ክምንቱ ፅንጋኺ

አለሚቱ የኔት

አማኻሪ ክልሉ ሰላሞ አቲጝ ክንቲውሳ ዜርፎ ድኽጛ ቤዴላማጌያኽ:: ውማዩጊ ስር ክንቲ አኽጝስ ክንቲዳ ትኩቶ ፄዌካማ እንፃኽስቱንኩ አጌርካ ውላ ዜርፍስጊ ዋይሚስታ ያኻኒስ ካንትስቴ:: ፋይፃንኩ ሜሳርካጊ ዋኽትጜካማ ክንትፅጝስ ዋይሚስታ ያኻንኩ አጌርካዴስ እንግልቢችስ አማኻሪው ክልል ዴሜካ ዳንጉዊኒሊኪላ ክንትፅጝስ ካሊስታቲው ጊዝ ጌቴማማ ጋቻው ምክንያታስ ሚንችካ ክንቲ ጝንካ ልምትካማ ክንቲው ቴግባር ኬውጛ:: አዊ ብሄረሰቡ ቺፅጝፂዳ ኪላ እን ፅንጋኺ ጌቴምጝስ ክንታንትካ ፋያጋቲታ ጝናኻዳ እሼንታ ፄውስቱኒዴስ አሜቶ ቼፍፅካ::

አንኪሺ ጉዋጉሲ ወረዳ ደን አትኩዋሽቲ አባላምቲስታ ክቻክቺ ክንቲ ጝናኪላ ሰላም አቲጙ ምክንያታስ ኬውጛሺኹ ክንትጝ ክንትፅጙ ቴርት ጄሜርጝስ ዴስቴና አኽⶓ ክንታንታ አለምፀሃይ ቸኮለ ስልኪስ ድኹታ:: እምፕሎ አሜቶ ላካሳ ክንቲው ማድዴስ ሴጋ አኽጝስ ጝናቖ እርዳቲስ እጂⶓኪላ ዙሜ:: አክም ዝኩክ ጝናቕ ጄርኪዋ ሰላም ዝኩኽ ዙራሙሪሾ ካፅፅካማ ክንትፃኒስ ጚ ጝናኻዳ እሺጝ አንኮሊውሳ ፉሬ አቲሳሺት አኽⶓ ዲብስታ:: ክንታማ ኽሳንቴ አቾ ታምጝስ እክዶ እምቴሽቲት ታኹኒኪላ ክንቲ ልምትጝስ ኩፅኒ ኬውጝፄታ ግርብ እንፅኻሾ ቱጝስጊ ታክስታሺቲት አኽⶓ እንክርፄ:: ምንግስት ካስጝፅኹ ሰላሞ ማንዲፅጙ ቴግባርስ ኩፅኒ ዙራሙሪ ሰላማ ያኻማ ክንትጝ ክንትፅጙ ቴግባር ጄሜርጝስ ዴስቴና ታኻታ ናካዳ ክንቲው ማድዳ አግስቴት አኽⶓ ድኹታ:: ጚ ቻ ሹኻቶ ኒስ ጝናቕዴስ አግሌልጝታታ ካታውላ ቲጉኻጃጊ አሊኩ ጜዋ ኮንኩ ክንታንትካኪላ ዙራሙሬ ባይፅካማ ቴስፌ ኬውጝስ ቤሬኺሾ ካስⶓኪላ እንክርፄ:: ሰላም ዋይሚስ ጌሜትስታቲው አኽጝስ ውላጊ ሰላሞ ማንዲፅጝስ ታምቦጊ ፊትጝጝ ቱስታው አኽⶓኪላ ክንታንታ አለምፀሃይ ዲብስታ::

ክንታንቲ አስራቱ ደሳለው እን ክንቲ ጝናዳ 8ንቲ ቤኑ ክንታንቲ ያኹስ ሰላም አቲጛስ አሜቶ ላካሳ ክንቲ ኬውጛኒ ቴስፌ ኬዋሺኹ አኽⶓ ድኹዋ:: አፄብካ ሰላም ዝኩኽ ዙራሙሪዳ ክንትጛ ካሳኒስ ሼውዳ ማቔቾ ፌቴራሽኹ አኽⶓ ዲብሳማ ባያማ ስዴታ ካስጝስኪላ ታክሳሺኹ አኽⶓ እንክርፃ:: አፄብካኪላ ክንቲ ኬውጙኒዴስ እንዳራ እንፃኽስትኔ ንካማ ባይካማ ግርብ እንፅኻሳ እንፃኽስትጝስ ስዴታ ካስⶓ ዙማ:: ዙራሙሪው እምፕልታቕስታ ምንግስት እምፕልትጝስ ኩስጜካማ ሰላም ማንዲስታማ ክንትጝ ክንትፅጙ ቴግባር ጄሜርስታታ ፄውስትጝስኪላ ዴስቴና ያኻማ ክንቲው ማድዳ አግስትⶓ ድኹዋ::

