ዜርስትኹ ሴብሉሳ ምርታምቶ ዴሜክጝዴስ ፌይኹስ አቓ ግብሪ ማዳባሪው ኬሚካል ኽብፂዳ ታምፃውሳ ጉዳቶ ካላካልጛማ ኽብፄ አኬምጝስ ኬፍቲኒ ፍሺ ዝኩኽያኽ።
አማኻሪ ክልሉ ግብርኒው ቢሩ ንባርታ ፌይኹ ምርቱ ዝቤንዳ አሬሳቻንትካው ምርታምት ዴሜካታ አቓ ግብሪ ማዳባሪ ዎክትስ ታምባታ ፄውጝዴስ ድምክና አሬሳቻንትካ ፍትሬቱሳ ማዳባሬ ቴርሴካማ ቴኬምስታንታ ፄውስታማጊያኽ።
ስልኪስ ንባሮ ታምፁንኩ አዊ ብሄረሰቡ ቺፅጝፂ ጉዋንጊ ወረዳ አንጉዋይ ኬቤሊው አሬሳቻንቲ እሱባላው ጌታሁን ቤዴርንኹ ጊዝዴስ ጄሜርካማ ኮምፖስቶ ቴርሴካማ ቴኬምስትጝስ ኬሽኹሳ ምርቶ አግፅⶓ ዙሜካ። ፍትሬቱሳ ማዳባሬ እሳንስ ቴርስⶓ ቶኬሙንኩ አሬሳቻንቲ እሱባለው አኹዋቲስ ሊሚፃኑ ሴብልዳ እሳንስ ቴኬምስታንኩ አኽⶓ ድኹዌካ።
አሬሳቻንቲ እሱባለው ዙሙኑውስታጊ አኹዋቲስ ሹምቤ፣ ዱኒዜ፣ አምሌስታ ቤርቤሮ ሊሚፃና። እኒ ሴብልካዋ ሊሚፅጝስ ሹኻ ስፍራዳ ኮምፖስቶ ቴርስካ። ግብርኒው ውማይቴንካውሳ ኩስጜ ቻቤልጝስ ብቲዴስ ሴግዳስታ ብታኻዳ ላጛ አይኔታ ዳድስ ኮምፖስቶ ቴርስጝስ ቴኬምስታንኩ አኽⶓ እንክርፄካ።
ኮምፖስቶ ቴርስጝስ ፋይፃንኩ ዲብካዋ ሳሴርስ ጛ ዙራሙራዴስ አግስታንኩ ዲብካዴስ ቴርሳንኩ አኽⶓ ጌሌፁንኩ አሬሳቻንቲ እሱባለው ኮምፖስቶ አቓ ግብሪ ማዳባሪሊ አሌቔትጝፄካማጊ ዜራኒ ጉዶ ምርቶ እያው አኽⶓ ዙሜካ። ኮምፖስት አኹዋቲስ ሊማው ሴብልስ ኬፍቲኒ ትክም ዝኩኽ አኽⶓኪላ ቶኬምካ።
ጛ ዝኩዋኑ ዙራሙሪ አኹዋቲስ አሜትዴስ ላጚኒ ሊማው አኽጝታጊ ጉልሊ ዜርስታ ግባት ዲጋያታኪላ ካሲካ።
እሊው አንጉዋይ ኬቤሊው ሞዴል አሬሳቻንቲ ፀሀይነህ አላምረው ግብርኒኩ ውማይቴንካ ክንትፁኑ ስሬትስ ፍትሬቱሳ ማዳባሬ ቴርስጝስ ቴኬምስትካማ ኬሽኹሳ ምርቶ አግፅⶓ ዙሜካ።
አሬሳቻንቲ ፀሃይነህ ሹኻ ስፍራዳ ኮምፖስቶ ቴርስካ። አኹዋቲስ ዜራኑ ሹምቢዳ ፣አምሊዳ፣ ቤርቤርዳስታ ዱኒዚዳ ቴርሱኑሳ ኮምፖስቶ ቴኬምስታንኩ አኽⶓ ቶኬምካማ አቓ ግብሪ ማዳባሪዴስ ኪቻ ኮምፖስት ኬሽኹሳ ትክሞ እያው አኽⶓ እንክርፄካ።
አቓ ግብሬ ማዳባሬ ቴኬምስትጝስ ዜራኑ ብቲ እምፕል አሜትስ ይቢቻ ትክሞ እያው አኽⶓ ጉሹንኩ አሬሳቻንቲ ኮምፖስት ኩፅኒ እምፕላኒ ፄውኑ አንኩዋ አሜታሳኺስታ ኽብፂውሳ አሉምቶ ዙርፃው አኽⶓ ዙሜካ።
ግብርኒኩ ውማይቴንካ ኮምፖስት ዋታጛ ቴርስስታው አኽⶓ ሙሬኺስታ አንትጝስ ክንትፃንኩ አኽⶓኪላ አሬሳቻንቲ ቶኬምካ፡፡
