ኽሳንቲ ቑንዚ

አለሚቱ የኔት

ኽሳንቲ አኹኪ ስጋደዌው ቑንዚ እልስ ካንትስታቲው ማይኮ ባክቴሪየም ሊፕሬ እስትኹ ቑታቑትካ እንኪቴንካስ ይንታው ቑንዚያኽ:: ሊጊሲሚ ጊዝስ እጄውስታ አቒዴስ አቒሾ ፌያፌይጛው ቑንዚያኽ:: ቑንዚ ሚንችትስ አዬ፣ ኔርብኩ እንኪቴንካዋስታ እሎ ፂኬ:: እምቢታማ እክምኔ አግፂየስጊ ኬፍቲኔ አካሉሳ ጉዳቶ ሲፍፅጝዴስ ፌይኹስ ጝናቑ አባልካዳ ማቤራዊስታ  ሼው ፅንታውሳ ቻኒስቶ ሲፍፅጝስ ካላው ቑንዚ አኽⶓ ቲን ቢሩዴስ አግፅንኹ ንባር ቶኬሜ:: ቑንዚ ፆቴ አግሌላቲውስታ ዋሺኒኪ ድሚው አችዳ አግስታንኩ እምፕልታቑ ቤንካዋጊ ፂካዊያኽ:: ድኽት፣ ክችጙኽሳ ምግቦ አግፅⶓ አቲጝስታ እምፕል ጝንዳ ቼኔኔክጛማ ዝኩጝ ኽሳንቲ አኹኪ ስጋደዌው ቑንዜዚስ ፂኪስታንታ ፄዌ:: ስጋደዌውሳ ቑንዜ ካንትኹስኪላ አውጚው ሬዲዩኑ ቴርት ቤናሊ ስልኪስ እጂጜ ፄውንኩ ዶ/ር አለሙ በዛብህ አዩስታ አባላዘሩ አኪም ኽይትጝፄ እይካ::

ኽሳንቲ አኹኪ ስጋደዌው ቑንዚ አቒዴስ አቒሾ ፌያፌይጛው ሊፕሬሲ እስትጝስ አቕስታው አኽⶓ ዶ/ር አለሙ ጌሌፅካ:: እምፕልታቕ እን ቑንዚ ኬሴትስትጝስ ካላው እኻኺሪዴስ ጁጝሴኽ ናማ አምናው ኪላ ኬርትኹ አኽⶓ ቶኬምካ:: ኽሳንቲ ቑንዚ ይንታውኪላ ባክቴሪያስ አኽⶓ እርዳትፅካ:: እን ኽሰንቲ ቑንዚ ይቶፒያዳ አንኩዋ ሻያዋኺስታ ያኻንኩ አቖ ፂኪጝስ ካላው አኽⶓኪላ ዶ/ር አለሙ ጌሌፅካ:: እንሳ ቑንዜ ድፅጝስኪላ ይቶፒያ ጝሺሱ ጊዝዳ እሳንስ እንፃኽስቴታጊ ዝኪት አኽⶓኪላ ዶ/ር አለሙ ቶኬምካ:: “ኽሳንቲ ቑንዚ ዜኔግስቱንኩ ቑንዝካዳ ሜዴብስታው አኽⶓስታ ምክንያቲኪላ እስጜ ቑንዜ ካንታንኩ ፅናትካ ሚንችትስ አግስታቲንኩ አኽጝሴኽ” ንካ::

ኽሳንቲ ቑንዚ ማልጜ ፂካው አክምስ ዜሬቕቴና ያኹንኩ ድኻድኽ አጌርካዋ አኽጝሰ ትኩት እይስታቲው ያኻማ ዜኔግስትኹ ቑንዚ እስትጝስ ካሊⶓኪላ ዶ/ር አለሙ እርዳትፅካ::

