አኹዋቲው ስንዳይስ ትኩት እይስታማጊያኽ

ታደለ አጋጄ

አንኪሺ ጉዋጉሲ ወረዳ አኹዋቲ ልማትስ 2 ሻይ 765 ሄክታር ብቴ ሊሚፅⶓ ወረዳው ግብርኒ ፅፌት ጝና አቕፅኾ::

ምንግስት አኹዋቲ ስንዳይስ ሊሊቴ ትኩቶ እያማ እንፃኽስትጝስ ሊሊትጙንኩ አጌራኩ ቤንካዳ ስንዳዮ እሳንስ ሊሚጝስ አሬሳቻንትካዋ ቴኬምስታንታ ፄዋማጊ አግስቴ::

አንኪሺ ጉዋጉሲ ወረዳ ማንጃ ቱንኪሺ ኬቤሊው አሬሳቻንትካኪላ አኹዋቴ ስንዳዮ ሊሚፅጝስ ኬሽኹሳ ምርቶ አግፅጝስ ቴኬምስታንታ ያኼካማጊያኽ:: አሬሳቻንቲ ብርሃን አየን ማንጃ ቱንኪሺ ኬቤሊው አሬሳቻንቲ ያኻኒስ ስንዳዮ ክላስተርስ ሊሚፅጝስ ኬሽኹሳ ምርቶ አሜሬትጝስ ጛጛርትጛሱ ምግብዴስ ፌይኹስ ጌቤልስ ዲግስጝስ ትክሞ አግፅⶓ ድኹዌካ::

እንዴስ ቤዴራ ስንዳዮ ዜርጙ ዴስ እላቲኩ እሺⶓስታ ስንዳይዴስ ኪቻ ስምኬስታ አፊንፄ ዜርጝስ ትክሞ እግፃቲንኩ እሺⶓ ቶኬምካ:: አሬሳቻንቲ ዲጊ ጊዝዴስ ናቴ ኩፅኒ ግብርኒኩ ውማይቴንካውሳ ኩስጜ ቻቤልጝስ ስንዳዮ ክላስተርስ ሊሚፅጝስ  ትክሞ አግፄካማጊ አኽⶓ ዲብስካ::

ንⶓ ዜሩኑ ስንዳይ ኬሽኹስ ዋግⶓ ዙሙንኩ አሬሳቻንቲ ኬሽኹሳ ምርቶ እያታ አሪሜ አሬምጝስ፣ አኾ ዎክትስ ዝቕፅጝስስታ ቱስታውሳ ግባቶ ፄውጝስ አንኬባኬብካማጊ አኽⶓ ድኹዌካ:: ግብርኒኩ ውማይቴንካ አሬሳቻንትካውሳ ማሴኺስታ አንትጝስ እርዳቴ ፄዌካማጊ አኽⶓኪላ ዲብስካ:: አሬሳቻንቲ ስንዳይ ዋጉኒዴስ ፋሌንጋ ዴሜክስታው ዩሪያው ማዳባሪው እንፂጝ ጌቴምኹ አኽⶓ ጉሽካ:: ግባት ቱስታውሳላካ አሬሳቻንትካስ ዲጉኒጊ ኬሽኹ ምርትስታ ምርታምት ዴሜካው አኽⶓ ቶኬምካ::

እንዴስ ቤዴራ አኹዋቲስ ስምኬ፣ አፊንፄስታ እሊኩሳ ሴብልካዋ ሊሚፅጝስ ትክሞ አግፃቲንኩ አኽⶓ ዙሙንኩ ዴሜካ እሊው ማንጂ ቱንኪሺ ኬቤሊው አሬሳቻንቲ ጌታሁን ቢተውያኽ::

