ኩዋንቲ ቑንዚ

አለሚቱ የኔት

እምፕል ቲን ዌና አቒው አካላታኻዳ አንኩዋዴስ ላጚቲ ሊትራሳ ታንባው ብሪ ዝኩኽ አኽጝ አምንስቴ:: ብሪኪላ እንዳራኪ ጌጌዋንታ ጋቲታ ብሪው ባይሾስ እንዜጝትጝጛው ያኹስ ሰኮንድካስ ልቕልቕቲ ቲሬኒ ኩፅኒ ፄፄርሾ ኪስስትጝስ አሬጌ:: እንስኪላ ምክንያታ ያኻማ ቶኬምስታው ብሪ ሌኽዴስ 45 ታፋ ያኻው ፄፄር፣ ሌኽዴስ 55 ታፋ ያኻው ዴሜካ አኹ አኽⶓኪላ ማይቴንካ ቶኬማና::

ብሪው አሬግጝ እስቱስኪላ አካላታኻዳ እምፕልስታ እንዴስ ጃላ ያኹኽ ብሬ ዙርፃንቲ አኹኪ ቬናኻዳ ብሪው አሬግጝ ኬሴትስትጝ ንጝ አኽⶓ ቲንኩ ውማይቴንካ ጌሌፃና:: ሚንችትስ ዴሜካ ልኩ ዙራሙሪዳ ኬሴትስታው አኽጝኪላ ድኹስቴ:: እንስኪላ ምክንያትታ ድኹስታንኩ ሊሊትጙንኩ ቲኑ ችግርካ፣ ሊጊሲሚ ጊዝስ ልቕልቕቴ ፄውⶓ ባይጝ አኹኪ ሊጊሲሚ ጊዝስ ቲሪጝ /እንጅኩጝ/ አኽⶓኪላ ውማይቴንካ ጉሻና:: ኪቢርስቲንኻ አንቬቫንትካ ናካስ አንቤብፅጝስ ፋኑኽኪላ ብሪ አሬግⶓ ካንትኹስ አውጚ ሬዲዩንሊ ዶ/ር ደሳለኝ አዛዥሊ ስልኪስ ካስጙኽሳ ንባሮኽ::

ብሪ አሬግጝ ንጝ ብሪው ባይዳ ብሪ ኹራኒ አኹኪ አሬጋኒ ይንታው ቑንዚ አኽⶓ ዶ/ር ደሳለኝ ጌሌፅካ:: ብሪው አሬግጝስኪላ ጛሬ ካሉኽ ጉሽፅካ ዝኩⶓ ቶኬምካ:: ጉዝጋኻሳ ቔድፅካማ አኬምስቱንኩ አቕ፣ ማልጜ ቑንዳስትካማ አይሲአኻዳ ኹሩንኩ፣ መኪናው ኬሴት ጌቴሙክ፣ ስትሮክስ ታስስትካማ ኹሩንኩ፣ አክቲቭ ካንሰር ዝኩክ ማልጜ ብሪው አሬግጙ ቑንዚስ ፂኪስታንኩ አኽⶓ ዶ/ር ደሳለኝ እርዳትፅካ:: እሊውሾስ ዴሜካ ዜርስ ይንታው ሼውስታ እንኩላሊቲው ቑንዚስ ፂኪስቱንኩ አቕ ብሪ አሬግጙ ቑንዚስ እሜ ፂኪስትጙ ድል እሳን ጌቴማኩ አኽⶓኪላ ቶኬምካ:: ሊሊትጙንኩ ኢንፌክሽን ዝኩክ፣ ሼርካስታ ካሜኑንኩ ቹትካ፣ ሊጊሲሜ ጊዞ እንጅኩካማ እንፃኽስታንኩ አቕ፣ ሲጃራዋ ትሽፃንኩ፣ ክምንቱሳ ካላካልጝፄ ፒል እስታውሳ ቴኬምስታንኩ፣ ኮሊስትሮል ሚንቻኩ አቕስታ ሽኩዋር ቑንዛ ዝኩክ አቕጊ እንቑንዚስ ፂኪስትጝስ ካላንኩ አኽⶓኪላ ጌሌፅካ::

ብሪ አሬግጝስ ካላኩ አካልኩ ቤንካኪላ ወሴንስቱንኩ አኽⶓስታ እኒጛዴስኪላ ኩክሪኒ ልኩ ቤንዳስታ ኹፕኹፕፃኻዳ እሳንስ ኬሴትስታው አካሉ ቤን አኽⶓ ዶ/ር ደሳለኝ ቶኬምካ::

ዋሺኒኪ አካሉ ቤንዳ ብሪው አሬግጝ ኬሴትስታው አኽⶓ ጉሽካማ አንኩሊዳ ብሪ አሬጋታፄዋንኩ ምክንያትካዴስ ሜቴንዴስ ጃላ ቼኔክስትጝ አኹኪ ብሪ ሺንካ ዴሜካኒ ያኹስ እሊው ሼውዳ ብሪ ኹራኒ ሼውዴስ ብሪ አንኩሊሾ ካሳኒ ችግሮ ፌቴራው አኽⶓስታ ስትሮኮ ኮንኩሳ ፌቴራው አኽጝስ አንኩላኻዳ ብሪ አሬጋታ ፄውጝስ ካሌ::

