ኪሴ ያጉኽ ኩስጝጚ

ታደለ አጋጄ

አማኻሪ ክልልዳ ኬሴትስትኹ ጋቻ እምፕልታቕዳ ሚንቼ ቤዴሎ ሲፍፃማጊያኽ:: ናካዴስ ቻ ሰላም ሴፌናዊያኽ ንጝስ እምፕልታቕ ቴስፊስ ማንዱኒውላ ናካዴስ ቻ አይጛዴስ ናካ ሰላሙ አኺኒ ባስጛማጊ እምፕልታቕ እሌት ቺፋሱሳ እንፅኼ አኮሜቻቲንታ ፄዋ::

ጌርክኩ እንፃኽስታንትካ፣ ጊፅስጝስ እንፃኽስታንኩ ሚንችካ እምፕልታቕኩ ቤንካ እሌትስ ኹዋኑሳ አቴካማ ችግራኻዳ አግስታና::

ሰላሙ አቲጝስ ምንግስቱ እንፅኺ ኬውጛማ እንፅኺ ቲሬ:: እምፕልታቕ ስፍሪዴስ ስፍሬ ልቕልቒጝስ ስጋትስ ዝኩካ:: ፌያፌያማ ዳዱ ልምትጝ ቑንዳስቱንኩ አኬምስታቲንታ፣ ክንታንትካ ክንቲ ጝናሾ ካቲንታ፣ ጊፂኒ ጊፅሳማ ኹዋቲታ ፄዋ::

አቑ ማይቤራዊ ዝኩዊኒ ናጊትጛ:: ሚንች አብትታ ቼፍስታኒስ እሺንኩ ማይቤራዊ እሴትካ ሺሽርስትካ፣ ሹማጌልትጝ ቕፂታ፣ እርክዴስ ኪቻ ጊዊ ሚንቻ፣ ታራታርጚ ይሳ:: ውላ ዴስጊ ኪቻ አቒው ይዎት ቕፂታ::

ፌዩንኩ አሜትካዳ ካስጙኽ ዎሬምዴስ ክንቴ ክንትⶓ አቲናና እኑስ እኖ ድኽጝኔ፤ ሴን ሴንዳ  ጁዋማ ሜሳሪስ ችግሮ ኽይጙ ዳድ ፄውስታ::

ውላ ዙራሙሪ ሰላማ ያኻታ አጌሩ ካላካልጚው ሴራዊቲስታ እሊኩ ፄትቲኩ አይልካ ይስጙኽሳ እጎ ኬቤርፅጙሳ እንፅኼ አኮሜቻማጊያኽ:: ሰላማ ያኹንኩ ሊሊትጙንኩ ዙራሙርካዳ እዝቦ ኩስጝፅጝስ ምንግስቱ እንፅኺ ጄሜራታስታ ዙራሙሪው ሰላም ቼሜትጛታ ፄውስታማጊያኽ::

ጃዊ ወረዳዴስ ስልኪስ ንባሮ ታምፁንኩስታ ስሞ ጌሌፅጝስ ፋየካያስኩ ዙሙኑውስታጊ ዙራሙሪዳ ዶንጌቱንኩ አይልካ እምፕልታቕዳ ሚንቾ ቤደሎ ታምፅⶓ ድኹዌካ::

“ጛራ ጛራ እምፕልታቕዴስ 15 ሻይዴስ 25 ሻዬ ኺስታ ጌንዜቦ ካሲጝስ እዝቦ ችግርዳ ሚፅፅካ:: እምፕልታቕ ማልጛ ቼግርስትካ” ናኒስ ዶንጌቱንኩ አይልካ እምፕልታቕዳ ታምፁኑሳ ቤዴሎ ዙሜካ::

“ብሄሩ ጋቻሾ ቱዋንታ ፄውጝስ አቕ ጛስጛዋ ክርጛንታ ፄውስታማጊያኽ” ኑንኩ ወረዳው ዝኩዋንቲ ወረዳዴስ ጎሌልስትካማ ጌውስጙንኩሳ አሬክጝፅጝስ ሰላሙ ሚኒስቴርዴስ ስልታኔ ካፅጝስ ዙርካማ ዙራሙሬ ይንቱኑ ጊዝዳ “እኖጂ ፌኬድናውላስ አይ አዜዛማይ እንፃኽቴው” ንጝስ ዶንጌቱንኩ አይልካ አካሉሳ ጉዳቶ ታምፅⶓ ድኹዌካ::

ዶንግቱንኩ አይልካ ታምፁኑ ጉዳትስኪላ ናካዳ ቑንዳስትካማ አግስታንኩ አኽⶓ ዲብስካ::