ኽሳንቲ ቑንዚ አንትጝስ ካላው ማይኮቫክቴሪያሊፕሬ እስታው ቫክቴሪያስ ያኹስ ዜርስ ፌያፌይጛቲው ያኹስ እምስትኹ አቒ ዝኩኒ ኩፅኒ አቒዴስ አቒሾ ፊኹዊስ ፌያፌይጝጝስ ካላው አኽጝስ እምቢትናማ አኬምስቲየስጊ ሲጊፃው አኽⶓኪላ ቶኬምካ:: ዜርሊ ዝኩኽሳ ካንትኹስኪላ ታብሊ አኹኪ ቹዋ ጝናኻዳ ኽሳንቲ ቑንዚስ ፂኪስቱንኩ ዝኩኒ ፌያፌይጝፅካ ዳድካስ ቑንዚ ፌያፌይጝጙ ድል እሳን አኽⶓኪላ ጉሽካ:: እሊኩስታ ቑንዝካታ ቑፅኒ ብሪስ ዜርዴስ ዜርሾ ፌያፌይጙ ድል እላቲው አኽⶓኪላ ቶኬምካ::

ኽሳንቲ ቑንዚ ፆቴስታ ድሜ ጐሌላቲው ቑንዚ አኽⶓስታ ሚንችትስ ኩፅኒ 15 ዴስ 45 አሜቱ ድሚው ክልልዳ ዝኩንኩሳ አቖ ፂካው አኽⶓኪላ ዶ/ር አለሙ ጉሽካ:: እን ድሚው ክልልዳ ዝኩንኩ አቕ ዴሜካ እንፅኼ እንፃኽስትካማ ጌንዜቦ አኹኪ አብቶ አፌራንኩ አኽጝስ ኢኮኖሚስ ጉዲስትጝስኪላ ምክንያታ ያኻው አኽⶓ ዶ/ር አለሙ እርዳትፅካ:: እን ንጝ ኩፅኒ እሊው ድሚው ክልልዳ ዝኩንኩሳ ፂኪጝስ ካላላኪ ንጝ ጋቲው አኽⶓ ይቶፒያዳ ሹኻ አርፊ ጄርዳ አግስትኹ ንባር ዝኩⶓኪላ ቶኬምካ::

ፆቲሾዳ ካንትስታኒ ኩፅኒ ውላጊ ፂኪስታንኩ አኽⶓስታ ጝርጃዳ ዝኩኽ ቻኒስት ኩፅኒ ኬፍቲኒ አኽⶓኪላ ዶ/ር አለሙ እርዳትፅካ::

“ኽሳንቲ ቑንዚ ኬሴትስቱስ ምልኻትካዋ እሜ ካንትፃቲው አኽⶓስታ እምፕልካ እምፕልካ አቕዳ ዋልቲ አርፋስ ምልኻት ካንትስቱስ እሊኩዳ ዴሜካ 20 አሜታሳኺስታ ባክቴሪያ ዝኮስኩስ ምልኻት ካንትስታውላ እጂጝስ ካላዌኽ” ንካ:: ምልኻት ካንትስቱስኪላ ሚንች አይኔትካ ምልኻትካ ካንትስትጝስ ካላንኩ አኽⶓ ቶኬምካ::

ኽሳንቲ ቑንዚ ሚንችትስ ጉዳው ኪላ ሴግቲኔ አካላቱሳ ቤኖስታ ኔርቦ አኽጝስ ካንትስታንኩ ምልኻትካ ካንትስታቲንኩ አኽⶓኪላ ዶ/ር አለሙ ጌሌፅካ:: ምልኻትካኪላ አካላትዳ ሴግዳ ካንትስታኒስ ኬሌሞ ኪስጝስ ካላው አኽⶓስታ እምፕልካ እምፕልካዳ ፉቺ ያኹስ እሊኩዳኪላ ድሚ አኽጝስ ካላው አኽⶓ ቶኬምካማ እንኬሌም ፉኽ ሲፍሪዳኪላ ኹክጝስ ካላው አኽⶓ እርዳትፅካ::

“ኽሳንቲ ቑንዚ ምክንያታስ ኔርብ ጉዲስታኒ ዴሜካ ታፍስታ ልኩ ፌዜዝጝስ፣ ታፎስታ ልኮ ልቕልቕፅጝስጊ ቼጌርፄኪላ” ንካ:: እንፅኼ እንፃኽስትጝስ አክኼ ጉሽጝስ እንዜጝጝስኪላ ቼጌርፃው  ማልጜ ባሳኒ ዴሜካ:: እሎኪላ ዴፌንፅጝስ ካላውስታ እሳኖኪላ ፂካው አኽጝስ አኹት ክቪጝስ ካሌ፣ ፌያፌያማ ዴሜካ ጊኺኒኪላ ፊጝስ ካላው አኽⶓ ዶ/ር አለሙ ቶኬምካ::