ልኩ ድሚትጝ አኹኪ ፃርክትጝ ልኩ እንኩዊንትጝስ ፄጌርጙንኩ ምልኻትካ አኽጝስ ካላና:: እን ቑንዚ ምልኻቶ ካንትፃውላ እጂጙ ፅኹር ዝኩኽ አኽⶓ ውማይቴንካ ቶኬማና:: ዶ/ር ደሳለኝ ኑኑውስታጊ ብሪ አሬግጙ ቑንዚው ምልኻትካዋ ልኩ እንቓርጝ፣ ልኩ ቑንዚ፣ ፊኹዌ ቼጌርስትጝ፣ ሴንዶ ቑንዳፅጝ፣ እውርፅጝስታ ብሪ እልቕቲ እውራው ብስቒ ዝኩጝ፣ ጛሬ ዙርፅጝጊ ምልኻትካኽ::

ብሪ አሬግጙሳ ቑንዜ አኬምስትጝስ ካሊስታው አኽⶓ ውማይቴንካ ጌሌፃና እኒ ምልኻትካዋ ካንቱንታኪላ አቕ እሜ እክምኒው ኾትሾ ካስጝስ ቱስታው አኽⶓስታ ጊዝ ካሳኒ ኩፅኒ ኬፍንኹ ቲኑ ችግርሾጊ ካስጝስ ካላው አኽጝስ ዲጊዳ ኬፍንኹ ችግር ጌቴማውላ ኬሽጝስ ካሊስታው አኽⶓኪላ ዶ/ር ደሳለኝ እርዳትፅካ::

ብሪ አሬግጙ ምልኻት ካንትስቱታ እምቢት ንጝስ ቲኑ ኾተሾ ካስጝ ቱስታው አኽⶓስታ ሊሊትጙንኩ ምርማሪኩ አይኔትካ ዝኩⶓስታ ቑንዚ አግስቱታ ኪላ ብሪ እንፁታታ እይስታው እጁ ዝኩⶓ ዶ/ር ደሳለኝ ጌሌፅካ:: እንሳ ቑንዜ አልትራሳውንድስ፣ ሲቲስካንስ፣ ሴንድራጅስታ ኢኮ እስታ እሊኩጊ ምርማሪኩ አይኔትካ ዝኩጝስ ሳሴርስ ቑንዜ ማላማ አኬምስትጝስ ካሊስታው አኽⶓኪላ ቶኬምካ::

እክምኒ ካንትስታኒኪላ እጆ ቴኬምስትጝዴስ ፍናስታ ፋሌንጋ እስታማ እይስታው አኽⶓስታ እጆ ቴኬምስትናውላስ እናው ምሳሊስ ቼር ክስልኮ እንፄውጝስ ብሪ ጃላሾ ትንክፍስታማ ካሳታ ኩክሪዳ ኹራቲታ ፄውጚያኽ:: ይዝኩዊ ቑንዚስ ቑንዳስትካማኪ ያኻ ቔድፅካማ አኬምስቱንኩ አቕ እሜ እርዳቴ ፄውጝስ ልቕልቕቴ ሞኬራንታ ፄውጝስ ቑንዚስ ፂኪስታቲንታ ፄውጝኪላ ፋይፃንቲ አኽⶓ ጉሽካ:: እጆ ቴኬምስትጝስ ካላካልጝጚስ ካሊስታው ዴሜካ ሄፓሪንስታ ዋሻሪን እስታው እጁ ዝኮ:: እንሳ እጆ ቴኬምስትጝስ ካላካልጝጝስ ካሊስታው አኽⶓኪላ ቶኬምካ::

ብሪ አሬጉጙሳ ቑንዜ ማራማርጝስኪላ ቑንዚ ጌቴምኹ አካሉ ቤንታጊ ምርማሪው አይኔትኪላ ሊሊትጛው አኽⶓ ዶ/ር ደሳለኝ እርዳትፅካ:: ሼውዳ ፌቴርስትኹ ዲብ ዝኩኒጊ ኢኮኢሲጂስ ማራማርጝስ ካሊስቴ:: ሴንዱሳ ኤክስሬዋስታ ሲቲስካኖ፣ ኤም አረ አይ እናኩሳ ቴኬምስትናው ዴሜካ ሴንድዳ፣ ኹፕኹፕፂው ዙራሙሪዳ ፌቴርስትኹሳ ካንትጝስ አዜዝስታንኩ ምርማሪው አይኔትካ አኽⶓኪላ ጉሽካ::

እሊው አንጂ ዮግራፊ እስታው ዴሜካ ልኩዳኪ ያኻ ኹፕኹፕፂዳ እንቲታኪ ውላስጊ ቴኬምስትናው ምርማሪ አኽⶓኪላ እርዳትፅካ:: ወሴንስቱንኩ ምርማርካ ይቢቻ ያኻኒስ ሚንችካ ኩፅኒ ውላዋጊ ማራማርጝስ ካሊፃንኩ አኽⶓኪላ ዶ/ር ደሳለኝ ጌሌፅካ::

ብሪ አሬጝጙ ቑንዚ ኩዋንቲ ቑንዚ አኽⶓስታ ፅናት ቶኬማውስታጊ አሜሪካዳኪላ ሊኽሻያዴስ 80ሻያሳኺታ አቖ አሜትስ ኩዋው አኽጝስ ቤዴራማ ካላካልጝጝ ቱስታው አኽⶓ ዶ/ር ደሳለኝ እርዳትፅካ::