አለሚቱ የኔት
አዊ ብሄረሰቡ ቺፅጝፂው ኬፍቴንካ አመራርካ ጉዋንጉዊ ወረዳዴስ ፊትጙንኩ እምፕልታቑ ወኪልካሊ ሰላሞ ማንዲፅጙ ዙሪዳ ቻግኒ ኬቴምዳ ኩስጜ ካስጝፄካ::
ሰላሞ እንካናንቲ እምፕልታቕ፣ ፊቴ አሜሬታንቲስታ ሊሚፃማ ቴኬምስትጝስ ሌጌስⶓ ቤዴራንታ ፄዋው እዝብ ዝኩኼኽ ጉዋንጉዊ ወረዳዳ::
ኩስጝጚው ሜንድሬኽዳ አሴቴፍጙንኩ አምቢቒ ኬቤሊው ዝኩዋንቲ አቶ ተሰራ ጓዴ ኑኑውስታጊ ክልልታ ፌቴርስትኹስ ሰላም አቲጛሳ ምክንያቲታ ቴኬምስትጝስ ዙራሙሪዳ ካንትስትካ ያቕካያስኩ ወንጀልካ ፌፄምስታኒስ ሼው ንካ:: እን ወንጀል ኩፅኒ ኬቤሊውሳ ዝኩዋንትካዋጊ ማቔችፅጝስ ዲጊዴስ ናቴ ሰላሞ ማንዲፃማ ወንጄሎ ካላካልጚሾ ቱዋታ ፄውኽ አኽⶓኪላ ጉሽካ::
እሊው ሉንፅ ዲጊሪ ኬቤሊው ቺፅጝፃንቲ አቶ አማኑኤል ዘለከ ጛሾስ ኬቤሊዳ ኬፍቲኒ ያኹኽ እንሴስካው ዳዴኽስታ አቔ ኩጙ ወንጄል ፌፄምስቱስ እጂⶓ ዲብስካ:: ዲጊዴስ ናቴ ኩፅኒ እምፕልታቕሊ ፄውስትኹ ኩስጚስ ውላጊ ዙራሙሪውሳ ሰላሞ ማንዲፅጝስ ፄውስትኹ ቲቪቪርጚስ ኔኬታማጊ አንትⶓ ቶኬምካ::
ጉዋንጉዊ ወረዳው ቹዋ ቺፅጝፃንቲ አቶ ሰለሞን ቦጋለ ጌሌፁኑውስታጊ ዶንጌትካማ ካዌንሾ ቱንኩ አይልካ ወረዳውሳ ሰላሞ አቲስጝስ ፄዋሺኑሳ ፅሬቶ ወረዳው ይሴን ሰላም ማንዲፃንትስ ሰላም ዴፌርስታቲታ ፄውጝስ ካሊስታ:: ወረዳው እዝብ ሰላምስስታ አብርትስ ቼኔኬስታው አኽጝስ ዚጋሚስታ አዩ ጉዋጉሲ ወረዳዴስ ፌኔኬልጙንኩ እምፕልታቕስ 1 ሚሊዮን ብርዴስ ጃላ ፍሮ ፍሽጝስ እርዳቴ ፄውንኩ አኽⶓኪላ ቹዋ ቺፅጝፃንቲ እርዳትፅካ::
ወረዳ ዝኩኽሳ ሰላሞ ቴኬምስትጝስ ሊሊትጙንኩ ስርኩ ልማትካዋ ጄሜርፅጝስ ቤዴራ ቴርት ፄውስታማጊ አኽⶓኪላ ቹዋ ቺፅጝፃንቲ ቶኬምካ:: ዝኩኽሳ ሰላሙሳ አኺኔ ቴኬምስትጝስ ዳዴኹ ወንጄል ጝሺኪላ እምፕልታቑ ስጋት አኽⶓ ጉሽካማ እስጜስታ እሊኩ ኽይ ፋይፃኩ ጉዳይካዳኪላ እዝቦ ኩፅጝፅጝስ እንፃኽስታንኩ አኽⶓ ቹዋ ቺፅጝፃንቲ ጌሌፅካ::
ኩስጚውሳ ሜንድሬኾ ጉሱንኩ ብሄረሰብ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው ጉዋንጉዊ ወረዳውስታ ቻግኒ ኬቴሙ እዝብ ችግራኻዳ ያኻማ ኪላ ሰላሙ እንፅኺሊ ቴርቴራ ልማቶ ቼሜትጝፅጝስ ፄውኽ ኩርፄንት ኬፍቲኒ አኽⶓ ጌሌፅካ:: ሹኻ አሜትዴስ ቤዴራ ዙራሙሪዳ ፌቴርስታሺኹ ሰላም አቲጛሳ ክችስኹ እዝብ ሰላሞ ፋያ እንካናማ ማንዲፅኹ አኽጝስ እን ይሴን ቴግባርኪላ ፍንሾስ ሲፍጝ ቱስታው አኽⶓ ጉሽካ:: ቡንካስ ይንታው ይኮኖሚውስታ ማቤራዊው ትክም እላቲው አኽⶓ አምንጝስ ሰላማዌ ካስጜ ሲፍጝ ቱስታው አኽⶓኪላ አቶ ቴዎድሮስ ታክስፅካ::