ሰላሞ ጎሌሉንኩ ብላፅካ

ታደለ አጋጄ

ጊፅሳማ ፊቲስጝስ፣ ካሜናማ ሌጌፅጝስ፣ ዜራማ አሜሬትጝስ፣ እንፃኽስታማ አብቶ አፌርጝስ፣ ክንትፃማ አቾ ታምፅጝስ፣ ሰላምስ ፋማ ሰላምስ ቱጝስ ትክላሊስ አቒያ እሌት ቺፋሱሳ ኩምችኔ አኮሜችጝስ ሰላሙ ዋይሚ ውኻይ እስታማ ካሲስታቲዊያኽ:: ፌዩንኩ አሜትካዳ አጌራኻዳ ኬሴትስቱንኩ ችግርካስ ሰላሙሳ ዋይሜስታ ዎሬሙሳ ጉዳቶ እርዳትስትጝ ይዝኩዌላ:: ዎሬሙሳ ሜሳሬ ዶንጌታማ ሴብትጝጝ ውንስ ሰላሞ አንትጝስ ካሌማ? እምፕልታቖ ባስኹ ችግርዳስታ ጉዳትዳ ሚፅጝዴስ ይጎ ዋትጜ ሰላምስታ ኪሲ አንትጝስ ካላው? ሚንችካ ክንታንትካ አቕቱሳ ብራኖ አግፅጝዴስ ኪቻ ክንቲዴስ ሴጋ ያኼካማ አቕቶ አግፃቲንታ ፄውስቱኒዴስ፣ ክንቲ ጝንካ ዶንጌቱንኩ አይልካው ፉሪፃ ያኹኒዴስ፣ ዳድ ልምታማ እምፕልታቕ እሌት ቺፋሱሳ ቴግባሮ አኮሜቻቲንታ ፄውስቱኒዴስ ፋሌንጋ እምፕልታቖ ባስኹ ጉዳትዳ ሚፅጝዴስ ይጎ ይንታው ኪሲ እላኽ::

ሰላሞ አግጝስኪላ ምንግስት ሊሊትጙንኩ እምፕልታቕኩ ቤንካሊ ሰላሙሳ ኩስጜ ካስጝፃ:: ሰላሙ ኩስጚዳ እምፕልታቕ ችግርካ ሰላሙ ኩስጝጚስስታ ዳራዳርጚስ  ኽይስታንታ ካቢትጝፄካማ ካሲካ::

ምንግስት ክልሉሳ ሰላሞ ቼሜትጝፅጝስ እጎ ኬቤርፅጙ  እንፅኺዴስ ኬምፕስ ኬምፖ ዶንጌቱንኩ አይልካ ሜሳሬ ዶንጌትካማ ሴብትጚዴስ ኪቻ ኩስጝጚስ ችግርካ ኽይስታንታ እቑዌ ፌያፌይጝፃ:: አማኻሪ ክልልዳ ዶንጌትካማ ሴብትጛሺንኩ አይልካ ሰላሙሳ ጉላሌ ቻቤልካማ ይንታኒ ሰላሙሳ ዝኩዊኔ ጉሳንታ እምፕልታቕሊ ዝኩዋንታ ፄውስታማጊያኽ::

አዊ ብሄረሰቡ ቺፅጝፂ ዳንግሊ ወረዳዳ 62 ዶንጌቱንኩ አይልካ ምንግስቱሳ ሰላሙሳ እቑዌ ቻቤልካማ ዶንጌቱኑ ሜሳሪሊ ምንግስትስ ታፎ እይካ::

ምንግስት ፌያፌይጝፅኹሳ ሰላሙሳ እቑዌ ቻቤልጝስ ሰላምሾ ይንቱንኩ ዶንጌቱንኩ አይልካ ዎሬሙ ሴብትጝጚ እምፕልታቖ ባስኹ ጉዳትዳ ሚፅኹ አኽⶓ ዙሜካ:: ናካሱ ወክትዳ ትክምዳ ጛስጛዋ ጋቺትጚሾ ቱⶓ ዲብስካ::

ዎሬሙ ሜሳሪስ ሴብትጝጝ እምፕልታቖ ባስኹ ችግርዳ ሚፅኹ አኽⶓ እርዳትስቱንኩ ዶንጌቱንኩ አይልካ ምንግስት ፌያፌይጝፅኹሳ ሰላሙሳ እቑዌ ቻቤልጝስ ሰላምሾ ዙሩንኩ አኽⶓ ድኹዌካ::

ዎሬሙሳ ሜሳሬ ዶንጌትጝስ ፄውስታው ዋሺኒኪ ቡንክትጚ አዋኪ ቴኬማቲው አኽⶓ ጌሌፁንኩ ሰላሙሳ ጉላሌ ቻቤሉንኩ አይልካ እሊኩ ሰላሙሳ እቑዌ ቻቤልካያስኩ አይልካ ሰላምሾ ይንታንታ እንፃኽስታንኩ አኽⶓ ዲብስካ::

