አለሚቱ የኔት
ዲጂታላይዜሽኑሳ እንፃኽስትጜ ቴኬምስትጝ ቤዴራ ማዘጋጂ ጝንካዳ እሺኹሳ አገልግሎቴ እይጙሳ ችግሮ ኽያይኩ አኽⶓ ቻግኒ ኬቴሙ ዝኩዋንትካ ዙሙና::
ዝቤናዊ ዲጂታል ቴክኖሎጂ ንባሮ እሚጝስስታ አገልግሎቴ እይጝስ ኬርቱንኩ እንፃኽስትጝካዋ ካላካልጛውስታ አገልግሎቴ እይጚዳ ካንትስታንኩ ችግርካዋ ኽያው አኽጝ አምንስታውያኽ:: ቻግኒ ኬቴሙ ማዘጋጂ ጝናኪላ አጌር አቕስ ኬልታፌስታ ኬርትኹ እንፃኽስትጚዴስ ኔፃ ያኹኽሳ አገልግሎቴ እይጝስ ንባርካ ዝቤናዊ ዲጂታል ቴክኖሎጂውሳ ቴርቶ አችትጝፃማ እንፅኺሾ ቱዋ::
ቻግኒ ኬቴሙ ማዘጋጂ ጝናዳ አገልግሎቴ ፋያ አግስቱንኩ ክቻዴስ መሪጌታ ልዑል ንጋቱ ቤዴራ ማዘጋጂ ጝናዴስ አገልግሎቴ አግፅጝስ ይንቴካማ ሊጊሲሜ ሳቶ እጂንኩስታ ቱስቲስ ሌንጌድታቲንኩ እሺⶓ ዲብስካ:: ዲጊዴስ ናቴ ኩፅኒ ንባሮ ዝቤናዊ ቴክኖሎጂስ እሚንኩ አኽጝስ ክችክቺስስታ አሬኽትስ ፋያኑሳጊ አገልግሎቴ አግፄካማጊ አኽⶓኪላ ዙሜካ::
እሊው ኬቴሙ ዝኩዋንቲስታ አገልግሎቴ ፋያንቲ ዴሜካ አቶ የሱፍ ዑመር ያኻኒስ ቤዴራ እሺኹ አገልግሎቲ ፋይል ድስጝስ ካቪትጚስ ዙራዙራንታ ፄውጙ አኺኒ ሴጝⶓ ቶኬምካ:: እን እንፃኽስትጚ ናካዳ ፋዩኑ ጌርክስ ካስካማ ፋያኑሳጊ አገልግሎቴ አሬኽትስ አግፅጝስ ቼጌርስታቲንኩ አኽⶓኪላ ዲብስካ::
አገልግሎቴ አግፅጝስ ሊጊሲሜ ጊዞ ዙራዙርጝስ ጊዞስታ ግርቦ ባኬንፃኒስ እሺንኩ አኽⶓ ቶኬምካማ አገልግሎቴ አግፅጝስኪላ ጌንዜቦ እይጝስ ኬርትኹ እንፃኽስትጚሾ ቱዌካማጊ እሺⶓ ዙሜካ::
ቻግኒ ኬቴሙ ቺፅጝፂው ትክትሊ ከንቲባስታ ኬቴሙስታ ስር ልማት ፅ/ጝናሱ አላፊ አቶ ገበየሁ አልማው ጌሌፁኑውስታጊ ቤዴራ መዘጋጂጝና አገልግሎቴ ፋይካማ ይንታንኩ ዴንቤንካዋ አገልግሎቴ እይጝስስታ ንባርካዋ አችትጝፅጝስ ኬፍቲኒ ችግር ጌቴሙስ እሼ:: እሰካዌ እንፃኽስትጜ ሲፍካማ ካይዘኑ ቴርትሾ ቱኒዴስ ፋሌንጋ አገልግሎቴ ፋያ ማዘጋጂ ጝና ይንታንኩ ዴንቤንካስ አገልግሎቴ ፋየካማ ይንታኒ ኩታ ንባሮ እሚጝስ ኮምፒተርስ እምስትኹ ንባርሾ ቱዋማ ፋይሎ ፋያማ አግፅጝስ እንዳርማኪ ድርትና ጋቲታ እሜ አገልግሎቴ አግፄካማ ካሳንታ ፄዌካማጊ አኽⶓኪላ አላፊ እርዳትፅካ::
አገልግሎቲ ዝቤናዊ ዲጂታል ቴክኖሎጂስ አኽጝዴሜካ ኬርቱንኩ እንፃኽስትጝካዋስታ ፅ/ጝና ሚንችትስ ልውስታውሳ ዳዴኾ ካላካልጚስ ካሊፁክ አኽⶓኪላ ቶኬምካ::
እንሳ ዝቤናዌ ቴክኖሎጄ ቴኬምስትጝ ኬልታፌ አገልግሎቴ እይጝስ ካሊፃውስታ ንባርካው ዴክትስ ኬፍቲኒ ትክም ዝኩክ አኽⶓ ቶኬምካ:: አቶ ገበየሁ ንባርካዋ ዝቤንፅጝስ ኦንላይንስ አገልግሎቴ እይጝስስታ አሱ ንባራሳኪላ ካላካልጚስ ቲኪስታቲው ፍሺ ዝኩኽ አኽⶓኪላ እርዳትፅካ::
አዊ ብሄረሰብ ቺፅጝፂው ትክትሊ ቺፅጝፃንቲስታ ኬቴሙስታ ስርልማት ሜምሪው አላፊ አቶ አይተነው ጓዴ ጛሾስ ብሄረሰቡ ቺፅጝፂታ ንባሩስ እሚⶓስታ አገልግሎቴ እይጜ ዝቤንፅጝስ ዋልታ ወረድካዳ ዲጂታላይዜሽንስ አገልግሎቴ እይጝስ እንፃኽስትካማጊ አኽⶓ ቶኬምካ:: ልቓ ወረድካዳኪላ ዝቤናዌ ቴክኖሎጄ ቴኬምስትጝስ ኬልታፌስታ ወሬኬትዴስ ኔፃ ያኹኽሳ አገልግሎቴ እይⶓ ጄሜርⶓኪላ ጌሌፅካ::
ዲጂታላይዜሽኑ አገልግሎቲ ክርፂ ቺፅጝፂው አገልግሎቲውሳ ሚንችካ ችግርካዋ ኽያው አኽⶓ ቶኬሙንኩ ትክትሊ ቺፅጝፃንቲ እስጜ ቴክኖሎጄ ውላጊ ወረድካስታ ኬቴሙ ቺፅጝፅካዳ ቴግባራዋ ፄውጝስ ካንትስታውሳ አገልግሎቴ እይጜስታ ንባሮ እሚጙሳ ችግሮ ዊዳፊስ ኽይጝስ እንፃኽስታንኩ አኽⶓ እርዳትፅⶓ ፋና ብሮድካስት ኮርፖሬሽን ዜጌባ::