ሰላሞ ናፌክቱት ኬቴማ

ታደለ አጋጄ

ፍልስፍኒኩ ምሁራንካ ጌሌፃኑውስታጊ ሰላም እምፕልታቕ እሌት ቺፋሱሳ ዝኩዊኔ ጉስጝስ እንፅኼ እንፃኽስቴካማ ጛጛርትጛሱሳ ፋዮ ዋኽትጝፅጝስ ፄዋኑሳ ፅሬቶ እንቲታኪ ዴስቴንካ ያኼካማ ዝኩዋንታ ሰላሞ ፋይፃንቲ አኽⶓ ጉሻና:: እሊኩ ጝሹላ “ሰላም ንጝ ዴስቴ አግፅጚያኽ” ናና::

ምስሊስ አይማኖትኩ ታብልስታ ፖለቲካኩ አቕ ሰላሙሳ ፋይፃንቴ እንቲታኪ ሰላሞ አቲጝ እምፕልታቕዳ ታምፃውሳ ችግሮ ካቢትጝፄካማጊ ዙሙና:: ያኼስጉ ኽምቢስ ዙሚስታውሳ ላካ ሰላም ሴፌንጝስ ኩፅኒ ካሊስታያ:: ሊሊትጙንኩ ታሪክኩ አኼንካዳ እርዳትስትናውስታ ሰላሞ አቲጝ እምፕልታቖ ማይቤራዊ፣ ኢኮኖሚውስታ ፖላቲካው አኺኒዳ ታምባው ቻኒስትስ እርዳትስትጝስ ካሊስቴ::

አይማኖትኩሳ ታብሎ፣ ፍልስፍኒኩሳ ምሁራንካ ያኻ ፖለቲካኩሳ አቖ አሴሜምጝፃው ዲብ ዝኩኒ ሰላሙ ፋይፃንት ያኹኒውላ ፖላቲካውሳ አላሜ ሳኪትጝፅጝስ ፄውስታው ፅሬትዳ ሰላሞ አቲጝ ኬሴትስታማ እምፕልታቕዳ ሚንች ጉዳት ታምባታ ፄውስታማጊያኽ:: ሰላም አቒያስ ያኻ እሊኩ ፍትሬትካስጊ ፋይፃንቲያኽ እኑስ ሰላም ይንታታ ፄዋንኩ ዲብካዋ ዘኔግጝ ቱስታላኽ::

አቒው ይዎት ድሳማጊ፣ አብትስታ ንብሬት ዎዴማማጊ፣ ዳድ ልምታማ መኪንካ እንዜጛቲታ ፄውስታማጊ፣ ክንቲ ጝንካ ክንታንትካዋ ክንትፅጝዴስ ሴጋ ያኼካማጊስታ እምፕልታቕ ባስኹ ችግራኻዳ ዝኩካስኩኒስ ዋትጛይ ሰላም ሴፌንጝስ ካላው? አማኻሪ ክልልዳ ኬሴትስትኹ ጋቻ እምፕል አሜቶስታ ኪንዴ ቼፍፃ:: እኒ ጊዝካዳኪላ ሜንቾ አብቶ አቲና:: ሚንችካ አቑ ይዎት ድሳ:: ምንግስትኩ አግልግሎቴ እይፅካ ኾትካ ልምትካማ አግልግሎቴ እይጝዴስ ሴጋ ያኼካማ እጂካ::

አዊ ብሄረሰቡ ቺፅጝፂታ ጋቻስ ማልጛ ጉዳት ታምብኹ ወረዳዴስ እምፕል ጉዋጉሲ ሽኩዳድ ወረዳኽ:: ስም ፋያያሱ ዝኩዋንቲ ዙሙኑውስታጊ ክልልታ ኬሴትስትኹ ፄትቲው ችግር ሚንቾ ጉዳቶ ታምፅⶓ ዙሜካ::ክንቲ ጝንካ ልምትካ:: ምንግስቱ አግልግሎቴ እያንኩ ኾትካጊ እምፕልታቕስ አግልግሎቴ እያላ:: እምፕልታቕ ዎሬሙ ሜሳሪውሳ ድምፆ እንኮኻማጊ ጅፍንትዳ አግስታንኩ አኽⶓ ዲብስካ:: እምፕልታቕ እንፃኽስቴካማ ኪስስትⶓ ፋይኒውላ ፌያፌያማ ኬሴትስታው ጋቻው ምክኒያቲስ እምፕልታቕ እንፅኼ እንፃኽስታንታ ፄውስትⶓ ድኹዌካ:: ናካዳ ጉድ ሰላሙ አኺኒ ዝኩኒውላ አምንጝፃው ኩፂ ጋቲዊያኽ ንካ::

እምፕልታቑ ሰላሙ ኩስጝጚ ካስጝጛማጊ ሰላም ሴፌናታ ካቢትጝፄካማጊ ካሴና ኑንኩ ዝኩዋንቲ ምንግስቱ እንፅኺስታ ክንቲ ጝንካ ፌያካ ፌይካማ ብስስትⶓ ዙሜካ:: ምንግስትኩ አግልግሎትኩ ኾትካ  አግልግሎቴ እይካማጊ አኽⶓ ዲብስካ::

ፌይኹዳ እሺኹ ሰላሙ አኺኒዴስ ናካ ኬሽኹ ሰላም ዝኩⶓ ቶኬሙንኩ ዝኩዋንቲ ሰላሞ ቼሜትጝፅጝስ እምፕልታቕ ጜዋንቶ ካፅጝስ እንፃኽስትጝ ፋይፃው አኽⶓ ዲብስካ::