ጉዋንጊ ወረዳው ግብርኒ ፅፌት ጝናዳ ኽብፂ አሉምቱ ውማይቲኒ አቶ አጋሉ ተሰማ አሬሳቻንትካ ምርታምት ዴሜካታ ፍትሬቱሳ ማዳባሬ ቴርስጝስ ቴኬምስትካማጊ አኽⶓ እርዳትፅካ። ወረዳዳ አግስታንኩ 18 ኬቤልካዳጊ አሬሳቻንትካ ኮምፖስቶ ቴርሳንታ ፄውስትⶓ ጌሌፅካ።
ወረዳታጊ 593 ሻይ 774 ሜትር ኪዩቭ ኮምፖስቶ ቴርስጝስ አኬድስታማ 457 ሻይ 280 ሜትር ኪዩቭ ኮምፖስት ቴርስስትⶓስታ እንስኪላ ሊኽዴስ 77 ታፋ አኽⶓ እርዳትፅካ።
አንጉዋይ ኬቤሊዴስ ኬሽኹስ ይማሊ ኬቤሊዳ ኮምፖስቶ እሳንስ ቴርሴካማ ቴኬምስታንኩ አሬሳቻንትካ ዝኩⶓኪላ ቶኬምካማ።
አቓ ግብሬ ማዳባሬ ሚንቾ ጌንዜቦ ፍሽጝስ ጄዋንኩ አኽጝዴስ ፌይኹስ እምፕል አሜትስ ቴኬምስታኑ ግባት ላጛንቲ አሜትዳ ድምክኔ አቓ ግብሬ ማዳባሬ ፋያው አኽጝስ ፍትሬቱ ማዳባሪ አሬሳቻንትካስ ኬሻው አኽⶓ ውማይቲኒ እርዳትፅካ።
አቓ ግብሪ ማዳባሪ ፄውስታማ ዜርስትኹ ብቲዳ ኽብፂው አሉምት ኔኬቴ። አሜት ቺፋ ድምክኔ ግባቶ ፋዬ። ኮምፖስቶ ቴኬምስትጝ ኩፅኒ ብቲው አሉምት ዙራታ ፄውጝስ ኽሳንቲ ትክም ዝኩኽ አኽⶓኪላ ውማይቲኒ ጌሌፅካ። እምፕልታቕ ጛው ዙራሙሪዳ አግስታው ዲብዴስ ቴርሳኑ አኽጝስ ጌንዜቡ ፍሺዴስ ይጉፃው አኽⶓ ቶኬምካ።
አሬሳቻንትካ ሳይንሳዊ ዳድስ ኮምፖስቶ ቴርስጝዳ ዳንጉንካ ካንትስቱኒውላ አሬሳቻንትካ ትክሞ ሺሼካማ ብቲዴስ ጃላ እንፃኽስስታውሳ ኮምፖስቶ እሳንስ ቴርስጝስ ቴኬምስትካማጊ አኽⶓ እርዳትፅካ።
ግብርኒው ውማይቲኒ አሬሳቻንትካ ጉሹኑ ግባቱ ችግሩ ካሲ ክችክቺ አኽⶓ አምንጝስ አኹዋቲስ ሊሚፃንኩ አሬሳቻንትካ ጉልሊ ዜሮኪ ያኻ አቓ ግብሬ ማዳባሬ ዎክትስ ዲግስጝዳ ችግር ዝኩⶓ ጌሌፅካ። እምፕልታቕ ፋያኑ ጊዝዳ ፋያኑሳ ላካሳ አቓ ግብሬ ማዳባሬ አግፃቲኑ ቹዋ ችግር ማዳባሬ ቤንጝፃኒስ ሚንችካ ዳንጉንካ ዝኩጝስ አኽⶓኪላ ቶኬምካ።
ናካዳ አንጉዋይስታ ዳንጉሊ ኬቤልካስ ያኻው አቓ ግብሪ ማዳባሪ እላቲው አኽⶓ ጉሹንኩ ግብርኒው ውማይቲኒ ማቤርካዳ ዝኩኽሳ ማዳባሬ ፌቴሹኒዴስ ፋሌንጋ አሬሳቻንትካስ ዲግስጝስ ፅሬቶ ፄዋንኩ አኽⶓ እርዳትፅካ።
አዊ ብሄረሰቡ ቺፅጝፂው ግብርኒው ሜምሪው አላፊ ዶክተር ታደሰ አስፋው ጉዋንጊ ወረዳ አንጉዋይ ኬቤሌ ጎቤናኒስ ጌሌፁኑውስታጊ አሬሳቻንትካ አቓ ግብሬ ማዳባሬ ቴኬምስትጝዴስ ኬምፕስ ኬምፖ ላጛ አይኔት ፍትሬቱ ማዳባሪኩ አይኔትካዋ ቴርስጝስ ምርታምቶ ሌጌፅጝስ አሬባሬብጜ ፄዌካማጊያኽ። ብሄረሰቡ ቺፅጝፂታ ላንቡሳኺስታ 800 ሻይ ሜትር ኪዩቭ ፍትሬቱ ማዳባሪ ቴርስስትⶓ እርዳትፅካ። ዎክት ኮምፖስቶ ቴርስጝስ ፋይፃንኩ ግባትካ አግስታኑ አኽጝስ ቴሳስ አርፌኺስታ ይስጛማ ሲፋው አኽⶓ ታክስፅካ።