ሀመርስታ ጚ ባይላ

ገነት አየነ

ይቶፒያዳ አግስታንኩ ብሄረሰብካዴስ እምፕልካኽ:: ስንክርስታያሱ ባይልስ አሌም ቤዴራማ ያቓ:: ኬሌም ዌና  ግዲፅካኪላ ጛጂስኩ ሊሊትካ አቕፅካ ያኼካ:: ደቡብ ኦሞኩ ሊሊትካ ግድካ ሀመሩሳ ባይሎስታ ዴሶ እንቶጂስ አንቤብፅጝስ ፋኑኻ::

ሀመርካ ደቡብ ይቶፒያ ሀመር ወረዳዳ አግስታና:: ሰሜንሾስ ከበላ፣ ደቡብሾስ ዳሰነች፣ ምስራክሾስ ኤርቦሬሊ ስታ ምራብሾስ ዴሜካ ያንጋቶም፣ ካሪሊስታ ሙርሲኩ ቤሄረሰብካሊ ወሌንካኽ:: ሀመር ናው እቑፂ ብሄረሰቡ ኮንኪስ ካንካዳ ስታ ካርጝ ክቻዳ ዝኩንኩ እምፕልቱንኩስታ አሌቔትጙንኩ እዝብካ ንጝያኽ:: ሀመር ናው እቑፂው ታሪክኪላ ቤዴሩኽ ዝቤንዳ ሀመርኩ ማቤርአቕ ካርጝካውዳስታ ሌጌሴምካ ካንካ ክቻዳ ጐረጐርስቱንኩ ስፍርካዳ ዝኩዋሺንኩ አኽⶓ ምንጊስኩ ታሪክኩ ሜፃፍካ ካንትፃና:: ብሄረሰቡ አንትጝጚ ካሪዴስ፣ አሪዴስስታ ሙርሲ ዴስ ይንቱንኩ ሊሊትጙንኩ ኬችካው እምፕልትኪላ ሀመርካ አግስታንታ ያኻ::  ሀመርካ ቹዋስ ክምካዋ እሩብፅጝስ እንዴስ ድምክኒስ ሹምቤስታ ባርባሬ አሜሬትጝስ ዝኩዌኔ ጉሳና::

ሀመርኩ ብሄረሰብካ ሚንች ዝቤንካዋ ማንዴካማ ሴጝፁኑ ሊሊትንኹ ባይላዊ ፄውካስ እሳንስ አቕስታና:: እኒጛ ባይላውካ ፄውካስታ ባይልካ ክቻዴስ እምፕልትስ ኬቤርስታንኩ ባልካ፣ ጉድቡ ቴርትስታ እሊኩኪላ ዝኩና::

ሀመርካው ሊሊቲ አቕፂ ክሙ ቴርትዴስ ኢባንጋዲው ቴርት እምፕልያኽ:: ኢባንጋዲው ክም ሀመርኩ አፍሌን ጝርጃውስታ ኹኑ ኔፃኔቱ ጉድቡ ክም ያኹስ፤ ኢባንጋዲ ኪላ ጐዴብስታው ግዲቲት አርፋስ ክማኒያኽ:: ኢባንጋዲ ሹኻ ጌርኩ ሊሊትትስ ካቢትጝጛማጊ ኬቤርስቴ:: ኢባንጋዲው አዝሜሩ ወክትዳ እንፅኺስ ዴሬትኹሳ አንኩሌስታ አካሎ ፍትኽፅጝስ እስታማ ፄውስታው ባይላዊ ሻኺው ቴርት ያኹስ ሀመርኩ አፍሌንካ ማይቤራዊ ዝኩዊኒሊ ታምትጝጛኑ እንካኖስታ እንጐጊ ጌሌፅጝጛኑ እስካውካ ጉድብኩሳስታ ሻኺኩሳ አይኔትካዋጊ ዲግሳኑ ሊሊቲ ብሩኽ ክሙ ቴርትያኽ:: ሚፅካያስኩ አኹኪ ኽይስትካያስኩ ኹን ኢባንጋዲዳ አሴቴፍጛንኩ ያኻኒስ ክምቲ አርፋስ ግዲካማ ሌጐ ብብርፅጝስ ውታኺዳስታ ካዌናኻዳ ኹንስታ ጝርጂ ግዲካማ ሻኻና::  ኢባንጋዲ ሀመርካው ሊሊቲ አቕፂ አኽጝታጊ ይቶፒያዴስ ሴጋ ሚንችካ ፂኒሳንትካዋስታ ጐቤናንትካዋ ጉሳ:: ኽይስትካያስኩ ኹኑ ኢባንጋዲው ቴርትዳ ኔፃኔትስ አሴቴፍጛንትካ አኽጝስ ጝን አቕ ጄርካዳ ቻኒስቶ ሲፍፅጙ ሜብት እላ:: ምክንያትኪላ እን ሀመርካው ሊሊቲ ባይል አኽጝስያኽ::