ሰላሙሳ ጉላሌ ቻቤሉንኩ አይልካ ምንግስትስ ታፎ እዩኑ ጊዝዳ አግስቱንኩ አይማኖትኩ ታብል ዙሙኑውስታጊ ቻ አጌራዋ ኪሳው ዎታቱ አይል ጛስ ጛዋ ድስጚዴስ ኪቻ ልማቶ አሬኽፅጝ ቱስቴ:: አጌራ ዎታትካዴስ ልማቶ ፋቴ ኑንኩ አይማኖትኩ ታብል “ብላፅካ አጌራዋ ልማትስ ሌጌፃናጉ ዎሬምስ ድፃላኽ” ንካ::

ዎሬምዴስ ድፂጃጊ ፊቲ አግስታቲው አኽⶓ ቶኬሙንኩ አይማኖትኩ ታብል ሰላሙሳ ጉላሌ ቻቤሉንኩ ዎታትካ ዎታትቱሳ ግርቦ ቴኬምስትጝስ አጌራዋ ልማትስ ኪስጝስ ቤዴሉኑሳ እምፕልታቖ ካሲጝ ቱስታው አኽⶓ ቶኬምካ::

ዋሺኒኪ ችግር ኽይስታው ኩስጝጚስጉ ዎሬሙሳ ሜሳሬ ዶንጌታማ ሴብትጝጚስ ጋቲው አኽⶓ ታክስፅካ::

ዳንግሊ ወረዳው ቹዋ ቺፅጝፃንቲ አቶ ጌትነት ማርልኝ ሰላም ውላ ዲቡ ስር አኽⶓ ቶኬምካማ አቕጝስኪ ያኻ ያቓኑላስ ይጉጝስ ዶንጌትካማ ሴብትጛሺንኩ አይልካ ናካዳ ምንግስቶስታ እዝቦ እርዳትጝስ ሰላሙሳ እቑዌ ቻቤልካማ አንትጝ ችግርካዋ ዙሚትጝጚስ ኽይጝስ ኽሳንቴ አክሞ ፌቴራው አኽⶓ እርዳትፅካ::

ምንግስት ፌያፌይጝፅኹሳ ሰላሙሳ እቑዌ ቻቤልካማ ይንታንኩ አይልካዋ ቱስታው ዳድስ ቻቤልጝስ ቴርትⶓ ቶኬምካ::

አዊ ብሄረሰቡ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው “ዎታት ድፅጝስኪ ያኻ ሊሚፅጝስ ያኻው ድሚው አች አኽⶓ ቶኬምካ ላንቡሳኺስታ ቤዴልንኹ ይጉዌስ ንጝስ ሰላሙሳ እቑዌ ቻቤልጝስ እምፕልታቕሊ ሰላምስ ዝኩጝስ ፋየካማ አንትⶓ ዎሴኑንኩ ዶንጌቱንኩ አይልካስ ምስጋኔ ዲግስካ::

ዋሺኒኪ ዎሬሙ ሜሳሪስ ፄውስታው ቡንካ እምፕልታቖ ባስኹ ችግርዳ ሚፅጝዴስ ይጎ ይንታው ፊቲ እላቲው አኽⶓ ጌሌፁንኩ አቶ ቴዎድሮስ ዎሬሙስታ ጋቻው አሊዲ ኩስጝጚስታ ዳራዳርጚ አኽⶓ ቶኬምካ::

ምንግስት ፌያፌይጝፅኹሳ እቑዌ ቻቤልጝስ ይንቱንኩ  ሰላሙ ዜባ አኽጝስ ቤዴልስትኹሳ እዝቦ ካሲጝ ቱስታው አኽⶓ እርዳትፅካ::

እገ ምንግስትስ ጎሌልስትኹሳ ምንግስቶ ሼቤርፅጝስ ሜሳሬ ዶንጌትካማ ልቕልቕናንኩ አይልካዳ እጎ ኬቤርፅጙሳ እንፅኼ ይስጝፃማ ሲፋው አኽⶓ ጌሌፅካ::

ፍንሾስ ካዌናኻ ቱንኩ አይልካ ቴክሌልካማ ይንታንታ  እንፃኽስትጝ ማንዲስታው አኽⶓ ታክስፅካ::

አቶ ቴዎድሮስ ሰላማዌ ዝኩዊኔ ጉስጝስ ይንቱንኩሳ ታህድሱሳ ስልታኔ እይጝስ እንፅኺሾ አሴሜርጝፅጝስ ቴርትⶓኪላ ቼሜትጝፄካ::

ትክላሊስ ዋሺኒኪ ችግር ዎሬሙ ሜሳሬ ዶንጌታማ ሴብትጝጝስ ኽይስታላኽ:: ችግርካስ ኩስጝጚስስታ እምፕልትስ ቴቤቤርጝስ ኽዬ አግጝስ ካሊስቴ:: ምንግስት ፌያፌይጝፅኹሳ ሰላሙሳ እቑዌ ቻቤልጝስ ይንቱንኩ አይልካ ሊሊትጙንኩ ዙራሙርካስ ምንግስትስ ታፎ እይጝ ሰላሙሳ ዝኩዊኔ ጉሳንታስታ እሊኩሳጊ ሰላምሾ ይንታንታ ፄውጝ ቱስታዊያኽ::