ውላጊ እንፃኽስትጝ ቱስታው እንፅኺ

ታደለ አጋጄ

ይቶፒያ እንሴስካው አብቱ ልማትስ አፍሪካዴስ ቢዲሪዳ ቶኬምስቴት ታኹስ አሌምዴስ ዴሜካ ላጜታንቲ አችዳ አግስቴት አኽⶓ ንባርካ ካንትፃና::

አማኻሪ ክልል እንሴስካው አብቱ ልማትስ አቕስትኹ ያኹኒውላ ፋይስታውሳ ላካሳ ትክሞ እይጝዳ ኩፅኒ ሚንችካ ዳንጉንካ ጁዋና:: ዲጊ ጊዝዴስ ናቴ ዝኩኽሳ አብቶ ቱስታው ዳድስ ትክሞ እያታ ፄውጝስ ጉድ ልቕልቕቲ ካንትስታማጊያኽ::

አጌር አቡቑ አችስ ጄሜርስትኹ ምስቡ ቢሪኪቲስ ሚንችካ እምፕልታቕኩ ቤንካ ጛጂሱ ጐርዳ እንሴስካዋ ሌፍፅካማ ዋይጝስ ትክሞ አግፄካማጊያኽ::

አዊ ብሄረሰቡ ቺፅጝፂኪላ እንሴስካው አብትስ ማልጛ አስሜምጛው አኽጝታጊ ሚንችካ አሬሳቻንትካ ግብርኒው እንፅኺዴስ ኬምፕስ ኬምፖ እንሴስካዋ ቡዚስጝስ ቴኬምስታንታ ያኼካማጊያኽ::

ግብርኒው እንፅኺዴስ እሊውሾስ እንሴስካው ልማቱ አብትዳ ዝኩኽሳ አብቶ ፋይስታው ዳድስ ትክምዳ እሽፅጝስ ፄውስታማጊ ዝኩኽ ፅሬት ማልጛ ጋሺፃዊያኽ:: ብሄረሰቡ ቺፅጝፂው ሊሊትጙንኩ ወረድካዳ እንሴስካዋ ሌፍፅጙ እንፅኺ አምፕል ኢኒሼቲቭ አኽጝስ እንፃኽስስታማጊስታ ክርፂ ዋይሚ ሜዜጌብስታማጊያኽ:: አሬሳቻንትካ ሌፍፃንኩሳ እንሴስካዋ ጉድ ጌቤሉ ታምትጚ ዝኩዋታ ዴሜካ ወረዳ ቺፋ እንሴስካውሳ አውደ ርእዬ ካስጝፅጝስ አቕትጝፅጙስታ ጌቤሉሳ ታምትጜ ፌቴርጙ እንፅኺ አኮሜችስቴ::

ስንብቶ አዩ ጉዋጉሲ ወረዳ እንሴስካውሳ አውደ ርእዮ ካስጙው ጊዝዳ ካንቴ እዩንኩ አቶ ነበሩ አዳሙ እንሴስካዋ ሌፍፅⶓ ጄሜሩኑ እንፃኺቱ ጊዝዴስ ጄሜርካማ አኽⶓ ዙሜካ::

ቤዴራ ጄሜሩኑ እንሴስካዋ ሌፍፃማ ዋይጙ ዴስስ ትክሞ አግፄካማ አኽⶓ ቶኬሙንኩ አቶ ነበሩ እን እንፅኺዴስ እንግርግራ ናቲንኩ አኽⶓ ድኹዌካ:: ሹኻ ፌሬንጅኩሳ ክምካዋ ቤዴራ ሌፍፃማ ዋይኹ አኽⶓ እንክርፁንኩ አቶ ነበሩ ናካኪላ እንፄዋማ ሌፍፃኩ ቤራ ዝኩⶓ ቶኬምካ::

እሊውሾስ ዴሜካ ኾሺውሳ ምርቶ እያንኩ ኾሺኩሳ እንሴስካዋ አጌልጝስ እምፕልታቕስ ኾሺዉሳ ምርቶ ዋይጝስ ቴኬምስታንታ አኽⶓ ድኹዌካ:: እሊኩ ዎታትካስ እንፅኺውሳ ድሎ ፌቴርⶓ ቶኬምካማ እንሴስካው አውደ ርእይ ካስጝጝ ጌቤሉሳ ታምትጜ ፌቴራያዉስታ አቕትጝፁኽ አኽⶓ ዲብስካ::

እንሴስካው አብትዳ ኽስኹስ ይስካማ እንፃኽስትጝስ ኬሽኹሳ ትክሞ አግፅጝስ እንፃኽስታንኩ አኽⶓ እንክርፄካ::

