ፂፂ ቴግባር

ሳነሽ ተረፈ

አሌምዳ ሚንችካ አጌርካ ኬፍቲኒ ሴላም አቲጛስ ፌይካ:: ምሳሊታ ካንትናኒ ደቡብ አፍሪካ፣ ቱኒዚያ፣ ናይጀሪያ፣ ኮቲዲቫር፣ ሩዋንዳ እሊኩጊ ጅዋና:: እኒ አጌርካ ሊጊሲሜ ጋቻኻስ ፌይጝ ታምፅኹ አቕቱ፣ ምታኒ አብቱስታ ማቤራዊው ኬውስ ኬፍቲኒ አኽⶓ እርዳትስትጝስ ሊሊቶ ዙሚትጚስ፣ ኩስጝጚስስታ ዳራዳርጚስ አኽⶓ ቤዴርፅካ:: እን ኪላ ዋይሜ ያጋማ ውላጊ ዜርፍዳ ኬሻንቴ ልግሶ ሜዜጌብፅጝስ ካሌካ::

አሌምዳ ይቶፒያዋ ዴሜካማ ሚንችካ አጌርካ ጝሺሳኺስታ ጋቻስታ ወሬማኻዳ አግስታና:: ቪዥን ኦፍ ሂውማኒቲ አ.ዝ.ቼ አምሊ 11/2024 ፍሽኹ ሪፖርት ስሬታስ 92 አጌርካ ወሬማኻዳ አግስታና:: ይቶፒያኪላ ሰሜኑ ወሬም ጂሚሪ ትክምቲ 24/2013 ም/አ ጄሜራማ ሜልኮ ኪስጝፃማጊ ላንቡሳኺስታ ሲፉታኽ:: አምሊ አሊዲ 2015 ም/አ ጄሜራማ አማኻሪ ክልልዳ ዱንጊቲስ አጌዝስትኹ ጋቻኻዳ ቱዋ::

ፌቴርስትኹ ሰላሞ አቲጙ ችግርስ ክብር ያኹኽ አቒው ይወትስታ አብት ንብሬት ቱስታጋታ ድስጝስ ካላ::

አቒ ኻሮ ጌርኮ ፃዴፋማ አፌርኹሳ ማቻቑዌ፣ እሌት ቺፋ አግፃው ሚፂዴስ ክብሳማ ቻ ጄር ጀራስ አዌሎ እሚጝስ እንፅኺሾ አሴሜርጝኹሳ አብትዌናሳ ኪላ አብቶ ዜሬፍጝስ ጛው ዙራሙሪዴስ ፌፌኔኬልጛታ ፄዋ::

እንኩዊንትኹ ጝንዴስ ፌኔኬልጝኹስታ እንካናው ጝን አቕዴስ አግሌልጛማ “ድባን ፍርዶ አይስ” ንጝስ ድባንስ አዴሮ እይኹ አጌሩ ዝኩዋንቲ ክልሉ ምንግስትስታ አጌሩ ካላካልጚው ስራዊቲ ፄውኽ ይሴን እጐ ኬቤርፅጙ እንፅኺስ እንኩዋን ጝንሊ አብት ንብሬትሊ ታምትጛታ ፄዋማጊያኽ::

ክብሪ አቒው ይወት ድስጝስታ ታክሲሎ አብት ንብሬቶ አቲጝስ ቤዴልስታሺንኩ አዩ ጉዋጉሲ ወረዳዳ ኢንቨስትመንቱ እንፅኺው ዜርፍዳ አሴሜርጙንኩ አብት ዌንኪላ ጛው አብት ዙርጝስ እንኮዋኽስትኹሳ እንኩዋኽስቶ አዊ ብሄረሰቡ ቺፅጝፂ ምንግስት ኮሚኒኬሽንዴስ አግስቱኹሳ ንባሮ አንቤብፅጝስ እንካንና::

