ፌኔኬልጛሺንኩ እምፕልታቕስ እርዳቲ ፄውስታማጊ ጋቲዊያኽ እስትኾ

ታደለ አጋጄ

ፌይኹ አሜትዳ ኬሴትስታሺኹ ጋቻ ምክንያታስ ፌኔኬልጛሺንኩ እምፕልትቕ እሺኑ ዙራሙሪሾ ዙሩኒዴስ ፋሌንጋ እርዳቲ እይስታማጊ ጋቲዊያኽ ናኒሰ ዙሙና::

አማኻሪ ክልልዳ ፌቴርስትኹ ጋቻው ምክንያታስ ሊሊቱጙንኩ ዙራሙርካዴስ እምፕልታቕ ፌኔኬልጜካማ እጂንኩ ያኹስ ዲጊስ ምንግስት ፌኔኬልጛንትካዋ እሺኑ ዙራሙሪሾ ዙራንታ ፄውጝስ ቲሪትጝፅጙሳ እንፅኼ እሳንስ አኮሜቻማጊያኽ::

ፌይኹ አሜትዳ አዮ ጉዋጉሲ ወረዳ አምቢሊ ኬቤሊው ዙራሙሪዴስ ሚንችካ ፌኔኬልጜካማ ባስኹ ችግራኻዳ ፌይፁኒዴስ ፋሌንጋ እሺኑሾ ዙርካማ ዝኩዊኔ ጉሴካማጊያኽ::

አማኻሪ ሚዲያ ኮርፖሬሽን አውጚው ቴሌቭጅን ቤናስ ካንቴ ታምፁንኩ አምቢሊ ኬቤሊው ዝኩዋንትካ ምንግስት ፌኔኬልጛንትካስ ፄዋማጊ ዝኩኽ እርዳቲ ማልጛ ዜሬቕቲኒ አኽⶓ ዙሜካ:: ፌይኹ አሜትዳ እምፕልታቕዳ ሚንች ጉዳት ታምብⶓ ቶኬሙንኩ ዝኩዋንትካ ምንግስት ፌኔኬልጜንትካዋ እምቢታማ እሺኑ ሙሪሾ ዙራንታ ፄውጝስ ቲሪትጝፅጝስ ካሊⶓ ዲብስካ:: ሊሊትጙንኩ ኾትካ ፌኔኬልጛንትካስ ፄዋኑ እርዳቲ አምፕልታቕ ችግሮ ቲሪትጜካማ ፌያንታ ካሊፅኹ አኽⶓ ጉሽካ:: ፌኔኬልጛሺኑ ዙራሙሪሾ ዙሩኒዴስ ፋሌንጋ ፌሬስኹሳ ጝኖ ግቢትጝስ፣ እርሼ አሬስጝስስታ አሊኩሳ እንፅኽካዋ አኮሜችጝስ እንፃኽስቴካማጊ አኽⶓ ቶኬምካ::

ናካዳ ጉድ ሰላሙ አኺኒ ፌቴርስትⶓ ቶኬሙንኩ ዝኩዋንትካ ችግር ካቭስ ፌቴርስታቲታ ጛውሳ ታምቦ ፊትጜካማጊ አኽⶓ ዙሜካ::

አምቢሊ ኬቴምዳ ሌግስ ድጙስቱንኩ ጝንካ ግቢትስቴካማጊ ጋቲው አኽⶓ ዙሙንኩ ፌኔኬልጛንትካ ኮርኮሩ ሚስማርስታ እሊኩ ጝኖ ግቢትጝስ ፋይፃንኩ ሜሳርካ እምፕልታቕስ ዲጋያንታ ካሲካ:: አምቢሊ ኬቴምዴስ ሴጋ ዝኩዋንኩ እሊኩ ኬቤልካ ናካኪላ ያኹኒ ሰላሙ ችግር ዝኩኽ አኽጝስ አምፕልታቖ ዙርፃማ ቲሪትጝፅጝስ ትኩቶ ፋያው እንፅኺ አኽⶓ ዲብስካ::

እምፕልታቕ ሚንቺትስ ግብርኒው እንፅኺስ ቺትጛንኩ አኽጝስኪላ ጉልሊ ዜሩስታ ግባት ዎክትስ አሬሳቻንትካስ ዲጋያታ ካሲካ::

