ብልፅግኒ ፓርቲ ኹኖ ቴኬምስታንታ ፄዋማጌኽ እስትኾ

ታደለ አጋጄ

ብልፅግኒ ፓርቲ ኹንስ እሳኖ ድሎ እይኹ፤ ውሳኔ እይጙ ካስትዳ አሴቴፍጛንታ ፄውኽስታ ኹንስ ድል እይስትጝ ዴሜካ ምንግስቶስታ ፓርቴ ቴኬምስታንታ ፄውኽያኽ ናኒስ ብሄረሰብ ቺፅጝፂው ኹን አመራርካ ጌሌፁና::

አዊ ብሄረሰቡ ቺፅጝፂው ማድንስታ ኢንቨስትመንት ሜምሪው አላፋ ታየች ዘለከ ብልፅግኒ ፓርቲ ኹንስ ውሳኔ እይጙ ድል እይስትኹ፤ አጌራው ጉዳይዳ ኹን ውሳኔ ዎሴንጙ ድል እይስታታ ፄውኽ አኽⶓ እርዳትፅካ::

ቤዴራ ኹንዳ ሚንች ቤዴል ታምባሺኾ ኑንኩ ዊዛሩ ታየች ውሳኔ እይጙ ካስትዳ እይስታሺኹ ድል ማልጛ ልቓ፤ ያኼስጉ ፌዩንኩ አንኩዋ አሜትካዳ ኹን ወረዳዴስ ፌደራሎኺስታ ዝኩኽ አችዳ ሊኽዴስ 50 ታፋ ኹን ጉሳንታ ፄውጙ ድል እይስታማ ጉድ እንፅኺ አኮሜችስታማጊ አኽⶓ ጌሌፅካ::

አጌራዊ ኩስጝጚው ኮሚሽንዴስ ጄሜራማ ዋሺኒኪ እንፅኺዳ ኹን አሴቴፍጛንታ ፄዉስታማጊ አኽⶓኪላ ቶኬምካ::

ኹን እላቲዉ እንፅኺ እንዳራኪ ዋይሜ ያጋማጊ ጋቲዌኽ ኑንኩ ዊዛሩ ታየች ኹን ኢኮኖሚው፣ ማይቤራዊውስታ ፖለቲካው ልቕልቕቲዳ ድሎ አግፅጝስ ኬሽኹ ዋይሚ ሜዜጌብስታማጊ አኽⶓ እርዳትፅካ::

“ኹኖ እንዴስ ጃላ ሊሊትጙንኩ እንፅኺኩ ዜርፍካዳ አሴቴፍጝፅጝ ትክምጉ ጉዳት እላቲዋያኽ ኪላ” ንካ::

ብልፅግኒ ፓርቲ ሜሴሬትጝ እሊው ቴግባርዴስ ጃላ ኹንስ ድል እይስትኹ፤ እሳን ድል እይስትጝ ዴሜካ ምንግስትስታ ፓርቲ ቴኬምስታንታ ያኹኽ፤ ዳዴኽስታ ሙስኒ እንፃኽስታሺኹ ስፍሪዳ ኹኖ አሴቴፍጝፅጝስ ባኬናሺኹሳ አብቶ ይጉፅኹስታ ኪሲ ካንትስታታ ፄውኽ አኽⶓ ጉሽካ::

አዲስ አበባ ኬቴሙ ቺፅጝፂዳ እንፃኽስስታማጊ ዝኩኽ ልማቱ እንፅኺ ኹኑ ጉስጙሳ አክሞ ካንትፃዊያኽ ኑንኩ ዊዛሩ ታየች ቤዴራ ሚንች ችግር እሺኹ አዲስ አበባ ኬቴሙ ቺፅጝፂ ኹኖ ጉሳንታ ፄውጝስ ኬቴም ቱሪዝሙ ማይኬል ያኻታ ፄውስትኹ አኽⶓኪላ እርዳትፅካ::

ብልፅግኒ ፓርቲ እንኩርኹ ዳብዚስ ኹን ማይቤራዊ፣ ፖለቲካውስታ ኢኮኖሚው ኪሲ ካንትስታታ ፄውⶓ ጉሽካ::

“ኹን እንፃኽስትጝስ ካላንኩዊያኽ፤ ችግሮ ኽይጝስ ካላንኩዊያኽ” ናው ካንቲ እምስትኹ ብልፅግኒ ፓርቲ ቲሪትጙኒዴስ ናቴ አኽⶓኪላ ዊዛሩ ታየች ቶኬምካ::

ፄትቲው ችግር ዝኩክ ዙራሙርካዳ ኹን ስፍሬኺስታ ዴፌርካማ ካስጝስ ሰላም ቼሜትጛታ ጉድ እንፅኺ አኮሜችካማጊ አኽⶓኪላ ጌሌፅካ::

ብልፅግኒ ፓርቲ ኹንስ ድሎ እይጝስ ኬፍንኹሳ ፍሼ ፊትጝⶓ ቶኬምካማ ፍንሾስኪላ እንታኮው ቴግባር ይስጛማ ሲፍጝ ቱስቴ ንካ::

ብልፅግኒ ፓርቲ ቲሪትጝጝ ኹንስ ዲሞክራሲው ቴርት እሳናታ ፄውጝስ ኹን አሴቴፍጛንታስታ ቴኬምስታንታ ያኻንታ ፄዋማጊያኽ ኑንኩ ዴሜካ ብሄረሰቡ ቺፅጝፂው ኹኑስታ ስራስሪ ጉዳይ ሜምሪው አላፋ ዊዛሩ አምባነሽ ስሜነህያኽ::

ብልፅግኒ ፓርቲ ቲሪትጙኒዴስ ናቴ ኹን ኢኮኖሚውሳ ትክሞ ቼሜትጝፃኑ እንፅኺዳ አሴቴፍጛንታ ፄውጝስ ጉድ እንፅኺ አኮሜችስታማጊ አኽⶓኪላ ቶኬምካ::

ዙራሙሪውሳ ሰላሞ ቼሜትጝፅጝስ ኹን ኬፍቲኔ ፍሼ ፊትጜካማጊ አኽⶓኪላ ጌሌፅካ::

አላፋው ጊሊፂታጊ ወረዳዴስ ብሄረሰቡሳ ቺፅጝፄኺስታ ዝኩኽ ስልታኑ አችዳ ኹን ሊኽደስ 30 ታፋ ስልታንሾ ይንታንታ ፄውስታ:: ስልታንሾ ይንቱንኩ ኹን ዴሜካ ዋይሚስቴ እንፅኼ አኮሜችካማጊ አኽⶓ እርዳትፅካ::

“ቤዴራ ኹንስ ሚንች ድል እይስትኹስታ ፄውስታማ ዙሚስታሺኾ:: ቴግባርስ ኩፅኒ እላቲው ሴጛ ናካዳ  ቴግባርስ ካንትስታው ሚንች እንፅኺ ዝኮ” ንካ::

ሰላሞ አቲጝ እምፕልታቖ ማልጛ ጉዳማጊያኽ፣ ኹን ዴሜካ ሚንችስ ዲብስ ጉዲስትካማጊ አኽጝስ ሰላም ሴፌናታ ውላጊ ቴቤቤርጛማ ሰላሞ ቼሜትጝፅጝ ቱስታው አኽⶓ ጌሌፅካ::