እላፎ ፂፂፊስቲ

አለሚቱ የኔት

ላሊት ፓቲዳር እስቴ 18 አሚቲ ህንዳዊ ዎታቲያኽ:: ወታቱ 95 ታፋ ያኻው እላፍ ፂፂፊስ ሾፌንስትኹ አሌሙ ፂፂፊስቲ እላፍ ዌናኪላ እስታታ ፄዋ::

ላሊት ክቻክቺ ዝቤንዴስ ጄሜራማ አሌሙ ዙሪዳ ሜዜጌብስቱንኩ 50 ምስልካ አኼንካ ክቻዳኽ:: እን አኺኒ ዴሜካ ቢሊዩንካዴስ እምፕላኒ ጌቴማው አኽጝኪላ ዙሚስቴ::

ሚንችካ አቕ አግፃኒስኪላ ኪንኪጝስ ጅፊስትካማ ካንታንኩ፣ እምፕልካ እምፕልካኪላ ጉዳ ጋቲንኩ ካንትካዋ እያንኩ አኽⶓኪላ ዙሜ::

ክንቲ ጝናዳ ዝኩንኩ እሊኩ ስራስሪ ጂሚሪ ጊዝያስ ካንታኒስ ጅፊስቱና::ጚኪላ እንታኑስ ዙማ፡- “ጅፊስታኒስ እሺና፣ ያኼስጉ እያዋ ካንትⶓ ጄሜራኒስስታ ዙሚትጝፃኒስ ጛጂዴስ ሊሊታ ጋቲኻ አኽⶓ እርዳትስቱና:: ያኻማኪላ ይው ሊሊቲ ዲብ ሴግቲኒ አካልዳኽ፣ አኽቲኔ ኩፅኒ ሊሊታ ጋቲኻኽ::” ኑስኪላ ጌሌፃ::

አሌሙሳ ትኩቶ ጉሱኽ ላሊት ዴስስታያሱ አኺኒስ እላፍ ፂፂፊስቲ አኽጝስ አሌሙሳ ሪከርዶ እሚጝስ ካላ:: እን ህንዳዊ ወታት ዌርዎልፍ ሲንድሮም እስታማ እቑስታው ቑንዚስ እላፉ ፍንት 90 ታፋ ያኻው ፂፂፊስ ሾፌንስቱኺያኽ::

ፂፂፊውሳ ልግስኔ ሲፍፃው ሀይፐርትርኮሲስ እሊው ስምስ ዌርዎልፍ ሲንድሮም እስታማ እቑስታው ዴስስታያሱ ቑንዚ አሌምዳ ሚንቾውላ ኬሴትስታቲው ያኹስ ላሊቶ ሊሊቲ አቒ ናው ስም እይስታታ ፄዋ::

ላሊቱ አኺኒ ዘረመሉ ዛቢትጚስ፣ ካሜንስትጝዴስ ቤዴራ ዜርስ ፌያ ፌይጛው አኹኪ ካሜንስትኹ ጊዝዴስ ፋሌንጋ እጁስስታ እሊኩ ቲንኩ አኼንካስ ኬሴትስትጝስ ካላው አኽⶓ ቲንኩ ውማይቴንካ ዙማና::

ባይላዊ እቑዊስ “ዌርዎልፍ ሲንድሮም” ንጝ ጚጛርትጛሳ ቲኹሪሾ ኪስኹ ንጝታኽ:: እላፍ ፂፂፊስ ሾፌንስትጝዴስ ጁኽሳ ማቤርአቕ ሴየሙኑጃጊ አቒ ጄራ ጚጛርትጛሳ ቲኹሪሾ ኪስኹ ንጝ ኩፅኒ ጋቲዊያኽ::

ንባሮ አግፅንኹኪ ኢቢሲዴስያኽ