ኤች አይቪሊ ቡንካ

አለሚቱ የኔት

ኤች አይቪ ቑንዜ ካላካልጛውሳ አካሉሳ ቴርቶ ፂካው ቫይረሴኽ:: ቫይረስ አካላትሾ ቱስ አካላት ቑንዜ ካላካልጛውሳ ልቡስ ልቦ ዴሬፄ አኹኪ ፂኬ:: እስጜ ፅካቶ ቲሪትጝጛው እጁ ካፅስታውላስ ይጉኒጊ አካላት ቑንዚስ ስንክርስትጝስ ታምፄ:: ዋሺኒኪ አቒ ኤች አይቪዴስ ኔፃ አኽⶓ ማሊጝስ ካላው ብሪውሳ ምርማሬ ፄዋማ ኔፃ ያኻኒያኽ:: ኤች አይቪው ቫይረስ ብራኻዳ ዝኮ ንጝ ዴሜካ እምስትኹ አቒ እሜ ክርጝስ ታምቤ ንጝ ጋቲዊያኽ:: ኤች አይቪው ቫይረስ ብራኻዳ አግስቱክ አቕኪላ ቑንዚሊ እጂጝስ ካሊፃውሳ እጆ እሜ ጄሜርካማ ቱስቲስ ካፅጝስ ዋሺኒኪ ቲን ዌና አቒ እንፃኽስታውሳ እንፅኼጊ እንፃኽስትጝስስታ ድሜኪላ እጂጝስ ካሌ::

ጂሚሪ ጊዝዳ 1980ዳ ቑንዚ እሳንጙኒዴስ ፋሌንጋ ኤች አይቪ ቫይረስ ዋትጛ ፌያፌይጛው አኽⶓስታ ኤች አይቪሊ ዝኩጝ ዋትጛ ፄጌራው አኽⶓ፣ ኬርቱንኩ ካንትካዋ፣ ፍችትⶓስታ አግሌልስትⶓጊ ፌቴራማ ፌያ::

ኤች አይቪው ቫይረስ ኬሴትስትⶓ ጄሜሩኒዴስ ጉሽፃማ እምፕልታቕ ቑንዚስ እያው ካንቲ ኬርትኹ አኽጝስ ናቕፃላ ንጝስታ ቲኪኪምጚጊ እሺኾ:: ጊዝዴስ ጊዞ ይንቱኽ ኪሲስ ኩፅኒ ሴንካዋ አግሌልጝዴስ ኬቻ ናቕፃማ እርዳትጝሾ አንትጝስ ይንቱኽ ኪሲስ ኩፅኒ ሴንካዋ አግሌልጝዴስ ኬቻ ናቕፃማ እርዳትጝሾ አንትጝስ ካሊስታ::

አንኪሺ ጉዋጉሲ ወረዳ አገው ግ/ቤት ኬቴሙ ዝኩዋንቲ አቶ አስማረ ከበደ ኤች አይቪው ቫይረስ ብራኻዳ ዝኩክ አኽⶓ ስልኪስ እንክርፄካ:: እን ቑንዚስ ፂኪስትጝስ ካሉኑ ዴሜካ እሊኩ ኹንሊ ፋይታ ታምትጚ ፄውጝስ አኽⶓ ቶኬምካ:: ቑንዚስ እምስትⶓ ማሊጝስ ካሉኑ ዴሜካ ማልጜ ቑንዳስትካማ ጝንዳ ኹራኒስታ ባስ ጃጊ ኬሽ ካንትስታላ ናኒ ቲኑ ጉትፕሾ ካስካማ ማራማርስትጝሴኽ ቫይረስ ብራኻዳ ዝኩጝ አቕስቱታኪላ እሜ እጆ ካፅⶓ ጄሜርⶓ አቶ አስማረ ዲብስካ:: እጆ ክችክቺስ ሲፍጜካማ ካፃንኩ አኽጝስ ጛው ቲንዳ እንዳርማኪ ችግር ፌቴርስታያሱ አኽⶓኪላ ድኹዌካ:: ጛጂ ሲፍጛኑ ቲን ጉትፓዳ እይስታው ኩስጚስታ አግልግሎቲኪላ ማልጜ ሼውፅንታሳ ፄጌናው አኽጝስ አኻፁሪዳ ጌቴማንኩ ቑንዝካኪላ እሺካያስኩ አኽⶓ አቶ አስማረ እንክርፄካ:: ቲን ጉትፓዳ አርፊ ቺፋ እይስታው አግልግሎቲስታ ድምክኒ ቑንዚ ቑንዳፃኒ ነፃስ እይስታኒስ እሺንኩ ድምክንካ እጁክ አይኔትካ ኩፅኒ ናካዳ ኬውጝጝስ ቼጌርስትካማጊ አኽⶓኪላ አቶ አስማረ ቶኬምካ::