አምቢሊዴስ አዚኔ እንጃቢሬ ኺስታ ዝኩኽ ዳድ ብስስታማ አግልግሎቴ እያታ ካሲንኩ እምቢሊ ኬቤሊው ዝኩዋንትካ ትራንስፖርቱ ችግርስ ቑንዳስቴንካ እክምኒዳ ካስካማ አኬምስታቲንታ ቻኒስቶ ታምፅⶓ ዙሜካ::

አጌር ሹማጌልካ እምፕልታቕ ክቻዳ ጋቻ ፌቴርስታቲታ ሊሊትጙንኩ እንፅኽካዋ አኮሜችካማጊ አኽⶓ ቶኬምካ:: ዝኩዋንትካ ዳዴኹስታ ዜሬፍጙ ዎንጄልካዋ ካላካልጝጝስ ሊሊቲ ትኩትስ እንፃኽስስታማ ዎንጄል ኔኬታማጊ አኽⶓ ጉሽካ::

አምቢሊ ኬቴምዳ ሜዳብስትኹ ፄትቲው አይል ይስጙኽሳ እንፅኼ እንፃኽስታማጊ አግስታው አኽⶓ ቶኬምካ:: ሊሊትጙንኩ ዎንጄልካ ፌፄምስታቲንታ ፄትቲው አይል ኬፍቲኔ ፍሼ ፊትጛማጊ አኽⶓ ዲብስካ::

አዮ ጉዋጉሲ ወረዳው ቹዋ ቺፅጝፃንቲ አቶ ገበየሁ በሪሁን ፌይኹ አሜትዳ አምቢሊ ዙራሙሪዳ ኬሴትስትሺኹ ጋቻው ምክንያቲስ እምፕልታቕዳ ሚንችካ ችግርካ ታምብⶓ ቶኬምካ:: ፌኔኬልጛሺንኩ ጛርት አቖ ምንግስት ዙርፃማ ቲሪትጛንታ ፄውጝስ ሚንቾ እንፅኼ አኮሜችⶓ ጌሌፅካ::

ብሄረሰብ ቺፅጝፂው አችስ ቲሪትጙኽ ፌኔኬልጛንትካዋ ዙርፃማ ቲሪትጝፃንቲ ኮሚቴ ክልሊ፣ ዞንሊስታ ወረዳሊ እምፕልትስ እንፃኽስትኹ እንፅኺስ ሚንችካ ፌኔኬልጛሺንኩ እምፕልታቕ እሺኑ ዙራሙሪሾ ዙርካማ ጝኖ ግቢቴካማ ዝኩዊኔ ጉሴካማጊ አኽⶓ እርዳትፅካ::

አምቢሊዴስ- አዚኔ- እንጃቢሬኺስታ ዝኩኽ ዳዱ ልምትጝዳ እምፕልታቕ ጉሻኑ ካሲስ ዶንግቱንኩ አይልካ አድጉዋያ ዙሪሙሪዳ ልቕልቕቴ ፄዋኑ አኽጝስ ዳድ ልምታማ አግስታው አኽⶓ ጉሽካ::

ልምትኹ ዳድ ብስስታታ እምፕልታቕ ጛውሳ ታምቦ ፊትጜካማ ትራንስፖርቱ አግልግሎቲ ጄሜርስታታ ፄውጝ ቱስታው አኽⶓ ጉሽካ::

ፌኔኬልጛሺንኩ ዎጌንካስ ፌይኹ አሜትዳ ቲሪትጚኒምባ ኺስታ ዳላው አክምስ እርዳቲ እይስታሺኹ አኽⶓ ዙሙንኩ ቹዋ ቺፅጝፃንቲ እርሺውሳ እንፅኼ ጄማሩኒዴስ ፋሌንጋ ኩፅኒ ውላስጊ ያኻውላስ አክም እላቲንኩስ ይቪችካስ እርዳቲ አይስታው አኽⶓ ጌሌፅካ:: ኹሉ ቺፋ እርዳቲስ ዝኩጝስ ካሊስታቲው አኽⶓኪላ እርዳትፅካ::

አሬሳቻንትካ ግብርኒው ግባት ዲጋያታ ንካማ ካሲኑ ካሲስኪላ አቶ ገበየሁ ፋይስታው  ግባት አሬሳቻንትካስ ዲግⶓ ጌሌፅካ::

አምቢሊዳስታ ዙራሙሪዳ ካቭሰ ችግር ፌቴርስታቲታ እምፕልታቕ አችትጜካማ ሮንዶ ማንዲጝስ፣ ጛ ዙራሙራሱሳ ሰላሞ ሴፌንፅጝ ፋይፃው አኽⶓ ዙሜካ::