ስፖርቱ ልቕልቕቲ ጉድ ምግባር ፅንታስስታ ቲኖ ማንዲጝስ

ታደለ አጋጄ

ቻግኒ ኬቴሙ ቺፅጝፂዳ ሊሊትጙንኩ ስፖርቱ ልቕልቕቲዳ አሴቴፍጝጝስ ጉድ ምግባር ፅንታ ዝኩዋታስታ ሊሊትጙንኩ ቑንዝካዴስ ካላካልጝⶓ ስፖርቱ ልቕልቕቲዳ አሴቴፍጛንኩ ዎታትካ ዙሙና::

ቻግኒ ኬቴሙ ቺፅጝፂዳ ቲኩዋንዶው ሴሌቴንፃንቲስታ ክንትፃንቲ ሳቦም የኔአለም ሀይሉ ክንትፅጙ እንፅኺዴስ ኬምፕስ ኬምፖ ኬቴምኩ ዎታትካስ ስፖርቱሳ እንፃኽፄ ጝኖ ክራይታማ ሊሊትጙንኩ ስፖርቱሳ ልቕልቕቴ እንፃኽፄ::

ሳምቦ የኔአለም 2005 ም.አታዳ እንጃቢሪ ክንትፃንትካው ኮሌጅዳ ክንትፅጙ ውማይስ አካላታ ፋፊፂ ክንቲው ዜርፍስ ኮሌጅዳ ክንትⶓ ጄሜርኹ ጊዝዳ ቲኩዋንዶውሳ ክንቴ ሴሌቴንⶓ ቶኬማ::

ክንታንትካዋ ቲዎሪስኩ ያኻ ቴግባርስ ክንትፅጝስ ክንትፃንቲ ውላ አቕጝስ ፋይፃው አኽጝስ ክንታንትካዋ ክንትፅጝስ ፋይፃውሳ ካሌቕቶ እሚጝስ ቲኩዋንዶሾ ቱⶓ ዙማ::

እምፕልታቕስ ቲንስስታ ጉድ ምግባር ፅንታ ዝኩዋታ እንቲታኪ አሜችኹሳ ዝኩዊኔ ጉሳንታ ፄዋው ስፖርቱ ልቕልቕቲ ያኻ ንካ::

እምፕልታቕዳ ቤዴራ ቲኩንዶው ስልታኒዳ ኬርትኹ ካንቲ እሺⶓ ቶኬምካማ ናካዳ ኩፅኒ ኬሽኹሳ ካንቴ እሚⶓ ዙማ::

ሴሌቴኑንኩ ዎታትክ ዙራሙሪኩ እምፕልታቕስ ሊሊትጙንኩ ትክምካ አግፅⶓስታ ዎታትካስ እንፅኺውሳ ድሎ ፌቴርⶓ ጌሌፅካ::

ኬቴምኩ ዝኩዋንትካ ዎታትካስ ጉድ ምግባር ፅንታ ዝኩዋታስታ ሰፖርቱ እንፅኺው ዜርፍዳ አሴሜርጛንታ ዎታትካዋ ሴሌቴንፅⶓ ሲፋንኩ አኽⶓ ቶኬምካማ ኬቴሙ ቺፅጝፂው እርዳቲ እላቲው አኽⶓ ጉሽካ::

ቻግኒ ኬቴሙ ቺፅጝፂው ባይሉ ቱሪዝሙስታ ዎትትካው ስፖርት ፅፌት ጝናሱ አላፊ ኩምላቸው አሰፋው ኬቴሙ ቺፅጝፂዳ ሊሊትጙንኩ ስፖርትኩ ዜርፍካዳ አሴቴፍጛንኩ ጛርት አቕስ ሊሊትጙንኩ እርዳትካዋ ፄዌካማጊ አኽⶓ ጌሌፅካ::

ሜሳርካውሳስታ እንፃኽፄ ስፍሬ እይጝስ እርዳቲ ፄውስታማጊ አኽⶓኪላ ቶኬምካ::