አማኻሪ ክልሉ ኩስጚጝና ሰላም አቲጛሳ ክችስጝስ ኩስጝጛ

አለሚቱ የኔት

አማኻሪ ክልሉ ኩስጚ ጝና 6ንቲ ዙሪ፣ 4ንቲ አሜት 9ንቲ ሚዲቢኒ ጉባይዳ ሰላም አግጝስ ትኩትስ እንፃኽስትጝ ቱስታው አኽⶓ አዊ ብሄረሰብ ቺፅጝፂው ወኬልስታንትካ ዙሙና::

አማኻሪ ክልሉ ኩስጚ ጝና ካስጝፅኹ ጉባይዳ ክልልታ ጌቴምኹሳ ሰላም አቲጛሳ ክችስጝስ ትኩትስ እንፃኽስትጝ ቱስታው አኽጝ እሳንስ ኩስጝስትኹ ጉዳያኻ::

አዊ ብሄረሰብ ቺፅጝፂው ወኬልስታንትካ አቶ በላይነህ ወንድም ዲጊስ ይንታማጊ ዝኩኽ ሰላም እምፕልታቕ አላፍቶ ካፅጝስ ይንቱኽ አኽⶓ ዙሜካ:: ያኼስጉ ናካኪላ  ያኹኒ ሰላሙ ዳንጉዌ ዋኽስ ዋኾ ጌጌውስትጝስ ካላያሱ አኽጝስ አቕ ሼውታ ፌካማ ልቕልቕንጝስ፣ ክንታንትካ ሼውታ ክንትጝስ ካሌካያሱ ዙራሙሪ ዝኩጝስ ሊሊቲ ትኩት እይስታማ ሰላሙ ዙሪዳ እንፃኽስትጝ ቱስታው አኽⶓ ዲብስካ::

ዶንጌታማ ልቕልቕናው ኬች ጋቻዴስ አግስታው ፊቲ እላቲው አኽⶓ አምናማ ሰላማዊ ዳድሾ አንትጝ ፋይፃንቲ አኽⶓ አቶ በላይነህ ድኹዌካ:: አንኪሺ፣ ጉዋንጉዊስታ ዚጋማ ወረዳታጊ ይሳማ እንፃኽስትጝስ እምፕልታቕኪላ ሰላሞ ማንዲፅጝሾ ቱጝኪላ ፋይፃንቲ አኽⶓኪላ ታክስፅካ:: ብሄረሰቡ ቺፅጝፂዳ አግስታንኩ ልማትካ ኾትካዳ ካስጛውሳ ልቕልቕቴጊ ካስጝፅጝስኪላ ሰላሙ ዳንጉዊኒ ፅንጋኻ ያኻማጊ አኽጝስ ሰላም አግጝስ ቻ ናካ እስታውላ ይሳማ እንፃኽስትጝ ፋይፃንቲ አኽⶓኪላ ቶኬምካ::

ካዌናኻዳ ዝኩንኩ ብላንካስውላ ሰላም ፋይፃንቲ አኽⶓ ዙሙንኩ ዴሜካ እሊት ወኬልስታንታ ዊዛሮ አስናከች ዘላለሚያኽ:: ሰላም ይንታታ ታምቦጊ ፊትጝጝስኪላ ምንግስት፣ ዶንጌትኹ አካልስታ እዝብ ካላውሳጊ እንፃኽስትጝስ ሰላሞ ሴፌንፅጝ ፋይፃንቲ አኽⶓ ታክስፅካ::

ሰላሞ አዌክጝስ ፅንጋኻ ያኼካማ ፍንዳ አግስታንኩ እንፅኻ ጋንኩ ወታትካ አኽጝስ ዎታትካስ እንፅኺ ድላሳ ብሳማ እሳንስ አሴሜርጛንታ ፄውስቱኒ ሰላም አንትጝስ ፍሼ ፄዋው አኽⶓኪላ ዊዛሮ አስናከች ካንቴ እይካ::

ብሄረሰብ ቺፅጝፂው ወኬልስታንቲስታ አማኻሪ ክልሉ ምንግስቱ እቑስታንቲ አቶ አየን ብርሃን ጌሌፁኑውስታጊ ሰላም ይንታታ ምንግስትዴስ፣ እዝብዴስስታ ዶንጌትካማ ካዌናኻ ቱንኩዴስጊ ማንዲስታው ዲብ ዝኮ::

ሰላም ይንታውስታ አጌር ልማትሾ ቱጝስ ካላው፣ ሜብት ኬቤርስታማ ክርፂ ቺፅጝፂ ፌቴርስታው ክርጚስ ያኻውላ ኩስጚስታ ዙሚትጚስ አኽⶓኪላ አቶ አየን እርዳትፅካ::

እኑስ እኖ ክርጝናናጊያ ዝኩን ኑንኩ አቶ አየን ድሳውሳ አብቶስታ ፍትሬት አብታሳ ይው አብቲያኽ ንጝስ ድሳውሳ አብቶጊ ይጉፅጝስ ካሊስታው አኽⶓኪላ ጌሌፅካ:: ሰላም ይንታታ ፄውጝስ ምንግስትኪላ ያኹኒ ሜብቶስታ እጐ ኬቤርፅጝ ፋይፃንቲ አኽⶓኪላ አቶ አየን ጉሽካ:: እዝብኪ ያኻ ካዌናኻ ቱንኩ አካልካ ካሴኑ ካሲ ዝኩኒኪላ ቱስቲስ ዲግጛማ ካሊስታውሳጊ ፄውጝስ ኩስጝጝስታ ኽይጝ ቱስታው አኽⶓኪላ ታክስፅካ::

ካዌናኻ ቱንኩኪላ ያኹኒ ካቢትጚስ ዲግጛማ ኩስጝጝስ ምንግስት ፌያፌይጝፃውሳ እንፅኼንቶ ቻቤልጝስ ሰላሞ አግጝ ጉላሊ እላቲው ጉዳይ አኽⶓኪላ አቶ አየን አሳቦ እይካ:: ሰሜንሾስ እሺኹ ወሬም ኩስጚ ይንቱኽ አኽⶓኪላ ቶኬምካ:: እንሳ ካንትናና እሜ ኩስጚሾ ቱናስክኑኒ ኩፅኒ ናካዳ ታንቡኽ ጉዳትጊ ይጉጝስ ካላው እሺⶓኪላ አቶ አየን ጉሽካ::