ፌቴርስትኹ ሰላም አቲጛስ ክንትፃንትካ ሼውታ ስፍሪዴስ ስፍሪሾ ልቕልቕንጝስ አቲⶓስታ ክንትፃንትካውሳ አቕፄ እሚካማ ዋሻኪ ፊጝስ ሴኬኬንትⶓ ዲብሱንኩ ዴሜካ ዊዛሮ ብርቱካን የኔሰው ደንአትኩዋሽቲ አባላምቲስታ ክቻክቺ ክንቲ ጝናሱ ክንትፃንታኽ:: ሴሌቴኑኑ ውማይስ እምፕልታቖ አጌላጌልጝስ አግፃኑ ደሞዚስ ጝናቖ ቺትጝፃንኩ ዊዛሮ ብርቱካን እንፅኺ ኬውጛኒ ደሞዚኪላ ኬውጜ ይኻሲ ንጝስ ችንኬታኻዳ እሺንኩ አኽⶓኪላ ድኹዌካ::

“ክንትፅጝስ እምፕልታቖ አጌላጌልኑኒኪላ ሴያ ግዲታማ እንጛርትጛሳ ማንዳማ ፊጝ ዴሜካ እኖጂሱ ትክሜኽ” ኑንኩ ዊዛሮ ብርቱካን ውላጊ ግዲታው ሰላምሊ አኽⶓ ትኩቶ እይካማ ዲብስካ::

ሰላሙ ድስጝ ክንቲው ፃንኩትዳ ታምፃው ዳንጊዊኒ ልቓ ጋቲው አኽⶓስታ ካሊስትኹሳ ላካ ክንታንትካ ዳሉንኩ ያኼካማ ሲፋው ቤንሾ ፌያንታኪላ ባኬንኹሳ ጊዞ ካሲትጝፅጝስ ፊቴ ጊዞ ቴኬምስትጝስ ክንትፅጝስ ውላጊ ክንትፃንትካ እክዶ ፍሽካማ ቴርትጝዳ አኽⶓ ክንትፃንታ ብርቱካን እንክርፄካ::

ዙራሙሪ ቺፋ ዝኩንኩ ክንታንትካኪላ ክንቲው ማድዳ አግስትካማጊ አኽጝስ ክንቲ ጝናሾ ዙርካያስኩሳኪላ ይንታንታ ፄውጙሳ ልቕልቕቴ ፄዌካማጊ አኽⶓኪላ ክንትፃንታ ድኹዌካ::

ደን አትኩዋሽቲ አባላምቲስታ ክቻክቺ ክንቲ ጝናሱ ጛሪ አቶ ነጋ አይኔ ኑኑውስታጊ ፌይኹ አሜትዳ ዋኽስ ዋኾ ክንቲ ኬውጛሼ:: 2017 ም/አ ክንቴ ጄሜርፅጝስ  ታክስስታማ እንፅኺሾ ቱስታኒ ኩፅኒ ሲፍፅጝስ ካሊስታያሱ አኽⶓ ጌሌፅካ::

ፌቴርስትኹ ሰላም አቲጛስ እንፅኺሾ ቱጝስ ልቕልቕቲ ጄሜርስቱኒኪላ ድኹስታው ኬርትኹ አብንስ ክንቴ ጄሜራ ኑውላስ እጂⶓኪላ አቶ ነጋ እርዳትፅካ::