ሀመሩ ባይልስ ቱትጚዴስ ቤዴራ ፄውስታንኩ ዲብካ ክቻዴስ ኹናዋ ሚፅጝስ ቴርትኹ ጄር ቤዴራማ ኹናኩ ጝን አቕስ ማቺታ ዲግስኩሳ ሚንችካ ክምካዋ እሩብፅጝ እንኪሜ ሳንክፃማ ፅኻራዋ ሳኽፅጝስታ  ጝኖ ግቢትጝ ፋይፃንቲያኽ:: ሀመሩ ጝርጂ ፋይስ ያኻውላ ባይል ጌዴድፃው አኽጝስ ባይጝስ ካላቲንኩ እሊኩ ባይላውካ ፄውካ ዴስ እምፕል ክምካዴሰ ፕሪጙ ቴርትያኽ:: ኹናዋ ሚፅጝስ ድሚ ታምቡኽስታ ክምካዴስ ፕሪጝስ ቴርትኹ ሀመሩ ጝርጂስ ሀመሩ ባይልስ እኩሊ እስታው እቑፂ ስም ዝኩኽያኽ:: ክምካዴስ ፕሪጙ ቴርትዴስ ቤዴራማ ፊትጝጝ ዝኩኽ አላፍትካጊ ዝኩና:: እኒጛኪላ እኩሊ ዴዴⶓ ግምቦ ይውዳ እንፄዋማ ይውዴስ ጃላ ዝኩኽሳ አካሉሳ ቤኖ ዝባትፅጝ ዝኮ:: ዲጊ ዳኪ ያኻ እቺዳ ዝኩንኩሳ ድንግሬኖ እቑዊጝ ጚስ እይስትኹ እንፅኺው ቤንያኽ:: ድንግሬን እቺ አጌርዴስ ውላ ይንቴካማ እንዳ ቴርትዳ አሴቴፍጝጝ ግዴቲያኽ:: እቼ አጌሮ ኺስታ ልኩስ እንዜጛማ ድንግሬኖ እቑዊጝ እኩሊውሳ አካሉሳ አድርትⶓስታ ሼውፅንታውሳ ይሴንቶ ካንትፂያኽ ጌሬፍስታኒስኪላ እሴላ ጋያኪ ጌሬፋንትካውላ ፕር ንካማ ካስካማጊ ጅሚስስታ እኹቲስ ጌሬፍስታና:: እን ግሩም እፃው ሀመሩ ባይላዊ ፂዊኪላ ናካሳኺስታ ፄውስታማጊ አግስቴ፡  ጌርፍስትጙ ቴርት አሌድስቱኒዴስ ፋሌንጋ እኩሊው ይዝኩዊ ፍታኒ ሲፌ:: እኩሊ ክምካዋ ፕሪጙ ቴርትስ  ግዲጝስ ሊሊትጙኽ ኽብፂኩ አይኔትካዴስ ኬሌሞ ፍሽጝስ እላፎስታ ጛሪ ፄፄፋሳ ግዲፄ:: ክምካ እምፕልዳ ኩፕናና:: ክምካዴስ ፕሪጙ ቴርትዳ እኩሊ ስዮ ሴያላ:: ይሴን አኹኪ  ግርቢስትካ ያኹንኩ አቕ ክምካውሳ ፅማሮስታ ጄንጆ እሜና:: 15 ዴስ ጃላ ክምካ እምፕልዳ አምስትካማ ቲሬና ቴርትስ እቑስቱንኩ እኩሊኩ ጝን አቕስታ ድንግሬን ሌዋ ፃንጌኻ ኩፕንካማ ጅምካማጊ እኩሊዋ ይስጝፃና:: ኹን  ታሜትስታንትካ ኪላ እንዳ ቴርትዳ አሴቴፍጛና:: እኩሊ ፕርንⶓ ጄሜሬ::

