ድቡሻ ጋሞው ባይል

ነት አየነ

ይቶፒያውያንካ ሚንችካ እሴትካ ዌናኽ:: እኒጛ እሴትካ ክቻዴስ  ጛርትስኪ ያኻ ኬችስ ሊሊትጙንኩ እምፕልታቕኩ ሴንካ ክቻዳ ፌቴርስታንኩ ጋቻ ዝኩዋኒ ሴላሙ ዳድስ አምኽጝጚ ፌቴርስታታ ፄዋንኩ ባይላውካ አምኽጝጚኩ ሴልካ ቶኬምስታና:: እን አጌራ ይቶፒያ ሚንች ብሄር ብሄረሰብካት አግፃ አኽጝታጊ፤ ብሄረሰብካው አይኔትታጊ ጋቻዋ ኽይጙ ዴስስታ ሴልኪላ ሊሊትታውያኽ:: ውላውጊ አላሚ ጋቻዋ ኽይጝ እምፕልታቕ ክቻዳ አምኽጝጜሰታ ሰላሞ አግጝ ያኻችኹኒኪላ እኒጛ ባይላውካ አምኽጝጚኩ ዳድካ ፊፂምጝጚስታ ባይላዋ እሴትካ ክቻዳ ሊሊትት ዝኩክያኽ::

ናኪኒ ባይሉ አምድዳ ኪላ ይቶፒያዳ አግስታንኩ ባይላውካ ጋቻዋ ኽይጙ ዴስካ ክቻዴስ እምፕል ያኹኽ ጋሞ ብሄረሰቡ ጋቻዋ ኽይጙሳ ዴሶኽ:: ክርፂ ንባብ ያኼምባ::

ጋምኩ ታብል ሚንችካ ዝቤንካስ ማንዴካማ እጂፁኑ እምፕል ባይላዊ ቴርት ዝኮ:: እንጚ ቴርትኪላ ጋቻዋ ኽይጙስታ አምኽጚው ቴርትያኽ:: እዝብ ክቻዳ ጋቻ ፌቴርስታኒ ጋሞኩ ታብል ድቡሻዳ አምኽጝፃና:: ድቡሻ ንጝ ጋሞው እዝብስ ሰላሙ ስፍሪያኽ:: ድቡሻ እርኩ ቴርት ፌቴርስታው ስፍሪኪላኽ::

ድቡሻ ሊሊትጙንኩ ቴርትካሰታ አይኔትካ ዝኩኑዊያኽ:: እኒጛ ዴስኪላ አባላምቲዳ ካሽ ድቡሻ ቶኬምስቴ:: ካሽ ድቡሻ ጋቻ ዝኩዋኪ ባያኪ ጋሞኩ ታብል ጌቤል ጌርካስ ጃናይስስታ አድጉዊስ ካሽ ድቡሻዳ ኩፕናና:: ካሽ ድቡሻዳ ኩፕንካማ አጌራውሳ ሴላሙሳ አኺኔ ኩስጝጛና::

ጃናይዴስስታ አድጉዊዴስ ድምክኒስ ማልጜ ፋይፃንቲ ያኹኽ ጉዳይ ማቤር አቓኻዳ ፌቴርስታኒ ጋሞው ባይላዊ ፊኹውሳ ሜሳሬ ማኹርጝስ እቑዊ ፄውስታማ ካሽ ድቡሻዳ አጌር ሹማጌልካስታ ዝኩዋንትካ ኩፕናና::

ጋቻዋ ባይላዊ ዳድስ ኽይጝስ እንዳ ስፍሪዳ አግስትጝኪላ ግዴቲያኽ:: ቤዴልስቱንኩ ካሽ ድቡሻዳ አቤትናና:: “ዋጋይሳ ሃሴይማ” ንካማ ጋሙ ኮንኪስ ቤዴልስትⶓ እርዳትፅጝስ ድምፆ ኬፍፅካማ እዝብ ክቻዳ ኬሌኻና:: እንጚሳ ክልኾ ቹኒቱንኩ ዙራሙሪኩ ዝኩዋንትካ ውላፋና:: ታምቡኽሳ ቤዴሎ እዝብ ፍናዳ ቲሪጝስ እርዳትፄ::