አሬሳቻንቲ ንብረት መንግስቴ እስታና:: አዩ ጉዋጉሲ ወረዳዳ ኢናባሪ ኬቤሊው ዙሪዳ ኢንቨስትመንቱ እንፅኺው ዜርፍዳ አሴሜርጜካማ ክምካዋ፣ ድኹዋሮስታ ታያ ፍየልካዋ እሩብፃና:: ክምካዋ ቡዚሳና ሌፍፃና:: አጌር ሰላም ንካማ እንፅኼ ጄሜሩንኩ አሬሳቻንቲ ንብረት ኩፅኒ ጛው ታክስጚታ ያኻውላስ አቔጊታኹዋታ ወጀቤርፅኹስታ ሴዴድፅኹ ታክሲሉ ወሬም ጛውሳ ታፎ ናኼስፃማ ፌያሺኾ:: ጛኪላ ዜሬፍስቱኑ 60 ዴስ ጃላ ክሜ፣ 100ዴስ ጃላ ታይካዋስታ 12 ድኹዋሮ  አቲስካ::

ችኻ አሬሳኑ ሴብልዴስ ዴሜካ ቦሎኬ ይቪቺ 100 ኩንታሎ ካፃኒስ ታፌ ዴሜካ ጐግሊዴስ ኪዴካማ 25 ዴስጃላ ኩንታሎ፣ 200 ኩንታልዴስ ጃላ ሹምቤ ካፅካ:: እንጊ ያኹስኪላ አብት ንብሬቶ እንታ ቼኬንካማ ካፁንኩ ይውሳስታ ጝንአቑሳ እንኬ ዋትጜ ባያኑ? ናውስኪላ ኻር ጌርክ ናኑውላ ጝን አቖ እሚካማ ልኩ ፍሻ ፊጝስ ዛኽ ዝሜድዳ ናቒካማ ጌርኮ ፌይፅካ::

ጌርክ ጌርኮ ካሜናማ ልላኹኽ ጌርክ ብራንታማ አማኻሪ ክልሉ ፄትቲው አይልስታ አጌሩ ካላካልጚው ስራዊቲ ፄውኹ ይሴን እጐ ኬቤርፅⶓ እንፅኺስ ጛው አብት ንብሬትሊ ታምትጛኒ ምቲስ አግፁኑሳ ፊኹዌ ዙሜካ::

ናካ ይንታማጊ ዝኩኽ ሰላምስኪላ ዙራሙሪሾ ዙርካማ ዜሬፍስቱንኩ እንሴስካ ዙርካማ ካንትጝስ ቢኪⶓ ዲብስካ::

እን አግስትኹ ቴስፊ ዴሜካ ጋሽስታውስታ ቻ ኪላ አሬሳቻንቲ ንብረትጂስታ ችግር ታምባቲታ ውላ አሬባሬብጜ ፄውጝ ቱስታው አኽⶓ ታክስፅካ::

“አምሊ ብሳ ያኻኒ ሳኖ ፄጌሬ” ናኑውስታጊ እን ወሬራንቲስታ ዜሬፋንቲ ኬች ጚውሳ እንፅኼ ባያቲው አኽጝስ ዙራሙሬ ኒካማ ማንዲጝ ቱስቴ ኑንኩ አሬሳቻንቲ ንብረት ግርቢስቲዳ ግርቢስቲ ታምባኒ ዜሬፍኹሳ አብቶ ዙርፅኾጉ እንታኮው ሴሜርፃንቲ ቴግባርዴስ ፍኖ ዙርፃቲው አኽጝስ ካብስ እንታኮው ችግር ካቢስታቲታ ውላጊ እምፕልታ ዙራሙሪው ዴክትስ ቲሪጝ ቱስታው አኽⶓ ሼውፅካ::

