ሰላም ዳንጉዊጛስ ቓቔፅኹ ስፖርቱ ልቕልቕቲ

ታደለ አጋጄ

አዊ ብሄረሰቡ ቺፅጝፂ አዩ ጉዋጉሲ ወረዳዳ ሰላሙስታ ፄትቲው ችግርስ ስፖርቱ ልቕልቕቲዳ ኬፍቱኔ ቻኒስቶ ታምፅⶓ ወረዳው ዎታታካውስታ ስፖርቱ ፅፌት ጝና አቕፃ::

አዩ ጉዋጉሲ ወረዳው ዎትትካውስታ ስፖርቱ ፅፌት ጝናሱ አላፊ መንግስቱ የኔው አውጚው ቴሌቪዥንሊ ስልኪስ ፄውኑ እጂጚዳ ዙሙኑውስታ ሰላሙስታ ፄትቲው ችግር ማቤራዊ፣ ኢኮኖሚውስታ እሊኩ ችግርዴስ ፌይኹስ ስፖርቱ ልቕልቕቲ ቓቔፃታ ፄውⶓ ጌሌፅካ::

ወረዳዳ አሜት ቺፋ ስፖርቱሳ ልኺትጜ ካስጝፅጝስ እጂⶓ ቶኬሙንኩ አላፊ ሰላሙስታ ፄትቲው ችግር ኬሴትስቱኒዴስ ናቴ ኩፅኒ አሜትቺፋ ካስጛውሳ ስፖርቱሳ ልኺትጜ ዎክትስስታ ፋይስትኹ ጊዝስ ካስጝፃቲንታ ፅንጋኻ አኽⶓ ቶኬምካ::

ዎታትካ ያኻያሱ ስፍሪዳ እሼቲንታ፣ ኽሳንትካ ቲኖ ማንዳንታ፣ ክርፃ ያኹኽሳ ታምትጜ እምፕልታቕ ክቻዳ ፌቴርጝስ ችኹ ወክትዳ ፄውስታው ስፖርቱሳ ልቕልቕቴ ፄውጝስ እክድ እምስቱኒውላ ፋይስታውሳ ላካስ እንፅኼ እንፃኽስትጝስ ካሊስታያሱ አኽⶓ ጌሌፅካ::

ዎታትካ ሰላምስታ ፄትቴ ኬቤርፅጝዴሰ ኬምፕስ ኬምፖ ስፖርቱ ልቕልቕቲዳ አሴቴፍጜካማጊ አኽⶓ ቶኬሙንኩ አቶ መንግስቱ ሰላሙስታ ፄትቲው ችግር ቲኪስታንትካ ስፖርትኩሳ ልኺትጛንትካ አፌራቲንታ ፄውⶓ እርዳትፅካ::

ናካዳ ቤዴራ እሺኹ ሰላሙስታ ፄትቲው ችግር ኬሽጛማጊ አኽⶓ ጌሌፁንኩ አላፊ ናካዳ ስፖርቱሳ ልኺትጜ ካስጝፅጝስ ቴርትⶓ ጌሌፅካ::

ወረዳው አችስ ስፖርቱ ልኺትጚ ካስጛታ ፄውጝስ ልቕልቕቴ ፄዌካማጊ አኽⶓ ቶኬምካማ ዎታትካው ስፖርቱ ልቕልቕቲስ እይስትኹ ስፍሪዳ ልቕልቕቴ ፄዋንታ ጁትጝፄካማጊ አኽⶓ እርዳትፅካ::

ስፖርቱ ልቕልቕቲ ካስጝጛውላስ ይጉጝ ዎታታካ ጌቔስታንታ ያኻያሱ ስፍሪዳ እሼንታ፣ ቲኪስታንትካ ስፖርቴንካዋ ፍሻቲንታ ፄውⶓኪላ ቶኬምካ::

ዎታትካዋ ስራ ፄውኽሳ እንፃኽስትጝስ ትኩቶ ፄውⶓ ጉሹንኩ ፅፌት ጝናሱ አላፊ ሰላሙ ችግር ኬሴትስትኹ ዎታትካዳ እንፃኽስታያሱ እንፅኼ ዝኩጝስ አኽⶓ ጌሌፅካ:: አቶ መነግስቱ ዎታትካ ምግባር ፅንታስ ክቼንታ ፄውጝስ ዎታትካስ ሊሊትጙንኩ ዳድካስ ክንቴ አግፃኑሳ ማይኬሎ ብስጝስ እንፃኽስታንኩ አኽⶓኪላ እርዳትፅካ::