ኬሴስታንቲ እንጚ ኩፕኑንኩ እዝብካው ክችዳ እላ ያኹኒጊ እንፅኺኒ እንፃኽስቴ:: እንፅኼንቶ ቹኒታማ ኬሲስታንቲ ድቡሻው ፍንዳ ቲሪ:: ኬሴሳንቲስታ ኬሴስታንቲ አምንፃና ናንኩሳ ዲብካዋ ጉሽካማጊ ካርካርጛና:: ሹማጌልኪላ ድቡሻው ፍንዳ ቲሪካማ ፍርዶ ፋያንትካ ድቡሻውሳ እጐስታ ቴርቶ እርዳትፃና:: ካሲስትጝ ዝኩንኩ ካሰካዋኪላ ካሴና:: ሹማጌል ካሲጝ ይቢቺ ያኻውላ ቲንኪክፄ ኪላ እያና:: ቲንኪክፂኪላ ድቡሻዳ አሶ ዙሚጝስ ካሊስታላ፤ ድቡሻው ባይልስ  ውኖ ዲበስኹ ኻኺሪዴስ ይጉዌ:: አሶ ዲብስታንኻኽ ውኖ ዲብሳን ንካማጊ ሹማጌል ድቡሻው ፍንዳ ግምቦ ቴኬላና::

ጋሞ ኮንኪስ “ፃጌር፣ ዋሪፄላ፣ ሳናሪ፣ ጉሃፄላ፣ ኑናማቼላ፣ ጐማሴሳ፣ ወረይዞሳ” ንካማጊ ሜሮ ሜፅፃና:: ሜሩ ኽይኪላ “ክሩንኩሳ ታብሎ ታክሳን፣ ዝኩኑኻሳ ካንታን አምፕዴስ ፌቴርኹሳ አምላኮ ሼውናን ቲሪቲኑሳ ብቴ ካንታን አሶ ዙሚካማ ካታንኻ ታኹኒጊ ጝሺ ቲሪቲኹኪ ብቲ ፋሌንጋ ክታታ ዴውስቴውኪ ብቲያኽ ሼውናን” ናና::

እንጚ ጊዛይ ጋሞው ባይል ስሬታስ ድቡሻው ባይላዊ አምኽጚው ቴርትዳ አሶ ዲብሳው አቒው ክሚዳ ጚው ይወትዳ ጝን አቕዳ ታምባው ድኪ ዲብ ዝኮ ንካማ አምናና:: እንዴስ ፋሌንጋኪላ ክችዳ ዝኩንኩ ጉሳንትካ ጁዌካማ አምሎ ክዬ እሚካማ ታፍዳ እይጝስ ላንጊዳጊ ድኪ ዲብ ታምባውላስ እኖጂ እሊው ሴልስ ውንዳ ታምብንስ ንካማ ድቡሻው ስፍሪዴስ ፌክፅካማ ኻሳካማ ካሳና::

እኒጛ ላንጊሾሰጊ ዝኩንኩ ጉሳንትካ ባይላዌ ዳዶስታ ሴሎ ቴኬምስትጝስ ውንዳ ታምባና:: ውሳኒ ኪላ እይስቴ:: እይስትኹ ውሳኒዳ ክሬቲ ዝኩዋኒ ስታ ውሳኔ ቻቤላላ ኑኒጊ ድቡሻው ቴርትዳ አሴቴፍጛንትካ ክቻዴስ ካቻና ክሬቴ ዲግሳና:: ካቻና ንጝ ጋሞው ኮንኪስ 40ዴስ 50 አሜቶኺስታ  ዝኩንኩ አቕያኽ:: ካችና ኪላ እምፕልትሰ “ዋሳሴ ሞሞላ” ንካማጊ ማቔቾ ካንትፃና:: አሊዲዳኪላ ኬሴስታንቲ ዋሴንስትኹሳ ውሳኔ ቻቤሌ:: ካሽ ድቡሻው ቴርት ኪላ አሌድስታማ አምኽጝጚ ፄውስቴ::