ናካ ኩፅኒ ግብርኒኩ ውማይቴንካውሳ ኩስጜ ቻቤልካማ ስንዳዮ ክላስተርስ ሊሚፅጝስ ኬሽኹሳ ምርቶ አግፄካማጊ አኽⶓ ዲብስካ:: ንጙዊኒ ዎክትዳ ዜርስትኹ ሴብል ጉድ ዋግጙ አኺኒዳ አግስታው አኽⶓ ዙሙንኩ አሬሳቻንቲ ጌታሁን ግባትስታ አኹ እንፂጝ ኬሽኹሳ ምርቶ አግፃቲንታ ፄውⶓ ቶኬምካ::

ስንዳዮ አሜሬትጝስ አግፃኑ ሚፂስ ጄርካዋ ክንትፄካማጊ አኽⶓ ቶኬሙንኩ አሬሳቻንቲ ፌይኹ አሜትዳ አሜሬቱኑ ስንዳይስኪላ ኬቴምዳ ጝኖ ግቢትⶓ ዲብስካ:: ንⶓ ዜሩኑ ሴብልዳ አሪሜ አሬምጝስ፣ አኾ ዝቕፅጝስስታ ቱስታውሳ አንኬባኬብጜ ፄውጝስ ጉዶ ምርቶ አግፃንኩ አኽⶓ ዲብስካ::

ማንጃ ቱንኪሺ ኬቤሊው ግብርኒው ውማይቲኒ ሽቴ ሞላ ኬቤሊታ 280 ሄክታር ብቴ ሊሚፅጝስ አኬድካማ 351 ሄክታር ብቲዳ አኹዋቲስ ሊሚፅጝ ካሊⶓ ዲብስካ:: ፌይኹ አሜትዳ ግባቱ እንፂጝ እሺኹ ያኹኒውላ ንጙዊኒ አሜትዳ ኩፅኒ አሬሳቻንትካስ ዳላው ሜቴንስ ግባት ዲግኹ አኽጝስ ኬሽኹሳ ምርቶ አግፅጝስ ካላንኩ አኽⶓ ጌሌፅካ::

አሬሳቻንትካ አኹዋቲስ ስንዳዮ ሊሚፅጙ ፋይ ዴሜካማጊ አኽⶓ ቶኬምካማ ዩሪያ ማዳባሬ ዴሜክጝስ ኩፅኒ  እንፂጝ ጌቴምⶓ እርዳትፅካ:: አሬሳቻንትካ አኹ ቱዋቲው ዙራሙሪዳኪላ ሞተር ፓምፖ ቴኬምስትጝስ አኹዋቲስ ሊሚፅካማጊ አግስታንኩ አኽⶓ ቶኬምካ::

አንኪሺ ጉዋጉሲ ወረዳው ግብርኒ ፅፌት ጝናሱ አላፊ አስፋው ሁነኛው አሬሳቻንትካ ስንዳዮ አኹዋቲስ ሊሚፅጝስ ፋይ ዴሜካማጊ አንትጝ ወረዳ አኬድኹዴስ ጃላ ሊሚፅⶓ እርዳትፅካ:: ወረዳታጊ 2ሻይ 200 ሄክታር ብቴ ሊሚፅጝስ አኬድካማ 2ሻይ 765 ሄክታር ብቴ አኹዋቲስ ሊሚፅካማጊ አኽⶓ ጌሌፅካ:: እንኮጚኒ አሜትዳ ግባቱ እንፂጝስታ እሊው ዎክታዊ ችግርስ 850 ሄክታር ብቴ ሊሚፃሺንኩ አኽⶓ ቶኬምካማ ንጙዊኒ ዎክትዳ ኩፅኒ አሬሳቻንትካ ፋያኑ ሜቴንስ ግባት ዲጋማ አኹዋቲስ ሊሚፅⶓ እርዳትፅካ::

አሬሳቻንትካ ስንዳይዴስ ትክሞ አግፅⶓ እርዳትስትጝስ አሜትዴስ አሜቶ ስንዳዮ ሊሚፅጝስ ኬፍንኹ ጁትጚ ዝኩⶓኪላ ቶኬምካ:: አሬሳቻንትካ ጉሽኑ አኹ እንፂጝስኪላ አኾ ዴዴክስ ግቢትፅጝስ ፅናቶ ፄውⶓ ቶኬምካ::