ወረዳው ምንግስቱ አካልካ ዙራሙሪውሳ እምፕልታቖ ኩስጝፅጝስ ካስጝፁኑ ቱትጚስኪላ ዙራሙሪው ሰላም ዙራማ ክንቴ ጄሜርፅⶓ ኽይትጝፅካ:: 2017 ም/አ ክንቲው ዝቤንስ ክንቲ ጝናስታጊ 650 ክንታንትካዋ ሜዜጌባማ ክንትፅጝስ እክድ እምስታሺኹ አኽⶓ ቶኬምካማ ናካ 315 ክንታንትካ ክንቲው ማድዳ አግስትጝስ ካሊⶓኪላ እርዳትፅካ:: ክንቲው ማድሾ ዙርካያስኩ ክንታንትካዋኪላ ሊሊትጙንኩ ክስካሲው ሴልካዋ ቴኬምስትጝስ ጝንዳ እሼው ክንታንቲ ዝኩዋቲታ ፄውጝስ እንፃኽስታንኩ አኽⶓኪላ ኽይትጝፄካ:: ውላጊ ታምቡሳ እንፃኽስትጝስ ዙራሙሪው ሰላም ማንዲስታታስታ ክንቲው ቴግባርኪላ ካስጛታ ፄውጙሳ እንፅኼ ካስጝፃንኩ አኽⶓኪላ አቶ ነጋ ቶኬምካ::

አቶ አለነ ካሳሁን ደን ዙሪ ኬቤሊው ዝኩዋንቲ ያኻኒስ ዙራሙሪዳ አግስታው ክንቲ ጝና ልምታማ እጂጝ ስራስሪዴስ ፌይኹስ ቹዋ ታብልዳኪላ ቻኒስቶ ፌቴራማ እጂⶓ ድኹዌካ:: ጄርካ ክንቴ ፋያ ሰላም ዝኩኽ ዙራሙሪሾ ካሳኒስ ቹዋ ታብልኪላ ዴክስ ታንብካማ ዙራናይኻሲ? ናው አሳብስ ችንኬትዳ እጂⶓ ቶኬምካ:: ጊዝ ስዳዋ ፌያቲታ ታክስጝስ አብኔቱሳ ክንቴ ክንታንታ ንጝስ እሊው ዙራሙሪሾ እንፃኻኒኪላ ፌያፌይጛንትካ ቑንዝካስ ፂኪስትጝስ ቼጌርስትⶓ እንክርፄካ::

ክንቲ ጝና ብስስታማ እንፅኼ ጄሜርጝ ዴሜካ ስራስሪዳ ፉሪፃሺኹሳ ሼውፅንታውሳ ችግሮስታ ቹዋ ታብሉሳ ሲኪኪኔጊ ይጉፃይኹ አኽጝስ ዴስቴንካ አኽⶓ ዲብስካ:: ሰላሙ ዳንጉዊኒኪላ ካብስ ጌቴማቲታ ውላጊ አረባሪብጜ ፄውጝስ ሰላሞ ማንዲፅጙ ቴግባርዳ ትኩቶ ፄዋማ እንፃኽስትጝ ፋይፃንቲ አኽⶓ አቶ አለነ ታክስፅካ::

አንኪሺ ጉዋጉሲ ወረዳ ክንቲ ፅ/ጝናሲ አላፊ አቶ ደሳለው ሽባባው ኑኑውስታጊ ወረዳዳ ፌቴርስትኹ ሰላም ዳንጉዊጛስ 14 ክንቲ ጝንካ ክንቲው ቴግባርዴስ ሴጋ ያኼካማ እጂካ:: ናካዳ ካስጛማጊ ዝኩኽ ሰላሞ ማንዲፅጙ ቴግባርስኪላ 2 ክንቲ ጝንካዋ ክንትጝ ክንትፅጙ ቴግባርሾ ዙርፅጝስ ካሊⶓ ጌሌፅካ:: 11 እምፕላንቲ አችስታ እምፕል ላጛንቲ አች ክንቲ ጝና ኩፅኒ ክንትጝ ክንትፅጙ ቴግባርሾ ቱዌካያስኩ አኽጝስ እኒኪላ እንፅኼ ጄሜራንታ እንፃኽስታንኩ አኽⶓ እርዳትፅካ::

ኬውጝፅካማ እጂንኩ ክንቲ ጝንካዋ እንፅኼ ጄሜርፅጝስ ካሊስትኹ ዙራሙሪው እምፕልታቕ ትኩታኩ ቤንካሊ ካስጝፁኑ ኩስጚስ አኽጝስ ፍንሾስኪላ እዝብሊ ኩስጜ ፄዋማ ዙራሙሪውሳ ሰላሞ ዙርፅጝስታ ክንቴ ጄሜርፅጝዳኪላ እንፃኽስታንኩ አኽⶓ አቶ ደሳለው እርዳትፅካ::