እሊው አዮ ጉዋጉሲ ወረዳው ዝኩዋንቲ አቶ ካሳሁን የኔት እንሴስካዋ ሌፍፅጝዳ አሴሜርጙንኩ ጛርት አቕ ያኻኒስ ጛኪላ እንሴስካዋ ዋይጝስ ኬሽኹሳ ትክሞ አግፁንኩ አኽⶓ ድኹዌካ:: አቶ ካሳሁን ዙሙኑውስታ 5ሻይዴስ ጃላ ቹንችካዋ ሌጌፅካማጌኽ:: ሶኼታ ክምካዴስ ዴሜካ ኾሺውሳ ምርቶ ቴኬምስትካማጊያኽ:: ላጛርጛዴስ ጃላ ቤራዋኪላ እንፄውጝስ ሌፍፃና:: ወረዳው አችስ እንሴስካው አወደርእይ ካስጝጝ ሌፍፃንኩሳ እንሴስካዋ አቕትጝፃይኹስታ ኬሸኹ ጌቤሉ ታምትጚ ዝኩዋታ ፄዋው አኽⶓ ዲብስካ::

ግብርኒ እንፅኺዴስ ኬምፕስ ኬምፖ እንሴስካው አብት ልማትዳ አሴሜርጝስ ኬሽኹሳ ኪሴ ካንትፅካማጊ አኽⶓ ቶኬምካማ ይንታውስኪላ ይስጝፄካማ ሲፍጝስ ቴኬምስታንታ አኽጝስ እንፃኽስታንኩ አኽⶓ እንክርፄካ::

አዮ ጉዋጉሲ ወረዳው ቹዋ ቺፅጝፃንቲ አቶ ገበየሁ በሪሁን ወረዳ ግብርኒው ልማትስ ጋያኪ እንሴስካው አብቱ ልማትስ ማልጛ አሜቻው አኽጝስ እን ዜርፍዴስ አግስታውሳ ኢኮኖሜ አኬድካማ እንፃኽስታኒስ እጂⶓ ጌሌፅካ::

እምፕልታቕ እንሴስካዋ ሌፍፅጝስ አግፃኑ ሚፂ ሴብሉ ልማትዴስ አግፃኑ ሚፂሊ እንፂትጛቲው አኽⶓ ጉሹንኩ አቶ ገበየሁ እንሴስካው አብቱ ልማት ዊዳፊ አብቱ አግፅፂስታ እንፅኺውሳ ድሎ ፌቴራው ዜርፍ አኽⶓ እርዳትፅካ::

አቶ ገበየሁ ዙሙኑውስታጊ እንሴስካው አብቱ ልማቱ ዜርፍ ዋይሚስታ ያኹኽሳ እንፅኼ እንፃኽስትጝስ እምፕልታቑሳ ምግቡሳ ዋስትኔ ቼሜትጝፅጝስ ሜቴቴንጙኽሳ ምግቦ አግፅጝስ ቲንዌናስታ አሜሬታንቲ እምፕልታቕ ያኻንታ ኬፍቲኒ ፍሺ ዝኩኽያኽ::

እንሴስካው አብቱ ልማቱ ዜርፍ ጌና ኔክስታያሱስታ ሚንች አብት ዝኩኽ አኽጝስ እንሳ አብቶ ዝቤንፅጝስስታ ኬሽኹ ኢኮኖሚው ቴኬምስታንትስ ይስካማ እንፃኽስትጝ ፋይፃው አኽⶓ ጌሌፅካ::

እንሴስካው አብቱ ልማትዳ ፅንጋኻ ያኹንኩ ችግርካ እንሴስካው ዜርካው ፃንኩት፣ ሜኑሳ ችግሮስታ ቲንዳ ካንትስታንኩ ችግርካዋ ኽይጝ ፋይፃው አኽⶓ ቶኬምካ::

ጄሜርስትኹ እንሴስካዋ ሌፍፅⶓ ፕሮጄክት ኬሽኹ አኺኒስ ሲፍፅጝስ እምፕልታቕ ኢኮኖሚው ቴኬምስታንትስ እንፃኽስትጝ ቱስታው አኽⶓ ዲብስካ::

አዮ ጉዋጉሲ ወረዳዳ ካስጙኽ እንሴስካው አውደ ርእይ አግስቴካማ ዙሚትጜ ፄውንኩ ብሄረሰቡ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው እን አጌራዳ ፅንፌንትስታ ድኽት ቹዋ ፅላትካ አኽⶓ ቶኬምካማ ድኽትዴስ ፊጝስ አምፕልትስ እንፃኽስትጝ ቱስታው አኽⶓ ጌሌፅካ::

ብሄረሰቡ ቺፅጝፂኩ ሊሊትጙንኩ ዙራሙርካዳ እንፃኽስስታማጊ ዝኩኽ እንሴስካው አብቱ ልማት እምፕልታቖ ቴኬምስታንታ ፄውጝስ እንፃኽስታማጊ ዝኩኽ እንፅኺ ይስጛማ ሲፍጝ ቱስታው አኽⶓኪላ ቹዋ ቺፅጝፃንቲ ታክስፅካ:: እንሴስካው አብቱ እንፅኺዳ ካንትስታንኩ ችግርካ ኬፍቴንካ ክንቲኩ ኾትካሊ ቲቪቪርጚስ እንፃኽስትጝስ ኢኮኖሚው አግፅፂ ያኹኽሳስታ ኔክስታያሱሳ አብቶ ትክምዳ እሽፅጝ ማንዲስቴ:: ጌቤሉ ታምትጚ ፌቴርስታታ ዴሜካ ትኩትስ እንፃኽስትጝ ፋይፃው ጉዳያኽ::