ጛው ዙራሙሪዳ ዝኩዋንኩ እምፕልታቕ ሶኼትቺፋ አድጉዊ ጌርካስ ኩፕቴ ፄውጝስ እምፕልትስ አስሜምጜካማ ዝኩዋንታ ፄውስታማጊ አኽⶓ ዙሜካ::

አኪም ጝናዴስስታ ባንክዴስ ይጎ እንዳርማኪ ምንግስቱ እንፅኺ እንፃኽስታቲው አኽⶓ ቶኬምካ::

“እን ዙራሙሪዳ ግቢትስታሺኹ አስፓልቱ ዳድ ቲሬ:: መኪንካ ሌግስ ድጙስትካ:: ቻይናው ካምፕዳ እሺኹ ብብራንቲ ጛጂሱ እንክርፃ ያኻ” ናኒስ ፄትቲው ችግርስ ስር ልማቱ እንፅኺዳ ታምብኹሳ ቻኒስቶ ድኹዌካ:: አጌሩ ካላካልጚው ሰራዊቲ ጛው ዙራሙሪሾ ቱኒዴስ ናቴ ጉድ ሰላሙ አኺኒ ዝኩⶓ ቶኬምካ::

ሰላሙስታ ፄትቲው ችግርስ ማልጛ ጉዳት ታምብኹ እሊው ዙራሙሪ ዴሜካ ፋግቲ ለኮማ ወረዳኽ:: አዲስ ክዳም ኬቴሙ ቺፅጝፂዴስ ስልኪስ ንባሮ ታምፁንኩኪላ አጌራ ሹማጌላ  “ እዝብ ድኽኾ፤ አጌር ቤዴልስትኾ፤ ዝኩንኹ ዲብ ማልጛ አዜንፄ፣ ያኽስታውሳ እንዳራ ካንቴታይ፤ እንፃንቲ፣ ኽሳንቲ ጚስጜዋ ኩትጝጛማጊያኽ ዝኩኽ” ናኒስ  አዲስ ክዳም ኬቴምኩ ዝኩዋንትካዳ ታምባማጊ ዝኩኽሳ ቤዴሎ ሴንቲ ላሌቕኹ አንዴቤትስ እንክርፄካ::

“ያቓኒስኪ ያኻ ያቓኑላስ እንፃቲስታ ኽሳንቲ ጚስጜዋ ክርጛማጊያኽ፤ ሚንች ዲብስ እቑስቴሽቲት ኬቴማ ናካ ችግራኻዳኽ አግስቴው” ኑስ ዝኩኽሳ ንባሮ ድኹዌካ::

“ዝኩዊኒ ማልጛ ይዝኩዌ፣ ሰላም አታ፤ልማት እላ ፤ምንግስት ሼዎ እሳናማ ችግርካስ ኽዮ ፋይጝ ፋይፄ:: ዝኩኽሳ ችግሮ ኩስጝጚስ ኽይጝ ዝኮ:: አጌር ሹማጌልካ ዎኬስስትናናጊያኽ:: ምንግስት ውላ ዲቦ ፄውጝስ ካላው አኽጝስ ሰላሞ ቼሜትጛታ እንፃኽስትጝ ፋይፄ” ናኒስ ካንቴ ታምፅካ::

ዶንጌቱንኩ አይልካዋ እሊው ክልልዳ ፄውስትኹስታ ምንግስት ሼዎ እሳናማ ዙሚትጝፅጝ ቱስቴ ንካ::

ጃዊ ወረዳው ቹዋ ቺፅጝፃንቲ አማኑል አዳነ ጊዝዴስ ጊዞ ሰላሙ አኺኒ ኬሽጝጜ ካንትፃማጊ አኽⶓ ቶኬምካ:: እዝቡሳ ኩስጝጜ ፄውጝ ጉድ ሴላሙ አኺኒ ሴፌናታ ፄውስታማጊ አኽⶓ እርዳትፅካ:: ወረዳዳ አግስታንኩ ሊሊትጙንኩ ኬቴምካ እዝቡሳ ኩስጝጜ ፄውጝስ ምንግስቱ እንፅኺ ጄሜራታ ፅሬት ፄውስታማጊ አኽⶓ ቶኬምካ::

እምፕልታቕ ዶንጌቱንኩ አይልካስ ቤዴልስትካማጊ አኽⶓ እዝቡ ኩስጝጚዳ ጉሽⶓኪላ ቹዋ ቺፅጝፃንቲ ጌሌፅካ::