ኤድሱ ቑንዚ ቤዴራ እይስታሺኹ ትኩትስ እምፕልታቕ ፄዋኑ እሺኹ ትንካኪኪላ ናካዳ ኔኬታማጊ አንትጝስ ቑንዚ ዝኩኽሳላ ፄጌራቲው አኽⶓ አቶ አስማረ ዲብስካማ እይስታው ክንቲ ኔኬትጝ ቑንዚ እላንጝ ጋው አኽጝስ ውላጊ ጛሬ ማንዲጝ ፋይፃንቲ አኽⶓኪላ ታክስፅካ::

እሊት ግምጃቤት ኬቴሙ ዝኩዋንታስታ ቫይረስ ብራኻዳ ዝኩት ዊ/ሮ ሙሉነሽ አድማስኪላ እጆ ካፅⶓ ጄሜሩኒዴስ 10 አሜትዴስ ጃላ አኽⶓ ድኹዌካ:: አካላታኻዳ ዝኩⶓ ማላኑውላስ ጝናኻዳ ዝክኹ ታምትጚስ  ጄርኪሾጊ ፌያፌይጝⶓ ዲብስካ:: ጛ ማራማርስትካማ ዝኩⶓ ማሊጝስ እጆ ጄሜራኒስ ኩፅኒ ጝናቖጊ ማራማርፃንታ ካሲስታኒ ማራማርፅካማ ካሜኑኑ ጄርዳ ቫይረስ አግስትⶓ ቶኬምካ:: ቑንዚስ ትኩት እይስትⶓ ጄሜርጝ ዴሜካ ካሜንስታንኩ ስራስሪ ኔፃ ያኼካማ ካሜንስታንታ እርዳታሺኹ አኽⶓኪላ ዊዛሮ ሙሉነሽ እንክርፄካ::

ጛ ጄሜሩኑ ጊዝዳ እጁ ስግላስታ ክማኒ ካፅስታሺኹ አኽⶓ ቶኬምካማ ዲጊዴስ ናቴ ኩፅኒ እጁ ኬሽጛማ አንትጝስ ጌርክዴስ እንፕላኒ ይቢቻ ካፅስታው አኽⶓ ዲብስካ:: እን አኽጝ ዴሜካ እጆ ካፅጝስ ሳሴርፃይኩ አኽⶓኪላ ድኹዌካ:: ጛጂስኪላ ሊሊትጙንኩ ምከንያትካስ እጆ ኬውጝፃቲንታ ኹራኒስ ኻራ ካፃንኩ አኽጝስ እምፕላኒ ይቪቻ አኽጝ ኬፍንኹሳ እርዳቴ ፄዋዩክ አኽⶓ እንክርፄካ::

ዊዛሮ ሙሉነሽ ዙሙኑውስታጊ ኤች አይቪ ኤድስስ ዝክኹ ካንቲ ዲጊዴስ ናቴ ኔኬታማጊ ይንታ:: ምክንያቲኪ እጁ እላቲኩ ቑንዚው አይኔትካ ኬሴትስትጝስታ ኤች አይቪውሳ እጆ ቴኬምስታንትካኪላ ካንትስታኒስ አካላቶ ሴሻንትካ ያኼካማ ካንትስትጝስታ ቲንዌንካ እንፃኽስታኑሳ እንፅኼ አንፃኽስታኒስ ካንትጝ አኽⶓኪላ ቶኬምካ:: ቤዴራስታጊ ኩዋንቲ ቑንዚ አኽⶓ ካንትኹስኪላ እንፃኽስስታንኩ ቴግባርካ ኔኬትካማጊ አንትጝኪላ ቑንዚው እሳንጝጝስ ቤዴራፍንካ ምክንያትካ አኽⶓ ዊዛሮ ሙሉነሽ ድኹዌካ::

