ዝቤናዊ ዳድስ ግቢትስታው ዴዴክ ኢኮኖሚው ትክምስ ፍሺ ዝኩኼኽ

ታደለ አጋጄ

አኹዋቲስ ቴኬምስታኑ ብንዳ ዝቤናዊ ዳድስ ዴዴክ ግቢትስትጝ ኬሽኹሳ ኢኮኖሚውሳ ትክሞ አግፃንታ ካሊፃው አኽⶓ ዋይከላ ኬቤሊው አሬሳቻንትካ ዙሙና::

አዊ ብሄረሰቡ ቺፅጝፂ ጉዋንጊ ወረዳ ዋይከላ ኬቤሊው አሬሳቻንትካ አኹዋቲስ ሊሊትጙንኩሳ ሴብልካዋ ሊሚፃና:: እንዴስ ቤዴራ አኹዋቲስ ቴኬምስታኑ ብን ባይሉ ዳድስ ቴኬምስትጝስ አኹዋቴ ሊሚፃኑ ጊዝዳ ግርቦስታ ጊዞ ባኬንፃሺንኩ አኽⶓ ቶኬምካማ አኹዋቲስ ቴኬምስታኑ ብን ዝቤናዊ ዳድስ ግቢትስትጝ ኬሽኹሳ ኢኮኖሚውሳ ቴኬምስታንቶ ቼሜትጝፃው አኽⶓ አሬሳቻንትካ ዙሜካ::

ባይሉ ዳድስ አኹዋቲስ ሊሚጝስ አኹ እንፂጝ ጌቴማማጊ ልቓ ብቲዳ ሊሚፃኒስ ሴጝካ:: ፋይፃዉሳ ላካሳ ሴብሎ አሜሬታቲንታኪላ ፄዋ:: ናካዳ ኩፂ ምንግስት ሊሊቴ ትኩቶ እያማ እንፃኽስትጝስ አኹዋቲስ ቴኬምስታኑ ብንዳ ዝቤናዊ ዳድስ ዴዴክ ግቢትስታማጊ አግስቴ::

አሬሳቻንትካ ኑኑውስታጊ ምንግስት ዝኩኽሳ ችግሮ እርዳትስታማ አኹ እንፂጙሳ ችግሮ ኽይጝስ ግቢታማጊ አግስታው አኹዋቲው ዴዴክ እምቢታማ አሌድስታታ ግርብስስታ አሳብስ እርዳትካማጊያኽ:: አኹዋቲስ ቴኬምስታኑ ብንዳ ዝቤናዊ ዳድስ ግቢትስትጝ አኹውሳ እንፂⶓ ኽያው አኽጝስ ይንታውስ ሊሊትጙንኩሳ ሴብልካዋ ሊሚፅጝስ ኢኮኖሚስ ቴኬምስታንታ አኽጝስ ቴርትⶓ ዙሜካ::

ጉዋንጊ ወረዳው ኩሉስታ አኹዋቲ ልማቱ ፅፌት ጝናሰ አላፊ አቶ አደራው ገኔ ወረዳ 31 ሚሊየን ብርዴስ ጃላ ፍሺስ ሹኻ አኹዋቲው ልማቱ ፕሮጀክትካዋ ግቢትጝስ 153 ሄክታር ብቴ ሊሚፅጝስ ካላውስታ 315 አሬሳቻንትካዋ ቴኬምስታንታ ፄውጝስ እንፃኽስስታማጊ አኽⶓ እርዳትፅካ::

ዋይከላ ኬቤሊዳ ሺዲፒስታ ምግቡ ቲቢቢርጝፂ ቴርቱ ፕሮጄክትስ ግቢትስታንኩ 29 ሚሊዮን ብርዴስ ጃላ ፍሺስ ግቢትስትጝስ 110 ሄክታር ብቴ ሊሚፃውስታ 300 ዴስ ጃላ አሬሳቻንትካዋ ቴኬምስታንታ ፄውጝስ ካሊፃው አኹዋቲው ዴዴክ ግቢትስታማጊ አኽⶓ ጌሌፁንኩ አላፊ ዲጊ ጊዝስ አሌድስታማ አግልግሎቴ እያው አኽⶓ ጉሽካ::

አዊ ብሄረሰቡ ቺፅጝፂው አኹዋቲስታ ኩሉ ዙራሙሪ ልማቱ ሜምሪው አላፊ አቶ ታደሰ ቢተዉ ብሄረሰቡ ቺፅጝፂ አኹዋቲው ልማትስ እሳንስ ሊሚፅጝስ ካሊፃው 200ዴስ ጃላ ብንካ አግስታኑ 100 ሻይ ሄክታር ብቲዴስ ጃላ ሊሚፅጝስ ካሊፃው ያኹኒውላ ላንቡሳኺስታ ባይሉስታ ዝቤናዊው አኹዋቲስ 32 ሻይ ሄክታር ብቲዳ ይቪቻ ሊሚⶓ እርዳትፅካ::

ብሄረሰቡ ቺፅጝፂዳ 149 ዝቤናዊ አኹዋቲው ዴዴክ ግቢትስታማ አግልግሎቴ እያማጊ አኽⶓ ቶኬሙንኩ አቶ ታደሰ እምስትኹ ባጄት አሜትዳ 850 ሚሊዮን ጌንዜቡ ፍሺስ 22 አኹዋቲ ልማቱ ፕሮጀክትካዋ ግቢትጝስ 3ሻይ ሄክታር ብቲዳ አኹዋቲስ ሊሚፅጝስ 4ሻይዴስ ጃላ አሬሳቻንትካዋ ቴኬምስታንታ ፄውጝስ እንፃኽስስታማጊ አኽⶓ ጌሌፅካ::

አኹዋቲውሳ ልማቶ ዝቤንፅጝስ ሴዛ ልማትኩ ፕሮጄክትካዋ እንፃኽስትካማጊ አኽⶓ ቶኬምካ:: ግቢስትካማጊ አግስታንኩ 22 ፕሮጄክትካዴስ 19 ጉድ ፊፂምጚዳ አግስታንኩ አኽⶓ ኽይትጝፄካ::

600ዴስ ጃላ ዎታትካስኪላ እንፅኺውሳ ድሎ ፌቴርⶓ ጌሌፅካ::

አኹዋቲው ልማት ምርቶስታ ምርታምቶ ሌጌፅጝስ ቹዋ አኽጝስ ልማት እምፕል ኾትስ ይቪቺ ሳኪትጛቲው አኽጝስ አች ቺፋ ዝኩንኩ አመራርካ፣ ውማይቴንካስታ ታምብዌን አካልካ ጛውሳ ታምቦጊ ፊትጛንታ እቑዌ ፌያፌይጝፅⶓ አዊ ኮምኒኬሽኑ ዜጌቢ ቶኬማ::