እምፕልዳ ዳራዳርሰቱንኩ ክምካዋ እንቓሳማጊ ክምካዴስ አምፕስ ጊጛማጊ ፌዬ:: ክችዳ ክምካ ልቕልቕናንቲንታኪላ እሜንኩ ይሴንካ አቕ ፋይፃና:: እኩሊኪላ ክራፊትጛማ ኽቴናቴ ጊጛማጊ ፌዬ:: ድንጌቶ ክችዳ እቱኒጊ አኹኪ ብቲሾ ጌሙኒጊ እኩሊ አችዳ ታምባያላኽ ንጝስ ሀመሩ ባይልስ ኹናዋ ሚፅጝስ ካላላ:: ኻስኩሳ ቤዴራ ቴርትካዋ ዋኽትጝፃውላስ ይጉኒጊ ይንታው አሜትስ ኬፄሩ እምስቴ:: ክምካዴስ ፕሪጙ ቴርት አሌድስቱኒዴስ ፋሌንጋ እኩሊገዳ  እስታው ሻኺው ስታ ጉደቡ ቴርት ሲፌ:: እኩሊ ገዳው ጉድብስታ ሻኺው ቴርትኪላ እኩሊው ክብርስ እስታማ አርፋው ብራንስ ብርኹ ክምስ ፄውስታው ባይሉ ቴርትያኽ:: እኩሊኩ ጝንአቕ እንያሳ ጄሮ ካሚንናና ሌጌፅናና አክመ አዳሙ ማሬግስ ታምፅንኾ ንካማ ቱትጚስ ቢክፅንኾ ንካማጊ ጐዴባና:: ክምካዴሰ ፕር ኑኒዴስ ፋሌንጋ እሊው ይዝኩዊ ቴርት እላቲው አኽጝስ ቱትጚ ፄውስታው አኽⶓ ቼሜትጝፃና:: እኩሊኪላ ክምካዴስ ፕር ኑኒዴስ-ፋሌንጋ መአዛ እስታውሳ ክብሩሳ እቑፄ አግፄ:: እኩሊኪላ እኩሊ ጉዳው ትርትዴስ ጄሜራማ ሹኻ አርፋሳ እሺዴስስታ ኾሺዴስ ይጐ እሊውሳ ኬሌቦ ኬሌብስታላ:: እኩሊኪላ ሹኻ አርፋኻዳ ጚውሳ አካሎ አድርፄ እስታማ አምንስቴ:: ኻስስኪላ ሊሊትጙንኩ ቴርትካዋ ፄዋና:: ታሚትስቲት ሀመርቲ ኹና እሊው ከቤሊዴስ አኽጝ ዝኮ:: ሀመርኩ ኹንስታ ጝርጃ ኻስስ ቤዴርካማ ሊሊትጙንኩ ግዳግድካዋ ፌድሊዴስ፣ ሻሚዴስስታ አይዴስ ግቢታና::

ኻሱ ቴርትኪላ ብሩኽ ዳድስ አኮሜችስቴ:: ፂኻ ፂኻራሾ ካስጝዴስ ፍና ሀመርኩ ሹማጌልካስ ዳቔርስቴ:: ድቕሩ ቴርትኪላ ቡን ጌፌርስትጝስ ሀመሩ ሹማጊሊ ቤዴራማ ቡኖ ኽምቢዳ እሜማ ፂኻራዳሰታ ፂኻዳ ፂቕፂቕ ፃማጊ እንትፍ እንትፍ ንጝስ ዳቔሬ:: ካሚን አጊል እስቴታ ዳቒርስቴታ ሲፍስቲ:: ፂኻ ፂኻራስኾ ካቱኒዴስ ፋሌንጋ ፂኻራስኩ ኹን ሴንካሊ አንኬሩ ኻግዳ ኹሪ:: ፂኻራ ዴሜካ ካዌናኻዳ ካቻማጊ ቺጝስ ብቲቻኒ ይንቴ:: ሀመሩ ባይልስ ፂኻ ፂኻራሳ ማቔችፃንኩሳ ፄውካዋ ፄውቴ:: ፂኻራኪላ እንሳ ካንታማ ፌያላ ፂኻዋ ታሴ:: እንጚኪላ ባይል አኽጝስ ፂኻ ፂኻራ ታሳላ ናኒ ናኩኻ ኔታ ታክስታት አኽጝስ ፂኻኪ ፂኻራሳ ማቔችፅጝ ይጉዋላ ፂኻራኪላ ፂኻዋ ኪንክፄ:: አርፊዴስ ሹኻ አርፋሳኺስታ ፂኻስታ ፂኻራ አብራ ቻላኪ:: ፂኻ ውላዴሰ ቤዴርታታ ጁጝስ ቡኖ ጌፌርፅጝ ግዴቲያኽ:: እንጚሱ ዳድስ ትዳሩ ዝኩዊኒ ጄሜርስቴ::

ሀመሩ ባይል እሊው ዝቤንጚሊ አሌቔትጛማ ስንክርስትያሱ ባይላዊ አሜ ማንዱታ ዝኩኽ አኽጝ ሚንችካ ባርኾቼኩሳ ጐቤናንትካዋስታ ማራማርጛንትካዋ ጉሳ:: ባይሎ ማንዴካማ ሚንች ዝቤንካስ እጂፅካ:: ባይሎ ፍትሬትሊ አምኽጝፅካማ እሚካማ ሴጝካ፣ ዝቤንጚሊ ስንክርስታያሱ ፅንኩት ባይል ዌና ሊሊትካ ይቶፒያኩ ግድካኽ ሀመርካ::

ንባር አግስትኹኪ ኢቢኤስስታ ኢቢሲዴሴያኽ::