ጉዋጉሲ ሽኩዳድ ወረዳ ሰላሙስታ ፄትቲው አላፊ ዙሙኑውስታጊ እንዴስ ቤዴራ ኬቴምዳስታ ወረዳዳ ሚንችካ ጉዳትካ ታምብⶓ ቶኬምካማ ቤቴንስታማ እሺኹሳ ፄትቲውሳ ሜዋክሮ እንግራ አችትጝፅጝስ ወረዳዳ ኬሽኹ ሰላሙ አኺኒ ሴፌናታ ፄውስትⶓ ዙሜካ::

ሊሊትጙንኩሳ እምፕልታቕኩሳ ቤንካዋ ሰላሙ ኩስጝጚዳ አሴቴፍጝፅጝስ ሰላምስ እንፃኽስታንታ ፄውስትⶓ ድኹዌካ ::ወረዳውሳ ሰላሞ ሴፌንፅጝስ አጌሩ ካላካልጚው ሴራዊቲሊ ፃምርትጝስ እንፃኽስትካማጊ አኽⶓ ቶኬምካ::

ዶንጌትካማ ልቕልቓንኩ አይልካ ምንግስቱሳ ሰላሙሳ እቑዌ ፌያፌይጝፅጝስ ሰላምስ ታፎ እያንታ አጌር ሹማጌልካዋ እንቲታኪ አይማኖትኩ ታብልሊ ሰላም ቼሜትጛታ ፄውጝስ እንፅኺ እንፃኽስስታማጊያኽ ንካ::

እምፕልትቕ ሰላምስ እርዳታንታ ሊሊትጙንኩ ጊዝካዳ ኩስጝጜ ካስጝፅጝስ አችትጝጚስ ኬሽኹ

ሰላም ዝኩዋታ ፄውስትⶓ እርዳትፅካ:: ናካዳ ፄትቲውሳ ሜዋክሮ እንግራ አችትጝፁኒዴስ ፋሌንጋ ወረዳታጊ ኬሽኹ ሰላም ዝኩⶓ ቶኬምካ::

ጉዋጉሲ ሽኩዳድ ወረዳው ትክትሊ ቺፅጝፃንቲ አበራ ገረም ወረዳስታ ቲሊሊ ኬቴሙ ቺፅጝፂ ፌይኹዳ እሽኹ ፄትቲው ችግርዴስ ፋማ ጉድ ሰላሙ አኺኒዳ አግስታው አኽⶓ እርዳትፅካ:: እንዴስ ቤዴራ ልምታማ አግልግሎቴ እያቲንኩ እሺንኩ ምንግስትኩ ኾትካ እምፕልታቕስ አግልግሎቴ እይካማጊ አኽⶓ ቶኬምካ:: ምንግስትኩ እንፃኽስታንትካኪላ እንፅኼ ጄሜርⶓ ጉሽካ:: ወረዳዳ ፌያፌያማ ዶንግቱንኩ አይልካስ ዳዴኽስታ ዜሬፍጙ ዎንጄል ፌፄምስታማጊ አኽⶓ ቶኬሙንኩ ትክትሊ ቺፅጝፃንቲ ዶንጌቱንኩ አይልካዳ ፃምሪ ዎሬሙ አይል ይስጙኽሳ እርምጄ ካፃማጊ አግስታው አኽⶓ ጌሌፅካ::

እምፕል እምፕል ስፍሪዳ ዶንጌቱንኩ አይልካ መኪናዋ ቲሪፅጝስ ጌንዜቦ ቻቤላንኩዳ አጌሩ ካላካልጚው ሴራዊቲ ሲፍጛማጊ እርምጄ ካፅⶓ እርዳትፅካ:: ናካዳ ወረዳስታ ኬቴሙ ቺፅጝፂ ጉድ ሰላሙ አኺኒዳ አግስታው አኽⶓ ጌሌፅካ::

እምፕልታቕሊ ሊሊትጙንኩ ጊዝካዳ ፄውስትኹ ኩስጚዳ ሰላሞ ቼሜትጝፅጝስ ጜዋንቶ ካፅጝስ እምፕልታቕ ፄትቲው ሜዋከሩ ኬምፕዳ ያኼካማ እርዳትጝ ቱስታው አኽⶓኪላ ቱትጚዳ  ታምብⶓ እርዳትፅካ::

እንዴስ ቤዴራ ፄትቲው ሜዋክሮ ፌሬሳማ እሺያሱስታ አመራርካዋ ዴሜካማ እስካዊስ አችትጝፁኒዴስ ፋሌንጋ ፖሊሶስታ ሚሊሻ ሴሌቴንፅጝስ ሰላሞ ቼሜትጝፃንታ ፄውስትⶓ እርዳትፅካ::

ሰላሞ ቼሜትጝፅጝዴስ ኬምፕስ ኬምፖ ልማትኩ እንፅኽካዋጊ እንፃኽስቴካማጊ አግስታንኩ አኽⶓ ዙሙንኩ አላፊ ወክታዊ ተፋስሱ እንፅኺ እንፃኽስታታ ፄውስትⶓኪላ እርዳትፅካ:: እምፕልካ እምፕልካ ዙራሙርካዳ ዶንጌቱንኩ አይልካ ልማቶ እንፃኽስታቲንታ ፄውⶓ ቶኬምካ:: ጉዋጉሲ ሽኩዳድ ወረዳውሳስታ ቲሊሊ ኬቴሙሳ ሰላሞ ቼሜትጝፅጝስ እምፕልታቕ ጜዋንትስ ታምቦ ፊትጛንታ እቑዌ ፌያፌይጝፄካ::