ሶፍ ኡመር

አለሚቱ የነት

ባሌ ዞን ሚንችካ ቱሪዝሙ ታምብፅካ ስፍርካስ አዴልስትኹ ብቲያኽ:: ጉስፅካዴስ ጌሬምፃው ፍትሬቱ እይስቲ ያኹኽስታ አፍሪካዳ ዝኩንኩ ድንጉልካ ዎሽካዴስ እምፕልኪላ ሶፍ ኡመሩ ፍትሬቱ ዋሽ አግስቴ::

15 ትኩሚ 1 ኪ.ሜ ሌጌሴምት ዝኩኽ እንዋሽ ይቶፒያዳኪላ ሊጊሲሚ አኽጝ ድኹስታየ:: ዋሽ ጊዙ አሌሙ ማኼታ ያኻማኪላ ሜዜጌብስታ ሶፍ ኡመር ዋሹ አኽ አኽት ዳዱ ሌጌሴምትኪላ 15 ትኩሚ 1 ኪሎሜትር ያኹስ ጐኑ እሳንት ዴሜካ እምፕል ትኩሚ አንኩዋ ኪሎ ሜትርያኽ:: እንኪላ ይቶፒያዳ ሌጌሴምትስ ክቼው እላቲው ፄዋ:: ሲዚፅካዴስ ጃላ አብጄልካኪላ ዝኩኑዊያኽ::

ሚፅፂዴስ ጄሜራማ ፍሽፄኺስታ ላጛዴስ ሹኻ ሳታሳ እንዝጜ ካፃው አኽጝኪላ ድኹስታያው እን ስርኩኒዌና ዋሽ ይቶፒያዳ ናማኪ አፍሪካዳ ሌጌሴምትስ ቤዴራንቲያኽ:: አሌምዳ 360ንቴ አቾ እሚጝ ድኹስታያው እን ጊሪምፂ ፍትሬቱ ዋሽ አዲስ አበባዴስ 532ኪሎ ሜትር እቺትዳ አግስቴ::

ሶፍ ኡመሩ ዋሽ ባሌው ብሄራዊ ፓርክዴስ ጉሽፄ ፄዌ:: ሊኻፅካ ኪሎ ሜትሮ እንዜጛማ ዋሽ ብታኻሱሳ ካይፄ ዳዳ ፄዋው ዌቡ ብን እሊው ድምክኒ ዋሹ ግድኪላ ያኻ:: ዋሽስ እንዜጛንኩ አቕኪላ ላጚቲኒ ብኖ ካይጝ ማንዲስቴ:: አንኩዊኒ ልኩስ ላጚኒ ዴሜካ ባምቢጝስ ኬውጝፃና:: እን ፍትሬታ ቴርስትኹ ስርኩኒው ዋሽ አኽቲኒ ግድስታ ፍትሬቱ እንፂው ትቤብ ፅንት ጐቤናንትካውሳ ሼዎ ዴስፃዊያኽ::

አንኩዋ ሚሊዩን አሜትዴስ ቤዴራ እሽጝ ድኹስታያው ፍትሬቱ ዋሽ ዌቡ ብን ጊዙ ካስጚስ ሺሻማ ፌቴርኹ አኽጝ ድኹስቴ ስያሜ አግፁኽኪላ 1000 አሜትዴስ ቤዴራ ሶፍ ኡመር እስታንኩ እምኔቱ ታብልዴስያኽ::

ሶፍኡመሩ ዋሽ 42 ሚፅፅካ አብጄልካ ዝኩኑዊያኽ:: እኒ አብጄልካ ክቻዴስኪላ ጝሺሱ ሳትስ አጌላጌላንኩ ኩፅኒ ሴዛ ይቢችካኽ:: ሶፍኡመር ዋሽ ሚፅፂ ጉለንተናየው መኩ እስቱስ ፍሽፂ ዴሜካ ሁልካ እስቴ:: ጉላንተናየው መኩ ሶፍኡመር ጃ ኩራዩምኩ እንጅኩዌው ስፍሪያኽ::

ሶፍ ኡመር ዋሻኻዳ አሲ እንቲታኪ 50ዴስ ጃላ ቻኻኩ ዜርካ፣ ካዌንኩ አንጉችካ፣ ድንጉልካ ኤሊስታ እሊኩ ካዌንኩ እንሴስካዋ እሜ::

ንባሮኪ ይትዩ ዲኦግራፊ ዶት ኮምዴስ አግፅንኹዊያኽ::