ታፎ ቤቴርንስ

ዋሺኒኪ ፍትሬትዴስ ጃላ አቒያስ ሰላም እንዳርማዴስኪ ጃላኽ:: ሰላም አቒያስ እልውኒው ስርያኽ:: እልውኒስ ፋይፃንታ ያኹንኩ ዲብካጊ ዳላው አኺኒስ ዋኽትጜካማ ዳላዳልጚ ፌቴርስታኒ ሰላም እላ ያኹኒዴሰ ኬንቱዋኽ:: ኬችካው፣ ማቤር አቑ ኬፍኑስኪ አጌርካ ክቻዳ ፌቴርስታው ጋቻ፣ ቱትጜ አቲⶓስታ ጊዌ ድፃማ ሰላሞ አግጝስ ልኻዋ ዊድፃው ቡንካ ካስጛውኪላ ሰላሙ ዋይሚው ቴሜን ጋሚስታቲው ማልጜ ኬፍንኹ አኽጝስያኽ::

አማኻሪ ክልልዳ ፌቴርስትኹ ጋቻ ኪላ ላጛ አሜታሳ ቼፍፅጝስ ልቓ አርፍካ ይጉዌካ:: እን ጋቻስ አዊ ብሄረሰቡ ቺፅጝፂዳኪላ ሰላም ዳንጉዊትጛማ እምፕልዳ ሌጌሱንኩ ማቬር አቕ ጛስጛዋ ጋችትጛንታ ፄውስትጝስ ሚንችካው ይወት ድሳ፣ አብት ንብሬት ዌዴማ፣ አቕ ካሜንካማ አጌሉኑ ዙራሙሪዴስ ፌኔኬልጜካማ አሬሴካማ አፔሳንኩ፣ እሊኩስ እርዳታኒስ እሺንኩ አጌር አቕ እምፕልታ ዝኩዋኒስ እሺንኩ ሙሬ ባይፅካማ ስዴታ ፌካ::

ትብ ታፋሳ ካንትጝስ ቼጌርስታኒስ ሼውና:: ካሜናንታ ቹዋ ጚኾሳ ባታታ ስዴታ ፊጝስ ናቕቴታ ካሜንታውሳ እንጉፄ ጝኖ አቲጝስ ካናኻፂዳ ካሜንጝስ ጊዲድስቴ:: ሹማጌልካ እንጉታኑሳ አቲጝስ ብሽታኑ ግባኻዳ ሊጊሲሜ ጊዞ ናቒካማ ፌይፅካ:: እንጊ ሰላም አቲጝ ምክንያታስ ኬሴትስትኹ ችግር ያኽ::

ዲጊዴስ ናቴ ኩፅኒ ብሄረሰቡ ቺፅጝፂዳ ሰላም ቼሜትጙኽ ዙራሙርካዳ ፌኔኬልጜካማ እጂንኩ አጌር አቕ እሺኑ ሙሪሾ ዙራንታ ፄውስታማጊያኽ:: ሙሪሾ ዙራኒስ ኩፅኒ ቤዴራ ባይካማ ካሱኑሳ አብቶስታ ንበሬቶ አግፅጝስ ካሊስታያ:: ድኬ ድፄ ፌፄማንኩ ጛርት አቕስ ውላጊ ድኻማ ናኺሴ ብቴ ይቪቼ አግፄካ:: እኒ ሙሪሾ ዙሩንኩ አቕ ልቓስኪላ ያኹኒ ፋይፃውሳጊ ዋኽትጝፅጝስኪላ ዙራሙሪው ካሜንስታንትካ፣ ባኮ ፄዋንትካስታ ምንግስት እርዳቴ ፄዋማ ቲሪትጛንታ ፄውጙ ቴግባር ካስጛማጊያኽ:: ልቓስኪላ ያኹኒ ዝኩፂ ጝንኪላ ግቢትስትⶓ ጄሜራ:: ማቤራዊውስታ ኢኮኖሚው ዜርፍስኪላ ካሊስታውጊ እርዳቲ ፄውስታማጊያኽ:: ያኼስጉ ዋኽስ ዋኾ ሙሪሾ ዙርካያስኩኪላ ዝኩንኩ አኽጝስ ሙሪሾ ዙራንታ ፄውጙ ቴግባር ይሳማ ሲፍጝ ቱስቴ::

ሙሪሾ ዙሩንኩሳ ዴሜካ ይንታው ወርፍ ችኽ አኽጝስ ሊሊትጙንኩ ፌያፌይጛንትካ ቑንዝካስ ፂኪሰታቲንታኪላ ካሊስታው አክምስጊ እርዳቴ ፄውጝ ፋይፄ:: እንጉፂ እላቲኩስኪላ አግፃንታ ፄውጙሳ አኺኔ ፌቴርጝ ቱስቴ:: ሙሪሾ ዙሩንኩሳ አቒ ጄራ ያኹኽጊ ዝኩኽዴስ ይቪቺ ያኻውላ እላቲውዴስኪላ ያኹኒ ቤንጝፃማ እርዳትጝ ፋይፃንቲያኽ:: ጝን እላቲኩዴስ ጝን ዝኩዋማ ምርክትጝ ኬሻው አኽጝስ ውላጊ ታፎ ቤቴርጝኪላ ቱስቴ::