አሬሳቻንቲ ትሩነህ አንጀት አዩ ጉዋጉሲ ወረዳ ኢናባሪ ኬቤሊዳ ዝኩዋንትካ ያኻኒስ ጛኪላ እሊኩ አፄብካታጊ ኢንቨስትመንቱ እንፅኺው ዜርፍዳ አሴሜርጜካማ እንፅኼ አኮሜቻሺና:: ዙራሙሪዳ ፌቴርስትኹ ጋቻስ ኩፂ ዜሬፋንቲ ኬችስ አፌሩኑ አብት ንብሬት ዜሬፍስታ:: ጛኪላ እንዴስ ጌና ዝኩዊኒ እላኽ ንጝስ ጛው ዙራሙሪዴስ ፌኔኬልጜካማስታ 11 ሻይዴስ ጃላ ክሜ፣ ላጛ ሻይዴስ ጃላ ድኹዋሮ፣ አንኩዋ ሻይዴስ ጃላ ታይካዋስታ 400 ሻይዴስ ጃላ ፍየልካ ዜሬፋንትካስ ጛው ታፍዴስ አቴካ::

ትክላሊስ ዜሬፍስትኹ አብት ጌንዜብስ ጌሜትስታኒ 10 ሚሊዮን 7 ሻይዴስ ጃላ አኽⶓ ድኹንኩ አሬሳቻንቲ ትሩነህ ፍንሾስ እንሳ አብቶ ዙርፃማ አግፅጝስ ኽሳንቲ ፍታኒ አኽⶓ ዲብስካ::

ናካ ኩፅኒ እጐ ኬቤርፅጙ እንፅኺስ አግስትኹ ቴስፊስ ዴስቴንካ አኽⶓ ዙሜካ:: እን ያኻማ ኩፂ ናካ ኪላ ያኹኒ ጛው አብት ዋኽስ ዋኾ ዙራያሱስታ አግፄካያስኩ አኽጝስ ጝሺኪላ ምንግስት እጐ ኬቤርፅጙሳ እንፅኼ ይስጝፃማ ሲፍጝ ቱስታው አኽⶓ ታክስፅካ::

እምፕልታቑ ዜሬፍስትኹ አብት ንብሬትሊ እምትጙኽስ አሳቦ ታምፁንኩ አዊ ብሄረሰቡ ቺፅጝፂው ሰላምስታ ዴክት ሜምሪው አላፊ አቶ ጌታቸው ቢሻው ብሄረሰቡ ቺፅጝፂዳ ፌቴርስትኹ ጋቻስ ብሄረሰቡ ቺፅጝፂው ዝኩዋንትካዳ ታምብኹ ችግር እሳን አኽⶓ ጉሽካ::

አዩ ጉዋጉሲ ወረዳ፣ ጃዊ፣ ዳንግሊስታ ዚጋሚ ወረዳዳ እሺኹ ችግር ኬፍቲኔኽ ዶንጌታንትካ አይልካ ፄውኑ ግፍ እንፅኺስ ሚንችካ አቑ ይወት ድሳ፤ አብት ንብሬት ዜሬፍስታ:: እንቲታኪ ሊሊትጙንኩ ትንኩልካስ አብት ወዴማታ ያኻ::

እስጜ ችግሮ እርዳትስትኹ ክልሉ ምንግስትስታ ብሄረሰቡ ቺፅጝፂው ፄትቲው አይልካ እምፕልትስ አብት ዌንካዴስ ናማኪ ዙራሙሪዴስ ዜሬፍስትኹሳ ንብሬቶ ዙርፅⶓ ጄሜራ:: ጝሺ አኮሜችስታማጊ ዝኩኽ ኦፕሬሽንስኪላ ሚንችካ አብት ዌንካዴስ ካፅስትኹ 12 መኪና ዋኻ ክምካ ዙርጝስ ካሌካ:: እጐ ኬቤርፅጙሳስታ ሰላሞ ማንዲፅጙሳ ቴግባሮ ኪላ ሲፋ::  “ክምካዋ አብት ዌንሰ ዙርፅጝስ ኪላ እምፕልታቕስ አቕፅጝሰ እምፕልታቕ አብት ዌንቱሳ ሺሽፄ እሚጝስስታ ኬቤሊስ አቕፅጝስ አብቶ ካፃንታኪላ ድኹስታ” ንካ::