እምፕልካ እምፕልካ አቕዳ ዴሜካ አቲሬ ፄጌራንኩ እንቓርካ ፊጝስ ካላንኩ አኽⶓኪላ ጉሽካ:: ባክቴሪያ አካላትዳ ዝኩኒኪላ እንዳርማኪ ቑንዛ ጋቲታ ሊጊሲሜ አሜቶ እጂጝስ ካላው ቑንዚ አኽⶓኪላ ዶ/ር አለሙ ጌሌፅካ::

ቑንዜ ካንትኹስኪላ እምፕል ቑንዚ ኬሴትስቱኒጊ እምቢትናማ አኪምጝና ካስጝስ አኬምስትጝ ፋይፃው አኽⶓኪላ እርዳትፅካ:: “ምክንያቲኪ ሚንቾ ጊዞ እምስትካያስኩ ጝናቕሊ ዝኩዋው ያኹኒጊ እምስትካያስኩ አቖ ፍንሾስ ፂኪስትጙ ድል ዴሜካው አኽጝስ እንቢትናማ እክምኔ ጄሜርፅጝ ፋይፃዌኽኪላ” ንካ::

ካላካልጝጝስ ካሊስታው እጁ ዴሜካ እሊኩ ቑንዝካታጊ ስጋደዌስ እስታማ እይስታው ክትባቲ ዝኩኽ አኽጝስ ጄርካስ ካሜንስቱንታ ካፃንታ ፄውጝ ቱስታው አኽⶓኪላ ጉሽካ:: እምስትኹ አቒ ዝኩኒ ዴሜካ እክምኒ ኾትሾ ካስጝስ እይስታው እጁ ዝኩኽ አኽጝስ ካሳማ ካፅጝ ፋይፃንቲ አኽⶓኪላ ቶኬምካ:: ቴርትካማ እይስታንኩ ሹኻ እጁ አይኔትካ ዝኩንኩ አኽጝስ ካፅስታኑ ጌርክስስታ ሳትስ ቼፍጛማ ካፅጝ ፋይፃንቲ አኽⶓኪላ ዶ/ር አለሙ ጌሌፅካ::

ኽሳንቲ ቑንዚ ላጛ አይኔት አኽጝስ ጛውስታ ቑንዚው አይኔትታጊ እክምኔ ሲፍጛማ ካፅጝ ፋይፃንቲ አኽⶓኪላ እርዳትፅካ:: እምፕል አይኔት ኽሳንቲ ቑንዚ ኽብፂ ባሲለር እስታው ያኹስ አቒዳ ዝኩኽ ባክቴሪያው ሚንችት አይሎ ልቓ አኽጝስ አኬምስታው ጊዝኪላ ልቓ አኽⶓ ጉሽካማ ዋልቲ አርፋሳኺስታ ካፃው አኽⶓ ቶኬምካ:: ላጛንቲ አይኔት ኽሳንቲ ቑንዚ ዴሜካ መልቲባሲለሪ እስታው ያኹስ እንሱ አይኔት ቑንዚስ ፂኪንስቱንኩ አቕ ዴሜካ ሚንች ባክቴሪያ አካላታኻዳ ዝኩክ አኽጝስ ሊጊሲሜ ጊዞ አኹኪ እምፕሎ አሜቶኺስታ እክምኔ ካፅጝ ፋይፃው አኽⶓኪላ እርዳትፅካ::

ኽሳንቲ ቑንዚስ ፂኪስትካማ ምልኻቶ ካንቱንኩ አቕ እሊው ቑንዚታጊ አኬምስታማ ኬሽጝስ ካላንኩ አኽጝስ ቱስቲስ ቲኑ ኾትሾ ካሳማ ሲፋሲፍጜ ፄውጝ ፋይፃንቲ አኽⶓኪላ ታክስፅካ:: ድምክኒስኪ ጝናቖኪላ እክምኒው ኾትሾ ካስጝስ ማራማርስትካማ ቼሜትጝፅጝ ቱስታው አኽⶓ ጉሽካ::