ቻግኒ ኬቴሙ ሌጌሳታንብካው ልኺትጚ

ታደለ አጋጄ

ቻግኒ ኬቴሙ ቺፅጝፂዳ ካስጙስ እጂኹ ክሌብካው ልኺትጚ አሌድስትኾ::

አዊ ብሄረሰቡ ቺፅጝፂ ቻግኒ ኬቴምዳ ካስጙስ እጂኹ ክሌብካው ልኩ ኩታው ልኺትጚ ቻግኒ ወርወራ ልኩ ኩታው ኬቹ ዊፃንትስ አሌድስታ::

ላጛ አርፋዴስ ጃላ 7 ኬችካ ክቻዳ ካስጙስ ሴኔቤትኹ ልኺትጚ ቻግኒ ወርወራ ልኩ ኩታው ኬች ዊፅጝስ ዋንቼ ጉሻ::

ቻግኒ ኬቴሙ ቺፅጝፂው ቤዴራንቲ ትክትሊ ከንቲባ ይበልታል ሰይድ ልኺትጚው ፍፃሚዳ አግስትጝስ ፌያፌይጝፁኑ እንፅኼንትስ ዎታትካ ጉዳጋቲው ስፍሪዳ እሼቲንታስታ ቲን ዌናሳ ክምንቶ አፌርጝስ ስፖርቱሳ እንፃኽፄ ስፍሬ እሳንጝፅጝስ እንፃኽስቴካማጊ አኽⶓ ጌሌፅካ::

ኬቴሙሳ ሰላሞ ማንዲፅጝዴስ ኬምፕስ ኬምፖ ልኩ ኩታው ኬችካውሳ ልኺትጜ ካስጝፅጝስ እምፕልታቑ ታምትጚ ይስጛታ ስፖርት ኬፍቲኒ ታምብ ዝኩኽ አኽⶓ እርዳትፅካ::

ኬቴሙ ሰላሙ አኺኒ ስፖርቱሳ ልኺትጜ ካስጝፅጝስ አሜችኹ አኽⶓስታ ልኺትጚ ዎታትካዋ ስፖርትስ ጁትጛንታ ፄዋው አኽⶓ ጌሌፅካ::

እምፕልታቕ ስፖርቴንካስ ስዬ ዋኽትጝፅጝስስታ ስፖርትኩሳ አክኽካዋ እርዳትጝስ ስፖርቱ ልኺትጚ ካስጛታ ፄውⶓ ቶኬምካማ ኬቴሙ ቺፅጝፂ  ባጄትስ እርዳትጝስ ስፖርቱ ልቕልቕቲ ይስጛማ ሲፋታ እንፃኽስታንኩ አኽⶓ ጌሌፅካ:: ይንታውስ ስፖርቱሳ እንፃኽፄ ስፍሬ እሳንጝፅጝስ ትኩትስ እንፃኽስታንኩ አኽⶓ ቶኬምካ::

ቻግኒ ኬቴሙ ቺፅጝፂው ዎታትካው፣ ስፖርቱ ባይሉስታ ቱሪዝም ፅፌት ጝናሱ አላፊ አቶ ኩምላቸው አስፋው ቻግኒ ኬቴሙ ቺፅጝፂ ጉድ ሰላሙ አኺኒ ዝኩኽ አኽጝስ ስፖርቱ ልኺትጚ እንዳርማኪ ስጋታ ጋቲት ካስጙስ እጂⶓ ጌሌፅካ::

አዊ ብሄረሰቡ ቺፅጝፂው ዎታትካውስታ ስፖርት ሜምሪው ስፖርት ዜርፉ ኬቹ ጉሳንቲ አቶ ማርልኝ ሁነኛው ጛሾስ ብሄረሰቡ ቺፅጝፂዳ አግስታንኩ እሊኩ ኬቴምካስታ ወረድካ ቻግኒ ኬቴምዴስ ዴሶ ካፅጝስ ልኺትጜ ካስጝፅጝ ቱስታው አኽⶓ ጌሌፅካ:: ልኺትጚው አላሚ ቲኪስታንትካ ስፖርቴንካዋ አፌርጝስ ኬፍቲኒ ፍሺ ዝኩኹ አኽⶓ ቶኬምካ::

አሊዲዳኪላ ስፖርቱ ልኺትጚዳ ጉዶ ልኺትጚውሳ አክሞ ካንትፁንኩስስታ ዊፁንኩ ኬችካስ ሽልማቲ አይስታ ኑስ ዜጌብኹ አዊ ኮምኒኬሽኒያኽ::