ይቶፒያዳ ምርቶስታ ምርትምቶ ዴሜክጝስ ምግብስ ጛሬ ካሊጝስ አኮሜችስታንኩ ቴግባርካዋ ዱሜ ታምፅጝስ ምንግስት ኩርፄንትስ እንፃኽስታማጊያኽ:: ምርታምቶ ዴሜክጝስ ካሊፃንኩ ክቻዴስኪላ እሊኩ እንፃኽስትጝካሊ ቴርቴራ ኽብፂውሳ ማዳባሬ ቱስቲስ ቴኬምስትጚሾ ቱጝስ ምርታምቶ ዴሜካማጊ ይንታ:: ኽብፂውሳ ማዳባሬ ቴኬምስትⶓ ጄሜርጝስ ኬሻንቴ ምርቶ አግፅⶓ ጄሜሩኒዴስ ፋሌንጋ ዴሜካ ሊሊትጙንኩ ምክንያትካስ ማዳባሬ ዲግስጚው አኺኒ ኬውጛማጊስታ ዋይሚኪላ ኬሜስስታቲው ያኻማጊ ይንታ:: ሊሊትኑስኪ ሰሜኑ ወሬምዴስ ጉሽፃማ ኬፍቲኒ ግባቱ ዲግስጚው ችግር ጌቴማማጊ ይንቱኽ ያኼስጉ አማኻሪ ክልልዳ አሜትዴስ ጃላ እጂኹ ሰላሙ ዳንጉዊኒ ምክንያታስ ኩፅኒ ዲግስጚው እንፂጝዴስ ድምክና ሊሊትጙንኩ ዙራሙርካሾ ታምፅጝስ ዳዱ ልምትጝ፣ እንዜጝትጛውሳ ቲሪፃማ ዜሬፍጙ ወንጀል ምክንያታስ አሬሳቻንቲ ሼውታ አግፅጝስ ቼጌርስቱስ ሼውስታ:: እንኪላ አሬሳቻንቲ ምርታምቶ ዴሜክጝስ ፄዋውሳ ፅሬቶ ዳንጉዊትጝፅጝስ ምክንያታ ያኻማ ናካ ካንትስታማጊ ዝኩኽሳ ጌቤሉሳ ክብርናቴኪላ ሲፍፃማጊያኽ::
ኬሴትስትኹሳ ኽብፄ ማዳባሪውሳ ዲግስጚውሳ ችግሮ ጌጌውጝሾስ ኬሽጝፂው እንፅኽካ ይስጝፃውሳ ዋይሜ ሜዜጌብፅⶓ ግብርኒ ሚኒስቴሩ ንባር ቶኬማ:: 2017/18 ምርቱ ዝቤንስ 24 ሚሊዬን ኩንታል ኽብፂውሳ ማዳባሬ ዲግስጝስ አኬድስታማ ናካዳ 5 ትኩሚ 6 ሚሊዬን ኩንታል አጌርሾ ቱጝኪላ ጌሌፅስታ::
ናካዳ ይቶፒያስ ፋይፃውሳ ኽብፂውሳ ማዳባሬ አጌርሾ እንዜጝትጝፅጙ እንፅኺ ይስጙኽ ዳድስ አኮሜችስታማጊ ጌርክ ቺፋኪላ 150 ሻይ ኩንታል ባርኾቼዴስ ቱዋማጊ አኽⶓኪላ ዲጊስ ካስጙኽ እዝብ ወኬልስታንትካው ኩስጚ ጝናዳ ጁኽስ ካሲስ ተክላይ ሚኒስትር አብይ አህመድ ጊሊፄ እይካ::
አጌራኻ ቱኽሳ ኽብፂውሳ ማዳባሬ ዴሜካ አሬሳቻንቲ ወክትስ ታንባማ ቴኬምስታንታ ያኻታ ምንግስት አላፍቶ ካፃማ እንፃኽስትጝ ቱስቴ:: እምፕልታቕኪላ ያኹኒ ኽብፂውሳ ማዳባሬ አሬሳቻንቲስ ታምፅጝ ፖለቲካሊ ታምትጚ እላቲው አኽⶓ አምናማ ዳድዳ ፅንጋኻ ያኻንኩ ቤንካዋጊ ኩስጝፅጝስ ግባት ኔፃኔትስ አሬሳቻንቲስ ታንባታ ፄውጝዳ ታምቦጊ ፊትጝጝ ቱስቴ:: ማዳባሬ አሬሳቻንቲስ ታምፅጝ ችሪ ያኻውላስ ይወትስ ዝኩጙ ጉዳያኽ::