ፌኔኬልጜካሺካማ ባድሚሾ ዙሩንኩስ እርዳቲ ፄውስቱኻ

አለሚቱ የኔት

አዊ ብሄረሰቡ ቺፅጝፂ ዚጋሚ ወረዳ አህቲ ኬቤሊዴስ ፄትቲው ችግር ምክንያታስ ፌኔኬልጜካማ እጂንኩስታ ናካዳ ሙሪሾ ዙሩንኩ ወጌንካስ እርዳቴ ፄውስትኾ::

አህቲ ኬቤሊዴስ ፄትቲው ችግር ምክንያታስ ፌኔኬልጜካማ እጂንኩስታ ሙሪሾ ዙሩንክ እምፕልታቕስ ብሄረሰቡ ቺፅጝፂዳ አግስታንኩ ወረድካ ካሊስታውሳጊ እርዳቴስታ ድጋፎ ፄዌካማጊያኽ::

አዊ ብሄረሰብ ኮሙኒኬሽኑ ንባር ቶኬማውስታጊ ዚጋሚ ወረዳ አህቲ ኬቤሊዴስ ላጚቲ ሻያ 457 ፌኔኬልጛንታዋ ሙሪሾ ዙርፅጝስ ካሊስታ:: እን አቕኪላ ዙሩኑ ሙሪዳ እንዳራኪ ኮው ዲብ እላቲው አኽጝስ ውላጊ ካላውሳ እርዳቴ ፄዋማጊያኽ::

ፌኔኬልጛንትካስ ኬሌብስ ያኻውሳ ጊሳይቲ፣ ጂሚሪ፣ አካኩ አርጃስታ ሶሪት  ኬቤሊው እዝብ ዝኩኽዴስ ኔኬታማ አህቲው እዝብ ምርክትጝ ቱስታቲው አኽⶓ አምናማ 136 ኩንታሎ አሬ፣ ስይካዋስታ፣ ጝንኩ አክኽካዋ እርዳቴ ፄዌካ:: ሲፋንቲስኪላ እርዳቲ ሲፋው አኽⶓኪላ ኬቤሊው ሊከመንበር አቶ አባቴ መኮነን ቶኬምካ::

ቻግኒ አባላምቲ አች ሆስፒታልስታ ቻግኒ ቲኑ ጉትፕ ፃምርትጝስ ዴሜካ ቲኑ ጉትፕ ዋኽትጙኽሳ አግልግሎቴ እያታ 245 ሻይ 757 ብሮ ፍሻውሳ እክምኒውሳ ግባቶ አግልግሎቲዴስ ሴጋ እሺኹ አህቲ ቲኑ ጉትፕስ እርዳቴ ፄዌካ::

ፌቴርስትኹ ሰላሞ አቲጝ ሙሬ ባይፅካማ ፌኔኬልጜካሺንኩ እምፕልታቖ ናኺሴ ታፎ አፄፄፍካማ እንጅኩዋንታ ፄውኽ አኽጝስ አድማስ ውላቱዊ አሬሳቻንትካው እምፕልት እንፅኻው ማቢሪኪላ 3 ትኩሚ 1 ሚሊዮን ብርዴስ ጃላ ጌሜትስታውሳ ሊሊትጙንኩ እርዳትካዋ ፄዋ::

ዩኒዩን ፌኔኬልጛንትካ ዊዳፊስ ቲሪትጛንታኪላ ሰላም አቲጛስ ኬውጛሺኹ እርሺ እንፅኻሳ እርዳትጝስ እንዳራኪ ጌንዜባ ጋቲታ ሹኻ ትራክተርካዋ አሴሜርጝፅጝስ እርሼ ጄማርፃ::

ፌኔኬልጚዴስ ሙሪሾ ዙሩንኩ እምፕልታቕ እዩኑ ካንቲስ ሙሪሾ ዙራኒስ ፄውስታይኹ ቻቤልጚስ ውላስጊ ምስጋኔ ዲግስካ::

ዚጋሚ ወረዳው ቹዋ ቺፅጝፃንቲ አቶ መልካሙ አለነ ጌሌፁኑውስታጊ ሰላም አቲጛስ ፌኔኬልጜካሺንኩስ ፄውስታማጊ ዝኩኽ እርዳቲ ይስጝፃው አኽⶓ ጌሌፅካ:: ዙሩንኩ እምፕልታቕ ጝሺ አግስታኑ ጊዙ ድንኩዋንዳ አኽጝስ ቲሬንቲ ዝኩፂሾ ቱዋንታ ፄውⶓ እንፅኺኪላ ዲጊስ ጄሜራው አኽⶓ ቶኬምካ::

ብሄረሰብ ቺፅጝፂው ትክትሊ ጉባይ ኽምባስታ ፌኔኬልጛንትካው ዙርፃንቲ ኮሚቴው ኩችፃንቲ አቶ በላይነህ ወንድም ጛሾስ ወጌንስ ታንባንቲ ወጌን አኽጝስ ፌኔኬልጜካሺንኩ አጌር አቖ ቲሪትጚኒምባኺሰታ ዋሺኒኪ ወረዳ እርዳቴ ይስጝፃማ ኬፄልጝ ቱስታው አኽⶓ እንፅኼንቶ ፌያፌይጝፅካ::