ካሽ ድቡሻዳ እይስትኹ ውሳኒ ክችክቻ ጋው ኑንኩ ዴሜካ እሊው ድቡሻው ቴርትዳ ክሬቴ ዲግሳና:: እንጚኪላ ዛራ ድቡሻ እስቴ:: ዛሪ ድቡሻዳ ሹማጌል እንዴስ ፍና ካሽ ድቡሻዳ እሺኹሳ ቴርቶ እንግራ ካንታና:: ድቡሻው ቴርትዳ ዛራዴስ እሊው ቴርት እላቲውያኽ:: ዛራ አሊዲ ድቡሻው አምኽጚው አችያኽ:: ካሻ ዴስ ስታ እሊኩ ድቡሻኩ ቴርትካዴስ ይንቱንኩ ክሬትካ ኪላ ዛራዳ ሌንጌድታና:: ዛራዳኪላ እይሰትኹሳ ውሳኔ ቻቤላላ ኑኒጊ ታብል ጄዌካማ “ጐዛ ይፃዴሳ፤ ኻሻ ይፃዴሳ፣ ዛራይፃዴሳ” ንጝስ ጐዛውሳ ባይሎ፣ ካሽውሳ ባይሎ እንጋኔታ ዛራሾ ቲንታ ዛራዳኪላ ቻቤላላ ኒኾ ንጝሰ እዝብካኪላ እንጋ ናንቲ ንካማ እቑዌና:: ድቡሻው ባይላዊ ቴርትኩ አችካዋ እንጋናማ አንትጝስ ዛራዳኪላ ኬዌምጛው ያኹኒጊ እምፕልታቕ ሊሊትጙንኩ ማይቤራውካ ዝኩዌንካዴስጊ ሴጋ ፄዋና:: እዝንዳኪ ያኻ ዴስቲዳ አሰቴፍጛንታ ያኻላ:: ጋሞው ባይላዋ እሴት ያኹኽሳ ድቡሻዋ ናካኽ ንጝስ እምፕልታቕ ክቻዳ ጉድ ካንቴ አግፃላ::

ድቡሻዳ ውላጊ ፍርዶ ካሴንትካ እምፕል እልስ ካንፅስታኑ ቴርትያኽ:: ፅሊ ድፂዴስ ኽሳንትካ እስታንኩ ድፂኩ አይኔትካጊ ውላ ድቡሻው ቴርትስ አምኽጝጚዳ ታምብስታንኩያኽ:: ዝቤናዊ እጉ ቴርትስ ዳኚስቱንኩ አቕ ውላ ያኹኒ ድፁኑ ድፂስ አሪምፂ ጝናዳ  ኪፂስትካማ ዙሩኒዴስ ፋሌንጋ ማቤርአቕሾ ዙርካማ ድቡሻው ቴርትስ አምኽጝጝ ግዴቲያኽ:: እምፕል ንፍሶ ድፁኽ ጋሙው ዝኩዋንቲ ዝቤናዊ ዳድስ ዳኚስታማ አሪምፂ ጝና ቱኒዴስ ፋሌንጋ ኩዋንቲኩሳስታ ክራንቲኩሳ ጝን አቖ ቤዴርካማ አምኽጝፅካማ እጄና:: ድንግር ይስጝጛታ ንካማኪላ ኽቴናቴ ጄሮ ኽይፅጝስ ክችዳ ዝኩኽሳ ቑሎ ድፃና:: ሊሊትጙንኩ ማይቤራውካ ልቕልቕትካዳ አብራ ያኻና::

ድቡሻዳ ኩፕንክማ አቕ ጋቻዋ ኽይጝ ይቢቺ ያኻውላስ አጌራው ዴክትዳ እዝቡ ዴክትዳጊ ኩስጝጛና:: አጌራው አችስ ታምባንኩ ጋቻስታ ችግርካኪላ ድቡሻስ ኽዮ አግፃና:: ድቡሻ ጋሞው ሰላሙ ዳድ አምኽጚው ስፍሪያኽ::

ናካናካ እን አጌራ ይቶፒያዳ ፌቴርስታንኩ ጋቻዋ ባይላዊ አምኽጚው ዳድስ ኽይስቱኒጊ ዊዳፊ ሰላም አንትጝስ ካሌ:: ባይላውካ አምኽጚኩ ሴልካ ዝቤናዊ እግኩ ቴርትካስኪላ ስራ ያኹንኩዊ አኽጝስ፤ ባይላዊ ዳድስ ችግርካዋ ኽይጙ ዴስ ውላ ማቤርአቕስ ፋይፃንቲያኽ::