እምፕል እሊውሳ ዜሬቕፅጝ፣ ባላንጊሪታ ካንትጝስታ ጌርክዌና ያኻማ ፌያውሳ ዳዶ ጌውጝ፣ እንአጌራዳኪ ያኻ እሊውዳ ድጙትጝፁስጉ ልማቶ ያጉስ ካንትስታያ:: እምፕልታ ድንግርታማ ቱትጛማ ዝኩዋሺኹ እምፕልታቕ ልቓ ዲባፋይካ አጌፋኑው ሌግስስታ እንዜጝትጝፃኑ ዲብስ ዝኩዊኒው ዴክት አቤሌሽስታማ አይማኖትስ ኮንኪስስታ ዜርስ ቤንጛማ እልግድማስ ካንትጝጝ እንቲታኪ ናኪትጚውስታ እምፕሎ ኬፍ እሊውሳ ዜሬቕፃው ላኹትጚ ጋቻሾ ታምፃማ ድኽጚ ፄውስቱስ ካንትስታ::
ናካ እን አጌራዳ ስፍሪስፍራዳ ካንትስታው ጋቻ አቕውሳ እንኬ ጌቤርፃ:: እዝቡ አግልግሎቴ እይፅካ ኾትካ ብኽንካ:: እንፃኺታስ አጌሉኑ እግልት አኻቲታ ያኻማ ዜሬፍስትጝስስታ ሌግስ ድጙስትጝስ ሚንችካዋ ዝባትሳ:: አዊ ብሄረሰብ ቺፅጝፂዳኪላ ፄውስትኹ እንጚያኽ::
ሚንችካ እንኩዊኒ ጝንዴስ እንኬ ፊቲስጝስ ዝኩዋሺኑዴስ አግፃዋ ቡኬካማ እንዜጝካ:: ምንግስትስ ጌቤራሺንኩ፣ ብሽታኖ ዜኬራሺንኩ፣ ቼግርስትኹሳ ናቕፃሺንኩስታ ምርክትኹሳ ኹፃሺንኩ ዝባትካማ እኹሚስስታ አዊስ ጉዲስትካ:: ፋታፋትካማ ኹዋሺንኩ ስራስሪ፣ እሎ ዋያኒስ ካንትስትካ:: ጎተሪዴስ አፔሳሺንኩ ናካ ትቡሳ ታፎ ማንዳንትካ ያኼካ:: ቡካ ካሱኑውዳ ዳድዳስታ ካኒስራዳ እንጉትጝስ ጌዴድስትካ::
ያኻያኻማ ዋሺኒኪ ጋቻ አሬኬዝጝ ይጉዋላ:: አኽጝስኪላ እንጅኩዋማ ዙሚትጚስታ ኬሻውሳ ዳዶ እሚጝ ውላስጊ ቴኬማው ያኻማ አግስቴ:: አዋኾዳ አዩ ጉዋግሲዳስታ ዚጋሚ ወረድካዳ አጉዊዳ ትኩምንኹ አኺኒስ ልቓ ሌጎ አጌፍካማ ሚንችካዋ ስዴታ እንዜጝፅካሺና:: አዊ ብሄረሰቡ ቺፅጝፂ እኒ ቡካንትካዋ /ፌኔኬልጛንትካዋ/ ዜኔጋያኽ:: ጉሽፂዴስ ትንካኪ ፄውስትኹ ዳድስ ታምቡኑውዳ ጌዴፍስታንታ ፄውስ እጄ::
እርዳታንትካ አችትካዋስታ ቤረሰብ ቺፅጝፂው ካሜንስታንትካዋ ቴቤቤርጝፅጝስ ሊሊትጙንኩ እርዳትካዋ ፋይፃኩስ ታምፁስ እጄማ ጋቻዳ እሺንኩ እምፕልታቕ አይጚኒ ዝኩዊኒሾ ዙራንታ ጛስጛዋ ዙሚትጛንታ ፄዋማ እንዜጝትጝፅⶓ ጄሜራ:: አይማኖትኩ ታብል ሹማጌልስታ አመራርካ ኻሮ ጌርኮ እንፃኽስትካማስታ ዜፌልካማ ዴኮ ጌምፅጝስ ቢኬካ:: ጋቻዳ ቱዋሺንኩ ድኪዲብ ካቢስታቲታ እሲትጜካማ እስካዊ ዝኩዌኔ ጄሜርካ:: እንሳ ዊዳፊ ፄውጝስኪላ ውላጊ ኩርፄንትስ ትኩትስ እንፃኽስትጝ ፋይፄ::