አጌሩ ካላካልጚው ሴራዊቲ ይስጙኽሳ ኦፕሬሽኖ ፄዋማጊ አኽጝስ ዶንጌቱንኩ ኬችካ ቤንቴንስትካማጊ አኽⶓ ቶኬምካ::

እምፕልታቕ ዶንጌትካማ ካዌና ፉንኩሳ ሰላምስ ታፎ እይጝስ ምንግስቱስታ እዝቡ ኬምፕዳ አኽጝስ ሰላም ይንታታ ፄውጝ ቱስቴ:: ዙራሙሪ ቺፋ ኬሴትስታንኩሳ ችግርካዋ ምንግስትሊ አኽጝስ፣ እዝብ ሰላምስ ጜዋና  አኽጝስ እንፅኽስትጝ ፋይፃው አኽⶓ ቹዋ ቺፅጝፃንቲ እርዳትፅካ::

ፋግቲ ለኮማ ወረዳው ምንግስት ኮምኒኬሽን ዜጌቢታ ስንብቶ ወረዳው ሊሊትጙንኩ ዙራሙርካዳ እዝቡ ኩስጝጚው ሜድሬኽ ካስጛማጊያኽ:: ኔቼሊ ኬቤሊው እዝብሊ ኩስጝጜ ፄውንኩ ወረዳው ቹዋ ቺፅጝፃንቲ አቶ ታገል እጅጉ ኑኑውስታጊ ዶንጌቱንኩ ኬችካስ ወረዳው ሰላም አታማ እጄ:: እምፕልታቑ ልቕልቕቲ ቲሬ:: ምንግስትኩ ኾትካ ዜሬፍስትካ:: ውላዴስ ጃላ ያቔካማኪ ያኻ ያቓኑላስ ሚንችካ ዎታትካ ይዎቶ አቱኑ አኽⶓ እርዳትፅካ::

ወረዳዳ አግስትኹ ጉድ ሰላሙ አኺኒስ ፄትቲው ምከኒያቲስ ጉዳት ታምቡክሳ ስርኩ ልማትካዋ ቴጌንጝስ እምፕልታቑ ውላቱዌ ልግስኔ ቼሜትጝፃንኩ ልማትኩ እንፅኽካዋ እንፃኽስቴካማጊ አኽⶓ ጌሌፅካ:: “አግስትኹ ጉድ ሰላሙ አኺኒ ኬሽኹ ያኻታ እምፕልታቕ ጛጛርትጛሳ አሱ ንባርዴስ እቺስጝስ እጉ ሴግቴንት ኬቤርስታታ ውላጊ አሬባሬብጜ ፄውጝ ቱስቴ ኪላ” ንካ::

“ብሄረሰቡ ቺፅጝፂው አችስ እዝብሊ ፄውስታው ኩስጝጚ ሰላም ቼሜትጛታ ኬፍንኹሳ ታምቦ ፊትጛማጊያኽ” ኑንኩ ዴሜካ ብሄረሰቡ ቺፅጝፂው ሰላሙስታ ፄትቲ ማምሪው አላፊ አቶ ጌታቸው ቢሻውያኽ::

እምፕልታቕሊ ፄውስታው ኩስጝጚስ ሚንችካ ኽይስቱንኩ ችግርካ ዝኩⶓ ቶኬምካማ እምፕልታቖ፣ ኮንኪስ፣ ብሄርስ ፣እምኔትስ ጋቺትጝፅጝስ ፄውስታሺንኩ ችግርካ ኽይስትካማጊ አኽⶓ ጌሌፅካ::

እንዴስ ቤዴራ ሚንችካ ችግርካ እሺንኩ ዳንግሊ፣ አዲስ ክዳም ፣ቲሊሊስታ ጃዊ ወረዳዳ ፄውስትኹሳ ኩስጝጜ ሲፋማ ኬሽኹ ሰላም አንትጝስ ምንግስት ካስጝፃው እጎ ኬቤርፅጙ እንፅኺስ ኬፍንኹ ኪሲ አንትⶓ እርዳትፅካ::

ሰላሞ ቼሜትጝፅጝዴስ ኬምፕስ ኬምፖ ግብርኒው፣ ክንቲው ክርፂ ቺፅጝፂውስታ እሊኩሳ ቴግባርካዋ እንፃኽስትጝስ እምፕልታቕስታ ምንግስት ትኩቶ እይጝስ እንፃኽስትጝ ቱስታው አኽⶓ ጉሽካ::

ዊዳፊ ሰላሞ ቼሜትጛታኪላ ውላጊ ሰላም ማንዲፅጝስ ትኩትስ እንፃኽስታንታ እንፅኼንቶ ፌያፌይጝፅካ::