እሊውሾስኪ ቤዴራ ኤች አይቪ ቫይረስ ብራኻዳ ዝኩክስ ቲኑ ጉትፕዳ እይስታሺኹ እጁው አግልግሎቲዴስ ቴር ቴራ ኬሴትስታንኩ ቑንዝካስ ያኻው እጁ ነፃስ እይስታሺኹ ዲጊዴስ ናቴ ኩፅኒ ኬውጝጝስ ሚንችካ አክማጋንኩ ድምክንካ ቑንዝካዋ ካላካልጝⶓ አቲጝስ ክሪስ ታንቡንኩ ዝኩⶓኪላ እንክርፄካ:: ነፃስ እይስቱስ እሺኹ እጁ ፍንሾስኪላ ኬውጛሺኹ ክቼማ አግፃኑ ዳድ አሜችጛያታኪላ ዊዛሮ ሙሉነሽ አሳቦ እይካ::

አገው ግ/ቤት ቲኑ ጉትፕዳ ኤ አርቲ ቤኑ ቴቬቬርጝፃንቲ አቶ ፈካዱ ፈንታቢል ቲኑ ጉትፕዳ ኤች አይቪ ኤድሱሳ እጆ ካፃንኩ ቑንዳስቴንካዋ ክችክቺስ አግልግሎቴ እይካማጊ አኽⶓ ጌሌፅካ:: ካቢትጚስ ምርማሬ ፄውጝ ቱስታኩ እጁው ቴኬምስታንትካዋኪላ ፋይፃውሳጊ ምርማሬ ፄዌካያንኩ አኽⶓ እርዳትፅካ:: እስካዊስ ማራማርስትካማ እጆ ጄሜራንኩ ቴኬምስታንትካስ ዴሜካ ኩስጜ እይጝስ እጆ ክችክቺስ ካፃንታ ፄዋንኩስታ ሶኼትስ ያኻውሳ እይጝስ ክችክቺስ ካፅⶓ ቼሜትጝፅጝስ ዋልቲ አርፋሳኺስታ ካፅጝስ ካላኑሳ እያንኩ አኽⶓኪላ ቶኬምካ:: ኤች አይቪ ኤድሱሳ እጆ ቴኬምስታንኩ ጛርት አቕ እሊኩ ቑንዝካስ ቑንዳስታኒ ነፃስ እይስታው እሺኹ አግልግሎቲ ኩፅኒ እጁ ዲጋቲው አኽጝስ ኬውጝፅⶓ እርዳትፅካ:: እጁው እንፂጝ ዝኩጝስ ቴኬምስታንትካዳ አክም እላቲኩ አኽጝስ ትኩታኩ ቤንካ ዲግሳንታ ካቢትጚስ አቕፃንኩ አኽⶓኪላ አቶ ፈካዱ ጌሌፅካ::

አቶ አምሳሉ ጌታሁን አንኪሺ ጉዋግሲ ወረዳ ቲን ፅ/ጝናዳ ኤች አይቪ ፕሮግራሙ ቴቬቬርጝፃንቲ ወረዳዳ ኤች አይቪው ቫይረስ ብራኻዳ ዝኩክ አቕ ማራማርስትካማ ማሊጝስ እጆ ጄሜራንታ ፄውጙሳ እንፅኼ ካስጝፃንኩ አኽⶓ ጌሌፅካ:: ቑንዚ ካላካልጚስ ካሉንው ኮንደሞ ዲግስጝሾዳኪላ እንፃኽስታንኩ አኽጝስ ዲግስጚው ችግር እላ አኽⶓ ቶኬምካ:: ቑንዜ ካላካልጝጝ ቤዴራ ትንካኬ ፄዋንታ እይስታውሳ ሼውቴ እሜንታ ፄዋውሳ ክንቴ እይጝስ ኩፅኒ እምፕልታቑ ቻቤልጙ አኺኒስታ ትኩት ኔኬትጝስ ቼጌርስትካማጊ አኽⶓ ጌሌፅካ::

ቲኑ ጉትፕዳ እጁው ቴኬምስታንትካ አግፅጝስ ካላኑ እጁ ዲግስጚው አግልግሎቲኪላ እጁ ድኽጝስ አግስታው ስፍሪዴስ ያጋማ ቤንጝፅጝስ ወክታዊ ሰላሙ ችግር ምክንያታስ እንዜጝትጝፂው ችግር ዝኩጝስ ቼጌርስትⶓ እርዳትፅካ:: ቲን ጉትፕዳ አግስታንኩ እጁው አይኔትካዋ ቶኬምስትካማጊ እላቲውሳ ኩፅኒ ጛርቱ ቲን ጉትፓዴስ ጄዋንታ ፄውጝስ ችግር ጌጌዋንታኪላ አቶ አምሳሉ ታክስፅካ::